***

Ўлимдан қўрқмасман

бу қўрқув эмас
мен яшашни қаттиқ истайман
ўша туйғунинг умри
узунроқдир қўрқув умридан
гўдак ҳеч нарсадан қўрқмайди
арслон панжасини ўйнамоғи мумкин
бироқ яшагиси келади унинг
табиий бир истак
ҳаётнинг ўзи каби табиий
ҳаёт билан ўлим тенглашмоғи мумкин
икки кутб оралигида
Кўрқув соҳиб ётар дея ўйломанг
бўшлиқ ҳукм сурар бу оралиқда
устига рохатланиб чўзилса бўлар

1993

Баҳром РЎЗИМУҲАММАД

http://T.me/Bahrom_Ruzimuhammad

* * *

Паст оҳангда сўзлар эркаклар,
аёллар бошида оқ рўмол —
хонани совутар йиғи товуши.

Баҳром РЎЗИМУҲАММАД

t.me/Bahrom_Ruzimuhammad

БУ ТУН ШУНДАЙ

Тун, туннинг ортида
Унутилган қора қуёш бор,
бир қалъа бор қабристон каби жимжит
Унда мукка тушиб донолар
қора китобларни ўқир тун бўйи;
ниҳоят дарвоза олдида
иккита соқчи
қўриқлаб туришар қалъани
тонгга ўхшаш оқ одамлардан.

© Баҳром РЎЗИМУҲАММАД

t.me/Bahrom_Ruzimuhammad

* * *

Кундуз
ошкор бўлган сир
беҳуда
яна ундан ненидир кутиш

Ухла
ва уйғон уйқу ичида
илоҳий оламга
боғланганда туш

© Баҳром РЎЗИМУҲАММАД

t.me/Bahrom_Ruzimuhammad

* * *

Сайҳонликда
жийда гулига ўхшаган овоз
капалакка ўхшаб учиб юрибди
сайҳонликда
музга ёпишган янлиғ
ёпишиб турибди
жимликнинг ичига ўша капалак

© Баҳром РЎЗИМУҲАММАД

t.me/Bahrom_Ruzimuhammad

* * *

Сабр нима у
бир бурчагини танаввул қилиб бўлсайди
ёвғоннинг ўрнига қайнатар эдик
ичида яшаб бўлсайди
фориғ бўлар эдик бошпана ғамидан
байроққа ўхшаса эди ҳеч бўлмаганда
қўшиққа ўхшаса
оғзимизни тўлдирса бирпас

© Баҳром РЎЗИМУҲАММАД

t.me/Bahrom_Ruzimuhammad

* * *

Курсида савлат тўкиб
ўтирган қўғирчоқ
олис минтақадан келган сайёҳдир

Тутқунликнинг уч лаҳзасида
кўп нарса сўйлайди
жимлиги билан

Aртинг кийимидаги ғуборни
бўйинбоғини тўғирлаб қўйинг
сукути қолипдан чиқмасин
шиша кўзларининг рўпарасида
қилт этмай
турсин

Курсида савлат тўкиб
ўтирар қўғирчоқ
савлат
тўкилган
ва йиғиб олинмаган ҳеч
Кўзларида маъно
йилт этар бир бора
тўғирлаб қўйилганда унинг жимлиги

© Баҳром РЎЗИМУҲАММАД

t.me/Bahrom_Ruzimuhammad

* * *

Ярқироқ эди умидлари унинг
ҳеч нарса нур сочмаган бунчалик
ёруғликни ёритгудек важоҳати
тушлар тўрар эди бир ажойиб
бошини олишга фармон беришди
бошини кесишди умид ва тушнинг
уясини кавлаб кўмишди
бир япроқ чиқди мия қаватидан
ҳеч ким ўқий олмади тупроқдаги битикни

© Баҳром РЎЗИМУҲАММАД

t.me/Bahrom_Ruzimuhammad

‍ХУЛОСАСИЗ ЎЛИМ

Деворга уриб олди бошини
боши ёрилди
ёрилмади Хулоса

Хотинини чўри қилдилар
қул қилдилар болаларини
озод эди Хулоса

Миллатининг юзига тупурдилар сўнг
булғадилар одамлигини
Хулосанинг юзи ёп-ёруғ эди

Куни битиб
жони ҳам чиқди
шунда ҳам чиқмади Хулоса

Баҳром Рўзимуҳаммад

П. С:
Бор бўйича башарамизни очиб берадиган шеър. Сизни ҳам ҳайратга соладими битта жимитдек шеър қўлтиққа сиғмас романлар савиясию қудратидан баланд келиши?

