Москва мончосундагы окуя: ТИМ Орусиянын элчисине нота тапшырды

Тышкы иштер министрлиги Орусиянын Кыргызстандагы элчиси Сергей Вакуновду 14-апрелде министрликке чакырып, жолугушту. Элчи Москва шаарындагы "Бодрость" мончосунда Кыргызстандын жарандарын жапырт кармоого байланыштуу чакырылганын мекеменин басма сөз кызматы кабарлады.

Маалыматка ылайык, элчи Сергей Вакунов менен министрдин орун басары Алмаз Имангазиев сүйлөштү. Ал элчи аркылуу Орусия бийлигине мончодогу операциянын мыйзамдуулугу, андагы жарандарга күч колдонуунун себептери боюнча маалымат берүү жана күч колдонуу негизсиз болсо, укук коргоо органдарынын өкүлдөрүнө тиешелүү чараларды көрүү өтүнүчү менен расмий нота тапшырды.

Имангазиев ошондой эле Кыргызстандын Орусиядагы жарандарынын укуктарын коргоо боюнча натыйжалуу чараларды көрүүнү өтүнүп, кыргыз-орус союздаштык жана стратегиялык өнөктөштүк мамилелерине доо кетирүүчү бул сыяктуу жагдайларга жол бербөөнү элчи аркылуу орус бийлигинен суранды.

@azattyk_radiosu

14-апрелдин кечинде укук коргоочу Рита Карасартованы милиция кармап кеткени кабарланды. Бул тууралуу "Азаттыкка" окуяга күбө болгон укук коргоочу Перизат Суранова билдирди. Анын айтымында, Карасартованы милиция кызматкери үйүнөн алып кеткен.

‼️Абхаз, армян номурлуу машинелерди мыйзамдаштыруунун баасы түштү

Кыргызстанга Абхазиядан, Армениядан мыйзамсыз ташылып келген автоунааларды легалдаштыруунун баасы түштү. Министрлер кабинетинин төрагасы Адылбек Касымалиев кол койгон токтомго ылайык, кыймылдаткычынын көлөмү 2 литрге чейинки машинелердин ээлери 50 миң сом, 2 литрден жогору болгондор 100 миң сом төлөйт. Буга чейин бардыгы 100 миң сомдон төлөйт деп бекитилген.

Андан тышкары машинени чек арадан алып өткөн учурдагы документи жок болсо 2024-жылдын 30-декабрында өткөн деп эсептелет.

Кыргызстанда 1-апрелден тартып чет элдик номурлуу автоунааларды мыйзамдаштыруу иши башталган. Ал 1-октябрга чейин созулат.

@azattyk_radiosu

⚡️Москвада мончодо сабалган кыргыз жарандары арыз жазуудан баш тартты

Кыргызстандын Эмгек, социалдык камсыздоо жана миграция министрлиги Москва шаарындагы “Бодрость” мончосунда эч себепсиз ур-токмокко кабылган кыргыз жарандары укук коргоо органдарынын кызматкерлерине каршы арыз жазуудан баш тартканын билдирди.

Министрликтин маалыматына караганда, рейд учурунда кармалган 24 кыргызстандыктын 22си коё берилди. Калган эки адамды да бошотуу боюнча иштер жүрүп жатат. Буга чейин 24 адамдын төртөө Орусиядан чыгарылары айтылган.

@azattyk_radiosu

Укук коргоочу Рита Карасартова 48 саатка камалганын анын адвокаты Жаныш Бараков “Азаттыкка” билдирди. Бул тууралуу Ички иштер министрлиги комментарий бере элек.

14-апрелдин кечинде Рита Карасартованын үйүндө тинтүү жүргөнү, аны улай милиция укук коргоочуну кармап кеткени белгилүү болгон.

@azattyk_radiosu

❗️Орусияда кыргызстандык өспүрүм киши колдуу болду

9-апрелде Москва облусундагы Ермолино айылында тогуз жаштагы кыргызстандык өспүрүм киши колдуу болду. Анын өлүмүнө шек саналып 14 жаштагы өспүрүм кармалды.

Орусиянын Тергөө комитети окуяга "улуттук жана диний жек көрүү" себеп болгонун билдирүүдө. Мекеменин маалыматына караганда, бычак жеген өспүрүм "Тез жардам" менен ооруканага бараткан жолдо үзүлгөн.

«Московский комсомолец» гезити өз булактарына таянып, шектүү улутчул маанайдагы баракчаларга жазылганын жазды. Анын телефонунда "скинхед" баракчалардын шилтемелери табылган.

Кыргызстандын расмий органдары бул боюнча комментарий бере элек.

@azattyk_radiosu

Зеленский Сумы облусунун губернаторун кызматтан бошотту

Украинанын президенти Владимир Зеленский Сумы облусунун аскердик администрациясынын башчысы Владимир Артюхту кызматынан бошотту. Бул тууралуу Украинанын маалымат каражаттары жазды.

