Ноокаттагы “Сахаба” стадиону жылына бир жолу кудум байыркы Римдеги Колизейге айланып, мында Фергана өрөөнүнүн балбандары күчүн сынашат. Бул күрөш жүздөгөн жылдардан бери өтүп, ушул жерден далай чемпиондордун далысы жерге тийип, далай жаңы ысымдар өрөөнгө таанылган.

Клооп Медианын дагы бир журналисти Абдил Төрөбаев сурак берип жатат. Кечээ журналисттер суракка алынып, экөө 48 саатка кармалды.

Орусия Украинага 2-июнда Стамбулда сүйлөшүүнү сунуш кылды. Ал арада АКШнын президенти Дональд Трамп украин жана орус лидерлери менен жолугушууга даярдыгын айтты.

Бишкекте алты курулуш компаниясына эскертүү берилди. Компаниялардын айрымдары лицензиясынан ажырап, кээлери ишин токтотту.

Израилдин бийлиги оккупацияланган Иордан дарыясынын батыш жээгинде 22 жаңы конуш куруу планын жактырды. Бул – конуштарды кеңейтүү боюнча акыркы ондогон жылдан берки эң ири долбоор. Айрым өнөктөштөрдүн санкция эскертүүлөрүнө карабай кабыл алынган чечим тууралуу Израилдин коргоо министри Израэль Кац жана финансы министри, ашынган оңчулдардын өкүлү Бецалель Смотрич социалдык тармактардагы баракчаларында жарыялашты.

Орусия Украина менен тынчтык сүйлөшүүлөрүнүн эмки айлампасын 2-июнда Стамбулда өткөрүүнү сунуш кылды. Украина ага макул болгонбу же жокпу айтыла элек. Ага чейин Киев сүйлөшүүлөр алдындагы позициясын чагылдырган меморандумду Москвага тапшырганын, Орусия өз документин бере электигин билдирген.

Бишкек шаардык соту укук коргоочу Рита Карасартованы абакта калтырды

Бишкек шаардык соту 29-майда укук коргоочу Рита Карасартованын бөгөт чарасын карап, аны тергөө абагында калтырды. Муну менен судья жактоочунун үй камагына чыгаруу өтүнүчүн четке какты.

Карасартова 14-апрелде кармалган, үйү тинтүүгө алынган. Укук коргоочу муну жаранык активист Тилекмат Кудайберген уулуна (Куренов) таандык делген катты өзүнүн социалдык баракчасына жарыялаганына байланыштырган.
https://www.azattyk.org/a/33429284.html

Ош шаарынын мэри Жеңишбек Токторбаев 20 жылдык кечеге баргандан кийин күйөөсүнүн колунан мерт болгон келиндин Өзгөнгө караштуу Кызыл-Октябрь айылындагы ата-энесине барып, куран окуп, көңүл айтты. Ал маркумдун балдарын Ош шаарында окутуп, жатакана, тамак-аш жана кийим-кече жактан жардам берилерин убада кылды.

"Клооп" басылмасы алардын эсепчисин Улуттук коопсуздук комитети (УКМК) 30-майда суракка алып кеткенин билдирди. Фейсбуктагы расмий баракчасына аны Бишкекте, көчөдө, банктардын биринин кеңсесинин жанынан алып кетишкенин жазды.

"Кечээ УКМК "Клооптун" администрациялык кызматкерин кармап, басылманын эсептик документтери сакталган кеңседе бир канча саат тинтүү жүргүзүп, ал кызматкерди түнү менен суракка алып, бүгүн, 30-майда эртең менен бошотушту",-деп маалымдады.

Улуттук коопсуздук комитети (УКМК) Клооп" басылмасынын журналисттери, кызматкерлери камалган, сурак берген жагдай тууралуу комментарий берди. Анда аталган медиа "мамлекеттик органдар тууралуу бурмаланган маалыматтар менен терс материалдарды жарыялап келген",-деп билдирди.

Беш баланын энеси Айзиректин мыкаачылык менен өлтүрүлүшү - коомчулукту нес кылып, Кыргызстандын муфтийи эркектерге кайрылды. Кыз-келинди ким коргойт?

Клооп Медианын оператору Александр Александров жана мурдагы кызматкери Жоомарт Дуулатов эки айга камалды. 7 журналист атайын кызматка сурак берип, айрымдарынын үйлөрүндө тинтүү жүрдү.

АКШнын сунушу Газадагы апаатты токтото алабы? Ал арада Франция анклавда гуманитардык абал оңолбосо Израилге санкция саларын эскертти.

Жогорку Кеңештин экс-спикери Канатбек Исаевге издөө жарыяланганы маалымалды

Жогорку Кеңештин мурдагы төрагасы Канатбек Исаевге издөө жарыяланганын “Кактус” басылмасы күч түзүмдөрүндөгү булактарына таянып жазды.

