الفيزياء ⚛️ : عند زوج اساتذة الأول هو للي اعتمدت عليه بزاااف وهو الأستاذ عبد اللطيف .... محاسن الأستاذ أنو يقدم فيديو شامل للدرس (وأحيانا تجميعية) مع شرح مفصل وكذللك تمارين متدرجة الصعوبة من الباكالوريات السهلة تى أفكار العلامة الكاملة 💯 ومنهجية الإجابة وتنظيم الورقة كل هاذي يتكلمك عليها وكلها موجودة فاليوتيوب في التجميعيات كما أنو يعاود ينشر الفيديوهات تاع منصتو فاليوتيوب يعني بلا متدخل عندو راح تستفاد الكثير لكن النقطة السلبية فيه أنو يخدم بزاف على العلامة الكاملة يعني تلقاه مثلا في بعض التبسيطات والعلاقات كي يكون يشرحهم بسرعة ويفوت بعض الخطوات يعني لازم تكون شوية طالع فالنيفو وتخدم على العلامة الممتازة 👌.... ثاني أستاذ وهو عبدالله اخترتو لأن سلسلة الميزان تاعو اسطورية فيها تمارين فريدة من النوع ويخليلك pdf تحل منو امبعد تشوف حلك لكن حاجة مساعدتنيش أنو فالدرس والتمارين يشرح ببطء شديد لدرجة أني نديرو 2× ولكن هذا يمكن يساعد الأشخاص للي ميستوعبوش بسرعة فالملخص أنو اقرا عند عبد اللطيف اذا كنت طالع فالمستوى وتطمح لمعدل ممتاز واقرا عند عبد الله إذا كنت حاب شرح بطيء يخليك تستوعب 😃

وغدا انشاء الله نزيدلكم المواد الباقية على حساب الوقت إذا تيسرلي ان شاء الله
see you later 🫠

استكمالا لواش هدرت البوست للي فات عن الأساتذة للي اعتمدت عليهم وقريت عندهم عام الباك 😀 ونبدأ بمادة اللغة العربية للي كيما تعرفو غيها جزئيين👇👇

جزء البناء الفكري🌱 : للي اعتمدت فيه على أستاذ بوبكر مبروك واخترت هذا الأستاذ خصيصا لأنو يعرف يشرح الأمور المتعلقة بالبناء الفكري(كيفية الاجابة على أسئلة النص ،أنواع الشعر ،تلخيص النص....) وعندو أسلوب لغوي رائع ،يعطيك منهجية ونصائح لكيفية الإجابة ،فيديو مختصر سريع بلا مايطول عليك،يعطيك كل أنواع الأسئلة المحتملة (بديت نهدر شغل راني نديرلو pub 😏) وبحكم أني قريت عندو في الثانية عرفت أنو أستاذ مختص فالبناء الفكري لأنو لوكان تبعو من ناحية البناء اللغوي تلقاه مشي حاجة وميشرحش بالتفصيل (مثلا فديو تع شرح إذا وحالاتها تلقاه شارحو في 9 دقايق وهاذي متكفيش أبدا) كما أنو يليكيدي بزاف فالقواعد فهو بالنسبة ليا أستاذ يصلح غر في البناء الفكري واعتمدت عليه من هاذي الناحية فقط 🔻.

البناء اللغوي 📚📖: معظم القواعد وأهمه قريتها عند الأستاذ حيقون والاستاذ شريفي لكن أنا نرشح أستاذ حيقون لإنو أسلوبو فالشرح نحسو صارم ومايتعدا أي نقطة يعني يقلك أي حاجة منين جات ووعلاش وننصحم بسلسلة العلامة الكاملة للي راهو دايرها فاليوتيوب كما أنو من بين العفايش للي دارها وطاحت فالباك قيم الثورة السؤال الثالث الموضوع الأول كنت محفظتهمش أو مقريتهمش وهو دارهم فهاذي السلسلة وأنا مكفانيش الوقت نقراها (دارها فالشهر اللخر) تسما خلطت برك راحولي 3 نقط ونقطة اخرى ربما راحت فجزء القواعد على الاعراب تسما ديت 16 كيما الحابس.... والأستاذ شيريفي شرحو للقواعد ممتع وفعال يعيني جرب تقرا عند للي حبيت منهم لزوج ملاح أو حتى ميحتاج تقرا عندهم إذا كنت نظامي يعيني إذا كان أستاذك فالقسم مليح ويشرح الدرس مليح وإذا كنت حر جرب اقرى عند هذو وإذا كنت تعرف أساتذة أحسن دير عندهم 👌👏

اما مادة الإسلامية ☪️: ببساطة متحتاج ولا أستاذ تقدر تقراها وحدك أنا اعتمدت فقط على كتاب الأستاذة بو سعادي للي كافي ووافي وشامل اعتمدتو كمرجع تاعي عام طول
وهو مشي المرجع الوحيد وإنما كذلك هذي القناة للي راكو تشوفوها فوق 👆 وحطيتهالكم من قبل تعاون بزاف معمرة ملخصات ... تسما هذا للي كان مرجعي فالإسلامية إضافة إلى استاذة القسم وللاحرار تقدرو تعتمدوا على قناة الأستاذة بوسعادي قريت عندها في 15 يوم الأخيرة أستاذة مشاء الله تعاونكم وتلقاو قاع الدروس عندها كامل مع حل نماذج شاملة. يعني مادة الإسلامية والله ساهلة بزاف بلاك تتعقدلكم شوية كي تلحقو للميراث والربا بصح تتاقلمو عادي don't be afraid🤌... انا راحتلي غير نقطة في السؤال تاع استخراج مصدر التشريع فالموضوع الثاني تفرفشت فيه وطحت فالفخ عليه نقطة وتاني السؤال تاع مقارنة كان صعيب مي الباقي كلش سهل تعريف العقيدة شكون ميعرفوش ... والحمدلله ديت 18.5 فيها 🙂

