Ҡурған өлкәһе Әлмән районы башҡорттарының тарихи документтарын реставрациялау тамамланды

Башҡортостан Милли архивында Ҡурған өлкәһе Әлмән районы башҡорттарының тарихи документтарын реставрациялау тамамланды. Боронғо төрки телендә ғәрәп графикаһы менән яҙылған ҡомартҡыларҙы республика белгестәре уҡыған, яңыртҡан, электрон күсермәһен эшләгән. Яҙма йәдкәрҙәр һаҡлаған ҡыҙыҡлы мәғлүмәттәр, уларҙың әһәмиәте тураһында репортаж.

"Янғантау" геопаркында торналар иҫәбен алалар

Бөгөнгә ҡоштарҙың иң ҙур тубы Ҡыйғы районы Яңы Мөхәмәт ауылы янында теркәлгән. 90-дан ашыу торна йыйылған. Ҡадир, Иҫке Мөхәмәт, Лағыр ауылдары һәм Йүкәлекүл янында бәләкәй төркөмдәр бар. Орнитологтар әйтеүенсә, ҡоштар йылы яҡҡа осор алдынан айырым урындарҙа ҙур туптарға йыйыла. Улар оҙайлы осошҡа әҙерләнәләр.

2026 йылда пенсия 1 февралдән һәм 1 апрелдән артасаҡ

Рәсәй социаль фонды рәйесе Сергей Чирков белдереүенсә, тәүҙә хаҡлы ялдағылар өсөн түләү инфляция кимәле буйынса индексациялана. Апрелдән иһә социаль фондтың табышынан сығып пенсияны арттырыу планлаштырыла.

Өфөлә Салауат Юлаев һәйкәлен реконструкциялауға әҙерлек тамамланды

Вице-премьер Рөстәм Ғәзизов белдереүенсә, бөгөнгә был биләмә кәртәләп алынған, төҙөлөш ҡаласығы булдырылған, видеокүҙәтеү системаһы эшләй. Сентябрҙә ҡурғанда ер эштәре башлана, гранит баҫҡыстар алынасаҡ. Бөтә эштәр планға ярашлы алып барыла, - тине Рөстәм Ғәзизов.

Быйыл республикала 2 миллион самаһы ағас ултыртылған

Урман хужалығы министрлығынан ошо турала белдерәләр. “Йәшел Башҡортостан” акцияһы барышында 150-нән ашыу тематик аллея булдырылған. Республика иҫтәлекле ағастар ултыртылған урындар менән дә айырылып тора. Быйыл “Йәшел Башҡортостан” акцияһының төп көнө 27 сентябрҙә була.

Башҡортостанда «Геосаҡырыу» өсөнсө Халыҡ-ара геология чемпионаты еңеүселәре билдәләнде

Ер аҫты байлыҡтарын файҙаланыу буйынса федераль агентлыҡ менән республика Хөкүмәте тарафынан ойошторолған сара 10 сентябрҙә старт алғайны. Ярышта ҡатнашыусылар геологик белем нигеҙҙәре буйынса тест үткәндән һуң, геологик киҫелеш, палеонтология, кристаллография кеүек айырым этаптарҙа ҡатнашты, ялан шарттарында һынауҙар үтте.

Өфөлә робот ярҙамында онкология буйынса уникаль операция башҡарылды

Онкология сиренән уникаль операция. Бөгөн Башҡорт дәүләт медицина университеты клиникаһында бәүел ҡыуығындағы яман шеш робот системаһы ярҙамында заманса ысул менән алынды. Робот менән уҡыу йортоноң ректоры, медицина фәндәре докторы, академик Валентин Павлов идара итте. Рәсәй медицинаһы тарихында тәүге тапҡыр ҡулланылған үҙенсәлекле ысул хаҡында репортаж.

Башҡортостанда бәшмәк миҙгеле башланды

Бәшмәкле миҙгел. Башҡортостанда быйыл мул уңыш күҙәтелә.
Урман аҙығын йыйыу өсөн бәшмәкселәр тәбиғәткә ағыла. Оҫталар аҡһымға бай файҙалы ризыҡты эшкәртеү, ҡышҡылыҡҡа һаҡлау ысулдары менән уртаҡлаша. Тәжрибәле бәшмәкселәр һәм һаҡлыҡ саралары хаҡында иҫкәртеүсе эксперттар менән беҙҙең ижади төркөм дә осрашты.

