Ауырғазы районы Татар Нуғаҙағы ауылында яңы спорт майҙансығы асылды

Объект «Ауыл биләмәләрен комплекслы үҫтереү» программаһы буйынса сафҡа индерелде. Заманса спорт майҙансығын төҙөүгә ауыл халҡы әүҙем ҡушылған. Меценат, «Салауат» крәҫтиән-фермер хужалығы етәксеһе лә төҙөлөшкә 1 миллион һум аҡса йүнәлткән.

Өфөлә Чайковский әҫәрҙәренә арналған ҙур концерт үтте

Республиканың төп концерт залында Дмитрий Крюков етәкселегендәге оркестр Петр Чайковский әҫәрҙәренән төҙөлгән программа менән сығыш яһаны.
Скрипка концертында Корея республикаһынан Чайковский исемендәге 17-се Халыҡ-ара конкурс еңеүсеһе Ге Хи Ким сығыш яһаны.

Радий Хәбиров пилотһыҙ осоу аппараттарына ҡаршы тороу буйынса оператив штаб ултырышын үткәрҙе

Башҡортостан башлығы Радий Хәбиров пилотһыҙ осоу аппараттарына ҡаршы тороу буйынса оператив штаб ултырышын үткәрҙе. Төбәктең көс структуралары, министрлыҡтары һәм ведомстволары, сәнәғәт предприятиелары етәкселәре нефть эшкәртеү объекттарын һөжүмдәрҙән һаҡлау буйынса өҫтәмә сараларҙы тикшерҙе.

Радий Хәбиров уҡытыусыларҙы һөнәри байрамы менән тәбрикләне

Башҡортостан башлығы Радий Хәбиров уҡытыусыларҙы һөнәри байрамы менән тәбрикләне. Байрам уңайынан төбәк етәксеһе бер төркөм хеҙмәт алдынғыларына дәүләт наградалары тапшырҙы. Тантанала мәғариф хеҙмәткәрҙәре алдында торған бурыстар билдәләнде, һөҙөмтәләр барланды.

Радий Хәбиров республика вуздарының студенттар үҙидараһы лидерҙары менән осрашты

Ике йөҙҙән ашыу йәш кеше»Патриот«паркында идара итеү күнекмәләрен үҙләштерҙе, квалификацияһын күтәрҙе, яңы белем алды. Аралашыу барышында республика етәксеһе ғорурлана алырлыҡ яҡшы һөҙөмтәләр тураһында һөйләне. Беҙҙең юғары уҡыу йорттары «Өҫтөнлөк-2030» федераль программаһында әүҙем ҡатнаша.

Ҡалтасы районында эшләүсе предприятие ярымфабрикаттар әҙерләй

Өйҙәгесә тәмле. Ҡалтасы районында эшләүсе предприятие ярымфабрикаттар әҙерләй, ҡамыр ризыҡтары бешерә. Бынан тыш, магазин һәм төрлө учреждениеларҙы таҙартылған йәшелсә менән тәьмин итә. Компанияның барлыҡ йүнәлештәрендә дөйөм алғанда 300-ҙән ашыу хеҙмәткәр эшләй. Яңыраҡ ойошма Башҡортостандың Ауыл хужалығы министрлығы субсидияһы ярҙамында заманса ҡорамалдар һатып алған.

Әбйәлил районы хакимиәтендә ярты миллиард һумдан ашыу ҡаҙна аҡсаһы маҡсатҡа ярашһыҙ тотонолған

Һуңғы өс йыл эсендә Әбйәлил районы хакимиәте бюджет кодексы һәм норматив акттарҙы боҙоп ярты миллиард һумдан ашыу ҡаҙна аҡсаларын үҙләштергән. Милек өлкәһен иҫәпкә алғанда хоҡуҡ боҙоуҙар күләме 720 миллион һумдан ашып китә. Башҡортостандың контроль-иҫәп палатаһы Әбйәлил районында уҙғарылған аудит эшмәкәрлеге һөҙөмтәләрен иғлан итте.

Башҡортостанда контракт буйынса хәрби хеҙмәткә саҡырыу әүҙем алып барыла

Көн һайын тиҫтәләгән кеше»Черемушки«шифаханаһы базаһында эшләгән «Защитник» үҙәгенә килә. Унда берҙәм тәҙрә режимында медицина комиссияһы үтергә, документтарҙы рәсмиләштерергә һәм оборона министрлығы менән контракт төҙөргә мөмкин. Контрактҡа ҡул ҡуйғанда бер тапҡыр бирелә торған түләү һәм айлыҡ эш хаҡы ҡаралған. Граждандарға хоҡуҡи һәм финанс мәсьәләләре буйынса консультациялар күрһәтелә, ваҡытлыса йәшәү урыны бирелә.

