Стәрлетамаҡ ирекмәндәре ватан һаҡсыларына яңы партия гуманитар ярҙам әҙерләй

Уларҙың һәр береһе үҙенең көсөн һәм ваҡытын берләштереп, уртаҡ маҡсатҡа үҙ өлөшөн индерә. «Көмөш» йәштәге ирекмәндәр яугирҙар тураһында хәстәрлек күреү өсөн, һәр буш минутын бергә үткәрә. Волонтерҙар хәрәкәтендә 100-гә яҡын кеше. Улар араһында һуғыш балалары ла бар.

Ҡоролтайҙа төҙөлөш өлкәһендә энергияны һаҡсыл ҡулланыу мәсьәләһе тикшерелде

Дәүләт Йыйылышы-Ҡоролтайҙа торлаҡ сәйәсәте һәм инфраструктура үҫеше буйынса комитет ҡарамағындағы төҙөлөш буйынса эксперт советы ултырышы үтте. Эксперттар күп фатирлы йорттарҙа яңынан тергеҙелеүсе энергия сығанаҡтарын ҡулланыуҙы һәм ҡануниәтте камиллаштырыуҙы тикшерҙе.

Мәскәүҙә республикабыҙҙан уҡырға килгән беренсе курс студенттарын бағышлау тантанаһы үтте

Сараны Рәсәй президенты ҡарамағындағы Башҡортостандың тулы хоҡуҡлы вәкиллеге ярҙамында урындағы студенттар һәм аспиранттар ассоциацияһы ойошторҙо. Кисәлә йәштәр өсөн концерт номерҙары, шул иҫәптән Мәскәүҙең «Алтын ай» башҡорт бейеүҙәре ансамбле сығыштары тәҡдим ителде.

Салауат Башҡорт дәүләт драма театры Өфө сәхнәһендә сығыш яһаны

Баш ҡала халҡы һәм ҡунаҡтары иғтибарына улар драматург Сәрүәр Суринаның «Зәйтүнә» спектаклен тәҡдим итте. Ысын хәл-ваҡиғаларға нигеҙләнгән премьера әҫәре Миәкә районынан Зәйтүнә Әлибаеваның батырлығы тураһында. Ул Бөйөк Ватан һуғышы йылдарында фашист илбаҫарҙары менән тиңһеҙ алышта Ҡалмыҡ ерендә һәләк була. Рәсми документтарҙа ул тиҫтәләрсә йыл хәбәрһеҙ юғалған тип иҫәпләнә.

Башҡорт опера һәм балет театрында «Севильский цирюльник» премьераһы буласаҡ

Башҡорт опера һәм балет театрында 20 йылдан ашыу ваҡыт эсендә тәүге тапҡыр «Севильский цирюльник» спектакле күрһәтеләсәк. Бының өсөн Мәскәүҙән тәжрибәле режиссерҙар саҡырылған. Әле театр рәссамдары һәм тегенселәре костюмдар өҫтөндә эшләй, ә артистар репетицияларҙа әүҙем ҡатнаша.

Ишембай районы Ибрай ауылында яҡташтар, бағыусылар ярҙамы менән мәсет төҙөлә

Берәүҙәр аҡсалата, икенселәр төҙөлөш материалдары, ҡул көсө менән ярҙам итә. Әле иман йорто стенаһы манара күтәрелгән.. Мәсеттең имам-хатибы Рәсим Мәһәҙиев төҙөлөштә ҡатнашҡан барлыҡ ауылдаштарына рәхмәтле булыуын билдәләне.

Башҡортостан һәм Татарстан сигендәге яңы күпер асылды

Республикалар араһында күпер. Башҡортостандың Октябрьский ҡалаһы менән Татарстан сигендә реконструкциянан һуң Ыҡ йылғаһы аша күпер асылды. Объект планлаштырылған ваҡытынан бер йыл алда сафҡа индерелде. Уны файҙаланыуға тапшырыу тантнаһында Башҡортостан башлығы Радий Хәбиров һәм Татарстан Хөкүмәте Премьер-министры Алексей Песошин ҡатнашты. Транспорт хәрәкәтенә телекүпер режимында Рәсәй хөкүмәте вице-премьеры Марат Хөснуллин старт бирҙе.