Шишмә районында ғаилә 250 килограмм ҡабаҡ йыйҙы

Өфөлә йәшәп, Шишмә районында баҡсасылыҡ менән шөғөлләнгән Илһөйәр Һәм Таһир Төхвәтуллиндар ҡабаҡтан рекордлы уңыш йыйған. Һәүәҫкәр баҡсасылар үҫтергән ҡабаҡтарҙың дөйөм ауырлығы 250 килограмм самаһы тәшкил иткән. Хужалар әйтеүенсә, улар гигант ҡабаҡ үҫтереү өсөн артыҡ ҙур эш башҡармаған.

Өфөлә йәмәғәт эшмәкәрҙәре һәм коммерция булмаған ойошмалар ағзалары слеты үтте

Ирекмәндәр Евразия фәнни-мәғариф үҙәге майҙанында иң яҡшы тәжрибә тип табылған проекттар презентацияһын ойошторҙо. Республиканың төрлө төбәктәренән йыйылған 250 ҡатнашыусы өсөн бер нисә тематик майҙансыҡ эшләп торҙо. Бында коммерция булмаған ойошмалар эшмәкәрлеген киңәйтеү йүнәлешендә оҫталыҡ дәрестәре үткәрелде, гражданлыҡ йәмғитен үҫтереү өсөн лекциялар тәҡдим ителде.

Ейәнсура районы Иҫәнғол ауылының 2-се мәктәбе биләмәһендә күп функциялы спорт майҙансығы асылды

Спорт ҡаҙаныштары менән билдәле белем усағында 600-ән ашыу бала уҡый. Уларҙың күбеһе төрлө кимәлдәге ярыштар еңеүсе. Мәктәп бинаһында спорт залы бик бәләкәй булғанлыҡтан, яңы майҙансыҡ төҙөү ҡарары ҡабул ителә. Объект район хакимиәте менән «Берҙәм Рәсәй» партияһының «Реаль эштәр» проекты ярҙамында сафҡа индерелгән. Хәҙер физкультура дәрестәре саф һауала үтә, спорт секцияларында футбол, баскетбол һәм волейбол уйнау өсөн уңайлы шарттар булдырылған.

Шаранда Рима Баталова призына «Спорт легендалары» кроссы уҙҙы

Шаранда 13 тапҡыр паралимпия чемпионы Рима Баталова призына еңел атлетика буйынса «Спорт легендалары» 17-се район-ара кросс үтте. Ярышта Шаран, Туймазы һәм Мишкә райондарынан 300-ҙән ашыу кеше ҡатнашты. Һәр йәш категорияһы үҙ дистанцияһында көс һынашты.

Башҡортостандың электр станциялары ҡеүәте артасаҡ

Бөгөн Мәскәүҙә Радий Хәбиров «Интер РАО» асыҡ акционерҙар йәмғиәте етәксеһе Сергей Дрегваль менән осрашты. Яҡтар республиканың энергетика инфраструктураһын үҫтереү һәм энергохолдинг менән хеҙмәттәшлек мәсьәләләрен тикшерҙе. Сергей Дрегваль, компания өсөн Башҡортостан төп төбәктәрҙең береһе булыуын билдәләне

Башҡортостан йылытыу миҙгеленә 100 процентҡа әҙер

Һалҡын һауа торошо һаҡланһа, киләһе аҙнала уҡ яуаплы кампанияға старт бирелеүе ихтимал. Торлаҡ-коммуналь хужалыҡ министрлығынан хәбәр итеүҙәренсә, бөгөнгә бөтә муниципаль берәмектәр ҙә ҡышҡа әҙерлек паспорттарын раҫлаған. Федераль ҡануниәткә ярашлы, уртаса һауа температураһы биш көн рәттән 8 градус йылынан түбәнерәк булһа, йылы бирергә тейештәр.

Өфөлә Рәсәй Геройы Илдар Суфияровты һуңғы юлға оҙатасаҡтар

Иртәгә Өфөлә Рәсәй Геройы Илдар Суфияровты һуңғы юлға оҙатасаҡтар. Матәм сараһы иртәнге сәғәт 10-да «Башҡортостан» дәүләт концерт залында башлана. Илдар Филорет улын белгән һәм уның иҫтәлеген хөрмәтләргә теләгән һәр кем хушлашыуға килә ала. Матәм митингыһынан һуң Илдар Суфияров Өфөнөң Көньяҡ зыяратына ерләнәсәк.

