Радий Хәбиров студенттарҙы байрам менән ҡотланы

-Бөгөн Республика ВУЗдарында 100 меңдән ашыу студент белем ала. Һеҙ фәнни тикшеренеүҙәрҙә, инновация проекттары әҙерләүҙә, ирекмәндәр хәрәкәтендә, ижади конкурстарҙа, спорт ярыштарында әүҙем ҡатнашаһығыҙ. Тиҙҙән Евразия фәнни-мәғариф үҙәгенең ВУЗ-ара кампусы ишектәрен аса. Башҡортостандан өс юғары уҡыу йорто "Приоритет" федераль программаһында ҡатнаша. План һәм хыялдарығыҙ тормошҡа ашыр, Башҡортостан һәм Рәсәй үҫешенә ҙур өлөш индереүегеҙгә ышаныс белдерәм, - ти Радий Хәбиров.

Рәсәй президентын һайлауҙа видеокүҙәтеү илдең бөтә төбәктәрендә ойошторола

Был турала Үҙәк һайлау комиссияһы рәйесе урынбаҫары Николай Булаев белдерҙе. Рәсәйҙә президент 6 йылға һайлана. Кандидаттар өсөн өс көн эсендә тауыш бирергә мөмкин. Һайлау 15, 16 һәм 17 мартта үтә.

Башҡортостан һәм Ҡаҙағстан хеҙмәттәшлек юлдарын барлай

"Ҡаҙағстан Башҡортостандың төп иҡтисади партнерҙарының береһе. Төбәктәр араһында бәйләнештәрҙе киңәйтеү өсөн яҡшы мөмкинлектәр бар”. Республика Башлығы Радий Хәбиров Ҡаҙағстанға эш сәфәре барышында шулай тип белдерҙе. Ике-өс йылда Ҡаҙағстан менән тауар әйләнешен миллиард долларға еткереү маҡсаты бар.

Ҡаҙағстанда Башҡортостан ВУЗдарының береһе филиалы асылыуы көтөлә

Республика Башлығы Радий Хәбиров шулай тип белдерҙе. - Өфө дәүләт нефть-техник университеты, йә Өфө дәүләт фән һәм технологиялар университеты була. Астана хәл итә, шунан һуң ҡарар ҡабул ителәсәк. Беҙҙең республика университеттарына Ҡаҙағстандан бер нисә йөҙ кеше белем ала, тине Радий Хәбиров. Башҡортостан делегацияһы Ҡаҙағстанға рәсми сәфәр менән барҙы.

Башҡортостанда быйыл урман янғындары менән көрәш планы билдәле булды

4 миллион гектар биләмә һауанан күҙәтелә. 1 миллион 600 мең гектарҙа ғәҙәти патрулдәр ойошторола. Шулай уҡ урман янғыны хәүефе ҙур булған урындарҙа видеокамералар урынлаштырылған. Улар тәүлек әйләнәһенә эшләй. Быйыл 39 миллион һумға 7 техника алыу планлаштырыла.

"Хеҙмәт етештереүсәнлеге" милли проектында ҡатнашыусылар һаны артҡан

Республика Хөкүмәтенән хәбәр итеүҙәренсә, әле шундай 165 предприятие бар. Уларҙың өс меңдән ашыу хеҙмәткәре етештереүҙе яҡшыртыу буйынса уҡыу үткән. Милли проект Владимир Путин ҡушыуы буйынса ғәмәлгә ашырыла. Рәсәй хеҙмәт етештереүсәнлеген йыл һайын 5 процентҡа арттырып барыу маҡсаты ҡуйылған.

Ирәмәл Рәсәйҙәге иң матур тауҙар исемлегенә индерелде

Туристик сервистарҙың береһе халыҡ фекерен белешкән. Унда 2 меңдән ашыу кеше ҡатнашҡан. Рейтингта беренсе һәм икенсе урындарға Кавказдағы Эльбрус һәм Ахун тауҙары ҡуйылған. Артабан Алтайҙағы Белуха, Кавказдағы Казбек һәм Фишт, Себерҙәге Саян тауҙары күрһәтелгән. Башҡортостанда Көньяҡ Уралдағы–Ирәмәл түбәһе 7-се урында килә. Әйткәндәй, яңы йыл каникулында “Ирәмәл” тәбиғәт паркында 1 мең 500-ҙән ашыу турист булған.

