Радий Хәбиров 8-се март уңайынан республика ҡатын-ҡыҙҙарын тәбрикләне

Башҡортостан башлығы Радий Хәбиров яҙҙың иң күркәм байрамдарының береһе - 8-се март уңайынан республика ҡатын-ҡыҙҙарын тәбрикләне. Өфөлә үткән тантаналы ултырышта гүзәл заттарға дәүләт наградалары тапшырылды. Радий Хәбиров, ныҡлы һәм ышаныслы тыл ойоштороусы, иҡтисадты үҫтереүсе, ғаилә терәге булып торған ҡатын-ҡыҙҙарға оло рәхмәтен еткерҙе.

Илеш районы гүзәл заттарын «Ҡатын-ҡыҙҙың бәхете биләмәһе» асыҡ академияһы берләштерҙе

Бөгөн Илеш районы гүзәл заттарын «Ҡатын-ҡыҙҙың бәхете биләмәһе» асыҡ академияһы берләштерҙе. Республика проекты буйынса Үрге Йәркәй ауыл мәҙәниәт йортонда ойошторолған сараға 600-ҙән ашыу кеше, шул иҫәптән махсус хәрби операцияла ҡатнашыусыларҙың ҡатындары һәм әсәләре йыйылды.

«Башҡортостан» полкының танкистары йәшерен позицияларҙан һөжүм итә

Яҙғы юлһыҙлыҡ, һауа шарттары, көн тимәй, төн тимәй танкистар дошманды артҡа сигендерә. «Башҡортостан» полкының Сергей Зорин исемендәге танк батальоны яугирҙары тура төҙәүгә сығып, йәшерен позицияларҙан да нацизм ҡалдыҡтарын тар-мар итә. Сираттағы задание алдынан экипаж ағзалары менән беҙҙең хәрби хәбәрселәр ҙә күрешеп өлгөрҙө.

Мәрйәм Солтанова исемендәге ислам колледжы яугирҙарға ярҙам итә

Диндарҙар һәм шәкерттәрҙән тыл ярҙамы. Мәрйәм Солтанова исемендәге ислам колледжы етәкселеге диндарҙар ярҙамы менән махсус хәрби операция биләмәһендәге яугирҙарға фронтта үтемле техника, дарыуҙар, хәләл аҙыҡ-түлек менән ярҙам итә. Илебеҙҙең һәм халҡыбыҙҙың берҙәмлеген нығытыу буйынса үтәлгән изге ғәмәлдәр хаҡында ентекләберәк киләһе яҙмала.

Башҡорт халыҡ ижады һанлы форматҡа күсерелә

Халыҡ ынйыларын халыҡҡа еткереп. Рәсәй фәндәр академияһы Өфө федераль ғилми тикшеренеү үҙәгенең Почет Билдәһе орденлы Тарих, тел һәм әҙәбиәт институтының фольклор ғилеме бүлегендә фәнни экспедиция материалдарын һанлы форматҡа күсереү эше дауам итә. Был яңылыҡ айырыуса республика музыканттарын битараф ҡалдырманы. Бөгөн уҙған быуаттың 60-сы йылдарында яҙылған композиция тәүге тапҡыр халыҡҡа сығарылды.

Өфөлә Мәжит Ғафуриҙың йорт-музейында «Башҡорт әҙәбиәте ынйыһы» күргәҙмәһе асылды

Ул Салауат Юлаев исемендәге премия лауреаты, яҙыусы Һәҙиә Дәүләтшинаның тыуыуына 120 йыл тулыуға арналған. Яҙыусы 1905 йылдың 5 мартында Һамар губернаһы Николаевск өйәҙенең Хәсән ауылында тыуған. Сәйәси золом ҡорбаны бай әҙәби мираҫ ҡалдырған. - «Ырғыҙ», «Айбикә», «Башаҡтар тулҡыны», «Ялҡынлы йылдар», «Һырға һабағы» һәм «Мораҙым».

Дәүләкән районы Иҫке Көрмәнкәй ауылы халҡы «Айыҡ ауыл» республика конкурсында ҡатнаша

Дәүләкән районы Иҫке Көрмәнкәй ауылы халҡы «Айыҡ ауыл» республика конкурсында ҡатнаша. Абруйлы конкурста улар икенсегә үҙ көсөн һынап ҡарай. Һәр эштә татыу һәм берҙәм ауыл халҡы менән БЮТ ижади төркөмө аралашты.