@Jontemir_t

Tunov kun Bahrom og'ani yo'qlab borgandim. Shoir yaqinda qayta chiqqan "birinchi kitob" ini sovg'a qildi - "Tovushsiz qadam". Ko'pchilik bu shoirni bilar, hozirgi o'quvchi esa tanimasligi mumkin. Ammo ular uchun bir muhim fikrni aytaman - Bahrom Ro'zimuhammad ijodi o'zbek badiiy tafakkurida burilish, inqilob deb nomlangan. O'zi shu avlod shoirlarining ijodidan juda ko'p narsa o'rgansa bo'ladi - fikrni tasvirga bo'ysundirish, tasvirda esa ichkari-ichkari kirib ketaverish. Syurrealistik kayfiyat va syurealistik tasvir ayni shu avlod va keyingi Go'zal Begim kabi shoir ijodida yetakchilik qiladi. Umuman hozirgi she'riyatdan, o'zigacha bo'lgan she'riyatdan (Solihni istisno qilganda. Lekin Solihda tasvir emas, fikr yetakchi. Shu jihatdan mutlaqo farqlanadi) mutlaqo farq qiluvchi she'riyat bu avlod ijodi. O'qish kerak -kemtiklarimiz to'ladi - tasavvurimiz ichkarilaydi - hozir qandaydir quruqshab yotibmiz - balki qidirganimiz faqat his, fikr emas, tasavvur erkidagi tasvirdir.

Shoirning she'riy kitobi peshtaxtalarga chiqmay qo'yganiga 26 yil bo'lgan ekan. 26 yildan keyin shoir she'rlari kitob do'konlariga qaytmoqda. Men hozirgina tugatdim kitobni. Qidirganim - ruhiy lazzatni tuydim. Otning yoliga osilib tasavvur kengliklarida yoyildim.

Kitobni olaman deganlar, xabar bersin izohda, shoir va nashriyot bilan bog'layman!

* * *

Сокинликда шовқин бор
менга керак бошқача
сукун
кўзларингдан кўз
узмасам дейман
кўз дунёси теран бошқа
дунё рангсиз

сен учун бу дунёда
яшайман
овозингдан ўзга
мўъжиза йўқдир
сўзла сен мунтазам
сўзинг тугагач
рутубатли соат
бошланар шаксиз

қадаҳларда арғувон
бода
ичсак ҳушимизни йиғиб
оламиз
ўз қонимни ичгим
келади жуда
майдалагим келар
суякларимни

ярмим фариштадир ва
ярмим ҳайвон
икки олов ичра ёниб турибман
фаришта кўзи-ла
қарайман сенга
сен менга қарама
фариштам

тиззангга бош қўйдим
ўю хаёлим
гўзаллашиб кетди
лаҳзама-лаҳза
пардек енгил бошни
кўтардиму сўнг
жасадимни учиб
кетганин кўрдим

энди менга керак
бошқача сукун
токи тўкилмасин
гулларнинг қони

©Баҳром РЎЗИМУҲАММАД

http://T.me/Bahrom_Ruzimuhammad

КЕТАЁТГАН САФЛАР

Бу лаблар кулмоққа тайёр ҳамиша
ишон: сабр остидаги олтинни
наинки оқ,
қора қўллар билан ўмармоқ мумкин.
Титрама.
Кузатиб туришибди
агар йиқилсак
узала тушамиз минг қорачиққа.
Агарда инграсак
акс-садо берар икки минг жарлик.
Титрама,
титрама...

© Баҳром РЎЗИМУҲАММАД

@Bahrom_Ruzimuhammad

КАПАЛАК КАБИ

Бир лаҳзани юлиб ол
ўтиб кетаётган вақтдан —
тилла тусига қайта бўя уни
сўнг эса акс эт
ўша лаҳзанинг ялтироқ сиртида
ёниб
осмондаги қоронғиликни
кесаётган капалак каби.

