Өфөнөң Октябрь районы «Ата-әсәләр менән бергә Берҙәм дәүләт имтихандарын тапшырыу» акцияһына ҡушылды

Өфөнөң Октябрь районы «Ата-әсәләр менән бергә Берҙәм дәүләт имтихандарын тапшырыу» Бөтә Рәсәй акцияһына ҡушылды. Ул баш ҡалала туғыҙынсы тапҡыр ойошторола. Акцияны үткәреү майҙансығы итеп Өфөнөң 38-се мәктәбе һайланған.

Өфөлә ҡурайсылар, оҫталар һәм милли музыка уйын ҡоралдарында башҡарыусыларҙың семинары үтте

Баш ҡаланың «Торатау» Конгресс-холлында бөгөн ҡурайсылар, оҫталар һәм милли музыка уйын ҡоралдарында башҡарыусыларҙың беренсе семинары үтте. Йола буйынса «Урал» башҡорт халыҡ көйөнән башланған сарала ил һәм донъя кимәлендә танылыу алған милләттәштәребеҙ ҡатнашты.

Өфө дәүләт автоинспекцияһы яңы операция иғлан итте

Уның барышында йәйәүлеләр иғтибар үҙәгенә алына. Юл полицияһы кешеләргә юл бирмәгән водителдәрҙе асыҡлай. Шулай уҡ ҡағиҙәләрҙе боҙған йәйәүлеләр туҡтатыла. “Юл аша сыҡҡанда телефон аша һөйләшмәгеҙ. Ҡолаҡсын таҡмағыҙ. Капюшонды һалып тороғоҙ. Һеҙҙең именлек – һеҙҙең ҡулда”, - тип белдерә дәүләт автоинспекцияһы хеҙмәткәрҙәре. Рейд иртәгә тамамлана.

Республикала балалар араһында “Тере хәтер” тигән рәсем конкурсы башланды

Ул Бөйөк Еңеүҙең 80 йыллығына арнала. Ижади ярышты Башҡорт дәүләт ҡурсаҡ театры, Халыҡ ижады үҙәге, Хәрби дан музейы һәм кино төшөрөүселәр берлеге уҙғара. Конкурста 6 йәштән 17 йәшкә тиклемге ҡыҙҙар һәм малайҙар ҡатнаша ала. Һүрәттәрҙә Совет халҡының фронт һәм тыл батырлығы данланырға тейеш. Эштәр 31 мартҡа тиклем ҡабул ителә. Еңеүселәрҙе бүләкләү сараһы апрелдә һәм майҙа үтә. Ҡурсаҡ театры галереяһында һүрәттәр күргәҙмәһе ойошторола.

Республикала грипп һәм тын юлдары ауырыуҙары арта

Һуңғы 10 көндә 30 мең кешегә ошондай диагноз ҡуйылған. Сирлеләрҙең 65 процентында киҙеү асыҡлана. Йышыраҡ балалар ауырый. Инфекцияны иҫкәртеү өсөн йәмәғәт урындарында битлек кейеү, бүлмәләрҙе даими елләтеү кәңәш ителә.

Башҡортостан спортсылары Мәскәүҙә үткән турнирҙа еңеү яуланы

Мас-рестлинг буйынса уҙғарылған ярыш Олимпия чемпионы Роман Дмитриевтың иҫтәлегенә арналды. Республиканан Мәғди Ибраһимов 90, Евгений Пиконин 105 килограмға тиклем ауырлыҡ үлсәмендә алтын миҙал яуланы. Турнир унынсы тапҡыр уҙғарылды. Унда илдең 20-гә яҡын төбәгенән 80 спортсы ҡатнашты. Роман Дмитриев мас-рестлингты танытыуға ҙур өлөш индергән кешеләрҙең береһе. Тап ул Мәскәүҙә ошо спорт төрө буйынса тәүге чемпионаттарҙы ойоштороусы булып тора.