Башҡортостанда эҫе һыу иҫәпләгестәре тикшерелә

Торлаҡ-коммуналь хужалыҡ министрлығынан белдереүҙәренсә, “БашРТС” компанияһы белгестәре йорттар буйлап йөрөй. Тикшереү ваҡытын ойошманың сайтына инеп ҡарарға була. Белгестәр эҫе һыу иҫәпләгес торошон баһалай һәм күрһәткестәрҙе яҙып ала. Бының өсөн аҡса алынмай.

Ейәнсура районы халҡы урындағы башланғыстарҙы хуплау программаһында әүҙем ҡатнаша

Ейәнсура районы халҡы республикала быйыл да тәүгеләрҙән булып урындағы башланғыстарҙы хуплау программаһына ҡушылды. Һуңғы ун йылда райондың төрлө ауыл биләмәләрендә был программа буйынса күп эштәр башҡарылған. Ауыл биләмәләрен төҙөкләндерелгән, төрлө төҙөлөш эштәре, халыҡ ихтыяждары өсөн ҡорамалдар һәм техник ҡулайламалар һатып алынған

Радий Хәбиров Заһир Исмәғилев исемендәге Өфө дәүләт сәнғәт институтында булды

Башҡортостан башлығы Радий Хәбиров Рәсәй студенттары көнөндә Заһир Исмәғилев исемендәге Өфө дәүләт сәнғәт институтында булды. Уҡыу йортонда республика етәксеһе уҡытыусылдар коллективы һәм студенттар менән аралашты.

Өфөлә Рәсәй студенттары көнө билдәләнде

Бөгөн - Студенттар көнө. Илдә бер нисә быуат элек барлыҡҡа килгән байрам күләмле тамашалар, күңелле саралар менән билдәләнә. Республикала 100 меңдән ашыу студент иҫәпләнә. Уларҙың һәр береһе өсөн бөгөн уҡытыусылары, уҡыу йорттары етәкселәре һәм республика башлығынан ҡотлау һүҙҙәре яңғыраны. Баш ҡала юғары белем усаҡтары студенттары өсөн дә саралар ойошторолдо.

Пенсия алды йәшендәгеләр эштән ҡыҫҡартылырға тейеш түгел

Дәүләт Йыйылышы -Ҡоролтай депутаттары Рәсәйҙең хеҙмәт кодексына төҙәтмәләр индереү тураһындағы закон проектын ҡараны.Парламент ағзалары фекеренсә, ҡартлыҡ буйынса хаҡлы ялға сығыуға биш йыл ҡалһа, хеҙмәткәрҙе эштән бушатыу дөрөҫ түгел һәм быны хоҡуҡи йәһәттән нығытыу мөһим.

Башҡортостан делегацияһы Ҡаҙағстанда урындағы предприятиелар эшмәкәрлеге менән танышты

Хеҙмәттәшлек нығый. Ҡаҙағстанға бизнес-миссия сиктәрендә Башҡортостан делегацияһы урындағы сәнәғәт, ауыл хужалығы предприятиелары эшмәкәрлеге менән танышты. Берҙәм проекттар алып барыу, инвестициялар йәлеп итеү буйынса һөйләшеүҙәр алып барылды. Уңышлы тәжрибәләрҙе Башҡортостанға күсереү бурысы ҡуйылған.

Александр Доставалов исемендәге батальон яугирҙары үҙ оҫталығын полигонда камиллаштыра

Хәрби заданиелар араһында Александр Доставалов исемендәге батальон яугирҙары үҙ оҫталығын полигонда камиллаштыра. Реаль штурмға мөмкин тиклем яҡын шарттар булдырылған. Бындай дәрестәр ваҡытында ирекмәндәр, теләһә ниндәй һауа торошонда һәм тәүлек эсендә бойороҡто үтәү өсөн, үҙ ғәмәлдәрен автоматлаштыра.

Мәшғүллек үҙәге республика халҡына бизнес асырға ярҙам итә

Адреслы социаль ярҙам һәм социаль контракт нигеҙендә һәм эшһеҙ граждандарҙың эшҡыуарлыҡ эшмәкәрлеген башлауға булышлыҡ итеү программаһы сиктәрендә 153 мең һум күләмендә бер тапҡыр бирелә торған финанс ярҙам алырға мөмкин. Социаль контракт буйынса бизнес-планға ҡарап 350 мең һумға тиклем түләнә. Бөрө ҡалаһында былпрограмма менән файҙаланған эшҡыуарҙар тураһында тулыраҡ видеояҙмала.

