ردت ودمـــع السبي بعـــيونهه
والمصايب غيرت كــــل لونهه
ـــــــــــــــــــــــــــــــــــــــــــ
ردت ابياحال من جــــور السبي
من الشمس احمرصبح لون العبي
هاي بت حيدر علي وطــــه النبي
كلفه بت الزهره من يسبوهه
ـــــــــــــــــــــــــــــــــــــــــــ
وسفـــــه يسبون العقيله أم الخدر
من بعد مامشت بالطف عالجمر
من بعد عباس حاديهه الشمر
الدنيه دارت وختلف مضمونهه
ـــــــــــــــــــــــــــــــــــــــــــ
وختلف مضمونها أوركبت هـــزل
وصار حادي ضعونها واحد نذل
ويكطع دروب الصحاري وما يمل
وظل عالتربان حامي ضعونهه
ـــــــــــــــــــــــــــــــــــــــــــ
لفت مشتاكه تـــــدور عالگــــــــبور
وين أخوتي أتصيح مگطوعه النحور
بالچـــــــــفون أدموعها ظلت تفــور
أخـوتها كـــون الحره يتلكونهه
ـــــــــــــــــــــــــــــــــــــــــــ
كون يتلكـونها بدمــــــعــه وحزن
من العقيله باليل ماغمض جفن
والدليل أعله الأهل دومه يحــن
وحنت ورادت تداوي أمتونهه
ـــــــــــــــــــــــــــــــــــــــــــ
كـــامـــت إتشم بالتراب البي عـــطر
عطر ابو السجاد ظهره المــنـكسر
وعطر كافلهه الرخص لخته الـعمر
لوتحــشمه مايخيب ضنونهه
ـــــــــــــــــــــــــــــــــــــــــــ
خادمكم قيس عوده الكعبي

مرد الروس يوم الاربعين نعي مولاتي زينب عليها السلام

ماتگعدون ...تتلگون زينب ماتگعدون
شابت تره ام عون ... من السبي شابت تره ام عون
ماي تردون ... بس لابعدكم ماي تردون

رديت رديت ... وي روسكم يحسين رديت
هل جيت هل جيت ..وبلا رقيه من الأسر جيت
للبيت للبيت... مالك بعد جيات للبيت

عودة السيدة زينب عليها السلام إلى كربلاء




صاحت والگلب ينبض محنّه
خِـذنــه يا عــلـي لگبور أهلنه
.....................................................................................................................

زينب رجعت امن الشام مكسوره
لن بــيــت الهواشــم مِنهدم سوره
فگدت چم عزيــز وراجعـه اتزوره
مردّ الروس فجعه اتخـيّل الصوره

گلب زينب أبـــد ما عاف ونّه
خِـذنــه يا عــلـي لگبور أهلنه
.....................................................................................................................

تگلـــه يا علي الـســجــاد يعيونــي
ما أعتب واگــول اخوانــي عافوني
بس مشتاگه روحي ومنخطف لوني
إخوتي وراجعه امن السبي يدروني

بديار الغُرب وشـبــاقــي إلنه
خِـذنــه يا عــلـي لگبور أهلنه
.....................................................................................................................

ودّيــنــي تگله الگــبــر أبــو الأكــبــر
من عاشـــر مــحــرم گـلـــبــي يتفطّر
أريد أنحب نحــيــــب الفاگـــده وأكثر
شرط كون ابونــيــنــي الصخــر يتفسّر

وعلى هضم السبي أحچيله عنّه
خِـذنــه يا عــلـي لگبـــور أهـلــنه
.....................................................................................................................

تره ســيــف المواجــع للعــظــم واصل
رجعت الـكــربــلـــه لا رايــه لا كــافـــل
أريد أشــبــع بچــي يم گبـــر أبو فاضل
أشــم اتــراب اخــوي وأشــرح الحاصـل

وجوب انزور أبو الغيره الكفلنه
خِـذنــه يا عــلـي لگـبـــور أهلنه
.....................................................................................................................

آني أم الصــبــر مــعــروف عــنــوانــي
أنـــواع الــقــهــر هالــزمــــــن راوانـــي
وحق ضلع أمي روحــــي تريـــد ولياني
أصيح امـــن الســبـــي ردّيـــت يخواني

تفارگنه ونــِرد نجمــع شملنه
خِـذنــه يا عــلـي لگبور أهلنه
.....................................................................................................................