Башҡортостан командаһы дрон ярышында Волга буйы чемпионатында өсөнсө урын алды

Башҡортостан командаһы дрон буйынса Волга буйы федераль округы чемпионатының төбәк-ара ярышында өсөнсө урын яуланы. Бөгөн улар Сочи ҡалаһында үтәсәк Рәсәй чемпионатына әҙерләнә.

Өфөлә ветерандар һәм һуғыш балалары өсөн тантаналы төшкө аш ойошторолдо

Өфө ресторандарының береһендә тыл һәм хеҙмәт ветерандары, һуғыш балалары өсөн тантаналы төшкө аш ойошторолдо. Өлкәндәр үҙ-ара аралашып, тарихи ваҡиғалар, хеҙмәт йылдарына бәйле хәтирәләре менән уртаҡлашты. Сарала билдәле артистар ҙа сығыш яһаны, концерт барышында улар ветерандарға изге теләктәрен еткерҙе. Төрлө өлкәләрҙә эшләп, республиканың социаль-иҡтисади, ижтимағи-сәйәси үҫешендә ҡатнашҡан яҡташтарыбыҙ табынға бағыусылар саҡырыуы буйынса йыйылды.

Башҡортостанда өй шарттарында уҡыусылар һаны арта

Башҡортостанда 1128 бала мәктәпкә йөрөп уҡыу урынына ғаилә шарттарында белем алыу формаһын һайлаған. Өйҙә белем алған уҡыусылар теләһә ниндәй аккредитацияланған мәктәптә йомғаҡлау аттестацияһын үтә ала. Ғаилә белеме уҡытыу форматын һайлауҙа иреклек бирә.Ҡайһы бер ата-әсәләр балаларын үҙҙәре уҡыта, әммә күпселек быны профессионалдарға тапшыра. Әммә сифатлы һәм ваҡытында белем алыу өсөн яуаплылыҡ ата әсә иңендә ҡала. Ғаиләлә белем алыу үҙенсәлектәре хаҡында тулыраҡ киләһе яҙмала.

Рәсәй футбол союзының контроль-дисциплина комитеты «Фанком» клубына техник еңелеү яҙҙы

Кировтың һәүәҫкәрҙәр командаһы сентябрҙә Рәсәй Кубогының дүртенсе этабында «Өфө» клубы менән осрашҡайны. Дәғүәселәр пенальти серияһында еңеү яуланы. Уйындан һуң яҡташтарыбыҙ Артем Федчуктың майҙанға сығыуына дәғүә белдерҙе. Сөнки футболсы Рәсәй футбол союзы эгидаһы аҫтында уҙған бөтә ярыштарҙан да бер йылға дисквалификацияланған булған. Һөҙөмтәлә контроль-дисциплина комитеты ағзалары дәғүәне ҡәнәғәтләндереп, Киров клубына 0-3 иҫәбе менән техник еңелеү яҙҙы. Шулай итеп яҡташтарыбыҙ Рәсәй Кубогының бишенсе раундында Красноярскиҙың»Енисей«командаһы менән уйнаясаҡ.

Радий Хәбиров Ишембай, Бөрйән, Белорет аша үтәсәк юл төҙөлөшө менән танышты

Был йүнәлеш Өфө-Инйәр-Белорет трассаһына альтернатива буласаҡ, тигән төбәк башлығы социаль селтәрҙәге яҙмаһында. Әле юл Ишембай районының Ҡолғона ауылына тиклем һалына. Артабан Ҡағы менән тоташтырыласаҡ. Төҙөлөш эштәре бер нисә йылға иҫәпләнгән.

Тажикстан эшҡыуарҙары Башҡортостандың инвестиция ҡеүәте менән танышты

Хөкүмәт Премьер-министры Андрей Назаров Үҙәк Азия дәүләтенә эш сәфәре барышында сауҙа-иҡтисади, сәнәғәт һәм гуманитар хеҙмәттәшлекте үҫтереү буйынса төбәк мөмкинлектәрен тәҡдим итте.