Эш сәфәре менән Радий Хәбиров Туймазы ҡалаһында булды

Төбәк етәксеһе Туймазы дәүләт юридик колледжында булып креатив индустриялар йүнәлешендә уҡытыу шарттары менән танышты. Шулай уҡ республика башлығы бишенсе ҡала мәктәбенә капиталь ремонт үткәреү һөҙөмтәһен баһаланы.

Өфө үҙәгендә Азамат Юлдашбаевтың күн оҫтаханаһы продукцияһы менән сауҙа итеү нөктәһе барлыҡҡа килде

Ассортимент башлыса ир-егеттәр өсөн тәҡдим ителгән янсыҡ, сумка, билбау кеүек әйберҙәрҙән тора. Барыһы ла милли стилдә эшләнгән. Махсус урын Башҡортостан башлығының креатив индустрия вәкилдәре менән осрашыуы һөҙөмтәһендә барлыҡҡа килгән.

Шәһит Хоҙайбирҙин исемендәге хөкүмәт премияһы лауреаттары тағы ла биш журналистҡа тулыланды

Башҡортостан Хөкүмәте тарафынан булдырылған премияларҙы тапшырыу тантанаһы бөгөн Өфөлә, Шәһит Хоҙайбирҙиндың йорт-музейында үтте.
Шәһит Хоҙайбирҙин исемендәге премия-ул юғары хөкүмәт наградаһы, журналистың талантын һәм ҡаҙаныштарын таныу. 1989 йылда Журналистар Союзы тарафынан булдырылған дәртләндереү сараһы 1996 йылдан республика статусына эйә. Республика кимәлендәге бүләккә быйыл профессиональ ҡаҙаныштары һәм ҡыйыу гражданлыҡ ҡарашы булған һәләтле журналистар лайыҡ булды.

70 йыл бергә: Туймазы районында Ғәбдрәхимовтар бәрәкәт туйын билдәләне

70 йыл бергә.Туймазы районы Кәлшәле ауылында йәшәүсе Зөбәржәт менән Мазһар Ғәбдрәхимовтар бәрәкәт туйҙарын билдәләне. Был күркәм датаны уҙған быуат уртаһынан тормош һынауҙарын бергә үткән пар балалары, ейәндәре һәм бүләләре менән бергә ҡаршы алды. Өлгөлө ғаиләнең бәхет серҙәре менән беҙҙең ижади төркөм ҡыҙыҡһынды.

Радий Хәбиров Автомобиль һәм ҡала пассажир транспорты хеҙмәткәрҙәрен һөнәри байрам менән ҡотланы

Башҡортостан башлығы Радий Хәбиров Автомобиль һәм ҡала пассажир транспорты хеҙмәткәрҙәре көнө алдынан тармаҡ эшсәндәрен һөнәри байрамдары менән ҡотланы. Тантана Хәсәйен Әхмәтов исемендәге Башҡорт дәүләт филармонияһы бинаһында үтте. Республика етәксеһе тармаҡтың төп предприятиеһы булған «Башавтотранс» йәмғиәтенең төбәктә пассажирҙар ташыуҙы ойоштороуҙа мөһим урыны биләүен билдәләне.

Башҡортостандан бер төркөм хәрбиҙәр ҡыҫҡа ваҡытлы ялдан һуң йәнә фронтҡа юлланды

Өфө- арена эргәһендәге майҙанда уларҙы оҙатыу сараһы үтте. Тыуған яҡтағы ялдан һуң махсус хәрби операция биләмәһенә китеүселәр 2022 йылда мобилизацияланған яугирҙар. Махсус хәрби операция башланғандан алып яҡташтарыбыҙҙы ялға ҡайҡанда һәм кире киткәндә оҙатыу өсөн махсус автобустар бүленә.

«Ватанды һаҡлаусылар» фонды махсус операция ветерандарын торлаҡ менән ярҙам итеүҙе дауам итә

Барыһы ла тулы тормош өсөн. «Ватанды һаҡлаусылар» фонды филиалы инвалид махсус хәрби операция ветерандарының торлаҡ шарттарын яҡшыртыуҙы дауам итә. Баймаҡ районында ла был тәңгәлдә ҙур эштәр башҡарыла.

