Бишкектеги Диагностикалык борбордогу көйгөйдөн улам саламаттык сактоо министри Эркин Чечейбаев сөгүш алды. Эки ай мурун кызматка киришкен министр эки күндө маселени кантип чечет?
8-майга караган түнү Кремль жарыялаган үч күндүк жарашуу күчүнө кирди. Украин президенти Зеленский ок атууну 30 күнгө токтотууга үндөп келатат.
Бишкекте Жеңиштин 80 жылдыгына арналган аскердик парад өттү. Согуштагы кыргызстандыктардын салымы тууралуу жаңы тарыхый фактылар жарыяланды.

Америкалык кардинал Роберт Фрэнсис Прево Рим папасы болуп шайланды. 8-майда конклавдын – понтификти шайлоонун экинчи күнүндө ал добуштардын көпчүлүгүн алды. Леон XIV деген ысымды тандап алган 69 жаштагы диниятчы АКШдан чыккан алгачкы папа. Ал Чикаго шаарында туулган.

Жеңиш күнү - Орусияда чейрек кылымдан бери бийликте турган президент Путиндин, жалпы эле Кремлдин саясатында пропаганданын көзүрүнө айланган. Айрыкча Украинада согуш жүрүп жатканда Москвага бул аба менен суудай зарыл экени даана көрүнөт.

АКШнын президенти Дональд Трамп Киев менен Москва ок атышууну 30 күнгө токтотуу талабын аткарбаса, санкцияга илинерин эскертти. Бул тууралуу ал бейшембинин кечинде өзүнүн Truth Social баракчасына жазды.

Азербайжандын президенти Илхам Алиев Москвага баруудан баш тарткандан кийин Кызыл аянттагы парадга 30ка чукул лидер күбө болду. Көпчүлүктүн көңүлү Украинага каршы согушта Кремлге ишенимдүү өнөктөш болгон Кытайдын лидери Си Цзинпинге бурулду.

Украинада согуш жүрүп жатканда Кызыл аянттагы аскердик парадга 30дай лидер күбө болду. Айрым эксперттер белгилегендей, Москва Жеңиш күнүн саясий пропаганданын куралына айландырдыбы?

Бишкекте жүздөгөн киши жүрүшкө чыгып, Ата мекендик согуш маалындагы улуу муундун эрдигин эскеришти. Алматыда "Баатырларга таазим" деген акция өткөрүүгө бийлик уруксат берди.

"Согуш болбосун" деп ураан чакырганыбыз менен соңку маалда жаш муунду милитаризация идеясына сугаруу жайылдыбы?

Еврошаркет Орусия боюнча атайын трибунал түзүү чечимин колдоду

Украинанын Европа Биримдигиндеги союздаштары Орусия бийлигинин өкүлдөрүн жоопко тартуучу атайын трибунал түзүү чечимин колдошту. Бул тууралуу документке Украинага каршы орусиялык агрессияны уюштургандар үчүн атайын трибунал түзүү боюнча коалицияга кирген мамлекеттердин тышкы иштер министрлери кол коюшту. Башкы дипломаттардын жолугушуусу 9-майда Украинанын Львов шаарында өттү.

"Львов билдирүүсү" мындай трибуналды түзүүгө зарыл укуктук чараларды иштеп чыгуу жумушунун жыйынтыгы экени белгиленди. Билдирүүгө кол койгондор башка мамлекеттерди да бул демилгеге кошулууга үндөштү.

Reuters белгилегендей, трибунал ишин Европа Кеңешинин алдында жүргүзөт жана келерки жылдан тартып кызматын аткара баштайт.

@azattyk_radiosu

⚡️10-майда эртең менен Пакистандын өкмөтү Индияга каршы «Баньян ун Марсус» («Бекем чеп») деп аталган чоң аскердик операция баштаганын жарыялап, муну "агрессияга жооп" деп мүнөздөдү.

Бул жарыя Пакистандын армиясынын расмий өкүлү, генерал Ахмад Шариф Чоудри Индияны пакистандык аба базаларына, анын ичинде Исламабаддан 10 чакырым алыстыктагы Равалпиндиде жайгашкан Нур Хан базасына ракеталык чабуул койду деп айыптагандан кийин жасалды. Нур Хан базасы өлкөнүн аскердик командачылыгын штаб-үйү болуп саналат.