Игорь Комаров гүзәл заттарҙы Халыҡ-ара ҡатын-ҡыҙҙар көнө менән ҡотланы

Игорь Комаров Волга буйы федераль округында йәшәүсе гүзәл заттарҙы Халыҡ-ара ҡатын-ҡыҙҙар көнө менән ҡотланы. Рәсәй Президентының Волга буйы федераль округындағы тулы хоҡуҡлы вәкиле 8 март байрамы уңайынан ҡатын-ҡыҙҙарға мөрәжәғәт итте.

Бөйөк Ватан һуғышы ветераны Ҡотлогилде Төхвәтуллиндың дәһшәтле йылдар хәтирәләре менән уртаҡлашты

Еңеү яҙын Берлиндан етмеш саҡрым алыҫлыҡта ҡаршы алып, тотҡонлоҡта булған бер төркөм яҡташтарын үлемдән ҡотҡарған. Әбйәлил районы Мәхмүт ауылынан Бөйөк Ватан һуғышы ветераны Ҡотлогилде Төхвәтуллиндың дәһшәтле йылдар хәтирәләре - БЮТ ижади төркөмө әҙерләгән репортажда.

Башҡорт академия драма театрында «Ваня ағай» пьесаһы буйынса сәхнәләштерелгән спектакле күрһәтелә

Мәжит Ғафури исемендәге Башҡорт академия драма театрында 13 һәм 14 мартта Антон Чеховтың «Ваня ағай» пьесаһы буйынса сәхнәләштерелгән спектакле күрһәтелә. Уны Санкт-Петербургтан саҡырылған режиссер Степан Пектеев ҡуйған. Режиссер быға тиклем «Ваня ағай»-ҙы марый телендә сәхнәләштергән.

Борай районында «Дуҫлыҡ бейеүҙәре» төбәк-ара милли мәҙәниәттәр фестивале үтте

«Айыҡ ауыл» республика фестивале буйынса тормошҡа ашырылған финалда быйыл Борай районынан Алтай ауылы ҡатнаша. Ошо маҡсатта урында төрлө осрашыуҙар, мәҙәни-спорт саралары ойошторола. Әлеге байрамда Башҡортостан район-ҡалалары фольклор коллективтары менән бергә, күрше Удмурт республикаһы һәм Пермь крайы вәкилдәре лә ҡатнашты.

Өфөләге Көрәш һарайы илдәге иң яҡшы спорт комплекстарының береһе

Бөгөн бында тағы ла бер ҙур турнир - грек-рим көрәше буйынса 21 йәшкә тиклемгеләр араһында Рәсәй беренселеге башланды. Ул Рәсәй Геройы Максим Серафимов исемен йөрөтә. Башҡортостан башлығы Радий Хәбиров социаль селтәрҙәрҙә Рәсәй спорт министрлығы һәм спорт көрәше федерацияһы президенты Михаил Мамиашвилиға республикабыҙҙы ошондай мөһим сара үткәреү урыны итеп һайлағандары өсөн рәхмәт белдерҙе.

Хәйбулла районы Аҡъяр үҙәк район дауаханаһы белгестәре халыҡҡа күсмә диспансер тикшереү үткәрҙе

Ауыл кешеләренең һаулығы даими табиптар күҙәтеүендә. Хәйбулла районы Федоровка ауылында Аҡъяр үҙәк район дауаханаһы белгестәре халыҡҡа күсмә диспансер тикшереү үткәрҙе. Төпкөлдә йәшәгән ауыл кешеләренә заманса медицинаның яҡынайыуы хаҡында киләһе яҙмала.

Быйыл республикала 1 сентябрҙән эттәргә чип ҡуйыу мотлаҡ буласаҡ

Закон проекты өҫтөндә Башҡортостан парламенты эшләй. Ошо маҡсатта республика бюджетынан 80 миллион һум аҡса бүленгән. 2027 йылға тиклем процедураны бушлай үтергә мөмкин буласаҡ.

Башҡортостан махсус хәрби операцияның көн тәртибенә йәлеп ителгән алдынғы субъекттар иҫәбенә инде

Был хаҡта Мәскәүҙә махсус операцияға ярҙам итеү темаһына арналған матбуғат конференцияһында Сәйәси мәғлүмәт үҙәге етәксеһе Алексей Мухин белдерҙе. Эксперттар билдәләүенсә, Башҡортостан - 2022 йылда Донбассҡа гуманитар конвой ебәргән беренсе субъект булды.