Мәскәүҙең «Сэсэн» ижади берләшмәһен Белоруссия тамашасыһы алҡышланы

Әлфиә Агеева етәкселегендәге коллектив составында рәссамдар, шағирҙар, бейеүселәр, кондитерҙар һәм флористар сығыш яһай. Минск ҡалаһына улар «Шишмә» Халыҡ-ара татар-башҡорт йәмғиәте саҡырыуы буйынса барған. Түңәрәк өҫтәл артындағы һөйләшеүҙә яҡтар артабанғы хеҙмәттәшлек тураһында фекер алышты.

«Йылдың иң яҡшы табибы» Бөтә Рәсәй конкурсында Башҡортостандан бер юлы биш еңеүсе бүләкләнде

Тантана Мәскәүҙә үтте. Еңеүселәр араһында теш табибы Эльвира Ғәлиуллина ла бар. Иң яҡшы акушер-Сибай дауаханаһынан Алита Борискова, ә участка педиатры-Ҡариҙел районынан Эльза Лотфуллина табылһа. Иң яҡшы терапевт тип Өфө дауаханаһы табибы Флүзә Әхмәтйәнова танылған.

Республика клиник дауаханаһында анализдар диагностикаһы өсөн яңы система үҙләштерелгән

Ул конвейер рәүешендә эшләй һәм барлыҡ манипуляцияларҙы ла үҙаллы атҡара. Рәсәйҙәге тәүге комплекслы линия эше менән Башҡортостан башлығы танышты.
Автоматик ҡоролма кешене тулыһынса алыштыра алмаһа ла, эште күпкә еңеләйтә. Яһалма интеллект системаһы ҡуйылған аппарат анализдағы патологияны асыҡлап, табипҡа ебәрә ала.

Өфөнөң «Салют» реабилитация-белем биреү үҙәгендә «Ҡаршылыҡтарҙы еңеп» Бөтә Рәсәй форумы үтте

Сараға Башҡортостандың һәм илдең төрлө төбәктәренән физик мөмкинлектәре сикләнгән, әммә көслө рухлы кешеләр йыйылды. Форум сктәрендә түңәрәк өҫтәлдәр ҙә, оҫталыҡ дәрестәре лә, гала-концерт та ойошторолдо. Бөгөн ҡатнашыусылар Башҡортостан Хөкүмәте ҡарамағындағы Инвалидтар эштәре буйынса Координация Советы ултырышында ҡатнашты. Һөйләшеү Республика башлығы Радий Хәбиров рәйеслегендә үтте.

Башҡортостандың Күп функциялы үҙәге икенсе йыл рәттән Бөтә Рәсәй конкурсында еңеү яуланы

Был турала республика башлығы үҙенең социаль селтәрҙәге сәхифәһендә хәбәр итте. Башҡортостан «Иң яҡшы күп функциялы үҙәк» конкурсының өс номинацияһында беренсе урындарға лайыҡ булған. Радий Хәбиров коллективты ҡотлап, «был уңыш-күп функциялы үҙәкте камиллаштырыу буйынса алып барылған ҙур эштең законлы һөҙөмтәһе»,- тип яҙған.

Студенттар отрядтарын Башҡортостандан 10 меңдән ашыу егет һәм ҡыҙ тулыландырған

Улар колледж, юғары уҡыу йорттары һәм мәктәп уҡыусылары. Бөгөн Радий Хәбиров һәм хәрәкәт вәкилдәре ҡатнашлығында йыл йомғаҡтары барланды. Сарала республика башлығы йәйгеһен аҡса эшләргә һәм тәжрибә тупларға теләгән йәштәр, эш биреүселәр өсөн берләшмәнең мөһимлеген билдәләне.

Шәйехзада Бабич исемендәге республика дәүләт йәштәр премияһы талантлы ижадсыларға тапшырыласаҡ

Әҙәбиәт, сәнғәт һәм архитектура өлкәһендәге абруйлы премияға дәғүә итеүселәр араһында коллегаларыбыҙ-БСТ каналы хеҙмәткәрҙәре лә бар. Улар-«Мегасело» телепроектының ижади командаһы-режиссер Динара Әбдрәшитова, оператор Алмаз Нуретдинов, проекттың алып барыусыһы Анастасия Илсебаева һәм башҡорт мәҙәниәтен һәм сәнғәтен популяршлаштырыуға йүнәлтелгән махсус репортаждары өсөн «Яңылыҡтар» редакцияһы хәбәрсеһе Азат Ғәлиуллин.