Башҡортостанда «Геосаҡырыу» өсөнсө Халыҡ-ара геология чемпионаты еңеүселәре билдәләнде

Ер аҫты байлыҡтарын файҙаланыу буйынса федераль агентлыҡ менән республика Хөкүмәте тарафынан ойошторолған сара уҙған аҙнала старт алғайны. Ярышта ҡатнашыусылар геологик белем нигеҙҙәре буйынса тест үткәндән һуң, геологик киҫелеш, палеонтология, кристаллография кеүек айырым этаптарҙа ҡатнашты, ялан шарттарында һынау үтте.

Өфөлә киләһе аҙнала Ҡурсаҡ фестивале башлана

24 сентябрҙә Башҡорт дәүләт ҡурсаҡ театрында халыҡ-ара сараны асыу тантанаһы үтә. Тамашасыларға Донецк академия ҡурсаҡ театры спектакле тәҡдим ителә. Фестиваль Бөйөк Ватан һуғышында еңеүҙең 80 йыллығына арнала. Программа илһөйәрлек темаһына бағышланған сәхнә әҫәрҙәренән тора. Баш ҡалала Үзбәкстан, Ҡырғыҙстан театрҙары сығыш яһай. Шулай уҡ Владимир, Ырымбур өлкәләре, Татарстан, Сыуаш республикаһы коллективтары спектаклдәре ҡуйыла. Сергей Образцов исемендәге Дәүләт академия үҙәк ҡурсаҡ театры ҡунаҡ булараҡ ҡатнаша. Сараны ябыу тантанаһында был коллектив артистары “Ленинградка” спектаклен күрһәтә. Театрҙар форумы барышында ҡуйылған спектаклдәрҙе абруйлы жюри баһалай. Халыҡ-ара фестиваль президенттың мәҙәни башланғыстар фонды ярҙамында уҙғарыла.

Республика бәһлеүәндәре ракета комплексын һөйрәү буйынса рекорд ҡуйырға ниәтләй

“Рәсәйҙең иң көслө кешеһе” исемен йөрөткән Эльбрус Ниғмәтуллин ошо турала белдерҙе. “Сара 4 октябрҙә Стәрлетамаҡта үтә. 4 кешенән торған команда “Тополь-М” ракета комплексын буксирға ала. Спортсылар: Денис Ваһапов, Рәил Бикмаев, Айҙар Байсурин һәм Руслан Садыҡов ҡуйылған маҡсатҡа ирешеренә ышанам. Асыҡ күнекмә үткәрелде”, - тине Эльбрус Ниғмәтуллин. Рекордты теркәү өсөн республикаға “Уралстронг – Рәсәй бәһлеүәндәре” федерацияһы президенты Дмитрий Кононец килә.

«Газпром Салауат нефтехим» предприятиеһына террористик атака һөжүме

Был турала социаль селтәрҙә Башҡортостан башлығы Радий Хәбиров хәбәр итте. Ул белдереүенсә, сәнәғәт объектына самолет тибындағы ике пилотһыҙ осоу аппараты һөжүм иткән. Һәләк булыусылар һәм зыян күреүселәр юҡ. Пассив һәм актив һаҡланыу системаһы эшләп, предприятиеның һаҡ хеҙмәте уларға ҡаршы ут асҡан. Зыян кимәле асыҡлана. Әлеге ваҡытта ваҡиға урынында янғын һүндерелә. Барлыҡ хеҙмәттәр ҙә урында. Тулыраҡ мәғлүмәттәрҙе һуңғараҡ хәбәр итермен тип белдергән төбәк етәксеһе.

Республика клиник инфекция дауаханаһы юбилейын билдәләне

115 йыл дауамында күҙгә күренмәгән дошман менән көрәштә. Республика клиник инфекция дауаханаһы юбилейын билдәләне. Быуаттан ашыу учреждение табиптары йоғошло сирҙәр менән көрәштә алдынғы урынды биләй. Тәүгеләрҙән булып республика халҡының сәләмәтлеген яҡлап, профессионаллек һәм фиҙаҡәрлек күрһәтә.

Быйыл Башҡортостанда «Кадрҙар» милли проекты ғәмәлгә ашырыла башланы

Уның ярҙамында хеҙмәт баҙары талаптарын иҫәпкә алып әҙерләнгән белем биреү программалары буйынса уҡырға мөмкин. Халыҡта IT-өлкә, электр энергетикаһы һәм төҙөлөш өсөн әҙерлек программалары ҙур ихтыяж менән файҙалана.