Hello guys I hope you doing well ❤️‍🩹 نعاود نذكركم كيما قلت لاي واحد بعتلي وسقساني أنو إذا كنت ضعيف فاللغات فرنسي او انجلي او كلاهما لازم نبدا تتعلمهم دك الآن وفي الحال ... وتتعلمهم كلغة ومشي كمادة لانو على سبيل المثال فالفرنسي إذا مكانش عندك رصيد منها ومفهمتش النص سلام عليكم مبروك عليك علامة عشرة فما أقل لانو موضوع مادة الفرنسية كامل يتمحور حول النص يعني فهم النص هو الأساس.

نبداو بمادة الانجليزية:
let's start with the English module:
حرفيا قريت عند عديد من الأساتذة في المادة وكانو منهم أساتذة صح ملاح وأساتذة مشي حاجة ومشي قد المستوى وللي هما منصوري ،أمين ، عبد المومن، أستاذة ليديا. دك نهدر على كل واحد فيهم ونتوما شوفو للي يناسبكم على الأكثر خيرو ثلاثة أساتذة :
منصوري: هذا أول أستاذ بديت نقرا عندو عام الباك بانلي مليح فالبداية لكن لقيت الفيديوهات تاعو مشي منظمة بزاف ومفيهاش المعلومات الكافية مثلا راني شافي كان يهدر على القواعد وبدا يليكيدي برك مفهمت والو🫤 ... كي شرحتهم شيخة تع قسم فهمتهم عادي ومكانوش صعاب زيد راهو ناشط غر فالزوم ومولاش يحط بزاف فاليوتيوب😮‍💨 للي حب يعتمد عليه ننصحو يعتمد عليه فالمصطلحات مليح فيهم مثلا كي يجي يحل اختبار يشرح قاع الكلمات ويكتب معناهم هذي مليحة فيه بزاف.
ليديا : يعني مقريتش عندها بزاف قريت عندها من الفصل الثاني وطلع، كانت استاذة فالمستوى تشرح وتترجم وتعطيك طرق جمع بيهم نقاط بلا ما تفهم النص (وهي ثاني تقري فرنسي) استاذة مليحة يعني تقدرو تتعتمدو عليها حتى فالقواعد تاع الفصل الثاني كلهم قريتهم عندها😉.
عبد المومن:أنا نرشحلكم هذا الاستاذ لانو استاذ قمة صراحة ندمت كي عرفتو فآخر السنة لكن فادني بزاف خصوصا فيديو المراجعة النهائية تاعو اسطوري تقدر تشوفو الان رح يفيدك بزاف ... هذا الاستاذ يشرح بشكل بسييط واسلوب مريح ميتسرعش وميليكديش وداير فقرات ستوندار رح تستفادو من قناتو ✅
اخيرا أمين: كيفكيف ندمت كي عرفتو اخر السنة تهلا بزاف فقناتو غنية بالشروحات وطرق كتابة الفقرات وداير فيديوهات شابين يعاونو كيما فيديو 17 موضوع هذاك عاوني وفكلي عقدة القواعد🙃.

ننتاقلو إلى الفرنسي 😑وهذي منحبش جماعة بزاف يتبعوني بحكم اني غبي في هذي المادة ومنعرفهاش واصلا قريتها الشهر اللخر 🙂 واصلا كاين زوج برك
بروف النجاح: هذا استاذ ما شاء الله اسطورة لازم تشوفوه حتى وان كنت متفهمش الفرنسي هذا الاستاذ يعاونك بزاف محترف فالمادة المشكل فقط أنو مشي مهتم بصحاب الباك بزاف تسما ادخلو برك للتجميعة تع الباك تاعو تساعدكم تسما كاين فيديوهات محدودة ليه 🤐.
أستاذ رضا للي وليت نكرهو دكا: يقدر تقول يشرح مليح ويتناول قاع النواحي بصح نحس أسلوبو فيه بزاف تفاخر واستعلاء ومينداك يقعد يحرش فالقراية تسما مننصحكمش بيه بزاف كي شغل يدير الهف برك 😒.

أخيرا نقوللكم بلي فاللغات مشي الاستاذ هو للي يحددلك نقطتك انما مدى فهمك للغة واتقانها هو المفتاح والاجتهاد يكون شخصي متستناش الاستاذ يكتبلك ترجمة كل الكلمات لازم نتا تتعلمها وحدك وتكسر راصك وحتى فالمستقبل والجامعة راح تسحقها مشي فالباك برك
Just study hard then you'll see the results 😶‍🌫️
{وَمَنْ يَتَوكَّل على الله فهو حسبه} وفي اية {فإذا عزمت فتوكل على الله}

سلام عليكم خاوتي ... عندي لي كنترول سمانة الجاية (كي شغل فروض )وراني ناقص فالتحضير تسما جميع واحد يبعث يسقسي فالخاص أو فالقروب
https://t.me/bacwithexenomchat مراحش نجاوب إلى غاية يوم الأربعاء نرجع إن شاء الله 👋 وادعولي معاكم بالتوفيق والسداد😓