Мобилизация буйынса хеҙмәт иткән ире артынан махсус хәрби операцияға

«Жаворонок» ҡушаматлы фельдшер 2022 йылдың декабренән алып алғы һыҙыҡта. Махсус хәрби операцияға ул мобилизация буйынса алынған тормош иптәше артынан юллана. Тәүҙә ханым Красный Луч ҡалаһындағы дауаханала медицина ярҙамы күрһәтә, аҙаҡ Оборона министрлығы менән контракт төҙөй. Тыныс тормошта ул Өфөнөң 5-се ҡала дауаханаһында шәфҡәт туташы булып эшләгән. Ә хәҙер «Башҡортостан» полкының медицина взводы санитар-фельдшеры. Әле ул башлыса алғы һыҙыҡта яраланған һалдаттарҙы эвакуациялау менән шөғөлләнә. «Жаворонок» иҫәбендә йөҙҙән ашыу яугир һәм ҡотҡарылған ғүмер.

Өфөлә яугирҙарҙың ғаиләләре менән осрашыу үтте

Халыҡ-ара Ҡатын-ҡыҙҙар көнө уңайынан Өфө фән һәм технологиялар университетында махсус хәрби операцияла ҡатнашҡан яугирҙарҙың әсәләре, ҡатындары, балалары менән осрашыу үтте. Гүзәл заттарҙың барыһы ла юғары уҡыу йортонда эшләй. Вуз тарафынан хәрбиҙәрҙең ғаиләләренә ярҙам саралары ла ҡаралған.

Миәкә районында Советтар Союзы Геройы Миңлеғәле Ғөбәйҙуллин иҫтәлегенә хәтер саралары үтте

Бөйөк Ватан һуғышында дошман амбразураһын кәүҙәһе менән ҡаплаған һалдаттың тыуған ауылы Өршәкбаш-Ҡарамалыла ауылдаштар һәм ҡунаҡтар геройҙың һәйкәленә сәскә гөлләмәләре һалды, Миңлеғәле Ғөбәйҙуллин исемен йөрөткән музейҙа экскурсия ойошторолдо . Урындағы мәҙәниәт йортонда тарихи шәхес хөрмәтенә сәхнәләштерелгән тамаша күрһәтелде.

Баймаҡ районы Темәс ауылында милли ат сабышы уҙҙы

Баймаҡ районы Темәс ауылында Бөйөк Еңеүҙең 80 йыллығына, махсус хәрби операцияла ҡатнашыусыларҙың һәм уларҙың ғаиләләренә ярҙам итеү йылына арналған милли ат сабышы уҙҙы. Ярыштың бағыусылары, ойоштороусылар, ауыл хакимиәте яугирҙарға аҡсалата ярҙам күсерҙе.

Өфөлә студенттар кампусының Альфа башняһына нигеҙ һалынды

Өфөлә донъя кимәлендәге Евразия фәнни-белем биреү үҙәгенең юғары уҡыу йорттары араһындағы студенттар кампусының Альфа башняһына нигеҙ һалынды. Тантанала Башҡортостан башлығы Радий Хәбиров, Рәсәйҙең фән һәм юғары белем биреү министры урынбаҫары Айрат Ғәтиәтов ҡатнашты. Шулай уҡ кампус биналары комплексын төҙөү мәсьәләләре буйынса эшлекле кәңәшмә уҙҙы.

Күркәм байрам уңайынан Башҡортостандың гүзәл заттарын Радий Хәбиров тәбрикләне

Бөгөн яҙҙың иң күркәм байрамдарының береһе - Халыҡ-ара ҡатын-ҡыҙҙар көнө. Беҙҙең илдә был көн 1919 йылдан рәсми байрам булараҡ билдәләнә. Тәүҙә ул Халыҡ-ара эшсе ҡатын-ҡыҙҙар көнө тип атала. Ә егерменсе йылдар аҙағында «Халыҡ-ара ҡатын ҡыҙҙар көнө»нә үҙгәртелә. 1966 йылда 8 март дәүләт кимәлендә рәсми ял көнө тип таныла. Күркәм байрам уңайынан Башҡортостандың гүзәл заттарын Радий Хәбиров тәбрикләне.