Чоудри "коргонуу максатында агрессияга чукул арада жооп кайтарыларын, Индиянын ракеталарынын көбү абадан коргонуу системасы менен жок кылынганын, өлкөнүн аба күчтөрүнүн объектилери зыян тартпаганын" айткан.

@azattyk_radiosu

‼️Түркияда кармалган кыргызстандык мугалим Азамат Нурмат уулу үй камагына бошотулду

Стамбул аэропортунда кармалган "Маариф" мектебинин мугалими Азамат Нурмат уулу үй камагына бошотулду. Бул тууралуу ал өзү "Азаттыктын" кабарчысына 10-майда кабарлады.

Маалыматка ылайык, Азамат Нурмат уулу эч жакка кетпөө шарты менен эркиндикке коё берилген. Жакын арада анын үстүнөн өтчү жараяндын мөөнөтү белгилүү болору маалымдалды.

Нурмат уулу Түркияда эч кандай мыйзамсыз иш кылбаганын, аны сотто далилдөөгө аракет кыларын кошумчалады.

Быйыл 28-апрелде Кыргызстандын тышкы иштер министринин орун басары Алмаз Имангазиев Азамат Нурмат уулу диниятчы Фетхулла Гүлендин “Хизмет” (Түркия “Фетхуллачы террордук уюм” деп жарыялаган) кыймылына байланыштуу кармалганын билдирген.

@azattyk_radiosu

Зеленский Москванын бетме бет сүйлөшүү өткөрүү чакырыгын жакшы жышаан катары баалады.
Ал 11-майда X социалдык түйүнүнө "орусиялыктардын согушту токтотууну ойлоно баштаганын" оң жылыш деп жазды.

Москвада түндө өткөн басма сөз жыйында Путин Украина менен европалык лидерлердин 30 күнгө чейин ок атышууну токтотуу сунушуна моюн толгоп, анын ордуна Киев менен "эч кандай шартсыз" тынчтык сүйлөшүүсүн Стамбулда (15-майда өтүшү мүмкүн-ред.) өткөрүүнү сунуштады.

Путин Орусия менен Украинанын 2022-жылы апрелде, Москва 24-февралда коңшусуна кол салгандан бир канча күндөн кийин башталган тынчтык сүйлөшүүсүн кайра жандантууга ыктап турат. #rfe_rl

@azattyk_radiosu

Президент өзгөчө кырдаалдар министри Ажикеевге катуу сөгүш берди

Президент Садыр Жапаров жүктөлгөн милдеттерин тийиштүү аткарбагандыгы үчүн деген негизде өзгөчө кырдаалдар министри Бообек Ажикеевге катуу сөгүш берди. Бул тууралуу мамлекет башчынын басма сөз кызматы билдирди.

Жакында эле социалдык тармактарда аскердик форма кийген бир нече адамды башы менен жер сүздүрүп коюп, белгисиз бирөө оозго алгыс сөздөр менен сөгүп жатканы тартылган видео тараган. Бул армиядагы чоңсунуу боюнча талкууну жандантып, коомчулуктун сынына кабылды.

Бул окуя ушул жылдын февраль айында Өзгөчө кырдаалдар министрлигинин аскердик бөлүктөрдүн биринде болгону белгилүү болду. ӨКМ Бообек Ажикеевдин тапшырмасы менен бул факты боюнча министрликтин тийиштүү кызматтарынын катышуусунда ыкчам ички иликтөө иштери жүргүзүлгөнүн кабарлады.

@azattyk_radiosu

‼️Өкмөт Кыргызстанга цемент ташып келүүгө уруксат берди

Министрлер кабинети Кыргызстанга цемент ташып келүүгө салынган убактылуу чектөөнү алып салды.

Цементти импортуна ушул жылдын 31-мартында жарым жылдык тыюу салынган. Өкмөт бул чечим ички рынокту коргоо жана ата мекендик өндүрүштү колдоо максатында кабыл алынганын билдирген.

Акыркы күндөрү Кыргызстанда цементтин тартыштыгы байкалып, баасы көтөрүлгөн.