حرم وايتام كلــهـــه إويـــاي ملهــوفه
والـمفـــارگ حبيبــه رايــــد يـشـــوفــه
دلّيني أبو فــاضـــل وينــهــــه إچفوفـه
وأشوفه جروح إديّــه الأمس مچتوفه

مفجوعين لــن ضايــع أملنه
خِـذنــه يا عــلـي لگبور أهلنه
.....................................................................................................................

هاي إگبور أهـلــنــه البـــقــت ذكراهم
وهـــذا الأربــعــيــن وهسّــه جــيـناهم
من راحو خذوهــــه أرواحــنــه اوياهم
بنــفــس اليـــوم كلــهــم مـــن فگدناهم

تجري ادموعنه وننحب بعدنه
خِـذنــه يا عــلـي لگبور أهلنه
.....................................................................................................................

خادم الإمام الحسين عليه السلام
عمار هليل الواسطي

الله يعين زينب ردت شلون
٠٠٠٠ ٠٠ ٠٠٠٠
من درب السبي ماظلت امتون
يخواني اريدنكم تفزعون
الله يعين زينب ردت شلون
٠٠٠٠٠٠٠٠٠٠٠٠٠٠٠
تدرون المجالس موش الام عون
اطب ديوان والوادم يضحكون
الله يعين زينب ردت شلون
٠٠٠٠٠٠٠٠٠٠٠٠٠٠٠
عليه شكال يعباس يحجون
يهل الغيره خويه شلون ترضون
الله يعين زينب ردت شلون

حجي عله ختك يبو فاظل يشمرون
لو ميته اگولن سهله وتهون
الله يعين زينب ردت اشلون

  عليه الناس بالمجلس يأشرون
من الشام اجت معميه العيون
الله يعين زينب ردت شلون

فلاح طالب الماجدي

استشهاد الرضا ع

هذا موتك يالرضا يمك حظر
بس اشوف الكربله درت النظر
من تذكرت الضلع انحصر بعيونك دمع
****
شنهو مر بخاطرك / ونته موت امجاورك
بينك وبين المنيه دمعه وحده
هذا چبدك بالطشت / ونته للطف تلتفت
انسيت جرحك والحزن فوگك تبده
تريد تنحب يالرضا / عله ضلوع مرضرضه
وعله الثلموها ابسهم مرتين چبده

بجرحك اوتقره الزياره امن البعد
ياسلام الله اعله نحره والچبد
تقره بس ما تنسمع انحصر بعيونك دمع
****
يا غريب بلا وطن / رموش عينك حدبن
دمعة الغربه ثجيله وبيها حرگه
شاغلك چنه الضعن / الزينبيات انسبن
هايه ينرادلها يالمسموم شهگه
حرمه ما بين الغرب / وسفه عمتك تنضرب
متون زينب من ضربهم لسه زرگه

بچبدتك ما فكرت لا غربتك
بس شغل بالك سبيها عمتك
امصابها ما ينجرع انحصر بعيونك دمع
****
هذا مو موتك اضِن / العرّگ اجبينك حزن
كل مصايب كربله بگلبك جرحهن
دمعك الينزل حمر / يرسم بعينك نحر
گطره گطره اتطيح عالخد وتلمهن
شما كثر بيك الالم / اگبالك اتصير الخيم
تشوف چم طفله وطفل يسحگ جمرهن

تبچي وگبالك شفت منهو العثر
تركض وتوگع رقيه اعله الحجر
ظل جدمها بي طبع انحصر بعيونك دمع
****
يالعميت امن البچي / إبلهاتك غص حچي
يبن موسى اتريد تذكر يافجيعه
صبت اجبينك نهر / چنك اذكرت الگمر
ويلي عالعباس وچفوفه گطيعه
عينه صكاها السهم / وطاح من عنده العلم
وتالي وي جوده تبده اعله الشريعه

سكنه يم خيمتها ضلت تنتضر
ما اجه العباس بس جاها الشمر
وسفه سكنه تندفع انحصر بعيونك دمع
****
بعد تنضر ياجرح / راس جدك عالرمح
وللرمل مكشوف ظل حسين نحره
رحمة الحافر شمر / والجرح ما يستقر
العشره فزعن ونمرد عالغبره صدره
كل مكان بكربله / بيها طاحت وصله اله
وبالعبايه اتعنت اتلمهن الزهره

