حاول تعوّد على التطنيش 
‏صمتك عن الناقص يهينه 

‏لايشغلك من يهز الريش 
‏أغلب طيور البلد زينه 

‏أمسح على روسها بشويش 
‏ضعوف الأجواد مسكينه

‏كم واحدٍ مايبيك تعيش
‏« لو إن الأعمار بيدينه »

لشاعرها

مدخلك بالله غيابك لا يطول
مابعد طول الغياب الا القطيعه

والله اني بحاجتك اكثر من اول
صاحبن شاريك تكفى لا تبيعه

فلاح الدليقم

يمنى تمد وماتهاب .. التكاليف
ويمنى خذاها الشح لين .. المذله

الطيب الطيب عليه .. التحاسيف
ولا ردي الساس محدن .. فطن له

ياوجد قلبي وجد من جاله .. الضيف
يبغا يدسم شاربه وما حصل .. له

المال لابو المال ماهو على .. الكيف
كم من كريمن قيده في .. محله

محمد مسعود العرجان

مافى يدى حيلة مدام الجفى حال
"بينى وبينه" والوصــــل ضاع لبه

عساة يهنى فى حياتة وتنهال
مزن السعادة والفرح له تصبه

وعسى همومة ماتحده على اللال
وعساه مايشكى لاحــــد غير ربه

اكذب واقول انى نسيتة ولازال
يجرى مع دم الشرايين "حبه"

