Бәләбәй районында Аксаков көндәре үтте

Күренекле яҙыусы Сергей Аксаковтың тормош юлына һәм ижадына арналған фестивалдә Башҡортостан башлығы Радий Хәбиров ҡатнашты. Төбәк етәксеһе һәм ҡунаҡтар шәхес һәйкәленә сәскә гөлләмәләре һалды, Аксаков йорт музейы алдына ағас ултыртты. Бәләбәй районына эш сәфәрендә төбәк етәксеһе Радий Хәбиров төҙөкләндерелгән мәктәп эшмәкәрлеге менән танышты, яңы сүп-сар эшкәртеү комплексын ҡараны.

Өфөнөң Октябрь проспектында сирендәр аллеяһына нигеҙ һалынды

Сара бөгөн республика район-ҡалаларында старт алған «Йәшел Башҡортостан» акцияһы сиктәрендә үтте. Ағас ултыртыуҙа Башҡорт дәүләт аграр университеты студенттары, дәүләт һәм йәмәғәт эшмәкәрҙәре, шулай уҡ махсус хәрби операция ветерандары ҡатнашты.

Хәйбулла районында йәшәүселәр ҙә «Йәшел Башҡортостан» акцияһына ҡушылды

Аяҙ һәм ҡояшлы шәмбе иртәһе экологик өмә өсөн уңайлы шарттар тыуҙыра. Тиҙҙән төбәк үҙенең 95 йыллыҡ юбилейын билдәләй. Уға әҙерлек сиктәрендә Аҡъяр ауылының төньяҡ-көнсығыш паркын төҙөкләндереү тулы ҡеүәттә бара. Яҡын арала бында махсус хәрби операцияла ҡатнашыусыларға һәйкәл ҡуйыласаҡ.

Дәүләкән районында мәктәп автобусы юл-транспорт ваҡиғаһына тарыған

Авария Ҡаҙанғол-Соколовка юлында теркәлә. Дәүләкән лицей-интернаты уҡыусыларын ташыған 59 йәшлек «ПАЗ» автобусы водителе идара итеү һәләтен юғалтып, юл ситенә төшөп түңкәрелә. Был мәлдә салонда 9-сы класта уҡыған өс үҫмер була. Уларҙың береһе тән йәрәхәте ала. Ваҡиға урынында тәфтиш-оператив төркөм эшләй. Хәүефһеҙлек талаптарына яуап бирмәгән хеҙмәт күрһәтеү осрағы буйынса енәйәт эше ҡуҙғатылған.

95 йыллыҡ тарих һәм киләсәккә ҡараш: Черкассы ауыл биләмәһе юбилейын билдәләне

«Ауыл биләмәһе көнө». Өфө районы Черкассы ауылы паркында бер юлы бер нисә мөһим дата-ауыл биләмәһенең һәм Өфө районының 95, Бөйөк Ватан һуғышында Еңеүҙең 80 йыллығына, махсус хәрби операцияла ҡатнашыусыларға һәм уларҙың ғаилә ағзаларына ярҙам итеү йылына арналған байрам сараһы ойошторолдо. Йолаларҙы һәм быуындар күсәгилешлеген һаҡлаусы сара хаҡында киләһе яҙмала.

Баймаҡ тәрбиәселәре балаларҙы ҙур уңыштарға алып бара

Бөгөн-тәрбиәселәр һәнәри байрамын билдәләй. Баймаҡ ҡалаһы һәм районының мәктәпкәсә белем биреү учреждениеларында 180-гә яҡын тәрбиәсе эшләй. Теманың дауамы киләһе яҙмала

Хөсәйен Әхмәтов исемендәге Башҡорт дәүләт филармонияһы 87-се ижад миҙгелен асырға әҙерләнә

Ошо уңайҙан коллектив киң мәғлүмәт саралары хеҙмәткәрҙәрен ҙур матбуғат конференцияһына йыйҙы. Һүҙ көтөлгән концерт программалары, фестивалдәр, юбилей тамашалары тураһында барҙы. 1 октябрҙә рәсми асыласаҡ ижад миҙгеленә Башҡортостандың халыҡ ҡоралдары милли оркестры старт бирә. Республиканың алдынғы мәҙәни коллективы быйыл үҙенең 25 йыллығын билдәләй.