Маалыматка караганда, украин президентинин мындай чечимине Сумы облусунун Конотоп шаарынын мэри Артем Семенихиндин билдирүүсү себеп болду. Семенихин облус жетекчилиги шаарда аскерлердин иш-чарасын өткөрүү менен жай тургундардын коопсуздугуна коркунуч келтиргенин айткан.

Владимир Артюх аталган иш-чара шаарда өткөрүлгөнүн, бирок аны өзү уюштурбаганын билдирген. Анын ордуна Сумы облусунун аскердик администрациясынын башчысы болуп Олег Григоров дайындалды.

@azattyk_radiosu

‼️Кыргызстанда абактарда бир күндө эки адам каза болду

Кыргызстанда 14-апрелде абакта жазасын өтөп жаткан эки киши каза тапты. Жаза аткаруу кызматы алар узакка созулган оорудан улам каза болгонун билдирүүдө.

Маалыматка ылайык, биринчиси Ш.Т. аттуу 62 жаштагы адам. Ал 2016-жылдын 10-июнунда Баткендин Лейлек райондук сотунун өкүмү менен 16 жыл 6 айга эркинен ажыратылган. Быйыл 19-мартта Чүйдөгү Молдовановка айылындагы №27 түрмөгө которулган. Мекеме кургак учук оорусунан анын эки өпкөсү тең жабыркаганын, 14-апрелде абалы кескин начарлап каза болуп калганын кабарлады.

Абакта каза болгон экинчи адам 35 жаштагы Адилет Тилек уулу. Кылмыш-жаза кодексинин “Киши өлтүрүү” беренеси менен 18 жыл 4 айга эркинен ажыратылган. Ал 2025-жылдын 11-апрелинде Чүйдүн Молдовановка айылындагы №27 колониядан Жалал-Абад облусунун Базар-Коргон районуна караштуу Бай-Мундуз айылында жайгашкан №10 түрмөгө калган жаза мөөнөтүн өтөө үчүн которулган.

Адилет Тилек уулу 14-апрелде өзүн начар сезип жатканын билдирип, №10 абактын медициналык бөлүмүнө жеткирилген. Дарыгер ага биринчи жардам көрсөтүп, алдын ала жүрөктүн коронардык оорусу, инфаркт миокарда диагнозу коюлган.

Адилет Тилек уулуyнун апасы Дүйшөкан Байгазиева жана жубайы Насыйкат Долодиярова 15-апрелде Молдовановка айылындагы №27 түрмөнүн алдына барып, ал Чүйдөгү абакта сабалганын айтып, арызданышты.

Кыйноолорду алдын алуу боюнча улуттук борбор 9-апрелде Молдовановка айылындагы №27 түрмөдө жаза мөөнөтүн өтөп жаткан 42 жаран айып изоляторуна киргизилгенин билдирген. Сөз болуп жаткан борбор камакта отургандардын жакындары аталган жайда кыйноо, уруп-сабоо болуп, суу бербей, тамак-аш киргизүүгө, жолугушууларга уруксат берилбей жатканын айтып кайрылышканын маалымдаган.

Кыргызстанда буга чейин соттолгон же иши тергелип жаткан адамдар жабык жайларда каза болгон учурлар кездешкен.

@azattyk_radiosu

Жаңылыктар | 15.04.2025 | Чабуулдан Сумыда 35, Курскта бир киши мерт болду

- Укук коргоочу Рита Карасартова кайрадан кармалып, 48 саатка камалды. Мунун алдында Карасартова Фейсбуктагы баракчасына соңку күндөрү дайыны чыкпай жатканы айтылган Тилекмат Кудайберген уулуна таандык деген катты жарыялаган эле.

- Орусиянын Курск аймагы жапырт дрон чабуулуна кабылды. Ага жанаша жайгашкан Украинанын Сумы облусу да кандуу соккуларга туш болууда.

- Экс-президент Алмазбек Атамбаев башкы фигурант болгон Кой-Таш иши боюнча сотто жакын арада өкүм чыгары күтүлүүдө. Прокурор Атамбаев баштаган бир нече адамды 10-11 жылга эркинен ажыратууну сурады. https://youtube.com/live/hLdxf2MuM-E

‼️ Бишкекте мектеп окуучусу классташынын соккусунан каза болду

Бишкектеги №31 орто мектепте 7-класстын окуучусу классташынын соккусунан улам каза болду. Бул тууралуу Ленин райондук милициясынан кабарлашты.

Маалыматка ылайык, окуя 15-апрелде болгон. 2011-жылы туулган өспүрүм классташ кызы менен чырлаша кетип, аны уруп жиберген. Анын кесепетинен сокку алган кыз эсине келбей каза болгон. Окуя боюнча кылмыш иши козголуп, тергөө башталганын милициядан кабарлашты.

Кыргызстанда мектептеги чоңсунуу, тартип бузуу маселеси утур-утур талкууланып келет. Жыл башында Бишкектеги №72 орто мектептин 8-классынын окуучусунун өлүмүнө шек саналып ушул эле мектептин 9-классынын окуучусу кармалган эле. Мындан соң Билим берүү министрлиги билим берүү жайларындагы тартипке көңүл бурулуп, окуя болгон мектептердеги жетекчилик жана мугалимдердин жоопкерчилиги каралып жатканын билдирген.