يالرضا جدك تسلب ونسحگ
والترف صدره على ضهره انطبگ
ونگطع منه صبع انحصر بيعونك دمع
****
بين حسرات وشجن / تربي عينك للچفن
تدري جدك ظل ثلاثه اعله الترايب
من اجه وكت الدفن / انترست الدنيا حزن
السماء ابدفنته شافت عجايب
امن البچي اوليده انعمه / بالحصيره لملمه
اگبال هالموقف تره ازغيره المصايب

علي السجاد امن اجه ايلم الجسم
بكل اراضي كربله ظل بي يلم
جسمه صعبه ينجمع انحصر بعيونك دمع
****


الشاعر اياد الديراوي

اميــرات الهـواشـــم طبــن الشــــام
سبيــات وأخــوهن راسـه جــــــدام
ـــــــــــــــــــــــــــ
جبيـره اعله العــلاوي طبت السوگ
وهظيمه ابلايه محمل صعدن النوگ
جدمهن والگلب يانـــاس محـــروگ
ويا شــــام الشماته لزينب اشضــــام
ـــــــــــــــــــــــــــ
تعبـن والدرب خلص جـراحــــــات
من عگـب الخــدر صـارن سبيــات
وخلص عمر زينــب گـلـه حســرات
گلبـــها اعله الكفلها اهـواي محتام
ـــــــــــــــــــــــــــ
شكثر ساعــــات خلوهم يتانـــــون
حتى الشـــــام يجهز من يطـــبون
الماعدهم شـــرف باجــر يعيـدون
وكل ساعه انتظـار بمية الف عــام
ـــــــــــــــــــــــــــ
الناس اتجمهرت وتعــاين اشصـار
شي تشمر حجي شي تشمر احجار
وگلوب الفـــواطم تشتعـــل نـــــار
حرگ اگلوبهن جـن حرگ الخيــام
ـــــــــــــــــــــــــــ
اميرات وعليهن نضرو النــــــاس
وادم لاشرف لاغيره واحســـاس
وفوك اعله الرمح يا راس عباس
دخن وارتعد جن غيض ابو الثام
ـــــــــــــــــــــــــــ
طبـو والفرح بالشـــــام جــن عيد
واطبول وهلاهـل گـــامت اتزيـد
وطبت للقصــر زينــب على أيزيد
وبخطبتها طاحـت روس الاصنـام
ـــــــــــــــــــــــــــ
رغم مذبوحـه كل اخـوانها ام عون
الطواغـــي اگبـالها كلهم يدنـگــون
اليكتبون اعله زينـــب خل يكتبون
ذلت عرش اميـه بت الاكــــــــــرام
ـــــــــــــــــــــــــــ
محمد المشعلاوي

خويه يا خويه. جابل. ام عون

يحسين أگعد جابل أم عون
ردت حزينه امغيره اللون
ما بطلت دمعات العيون
جيتك يخويه ابهاي الضعون
كلهم يتامه اعليك يبچون

خويه كلش غميجات ..

اجروح اليسر كلش غميجات
واختك اجت شبعانه لچمات
بدرب اليسر وچم طفل مات
ومرن عليه اشكثر عيلات
ونسوانكم شبعن مسبات


خويه. خويه. ننعاك ننعاك
طول الدرب يحسين ننعاك
حسبالنه نوصل ونلگاك
ونگعد يخويه سويعه وياك
خويه نوم اللحد يحسين اذاك
وترابه شمسوي بمحياك

يحسين اجيتك شوف اديه
وشوف الحبل شمسوي بيه
يبن امي لا تعتب عليه
بشام عفناهه رقيه. يا خويه
عالراس وافتهه المنيه

يحسين جبت ادموع عيناي
أگعد يبعد الروح وچلاي
لو چلمه وحده تحچي وياي
جيتك نحيله وفاجده الراي
عالرمح راسك صارلي افياي
وطول الدرب ضل يبجي وياي
ويلاااااه يلمذبوح عالماي

چا وين عباس..