Өфөлә «Инклюзив атлетика» фестивале үтте

Рәсәйҙә физик культура һәм спорт өлкәһендә тәүге социаль йоғонто проекты сиктәрендә уҙғарылған сара инвалидтарға әүҙем тормош алып барыуға йүнәлтелгән. Уны ойоштороуҙа «Инклюзив атлетика» программаһының «Һин уйында» тип исемләнгән Бөтә Рәсәй конкурсында еңеү яулауы булышлыҡ иткән. Тулыраҡ киләһе яҙмала.

Балалар араһында киҫкен респиратор сирҙәр арта

Һуңғы аҙнала Башҡортостанда 30 меңдән ашыу киҫкен респиратор инфекция һәм грипп менән ауырыу осрағы теркәлгән. Сирләүселәрҙең яртыһы тиерлек 14 йәшкә тиклемге балалар. Киҫкен респиратор инфекция һәм грипп таралған осорҙа табиптар йәмәғәт урындарында медицина битлеге кейеп йөрөргә, ҡулдарҙы йышыраҡ йыуырға һәм иммунитетты нығытырға кәңәш итә. Был турала ентекләберәк БЮТ хәбәрсеһе Әлфинә Килдейәрова әҙерләгән әңгәмәне тәҡдим итәбеҙ.

«Башҡортостан» полкы хәрбиҙәре махсус хәрби операция биләмәһенә юлланды

Бөгөн ҡыҫҡа ваҡытлы отпуск ялынан һуң, «Башҡортостан» полкы хәрбиҙәре махсус хәрби операция биләмәһенә юлланды. Яугирҙар ике аҙна ялын яҡындары менән уҙғарған. Көнкүреш мәсьәләләрен хәл иткән, мәктәптәрҙә асыҡ дәрестәрҙә ҡатнашҡан. ир-егеттәрҙе оҙатыу тантанаһында яугирҙың ғаилә ағзалары, туғандары, дуҫтары ҡатнашты. ил именлеге өсөн көрәшкән яҡташтарыбыҙҙы тәғәйен урынға алып барыу өсөн Башҡортостан етәкселеге уңайлы автобустар бүлгән.

Иглин районы Меңйетәр ауылында яңы фельдшер-акушерлыҡ пункты асылды

«Һаулыҡ Һаҡлау» милли проекты буйынса сафҡа ингән объект заманса ҡорамалдаар менән йыһазландырылған. Бынан ары, урындағы халыҡҡа медицина тикшереүе үтеү өсөн район үҙәгенә йөрөргә кәрәкмәй. Учреждениела прививка эшләтергә, анализ тапшырырға, диспансер тикшереү үтергә мөмкин.

Благовещен психоневрология интернаты Ололар көнөн ҡаршы алырға әҙерләнә

Учреждениела менталь боҙолоуҙары булған оло йәштәге 120 кеше йәшәй. Күптәренең туғандары юҡ, улар өсөн иң яҡын кешеләр-интернат хеҙмәткәрҙәре. Бергәләп улар байрам концертына әҙерләнә.

Республикала йәш ғалимдар башҡорт тирмәһенең һанлы моделен етештерә

Өфө дәүләт нефть техник университеты белгестәре заманса айти-продуктты археология һәм этнография мухейы өсөн әҙерләй. Һанлы тирмә моделе уның төп нөсхәһенә ҡарап эшләнә. Көнкүреш әйберҙәр, тирмәнең эстәлеге тулыһынса башҡорттарҙың йәшәү шарттарын сағылдыра. Өс Д моделле проект лазерлы сканер фотоһүрәттәренә таянып эшләнә.

Өфөнән 79 йәшлек Миңлеғол Мәсәғүтова яңы айти-һөнәр үҙләштерә

Уҡырға бер ваҡытта ла һуң түгел! Өфөнән 79 йәшлек Миңлеғол Мәсәғүтова яңы айти-һөнәр үҙләштерә. Хаҡлы ялдағы ханым «21- се мәктәп»тә ойошторолған төркөмдөң иң өлкән уҡыусыһы. Ул һанлы технологиялар һәм программаларҙы бушлай өйрәнә. Миңлеғол Фәрүәз ҡыҙы пенсияға тиклем компьютер менән эш иткән.

