Сабантуйларга Татарстаннан баручы түрәләр саны арткан, ә иҗат коллективлары өлеше кимегән

Татарстан хакимияте Сабантуй үткәрү стандартларын үзгәрткән. Татарларның милли бәйрәме турында яңа карар шушы көннәрдә республика хөкүмәте сайтында чыкты.

📌Бизнес Онлайн игътибар иткәнчә, үзгәрешләр исеменнән үк башлана: элек документ Татарстанда, Русия төбәкләрендә һәм чит илләрдә узучы Сабантуйларны аерса, хәзер Казан аерым бүлек итеп чыгарыла. Дәрәҗәләр бүленешендә яңа иң югары баскыч барлыкка килгән —ул «Татарстан рәисе катнашында» дип атала.

📌Рәисне озатучы кешеләр саны да сизелерлек арткан: элек түрәләр һәм башкарма хакимият вәкилләре делегациянең 5 проценты белән чикләнергә тиеш булса, хәзер бу күрсәткеч 12 процентка кадәр күтәрелгән.

📌Хезмәт күрсәтү төркеме 10 кешедән 18гә җиткерелгән. Чит илләргә барганда делегацияләр хәзер 550 кешегә кадәр (хөкүмәт әгъзаларын исәпләмичә) җыела ала, ә элек 300 белән чикләнә иде.

📌Ә менә иҗат коллективлары бераз кимегән: аларның өлеше 85 проценттан 70 процентка кадәр киметелгән. Моннан тыш, командировкалар өч көн урынына ике көн генә дәвам итәргә тиеш.

📌"Татар утары" күчмә инсталляциясе дә үзгәргән, аның мәйданы арткан.

📌Яңа карарга ярашлы, көрәштә батыр калучыга машина бюджет хисабына бары тик Татарстан рәисе катнашында узучы Сабантуйларда гына каралган.

Сабантуйның беренче "стандартлары" 2021 елның елның августында кабул ителде.

Әлеге кагыйдәләр Татарстанда, бигрәк тә чит төбәкләрдә һәм башка илләрдә татар халкының милли бәйрәме ничек узарга тиешлеген раслый.

❗️Иртәгә, 13 апрельдә, Чаллы шәһәр мәхкәмәсендә 75 яшьлек татар милли хәрәкәте ветераны Зиннур Әһлиуллинга каршы шартлы мөддәтне озайту һәм өстәмә бурыч йөкләү эше каралачак.

Үзен "Сөргендәге Татарстан хөкүмәте" дип атаучы төркемнең һәм Бәйсез Татарстан комитеты Telegram-каналлары язуынча, бу хакта Зиннур Әһлиуллин белгертү алган.

Узган елның 17 сентябрендә Чаллы шәһәре мәхкәмәсе Әһлиуллинны шартлы рәвештә 2,5 елга ирегеннән мәхрүм итте. Аңа милли хокуклар турындагы чыгышлары, Telegram-каналдагы фикерләре өчен гаепләү белдерелде. Ул вакытта прокуратура Әһлиуллинга 2,5 ел колония җәзасы сорады, ләкин Әһлиуллин мәхкәмәдә "мин хөкем карарыннан курыкмыйм" дип белдерде һәм үз карашларыннан баш тартмады. Бу хакта тулырак монда яздык.

▪️Азатлык укучылары сайлаган 2025 ел шәхесе исемлегендә Зиннур Әһлиуллин Татарстанның элекке мәгариф министры Энгел Фәттаховтан соң сайтта иң күп тавышны җыйган шәхес булды.

@azatliqradiosi

Уфада Хач йөреше машиналарда узды

Йөреш Олы көн (Пасха) бәйрәме уңаеннан оештырылган.

Машиналар юлга Сипайлово микрорайоныннан кузгалды дип яза UTV телеканалының Telegramы. Уфа епархиясе хәбәр итүенчә, шуннан алар Первомай, Октябрь проспекты, Айская, Салават Юлаев проспектларындагы чиркәүләр яныннан уза.

Видеодан күренгәнчә, машиналар колоннасын күчмә чиркәү җитәкләп бара, чаңнар суга, урыс побы урамнарга "изге" су сибә.

▪️Хәтерләсәгез, 2012 елны Казаннан читтә бер төркем ир-егетләр мөселман язулы әләмнәр белән машинада үткән иде. Шуннан соң куәт оешмалары егетләргә каныкты, аларның машиналарын алып китте, көч куллану очраклары да булды.

📹UTV

@azatliqradiosi

Быел мартта Путинның Валдайдагы утары тирәсенә җиде "Панцирь" һава һөҗүменнән саклау комплексы төзелгән.

Шулай итеп Русия президенты Владимир Путинның Валдайдагы резиденциясе тирәсендә системлы һава һөҗүменнән саклау ноктасы (ПВО) 27гә җиткән.

Planet.com иярчен сурәтләрәреннән күренгәнчә, "Панцирьлар" өчен җиде яңа манара төзү берүк көнне - 17 мартта башланган. Аларның кайберләре зенит-ракет комплекслары белән җиһазландырылган.

Мәскәү тирәсендәге куелган "Панцирь" комплекслары манаралары кебек үк, Валдайдагы һава һөҗүменнән саклану системнары да Путин резиденциясе тирәсендә зур һәм кечкенә диаметрлы ике боҗра итеп урнаштырылган.

Кайбер мәгълүматларга караганда Валдайда Путинның мәгъшукасы дип саналган Алинә Кабаева һәм аларның уртак балалары еш була. Ә Русия президенты өчен аның Кремльдәге эш кабинетын төгәл кабатлаган бүлмәләрнең берсе төзелгән.

Элек Радио Свобода Татарстандагы "Алабуга" махсус икътисади зонасы җирлегендә һәм аның периметры буйлап эре калибрлы пулемётлар белән җиһазланган 20дән артык манара, шулай ук "Панцирь" зенит-ракета комплекслары урнаштырылган берничә урын төзелгәнен хәбәр иткән иде. Биредә Украинага каршы кулланылучы Иранның Shahed-136 дроннары җитештерелә. Русиядә аны "Герань" дип атыйлар.

@azatliqradiosi