Маалыматка караганда, быйыл 29-апрелде Бишкектин Биринчи май райондук соту аны УКМКнын тергөө абагына камоо чечимин чыгарган. 30-апрелде саясатчыга издөө жарыяланган.
Улуттук коопсуздук боюнча мамлекеттик комитеттин (УКМК) Чүй облусу боюнча башкармалыгынын кызматкерлери Исаевди былтыр 20-ноябрда кармап, Кылмыш-жаза кодексинин “Уюшкан топторду жана кылмыштуу коомдоштуктарды каржылоо” беренеси менен айып таккан. Ал коюлган айыпка макул эмес экенин билдирип, кылмыш ишин саясат менен байланыштырган.

6-декабрда борбор калаанын Октябрь райондук соту бөгөт чарасын карап, башка жакка кетпөө жөнүндө тил каттын негизинде абактан бошоткон.

“Кактус” бул ирет Исаевге башка ишке байланыштуу издөө салынганын жазды.

Саясатчынын адвокаттары же жакындары менен байланышуу азырынча мүмкүн боло элек.

https://smarturl.click/DYXzm

Акыйкатчы институту Айзиректин балдарына, жакындарына укуктук жардам берет

Акыйкатчы институту Оштогу Өзгөн районунун Алга айылындагы бүтүрүүчүлөрдүн 20 жылдык кечесине баргандан кийин күйөөсүнүн колунан мерт болгон Айзирек аттуу келиндин балдарына, жакындарына укуктук жардам берерин билдирди.

Учурда анын артында калган беш баласын маркумдун күйөөсүнүн бир тууган агасы камкордукка алууга даярдыгын айтканын маалымдады.

Аталган институт, былтыр аялдарга жана балдарга жасалган зомбулукту изилдегенин, жыйынтыгында тийиштүү мамлекеттик органдардын ишине көзөмөлдү күчөтүүгө байланыштуу өкмөткө, Башкы прокуратурага кат жолдогонгонун белгиледи.

Былтыр Омбудсменге үй-бүлөдөгү зомбулуктан улам 40 кайрылуу түшкөн, быйыл жыл башынан бери беш жаран кайрылган.

Ош шаарынын мэри Жеңишбек Токторбаев 30-майда маркум келиндин Өзгөнгө караштуу Кызыл-Октябрь айылындагы ата-энесине барып, куран окуп, көңүл айткан Ал Айзиректин балдарын Ош шаарында окутуп, жатакана, тамак-аш жана кийим-кече жактан жардам берилерин убада кылган.

Келинди өлтүрүүгө шек саналып анын күйөөсү, Кара-Кулжа районунун тургуну камалган. Милиция бул окуянын чоо-жайы тууралуу кеңири маалымат берген эмес, бирок Айзиректин туугандары күйөөсү аны атып салганын билдиришкен.

Муфтий Абдулазиз Закиров жума күнү аялдарга жасалган зордук-зомбулукту айыптап атайын билдирүү жасаган.
https://smarturl.click/4Omeg

Элчи Бөкөнтаев диаспора башчылары менен миграциялык талаптарды талкуулады

Кыргызстандын Орусиядагы элчиси Кубанычбек Бөкөнтаев 30-майда кыргыз диаспораларынын, коомдук бирикмелердин башчылары, өкүлдөрү менен жолукту. Анда Орусиядагы миграциялык жаңы эреже-талаптар талкууланды.

Ушул жылдын 30-июнунан тартып Орусияга киргени жаткан чет өлкөлүктөргө, анын ичинде кыргыз жарандарына эреже-шарт дагы катаалдайт. Ага ылайык, Орусияга барам деген чет элдик 72 сааттан кечикпей бул өлкөгө келген, жүргөн себебин, максатын көрсөтүп, атайын мобилдик тиркемеге арыз калтырышы керек.

20-майда орус парламенти Москвада жана Подмосковьеде мигранттарды жүргөн жери, геолокациясы тууралуу полицияга такай маалымат берип турууга милдеттендирген мыйзам долбоорун дагы кабыл алган.

Ага ылайык, ушул жылдын сентябрь айынан тартып алгач Москва менен Подмосковьеде мигранттардын жүргөн жерин көзөмөлдөгөн төрт жылдык эксперимент башталат. Алар атайын тиркемеге катталып, укук коргоо органдарына жүргөн жери, геолокация тууралуу маалымат менен бөлүшүүгө макулдук берет.

Мигранттар өлкө бийлигине жүргөн жери тууралуу такай маалымат берип турууга милдеттүү болот. Эгер мындай маалымат үч күн же андан көп убакыт түшпөй калса ал мигранттар көзөмөлгө алынуучу адамдардын реестрине киргизилет, башкача айтканда, аларга Орусиянын аймагында болушуна тыюу салынат.

Бул талап мигранттардан сырткары Москва менен жана анын жанындагы облуска 90 күндөн ашык убакытка келген чет өлкөлүк жарандарга дагы тиешелүү болот. 2029-жылдан тартып бул эреже Орусиянын бардык аймагына таратылат.

Тергөө комитетинин жетекчиси Александр Бастрыкин өлкөгө келген мигранттардын милдеттүү түрдө биометрикалык каттоого туруусун киргизүүнү дагы сунуш кылган.