Башҡортостанда ужым игенен урыу тамамланды

Был турала бөгөн хөкүмәттә оператив кәңәшмәләВице-премьер-Ауыл хужалығы министры Илшат Фәзрахманов белдерҙе. Бөгөнгә игендөйөм майҙандарҙың 89 процентында урылған. Уңыш - 3 миллион 400 мең тонна. Шәкәр сөгөлдөрө баҫыуҙарының57процентына эш теүәлләнгән. 300 меңтоннанан ашыу уңыш алынған.

Баймаҡта мосолман зыяратын кәртәләү тамамланды

Изге эштә район һәм ҡала хакимиәте, хеҙмәт коллективтары, барса халыҡ ҡатнашты. Тулыраҡ киләһе яҙмала.

Шишмә районында Ҡатыҡ байрамы үтте

Байрам уңайынан район мәҙәниәт һарайы алдындағы майҙанда «Милли ихата» һәм «Милли аш-һыу» темаларына бағышланған күргәҙмәләр ойошторолдо. Бында урындағы халыҡ һөт ризыҡтары, тәм-томдар тәҡдим итте. Күргәҙмә алдында һәүәҫкәр артистар сығыш яһаны, театрлаштырылған тамаша күрһәтелде. Көн дауамында оҫталыҡ дәрестәрендә хужабикәләр ҡатыҡ, эремсек, сыр бешереү тәжрибәһе менән уртаҡлашты.

Өфө районында автоспорт һөйөүселәрен берләштергән сара үтте

Автоспорттың йәйге миҙгеле тамам. Уға Өфөнөң Зинин ауылы эргәһендә техник спорт төрҙәрен берләштергән Джимхана фестивале менән йомғаҡ яһалды. Сараға килгән тамашасылар күрһәтмә уҙыштар шаһиты булды, көслө моторҙар геүләүен ишетте, ретро автомобилдәр менән таныша алды. Юғары тиҙлек яратыусы төрлө һөнәр эйәләрен берләштергән спорт сараһы хаҡында репортаж.

Алдағы төндә Башҡортостанда 4-9 градусҡа тиклем һыуытып, ҡырау төшөүе көтөлә

Автомобиль юлдарында төндә һәм иртәнгә ҡарай томан төшә, күреү мөмкинлеге 500 метрғаса сикләнә. Ел төньяҡ-көнбайыштан секундына 5-10 метр тиҙлектә иҫә. Ғәҙәттән тыш хәлдәр министрлығының Башҡортостан буйынса баш идаралығы электр һәм газ ҡорамалдарын, шулай уҡ мейесте файҙаланғанда янғын хәүефһеҙлеге ҡағиҙәләрен теүәл үтәргә кәңәш итә. Юлдарҙа һаҡ булығыҙ, дистанцияны һәм тиҙлек режимын һаҡлағыҙ!

Радий Хәбиров 2025 йыл аҙағына тиклем Пугачев урамын файҙаланыуға тапшырыу бурысын ҡуйҙы

Башҡортостан башлығы Радий Хәбиров 2025 йыл аҙағына тиклем Пугачев урамын файҙаланыуға тапшырыу бурысын ҡуйҙы. Һүҙ «Дуҫлыҡ Монументынан Геофизиктар урамына тиклем участка тураһында бара».

Башҡортостанда йылытыу миҙгеле башланды

Башҡортостанда 2 меңдән ашыу социаль учреждение һәм 7 меңгә яҡын күп ҡатлы йортҡа йылы бирелгән. Йәмғеһе 50 районда йылытыу миҙгеле башланған. Радий Хәбиров әйтеүенсә, энергия ресурстары менән тәьмин итеүҙе һауа торошона ҡарап һәр муниципалитет үҙе хәл итергә тейеш. Халыҡҡа уңайлы шарттар тыуҙырыу мөһим, тине төбәк етәксеһе аҙналыҡ оператив кәңәшмәлә.