@azattyk_radiosu

Бишкектеги мектептердин биринде 7-класстын эки окуучусунун ортосунда пикир келишпестик чыгып, 14 жаштагы кыз каза болду. Бишкек мэриясы жана шаардык милиция териштирүү башталганын билдирди.

Маркум кыздын жакындары окуя боюнча үн ката элек. Бул окуя мектеп окуучуларынын арасындагы чоңсунуу, коопсуздук боюнча маселени кайра козгоду.

@azattyk_radiosu

"Орусия менен Казакстандын эки ача пикири." Орус башкы дипломаты казак президентинин "аймактык бүтүндүк" тууралуу дээрлик үч жыл мурдагы сөзүнө комментарий берди. Казакстанда кайрадан талкуу жаралды.

"Табышмактуу каттан кийинки кармоо." Бишкекте эки күн мурда кармалган укук коргоочу Рита Карасартованын баш коргоо чарасы каралууда.

Ош шаарында мэриянын кызматкерлери жолго чыгып кеткен үйлөрдү бузуп жатканда 11 жаштагы кыз жаракат алды.
https://www.youtube.com/watch?v=T9ouESlHjbM&t=95s

УКМК депутат Сыдыгалиевдин Жамангулов боюнча сөзү ырасталбаганын билдирди

Улуттук коопсуздук боюнча мамлекеттик комитет Башкы прокуратура “Мегакомдун” мурдагы жетекчиси Акылбек Жамангуловго кылмыш ишин козгоп, каражат алып кайра коё бергени тууралуу маалымат ырасталбаганын билдирди.

Атайын кызматтын маалыматына ылайык, бул тууралуу парламентте сөз сүйлөгөн Жогорку Кеңештин вице-спикери Нурбек Сыдыгалиев, экс-башкы прокурор Курманкул Зулушев, Акылбек Жамангулов жана башка адамдардын катышуусунда текшерүү жүргүзүлгөн. Анда Нурбек Сыдыгалиев өзү да айткандарын тастыктай турган фактылар жок экенин мойнуна алганы айтылды.

Нурбек Сыдыгалиев Курманкул Зулушев Башкы прокуратураны жетектеп турганда Акылбек Жамангуловго кылмыш иши козголуп, ал акча бергенден кийин бошотулганын, буга байланыштуу арыз жазууга да даяр экенин айткан. Андан тышкары канча каражат бергенин да айтып берерин билдирген.

Бул тууралуу вице-спикер 15-апрелде Жогорку Кеңештин Конституциялык мыйзамдар, мамлекеттик түзүлүш, сот-укук маселелер жана Укук тартиби, кылмыштуулук менен күрөшүү комитеттеринин биргелешкен жыйынында айткан.

@azattyk_radiosu

Бишкекте мектептеги өлүм боюнча мугалим, окуучулар сурак берүүдө

Бишкектеги №31 мектепте классташынын соккусунан каза болгон 14 жаштагы кыздын окуясы боюнча Кылмыш-жаза кодексинин “Ден соолукка оор залал келтирүү” беренеси менен кылмыш иши козголду.

Бул тууралуу ички иштер министринин орун басары Октябрь Урмамбетов 17-апрелде Жогорку Кеңеште депутаттардын суроолоруна жооп берип жатып айтты.

Анын сөзүнө караганда, соттук-медициналык, биологиялык экспертизалар дайындалган. Анын жыйынтыгы менен юридикалык баа берилет. Ушул тапта мугалимдер, окуучулар сурак берип жатат.

@azattyk_radiosu

❗️Кой-Таш окуясы боюнча соттук териштирүү эки айга узартылды

17-апрелде Бишкектин Биринчи май райондук судьясы Азирет Медеров Кой-Таш окуясы боюнча соттук териштирүүнү эки айга узартуу боюнча чечим кабыл алып, кийинки отурум 12-майга белгиленди.

Бүгүнкү соттук жараянда шектүүлөргө акыркы сөзүн сүйлөштү. Фарид Ниязов бул окуя боюнча кылмыш иши козголбошу керектигин айтса, Равшан Жээнбеков “айыпталуучулардын бийликти басып алуу планы болгон деген кинеси орунсуз” экенин билдирген.

14-апрелдеги соттук отурумда прокурорлор соттон шектүүлөрдү 10 жылдан 11 жылга чейин абакка кесүүнү сураган. Мамлекеттик айыптоочулар мурдагы президент Алмазбек Атамбаевди 11, анын мурдагы аппарат жетекчиси Фарид Ниязовду 10, мурдагы жансакчысы Канат Сагынбаевди 11 жана Равшан Жээнбековду 10 жылга эркинен ажыратууну сураган.

Жогорку Кеңештин экс-депутаттары Асел Кодурановага, Ирина Карамушкинага, Мээрбек Мискенбаевге жана КСДП партиясынын мурдагы өкүлү Кундуз Жолдубаевага үч жылдан пробациялык жаза берүүнү өтүнгөн.

@azattyk_radiosu