Былтыр Москвада “Крокус Сити Холлдо” кеминде 145 кишинин өмүрүн алган куралдуу чабуулдан кийин Орусияда мигранттарга каршы маанай күчөгөн. Кылмышка шектүүлөрдүн көбү тажик тектүү жарандар экени аныкталып, кармалган. https://smarturl.click/9od8D

Камчыбек Ташиев УКМК жаңы имаратка көчүп жатканын билдирди

Улуттук коопсуздук комитетинин (УКМК) төрагасы Камчыбек Ташиев атайын кызмат жаңы имаратка көчүп жатканын айтты. Ал бул тууралуу 31-майда “Регион” телеканалына курган маегинде билдирди.

Анда азыркы 1982-жылы курулган имарат тарыхый жай болгонун, жаңысы мындан бир канча эсе чоң экенин билдирди.

Убагында өлкө башчылары камалган учурлар да болгонуна токтолуп, жаңы имаратта андай окуялар болбосуна үмүт кылды.
Ташиев эски имаратты эмне кылуу керектигин эми президент Садыр Жапаров чечерин белгиледи.

Бишкектеги Чыңгыз Айтматов проспектисиндеги УКМКнын жаңы административдик имаратын куруу 2023-жылы 29-майда башталган.

Ал жерде ошол күнү атайын кызматтын Киберкоопсуздук боюнча координациялык борборунун жаңы имараты ачылып, пайдаланууга берилген.

https://www.azattyk.org/a/33430386.html

Садыр Жапаров коррупцияга каршы күрөштөн 200 млрд сом түшкөнүн билдирди

Президент Садыр Жапаров коррупцияга каршы күрөштүн алкагында өлкө казынасына 200 миллиард сомдон ашык акча, 1100дөн көп кыймылдуу жана кыймылсыз мүлк мамлекеттин карамагына өткөнүн билдирди.
Ал бул тууралуу 31-майда Бишкекте Улуттук коопсуздук комитетинин (УКМК) борбордук аппаратынын жаңы имаратынын ачылышында айтты.
Мунун алдында УКМКнын төрагасы Камчыбек Ташиев коррупцияга каршы күрөш уланып жатканын айткан. Жыл башында ал эки жылдын ичинде паракорчулукту толук жоюу ниети бар экенин билдирген.
https://www.azattyk.org/a/33430800.html

Жаңылыктар | 02.06.2025 | Украинанын дрондору ондогон орус учагын жок кылды

• Украинанын дрондору Орусияда аскердик аэродромдорго чабуул койду. Орусия муну теракт деп жарыялады. Эксперттер ондогон учактын жок кылынышын - орус авиациясынын башына түшкөн каран түн катары сыпаттап жатышат.
• Орусияда “Мекендештер” уюмун жетектеген Нура Курманбекова орус жарандыгынан ажыратылды. Анын жарандыгын алып, өлкөгө кирүүгө тыюу салынышына эмне себеп болду?
• Президент коррупцияга каршы күрөштөн 200 млрд сом түшкөнүн билдирди. Жемкорлордон өндүрүлгөн каражаттардын тагдыры жана зыяндын ордун толтургандарды жазадан бошотууга байланыштуу кайчы пикирлер арбын. https://youtu.be/unyiK89cDyU

Сот Атамбаевге 11,6 жыл чегерди, үч киши сот залынан камакка алынды

Бүгүн 3-июнда Бишкектин Биринчи май райондук сотунда мурдагы президент Алмазбек Атамбаевге жана бир нече кишиге каршы козголгон айрым кылмыш иштери боюнча өкүм чыкты.

Атамбаевге 11 жыл 6 айга камоо, мамлекеттик сыйлыктарынан ажыратуу, мүлкүн мамлекетке алуу түрүндөгү жаза чегерилди.

Мурдагы вице-премьер-министр, эл аралык издөө жарыяланган Аскарбек Шадиевге 15 жыл 6 ай берилди. Анын да мүлкү мамлекеттин пайдасына чегерилери белгиленди.

Атамбаевдин тушунда президенттик аппараттын башчысы болуп турган Фарид Ниязовду, Жогорку Кеңештин мурдагы депутаттары Равшан Жээнбековду 7 жыл 8 айдан жана Ирина Карамушкинаны 7 жыл 6 айга эркинен ажыратып, сот залынан камакка алуу өкүмү жарыяланды. Атамбаевдин тарапташы Фархад Баабиевге 5 жыл 6 ай чегерилди.

Канат Сагымбаев, Асель Кодуранова, Кундуз Жолдубаева, Мээрбек Мискенбаев, Канат Осмоналиев, Рысбек Карыпбек уулу, Нооруз Капарбек уулу, Марат Шаменов, Амангелди Какебаев 3-5 жылдык пробациялык көзөмөл түрүндөгү жаза алышты.

Калган айыпталуучуларга "мөөнөтү өттү" деген негизде жаза чегерилген жок. Толук окуңуз: ➡️ https://smarturl.click/20wkD