Баҳром РЎЗИМУҲАММАД

t.me/Bahrom_Ruzimuhammad

#Bir_kun

Pastmodernizm

Kunlardan bir kun postmodernizm usulidagi she’rlari bilan tanilgan shoir Bahrom Ro‘zimuhammad shoir do‘sti Muhammad G‘afforga telefon qiladi:
– Muhammad! Eshitdingmi, biz pastmodernizm haqida kitob chiqaryapmiz.
– Juda yaxshi! Darvoqe, bu kitobda men ham bormanmi?
– Sen tushunmading, – deydi shoir masalaga aniqlik kiritib. – Men postmodernizm emas, pastmodernizm deyapman.
– E shundaymi? Unda kerak emas, past ketish yo‘q!

Sh.Otabek

@yoshlikjurnali
yoshlikjurnali.uz

AФСУНГAР

Осмон ям-яшил эди
қизил булутлардан
нимпушти рангда шарбат ёғарди
Aзроил
тик боқди
бу манзарага

Фаришталар
қулоқни тешгудек жарангдор овозда 
қудуққа қулаган зангори эчки
хусусида қўшиқ куйларди

Тамаки тутуни
учоқ изи каби шакл қолдирди ҳавода
нимпушти манзарага ҳошия бўлди

Aзроил панжасидан 
айнан шу лаҳзада 
қутулди арвоҳлар

Қандайдир бир маҳлуқ бор овози билан кулди 
сўнг аввалгидек жимлик чўкди 
ерга осмонга

Баҳром РЎЗИМУҲAММAД

http://t.me/Bahrom_Ruzimuhammad

СЕН ЭШИТГАН ЭРТАКЛАРИНГНИ

Сен эшитган эртакларингни
қуёшга ва менга тақдим этасан
ахир хўроз қичқириғи
уйғотиб юборди болалигимни

шунда оғир силкиниб қўйди
аквариумга қамалган митти кит
ёғдулар пар каби сочилди
ва қўлим ухлади ҳавода

кўздан ичкарида йўл йўқ
сўздан ичкарида йўл йўқ
аммо хўроз қичқириғи ортига
шафақранг қишлоғим бекиниб олган

бир зина тушаман зинапоядан
шубҳага қоришиб кетар ҳаётим
сени зўрға топдим-ку нега
нега севма қўйсам севгилим

болалик овози билан сен
қушга ўхшаб чуғурлайсан бетиним
барибир эшитган эртакларингни
менга ва қуёшга тақдим этасан

1998

©Баҳром РЎЗИМУҲАММАД

http://T.me/Bahrom_Ruzimuhammad

* * *

Ярқироқ эди умидлари унинг
ҳеч нарса нур сочмаган бунчалик
ёруғликни ёритгудек важоҳати
тушлар кўрар эди бир ажойиб
бошини олишга фармон беришди
бошини кесишди умид ва тушнинг
уясини кавлаб кўмишди
бир япроқ чиқди мия қаватидан
ҳеч ким ўқий олмади тупроқдаги битикни

© Баҳром РЎЗИМУҲАММАД

t.me/Bahrom_Ruzimuhammad

КЎК КЎЙЛАКЛИ ҚИЗ

У юрганда – йўллар чароғон,
қизилликка бурканиб дала,
қадамидан бўлур машъала –
чарос кўзи мавжланган замон.

Ёнар эди ёноқлари ҳам...
Ипак сочи қора қаймоқдай
елкасида товланган чоқда
ҳар юракка ташларди қадам.

Оқ навога йўғрилган хилқат,
у гул эди қизга айланган,
ғоят нафис табассум билан
қараганда забт этарди қалб.

У адашди, алам беҳуда,
парчалади ногоҳ ғурурин,
юлдуз нури дея ой нурин
гўё кўрди сувда – кўзгуда.

Руҳим ичра термулар элас...
О, табиат, уйғотма уни,
севгимизни илк баҳор куни
яшил тусда эсга олсанг бас.

1979

©Баҳром РЎЗИМУҲАММАД

http://T.me/Bahrom_Ruzimuhammad

Sen ko‘zsiz qarasang,
ko‘zoynaksiz tikilsang ajal
meni bosaverar xavotir.

Bahrom Ro'zimuhammad

t.me/Bahrom_Ruzimuhammad