Республикала көн һайын янғын хәүефһеҙлеге буйынса профилактик рейдтар үтә

Ғәҙәттән тыш хәлдәр буйынса дәүләт комитетынан хәбәр итеүҙәренсә, ғинуарҙа 300-ҙән ашыу янғын теркәлгән. Утта 26 кешенең ғүмере ҡыйылған. Ведомство хеҙмәткәрҙәре халыҡ араһында аңлатыу эше алып бара, иҫкәрмә ҡағыҙҙары тарата. Белгестәр шулай уҡ йорт һәм фатирҙарға ҡуйылған мини-сиреналарҙы тикшерә. “Өйҙә һәм бинала тәмәке тартмағыҙ. Электр приборҙарының төҙөклөгөн тикшереп тороғоҙ. Өйҙән сыҡҡанда уларҙы һүндерегеҙ. Үҙ аллы яһалған электр йылытҡыстарҙы ҡулланмағыҙ”, - тип кәңәш итә ҡотҡарыусылар.

14 февралдә Советтар Союзы Геройы Таһир Күсимовтың тыуыуына 115 йыл тула

Ошо уңайҙан Республика милли музейында батырға арналған күргәҙмә асыла. Унда генералдың хәрби юлы һәм тормошо менән танышырға була. Шулай уҡ фотоһүрәттәр, документтар һәм наградалартәҡдим ителә. Геройҙың тыуған яғы – Әбйәлил районында Таһир Күсимов музейы эшләй, бюст асылған. Өфөлә Еңеү паркында һәйкәл ҡуйылған. “Аҡбуҙат” ипподромы уның исемен йөрөтә. Таһир Күсимов исемендәге батальон махсус хәрби операцияла ҡатнаша.

Мәскәүҙә Башҡортостан мәғарифы аҙналығы үтә

“Рәсәй” халыҡ-ара күргәҙмәһендә республиканың белем усаҡтары менән танышырға, оҫталыҡ дәрестәрендә ҡатнашырға була. Аҙналыҡ 30 ғинуарға тиклем дауам итә. Һәр көн айырым темаға арнала. Бөгөн Башҡортостан колледждары тәжрибә менән уртаҡлаша, һөнәри ҡеүәтен һәм асыштарын күрһәтә. 27 ғинуарҙа Туған телдәр көнө була, 28 ғинуар “Ижад ит. Асыштар яһа” тигән атама аҫтында уҙа.

Республикала яугирҙәр һәм уларҙың ғаиләләре белгестәр менән осраша ала

“Ярҙам поезы” күсмә ҡабул итеү уҙғара. Ғинуарҙа граждандар менән осрашыу Нефтекама һәм Дүртөйлө ҡалаларында үтте. Министрлыҡ һәм ведомство хеҙмәткәрҙәре документтар юллау, медицина хеҙмәте һәм социаль ярҙам сараларына бәйле һорауҙарға яуап бирә. Поездың киләһе туҡталышы бөгөн Борай районы үҙәгендә була. Махсус хәрби операцияла ҡатнашҡандар шулай уҡ “Ватанды һаҡлаусылар” дәүләт фондының төбәк филиалына мөрәжәғәт итә ала. Ул Өфөнөң Минһажев урамындағы 107-се йортта урынлашҡан. Үҙәк көн һайын иртәнге сәғәт 9-ҙан киске 6-ға тиклем эшләй. Бәйләнеш телефоны: 8 (347) 268-01-02.

Рәсәйҙә 16 йәшкә тиклем баланы яңғыҙ тәрбиәләүселәрҙе эштән ебәреү тыйыла

Дума депутаттары Хеҙмәт кодексына төҙәтмәләрҙе икенсе уҡыуҙа ҡабул итте. Документ авторҙары фекеренсә, 16 йәшкә тиклем балаларға ярҙам кәрәк, шуға уны тәрбиәләүсене эштән бушатыу ғаиләне бөтөнләй аҡсаһыҙ ҡалдырыуы мөмкин. Әле ғәмәлдә булған закон буйынса бындай норма 14 йәш менән сикләнгән.

Башҡортостан Төркмәнстанға он оҙатты

Ауыл хужалығын күҙәтеү хеҙмәтенән хәбәр итеүҙәренсә, Сибай предприятиеһы 300 тоннаға яҡын бойҙай һәм арыш продукцияһын һатҡан. Он фитосанитар контроль үткән. Башҡортостан уҙған йылда сит илдәргә 12 мең тоннанан ашыу он сығарған.