جيت اشتكي چا وين عباس
ومنل هضم مخنوگه الانفاس
حگهه الحنينه اتشيب الراس
ترافگ غرب وبلايه حراس
وفرجه اصبحت لسوگ والناس


چا ما تگعدون ..
يهل الشيم چا ما تگعدون
نومه ولختكم ما تگومون
وانه ادري عدكم غالية ام عون
لو جيب يمكم طاري المتون
تگعدون يم زينب تلطمون

رديت يهلي وحالي مو حال
وزينب اجتكم مثل الخيال
ومامش بعد للحمل شيال
وانه مره وممتحنه بطفال
وافراگكم يخواني چتال
ويچويني خويه الدمع لو سال

الشاعر محمد الفهداوي

#نعي

الأربعين

طب لكربله ظعن الغرايب
وكل وحدة تدور عالحبايب
هاي تصيح يمه الگلب ذايب
بالدلال ذيچ تصيح صايب
وحدة تصيح بوية وين غايب


كل وحدة تنوح ابصف وليها
وتذب تراب عالهامة بديها
بس وحدة الگلب محتار بيها
حميدة ما لگت گبر الشفية

حميدة بت مسلم

ادور ما شفت گبرك يوالي
غريبة ويفطر الدلال حالي
كلمن شافني حن وبچالي
عليك افرك اسف بثنين ادية

يالنايم بعــــــيد بدار غربة
اليتيمة ابلا ابوها شلون تربة
الفاگدلة ابو شيصر گلبة
ليل انهار بس دمعة جرية


لا اندل وجيك واگعد وياك
غطاك التراب شلون ملگاك
صبتني بالگلب مايوم انساك
يريت اوصل وگلة الصار بية


أسالكم الدعاء رائد الاسدي

من چفني والباب السمه  
    دمعات بنتك فاطمه
يالماخذتني     ياليتمتني


ــــــــــــــــــ

فاطمه بعدك حزينه تبجي وتنوح
وبغيابك بويه قلبي يصير مذبوح
بويه مو وكته رحيلك عني لا تروح


الله يشهد     ولمحمد  
اعلن الكون الحداد
والعويله       ولرحيله 
 العرش لابس سواد

من دارك وتسمع بجي 
 وشكثر بعيوني حجي

يالفارگتني     ياليتمتني


ــــــــــــــــــ

رايح ودارك خليه بويه والدار
ابابي من بعدك يبويه تشتعل نار
وتنسطر عيني يبويه والضلم جار


وبوصيتك        فاركيتك
 فاضت الروح وهواك
ليت شعري    كون عمري  
ينطفي ويه ضواك

حجه اوداعك دمعتي
وياك تطفى شمعتي

يالتركتني       ياليتمتني



ــــــــــــــــــ

انـي من بعدك يتيمه والچفن شاب
يبجي الحسين الرحيلك والقلب ذاب
والحسن يندب يجدي بصوت المصاب


تبجي ولدي       اه يجدي
 وحيدره بهذاه المصاب
كون برجاك     ميته وياك  
ونندفن تحت التراب

يا بويه وياك اندفن
بعدك اموت من الحزن

يالأمتني      ياليتمتني

ــــــــــــــــــ


بويه من اتروح عني اصبح ادموع
والعده بعدك يجيني ويكسر اضلوع
وتنسطر يابويه عيني وهذا موضوع


حيدره انته       من گلتله 
بالوصيه اصبر لحين
انتي بعدي      وهذا وعدي 
انتي اول من تجين

اول بشر كتلي بعد 
انتي تلحگيني وعد

يالواعدتني    ياليتمتني


ــــــــــــــــــ

صابره وانتضر يومي وقلبي مشتاگ
انتضر يوم الرزيه شيحمل افراك
وجهك ونوره وحنينك يابو الاشواك


شده صعبه    حمل قلبه  
حيدره وذاك الونيين
ولحجابـي       اندفع ابابي
وطاح من عندي الجنين

اذونـي بعدك يالولـي
وگيده بحزنه علي
يالماعفتني ياليتمتني

ــــــــــــــــــ

بويه ملهوفه اعله شوفك ياضوه العين
وصوتك باذني اسمعه ويبدي الاونيين
بالاذان اذكر واندبك بويه كل حين