هذا هو المكتوب لوهو برى الحال
واللي احبه راح . . للي يحبه

لشاعرها

عط الليل فرصة من جديلك يا روح الروح
‏معك ودي إن الشمس تشرق بعد بكرة

‏انا اشفق على لبيه من صوتك المبحوح
‏لا حلّ الظلام ، وعوّد الطير في وكره

‏تحت عنقك الفارع ، ورا زرارك المفتوح
‏ما باقي عليّ إلا ألحق السكرة : السكرة

‏ على شباك دارك يغنّي : حمام الدوح
‏واغني عليك : البيت والقاف والفكرة

لشاعرها

لا تنشديني عن الشعر و جماهيره
‏ابطيت عن ساحة الشعّار من غبتي

‏طلّي .. و اسخّر لك القاف و تصاويره
‏وجهك هو ( الداعم الأول ) لـ موهبتي

‏لا من تمعّنت في نوره و نوّيره
‏لقيت ما يرضي غروري و تجربتي

‏اعطاك رب الحِسن ما لا عطى غيره
‏حتى على قلوبنا الخضرا تسببتي

‏رباك من تكرم يمينه مساييره
‏لا خاب ظنه معاك ولا بعد خبتي

لشاعرها

النوم ما ينطاق والفكر مشغول
وأزريت أحصّل سَلوتي وإنشراحي

مدري وش أسوّي ولا أدري وش أقول
أشكي وأعاني من جميع النواحي

أسعى وأجي وأروح وأصول وأجول
وهمّي خويّي في المِجي والمراحي

وأحيان ودّ إنّي ما قابل ولا زول
إلاّ أنت يا مُشبِه ظِبَيّ البراحي

يابو ثمانٍ كنّها صفّت اللول
ماعاد باقي فالجسد عضو صاحي

أشيل من جور الدهر جُور وحُمول
مَير الجِمل لا ضامِه الحِمِل طاحي

وأنته عن اللي صار بي منك مسؤول
اسمعْ كلام الجِدّ خَلّ المزاحي

أمّا نُحُطّ لحُبّنا حَدّ معقول
ولا تجمّل بيّ وأطلِق سراحي

مرزوق المقاطي

الفقر مثله مثل داء الخبيث اللاوي
للكريم اللي ( عيونه ) للعلا متجهه

السلف في نظرته مثل ابرة الكيماوي
تقضي اللازم وتلعب في ملامح وجهه

لشاعرها

انا لك الله ساعة ماتبيّنتي
‏عادت مياة الحياه الى مجاريها

‏تبختري في طموحاتي وسلطنتي
‏لا تهمك الناس قاصيها ودانيها

‏اهم حاجه نعيش العمر انا وانتي
‏باقي الامور الصراحه مالنا فيها

لشاعرها

أنا وين ابلقى لي خويٍ يذب الريع ؟
‏لو أنه كذوب ٍ يصرف الحكي من كيسه

‏أبي ديرة ٍ من دونها الإتصال يضيع
‏و جو ٍ خلا تطرق ضلوعي نسانيسه

‏قلبي من كثر م هزه الشوق و التلويع
‏فقد راحته وأغلب شعوره وأحاسيسه

‏حلالاه لو قلوب بعض العرب لـ البيع
‏أبطق لي قلب ٍ جديد بـ قراطيسه

لشاعرها

يمه كبرتّ وشفت بالوقت خذلان
وفنجال حزني من جروحي مهيّل

يمه ابرجع طفل مايعرف احزان
وانام عندك وابتسم واتخيّل

وقصي علي تريترا وابا الآذان
والحصني اللي بالعقاب يتحيل

وقولي ليامن نمت بالحوش عطشان
نم ياولدي .. يروي ضماك الغزيّل

يمه كبرتّ " وكل ماشوف وغدان
ودي لو ارجع مثل ماكنت عيّل

كلمات الشاعر / ممدوح زيد الحسيني

الناس تسال قبل تدرس مادرست
وإذا درست تقول وين الشهاده

وعقب الشهاده تسألك ماتوظفت
الناس راحت وأنت فوق الوساده

وعقب الوظيفه تسألك ماتزوجت
ترا العزوبي عيشته في نكاده

وعقب زواجك تسألك هاه مانجبت
ولافيه حول اهلك طاري ولاده

بعدين ترجع تسألك ماتقاعدت
انت بوظيفه مانت عاد بعباده

ماباقي الا تسألك هاه مامت
صار السؤال لكل هالناس عاده ،،

كلمات الشاعر / ممدوح زيد الحسيني

انا بشر لي في حياتي غرامي
اصنع من احساسي دول عشق واجيال

واللي حظت عن غيرها بإهتمامي
بآموت عاشقها على كل الاحوال ..

علمتها فن الغزل من كلامي
وهي علمتني اضحك اليا شوش البال
"
اليا اقبلت قامت تراجف عظامي
وان دبرت .. كنه ضرب الارض زلزال
"
تحبني وتحب عزة مقامي
واحبها واحب في خدها الخال
"
من عينها تروى القلوب الضوامي
في وجهها تقراء ' تبـارك والأنفال
"
ياغارة الله وين اودي هيامي
لامن على جيد الظبي لفت الشال
"
لا تسألوني بالغلا وش علامي
وعلى فراق عيونها لييه ماحتال
"
طقت كعبها في البلاط الرخامي
تلوي رقاب القوم رجـال رجـال
"
كلمات الشاعر / مهدي بن سميطان ...

الليله اهداف المحبه بلنتي
والزاوية في ثومة القلب تسعين
"
على دقاق سخيّف العرق منتي
ياورد يايشموم ياخوخ ياتين
"
لا شك في عمر الشباب امتحنتي
انتي نتيجة حُور عين وحَوَرْ عيّن
"
استحلفك باللي عليه استعنتي
اللي خلق من قبّلتك .. قٌبلة الزين
"
يوم ان ابوك انتجّك وشلون كنتي
كنتي بعد ورعه .، سوات الوراعين !؟
"
الناس مخلوقين من طين .. وانتي !!
اسغفرالله ' كيف جيتي من الطين
"
كلمات الشاعر / مطرب بن دحيم

كانك مطول بالزعل منت راضي
ماني مداري خاطرك صد زعلان

روح فجوج الله وساعن عراضي
ماعشت لجل ارضيك ولا ارضي فلان

بعض الامور يجوز فيها التغاضي
وبعض الامور اللي يتغاضاه غلطان

ماني على بعض السوالف رياضي
ماكل زله تنحسب زلة لسان

حاظر بحاظر ردها دون قاضي
الصمت بعض احيان نقصن وحقران

اول اطوف لك على شان ماضي
واليوم مالك لا مكانه ولا شان

فلاح حمود الدليقم

تشدن القمراء واشوفك لها نـور
وادري انها منك خذت فتنة الليل

الحور والله يغيرن منك الحـور
وكل البنات وكل من خالطك جيل

فواز عنيف التومي

تشدن القمراء واشوفك لها نـور
وادري انها منك خذت فتنة اللـيل

الحـور والله يغـيرن منك الحـور
وكل البـنات وكل من خالطك جيل

فواز عنيف التومي