Ҡалтасы районындағы «Восход» кооперативы «тоҡомсолоҡ хужалығы» статусын алған

Ауыл хужалығы компанияһы малсылыҡ һәм үҫемлекселек йүнәлешендә эшләй. Унда етештерелгән продукция эске баҙарҙа ғына түгел, сит илдәрҙә лә һатыла.

Уҙған төндә Бишбүләк районында ҡот осҡос авария теркәлде

«Лада Приора» автомобиленә идара иткән 24 йәшлек водитель юл буйында торған атҡа бәрелә. машина юлдан ситкә сығып түңкәрелә. Салонда 17-шәр йәшлек ҡыҙ менән егет ултырған була Ҡыҙғанысҡа ҡаршы, йәштәрҙең өсөһө лә фажиғә урынында һәләк була. Тикшереү барышында транспорт хужаһының водитель таныҡлығынан мәхрүм ителгән булыуы асыҡлана. Әлеге ваҡытта прокуратура ваҡиға сәбәптәрен һәм шарттарын билдәләй.

Республиканан махсус хәрби операция биләмәһенә иҫәп буйынса 162-се гуманитар ылау оҙатылды

Башҡорт батальондары транспорт сараларынан тыш, дрондар һәм эсәр һыу менән тәьмин ителәсәк. Хәрбиҙәргә адреслы ярҙам республика дәүләт органдары, предприятиелар, йәмәғәт ойошмалары һәм ирекмәндәр тырышлығы менән ойошторолған. Колонна составында 6 йөк автомобиле. Хәрбиҙәргә аҙыҡ-түлек, көнкүреш кәрәк-яраҡтары менән 3 юғары үтемле техника оҙатылды.

Октябрьский ҡалаһының «Бетеү» ирекмәндәр төркөмө махсус хәрби операцияға өс меңенсе селтәр оҙатҡан

Лилиә менән Константин Вельбойҙар 2022 йылдың көҙөндә мәҙрәсәлә хәрбиҙәргә һәм госпиталдәргә гуманитар ярҙам ойоштора башлай. Йыйылған әйберҙәрҙе Константин Анатольевич махсус хәрби операция биләмәһенә үҙе алып барып тапшыра, ирекмән өс йыл эсендә хәрбиҙәр янына 15 тапҡыр барып ҡайта. Ил яҙмышына битараф булмаған кешеләр тарафынан маскировка селтәрҙәре, дрондан йәшенеү костюмдары, окоп шәмдәре, юрғандар, беләҙектәр, кейем-һалым тегеү буйынса производство яйға һалынған.

Өфөлә следж-хоккей менән шөғөлләнеүселәргә сана һәм экипировка тапшырылды

Комплектты «Булат» клубының дүрт хоккейсыһы алды. Ветеран яугирҙарҙы спорт йыһаздары менән «Ватанды һаҡлаусылар» дәүләт фонды тәьмин итте. Быға тиклем экипировка һораған 8 яугирҙан ғариза килгән булған. Төбәк филиалының эксперт советы һәр мөрәжәғәтте спортсының физик үҙенсәлектәрен иҫәпкә алып, уға яраҡлы форма һайлай. Был бер ҙә осраҡлы түгел, сөнки следж-хоккей махсус хәрби операциянан яраланып ҡайттыусылар өсөн реабилитация йүнәлештәренең береһе булып тора.

Ишембайҙа кадеттар Ватанға тоғролоҡҡа ант бирҙе

Волга буйы федераль округының Рәсәй Геройы Александр Доставалов исемендәге Башҡорт кадет корпусы тәрбиәләнеүселәре хәрби ант бирҙе. Ишембай ҡалаһында урынлашҡан уҡыу йортонда уҙған тантанаға курсанттарҙың ата-әсәләре, яҡындары, көс структуралары, ғәҙәттән тыш хәлдәр министрлығы вәкилдәре, хәрбиҙәр саҡырылғайны.

«Изге эштәрҙең дүрт миҙгеле» төбәк проектының икенсе миҙгелендә ҡатнашыуға заявкалар ҡабул ителә

Проекттың маҡсаты-төрлө район-ҡалаларҙа йәшәүсе 12-18 йәшлек үҫмерҙәрҙе үҙ башланғыстарын тормошҡа ашырыу аша ирекмәнлек эшенә йәлеп итеү. Хәүефһеҙ бала саҡ, мәҙәниәт һәм төҙөкләндереү-өс йүнәлеш һайлап алынған. Проектта остаз-уҡытыусылар, вожатыйҙар, директор кәңәшселәре етәкселегендә 5-10 кешенән торған командалар ҡатнаша.