Республикала 179 килограмм тауар һатыуҙан алынған

Башҡортостанда 68 партия тәм-том һәм икмәк продукцияһы ҡулланыуға яраҡһыҙ тип табылған. 2024 йылда 179 килограмм тауар һатыуҙан алынған, тип хәбәр итәләр Ҡулланыусылар хоҡуҡтарын яҡлау хеҙмәтенән. Был продукцияның ҡулланыу ваҡыты үтеүе, тейешле тамғаһы булмауы асыҡланған.

Республика инвестиция Милли рейтингында илдең иң яҡшы өс төбәге иҫәбендә

Был турала Өфөлә Башҡортостан финанс министрлығы коллегияһының киңәйтелгән ултырышында хәбәр ителде. Унда 2024 йылға йомғаҡ яһалды һәм алдағы ике йылға өҫтөнлөклө йүнәлештәр билдәләнде. 2024 йыл йомғаҡтары буйынса инвестициялар күләме 700 миллиард һумдан ашып киткән. Етештереү 5,4 процентҡа артҡан.

1 марттан граждандар Дәүләт хеҙмәттәре порталында кредит алыуҙы тыйыу хеҙмәте менән файҙалана ала

Сикләүҙе Дәүләт хеҙмәттәре порталы аша ғына эшләргә мөмкин. Был ипотека, автокредит һәм белем алыу өсөн дәүләт ярҙамы менән бирелгән кредитҡа ҡағылмай. Операцияны Күп функциялы үҙәктәрҙең айырым секторҙарында белгестәр ярҙамында башҡарырға була, берҙәм тәҙрә аша был хеҙмәт күрһәтелмәй. Кредитҡа тыйыуҙы теләгән ваҡытта кире алырға мөмкин. Был осраҡта мәғлүмәт кредит тарихында мөрәжәғәт итеүҙең икенсе көнөндә сағылыш таба.

Баймаҡта «Һомай» тип исемләнгән конкурс үтте

Яҙҙың тәүге байрамы алдынан «Айыуҡай» балалар баҡсаһында «Һомай» тип исемләнгән конкурс үтте. Бәйгелә Һомайҙың үҙе кеүек һылыу, уңған 9 ҡыҙ ҡатнашты. Тулыраҡ киләһе яҙмала.

Башҡортостанда юлдар йыл әйләнәһе ремонтлана

Быйыл 7 меңдән ашыу соҡор ямалған, тип хәбәр итәләр Республика хөкүмәтенән. Иң ҙур эштәр Тәтешле, Өфө һәм Туймазы райондарында башҡарылған. Транспорт һәм юл хужалығы министрлығынан белдереүҙәренсә, һалҡын көндәрҙә юл ҡатламы емерелеүе, соҡорҙар барлыҡҡа килеүе ихтимал. Шуға ремонт йыл әйләнәһе алып барыла. Төп маҡсат - юлдарҙа хәүефһеҙлек тәьмин итеү. Көндәр йылытҡас республикала 23 асфальт-бетон заводы эшләй башлай.

Шүлгәнташтағы күлде пилотһыҙ йөҙөү аппараты тикшерә

Бөрйән районында экспедиция ойошторолдо. Тәүге көндә махсус аппарат һыу аҫтынан 36 метр үтте. Дрон 200 метрлыҡ электр сымына тоташтырылған. Ул һыу аҫтында оҙаҡ ваҡытҡа ҡала ала. Аппаратты Өфө инженеры Ярослав Литвинов эшләгән. Музей-ҡурсаулыҡтан хәбәр итеүҙәренсә, күлгә экспедиция ваҡыты сикләнмәгән. Маҡсаты - Шүлгәнташты өйрәнеү, берҙәм карта төҙөү.

Радий Хәбиров урта һөнәри белем биреү ойошмалары студенттары менән осрашты

Башҡортостан башлығы Радий Хәбиров урта һөнәри белем биреү ойошмалары студенттары менән осрашты. Төбәк етәксеһе әүҙем ҡарашлы йәштәр менән аралашып республикала эшкә урынлашыу, һөнәри үҫеш мөмкинлектәре тураһында һөйләне.