@azattyk_radiosu

Аскер бөлүктө жоокерлерди чекеси менен жер сүздүрүп, кыйноо көрсөткөн видео интернетте тарады. Кыргыз армиясында чоңсунуу менен зордук-зомбулук качан токтойт?
Украин президенти Зеленский орус лидери Путин менен көзмө көз жолугууга "даяр" экенин айтса, Кремль сүйлөшүүнү Стамбулда өткөрүүнү сунуштады.
Орусиядагы кыргызстандык мигранттардын документтерин легалдаштыруу 1-сентябрга чейин узартылды. 80 миңдей мигрант айтылган мөөнөткө жетишеби?

Эл аралык жарандык авиация уюму малайзиялык учактын кыйрашына Орусия жооптуу деп тапты

Эл аралык жарандык авиация уюму (ИCАО) "Малайзия аба жолдору" компаниясынын 2014-жылдын июлунда Амстердамдан Куала-Лумпурга багыт алган MH17 рейсинин Донбасста кыйраганы үчүн Орусия расмий түрдө жооптуу деп тапты. Кырсыктан 298 адам каза тапкан.

Аталган эл аралык уюмдун кеңеши 12-майдагы чечиминде Орусияны Эл аралык жарандык авиация боюнча конвенцияны бузган деп айыптады.

Кеңеш Орусидан компенсация төлөтүү маселесин кийинчерээк карай турган болду.

Австралия жана Нидерланд учак кырсыгына байланышкан ишти 2022-жылы БУУга караштуу Эл аралык жарандык авиация уюмуна өткөрүп берген.

Кыйраган учактагы жүргүнчүлөрдүн көбү Голландиянын жарандары болчу, мындан тышкары Австралиянын 38, Британиянын 10 жараны, Бельгия жана Малайзиянын атуулдары да бар болгон.

@azattyk_radiosu

Шаардык сот укук коргоочу Карасартованы абакта калтырды

Бишкек шаардык соту 13-майда абактагы укук коргоочу Рита Карасартованын бөгөт чарасын карап, өзгөртүүсүз калтырды. Ошондой эле анын кармалышын мыйзамдуу деп тапканын “Азаттыкка” адвокаты Жаныш Бараков билдирди.

Укук коргоочу Рита Карасартова 14-апрелде кармалган, 17-апрелге караган түнү Свердлов райондук соту аны бир айга камакка алган. Райондук сот 30-апрелде анын абактагы мөөнөтүн 12-июнга чейин узарткан.

Кармалардын алдында Карасартова өз үйүндө тинтүү жүрүп жатканын Фейсбукка жазып, буга Тилекмат Кудайберген уулуна (Куренов) таандык делген катты өзүнүн социалдык баракчасына жарыялаганына байланыштырган.

@azattyk_radiosu

Улуттук банктын маалыматына караганда, 2024-жылдын жыйынтыгында сырттан Кыргызстанга жеке жактар которгон акча 2,9 млрд долларды түзүп, 2023-жылга салыштырмалуу которуунун көлөмү жогору болду. 2023-жылы өлкөгө 2,7 млрд доллар которулган. Эң көп акча которуулар былтыркы жылдын август, сентябрь айына туура келди.

Негизинен акча которуулардын басымдуу бөлүгү Орусияга тиешелүү. Орусияда расмий түрдө 376 миң кыргызстандык миграциялык каттоодо турат. Мындан тышкары башка мамлекеттерден которуулардын көлөмү да жогорулаган.

@azattyk_radiosu

Жалал-Абадда эл аралык аэропорттун курулушу башталды


Сузак районунда 13-майда “Жалал-Абад” эл аралык аэропортунун курулушу башталды. Курулушка капсула салуу аземине президент Садыр Жапаров да катышты. Жаңы салына турган имарат эки кабат болуп, аянты 10 миң чарчы метрди түзөт. Аэропорт саатына 350 жүргүнчүнү өткөрүүгө ылайыкташат.

Аба майдандын учуу-конуу тилкеси 3800 метр болуп, эки рулеждик жол жана алты учак токтотуучу жай курулат. Бул аэропорт 4E категориясында салынып, Boeing 737, Airbus A320 жана A321 сыяктуу чоң учактарды кабыл ала алат.
https://www.azattyk.org/a/33412482.html