من يأذِن قلبي ويون
تنزل ادموع الوصال
وبحنينك بويه وينك
ظلمه من بعد الدلال

مشتاگه لعيونك وحن
بعدك اشوفن بس حزن

يالفارگتني ياليتمتني

ــــــــــــــــــ

زين العابدين الشمري

يالخذيتــــــو المصطفى تانوني
بالحد وي النبــــــــي دفنـــــوني
=========================
وي ابوي انخاك تاخذني علــــي
عگب ابو براهيم بلدينه شـــلي
من بعد عينه الحزن ماينچـــلي
وفدوه لعيـــــونه تروح عيوني
يالخذيتــــــو المصطفى تانوني
=========================
عيوني فدوه تروح لچل عيونه
هاذه ابوي شلون اضل بـــدونه
عليه امر گليوم اشوف شلــونه
حيل متعلـــــمه عليه تــدروني
يالخذيتــــــو المصطفى تانوني
=========================
عليه متعلمه وامرله بگل وگـت
مثل طيبه وعشـرته لا ماشفت
ياحـسافه وياك بويه مامتــــت
شلون بيــك الــــوادم يعـازوني
يالخذيتــــــو المصطفى تانوني
=========================
شلون بيك الـوادم تعــــــــزيني
گون يومك مااشوفه بعـــــيني
ولايضل يبچي عليك حــسيني
لچدي بساعه يــــگول اخـذوني
يالخذيتــــــو المصطفى تانوني
=========================
حسين مشتاك عالچده يريده
حيــل ونته ومايــون بـهــيده
نام چدي شلون وسط البيـــده
وانه اريده وهــــسه اله ودوني
يالخذيتــــــو المصطفى تانوني
==========================
حسين گلساعه وينشد فاطمه
ليش خله الدار چدي مضلــمه
وضل عليه حزنان حماي الحمه
وضل يـصيح بفـــــرگته اذوني
يالخذيتــــــو المصطفى تانوني
=========================
بقلم خادم من خدام الحسين ع

اهتزت اركان السمه راح والد فاطمه
گامت اتنوح الزچيه ابهذا الآمصاب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يوم راح النبي الهادي فاطمه اتهل الدمع
تنادي ابونه شجيه بويه احس گلبي انشلع
بويه ظلمتني الآعادي وانكسر من الظلع
بويه والمحسن تصوب راح مني منصرع
شوف بويه ابن الدعي هل سطرني ابعيني
گامت اتسيل ابدماهه او دمع سچاب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
من غبت سيد رسلهه خالفو عهدك الي
وبجمعهم بالسقيفه خلفو البيعه العلي
فزعو اعلى الدار لينه چتفو بويه الولي
ٱلتزم بويه ابوصيتك ماخلف عهده الوصي
بويه خلفو بيعتك خم غدير انسوهه
غدرو ابحيدر علينه داحي الباب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
آه يابويه شوصف گلبي چم لوعه حمل
من جمر فگدك تچوى والجسم مني نحل
بلوعة السطره يوالي عيني حمره واتهمل
وانكسر بالباب ظلعي بويه واگليبي ذبل
بويه محنيه الظهر من رحت يالغالي
دمعي بالعصره اختلط وي دم الآصواب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
بويه بالحسرات والهم خلص بعدك هالعمر
دنيتي جارت عليه بظيم وآآهات و قهر
بعد ماغمضت عيني حيدر ابراسه انطبر
والحسن تدري ابغيابك چبده بالسم نفطر
و الحسين ا بكربله الشمر حز رگبته
وزينب الحره سبيه ابين الاجناب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
بويه من گبري وانوحن باليسرويه الحرم
وبدمع سكنه او رقيه گلبي يابويه انهظم
طفلي وي طفل الرباب بنبلة الطاغي انفطم
وصدري رضنه الحوافروي صدرابني انهشم
صوباني حرمله يوم صاب حسيني
دمي من ظلعي جرى وي دم الآخضاب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لشاعراهل البيت عليهم السلام
خالد عامر الزيادي

(نعي)
السيده الزهراء اتخاطب أبها رسول الله


يـابــوي هـالـفـرگــه ثـگـيـلـه

وماينـحـمـل مـثـلـك رحـيـلـه

احــزان والـغَـيـبـه طـويـلــه

جـفـني خـلـيـتـه ابـمـسـيـلـه

وگـلـبـي اضـمـدنـه بـعَـويـلـه

بـفـراگـك الـبـضـعـه نـحيـلـه

ومـصـابـك اتحِملـه أوتـشيلـه

بس الصـمـيـده الاشـتـكيـلـه

والـمـرتـضـى مهـدوم حـيلـه

وصـار ألـنـهــار بـلـون لـيـلـه

                         *-----------------*-----------------*

خادم الرسول  الأكرم
✍الشاعر رعد الجريخي