Башҡортостан «Башҡорт сода компанияһы» өҫтөнән контролен һаҡлаясаҡ

Башҡортостан «Башҡорт сода компанияһы» өҫтөнән контролен һаҡлаясаҡ, директорҙар советында күпселекте төбәк вәкилдәре тәшкил итәсәк. Был турала эксперттар Владимир Путиндың «Башҡорт сода компанияһын» стратегик предприятиелар исемлегенән сығарыу тураһындағы Указы хаҡында фекер йөрөтөп белдерә.

Төбәктә инфраструктураны яңыртыу буйынса рекордлы күләмдә эш башҡарылды

Былтыр республикала коммуналь инфраструктураны яңыртыу төбәк программаһын тормошҡа ашырыуҙың беренсе этабы тамамланды. Уға ярашлы 21 объектта реконструкция һәм капиталь ремонт уҙғарылғайны, 115 саҡрым инженер селтәрҙәр яңыртылды. Дөйөм финанс сығымдар 1 миллиард ярым һум тәшкил итте.

Өфөлә «Үҙ ғаиләм» форумы уҙҙы

Белгестәрҙән бушлай консультация, ата-әсәләр өсөн оҫталыҡ дәрестәре, ижади майҙансыҡтар һәм башҡалар. Өфөлә «Үҙ ғаиләм» форумы уҙҙы. Күп балалы ата-әсәләр дәүләт эшмәкәрҙәре, төрлө ведомство етәкселәре үҙ-ара фекер алышып, хәл итәһе мәсьәләләрҙе асыҡланы.

Башҡорт дәүләт медицина университеты ғалимдары депрессияға ҡаршы яңы төр препарат уйлап тапҡан

Яңы дарыу әле вуз -ара кампус лабораторияларында һынау үтә. Дарыуханаларҙа һатылған препараттарҙан башҡорт антидепрессанты нимәһе менән айырыла?

Дәһшәтле йылдар шаһиты: Бөйөк Ватан һуғышы ветераны Ишҡол Мәхмүтовтың хәтирәләре

Дәһшәтле йылдар шаһиты. Әбйәлил районы Ҡаҙмаш ауылынан Бөйөк Ватан һуғышы ветераны Ишҡол Мәхмүтов 99 йәшендә булыуға ҡарамаҫтан, фронт һыҙығында булған ваҡиғаларҙы бөгөнгөләй хәтерләй. Үҫмер генә сағында ҡулына ҡорал алып, Ватан һағына баҫҡан, унан һуң әсирелектең барлыҡ михнәттәрен күргән сал сәсле яугир тураһында сюжет.

Өфөлә Раушания Бәҙретдинованың шәхси күргәҙмәһе асылды

Һынлы сәнғәттә «Емеш» образы. Башҡортостандың атҡаҙанған рәссамы Раушания Бәҙретдинованың Башҡортостан милли музейында шәхси күргәҙмәһе асылды. Экспозицияла Башҡортостандың халыҡ яҙыусыһы Зәйнәб Биишеваның милли мотивтар менән рухландырылған әҫәрҙәренә һәм яҙмышына, әлеге ваҡытта алғы һыҙыҡта Ватан һағына баҫҡан яугирҙарға арналған яңы картиналары тәҡдим ителде.

Рәсәйҙә социаль пенсия артасаҡ

1 апрелдән пенсия 14,75 процентҡа индексациялана, тип белдерә Дәүләт Думаһының Бюджет һәм һалымдар буйынса комитеты ағзаһы Никита Чаплин. Үҙгәрештәр 3 миллион ярым самаһы ил халҡына, шул иҫәптән Бөйөк Ватан һуғышы ветерандары, Ленинград блокадасылары, радиация һәм техноген һәләкәттәр ҡорбандарына ҡағыла.

Салауат Юлаев музейы ремонтлана

Башҡортостан милли музейы Малаяҙ ауылындағы музейҙа капиталь ремонт уҙғарыуға контракт төҙөнө. Уға ярашлы, бында һыу, канализация, йылытыу системаһы, ҡыйыҡ, бинаның тышҡы яғы төҙөкләндерелә. Шулай уҡ эргәләге биләмә тәртипкә килтерелә. Салауат Юлаев музейына 1965 йылда нигеҙ һалынған. Бында башҡорт халҡының милли геройының тормошона ҡағылышлы экспонаттар күрһәтелгән.