مـلـح المـجـالس غـزر ابخـدامك
مــافـضـلـوا ايـام فــوگ ايـامـك


ياهو التسأله بكل وكت يحچيها
مـلـحـك يـعـثــرنـي اذا ســويـها
بيدك نعمتي اشلون راح اچفيها
واليـنـكر النـعمه يچمل اسهامك
مـلـح المـجـالس غـزر ابخـدامك


يگـولون اليضـوگ الملح ويخونه
الكـل بـيـت طـبـتـه ابـد مـامـونه
واني الـي عرضت نعمتك بعيونه
والهـالسبب واگـف عـبـد جـدامك
مـلـح المـجـالـس غـزر ابـخـدامك


عـبـدك واذا تعتقني مـوتي ابهايه
يامـن گـضـيت العمر جـوه افيايه
وبـيـنـاتـنـه عـشـرة دمـع واقـرايه
عينك علي واحسبني من ايتامك
مـلـح المـجـالـس غـزر ابـخـدامك


عيـنك عـليه وخـاف ازلـن مـرات
سهون يـجـن واللـه مـامقصودات
مچلب ابردنك مـااعـوفك هيهات
انسان اصيرن ادري كـل احـلامك
مـلـح المـجـالـس غـزر ابـخـدامك


الضـاگ زادك غـيـر زادك مـيضوگ
يابـيـت خـيـر للـيچـهـبـك مـعشوگ
لوضعت منك طفل ضايعله ابسوگ
خـليـني عــايـش عـمـري وي آلامك
مـلـح الـمـجـالـس غــزر ابـخـدامـك


عايش بأسمك واسمك يعلي الراس
غـالي وتحب المـايـذل بـيـن الناس
يامـن خـدمـتـك فـاز بـيـها العبـاس
ضحه الچفوف وهامه فدوه الهامك
مـلـح الـمـجـالـس غــزر ابـخـدامـك


ابـداعـة رقـيـه ياابـو ارقـيـه عليك
خـليـني وي خـدامـك الهـامـوا بيك
لو مـره يصـدر فـعـل منـي وياذيك
ياقــابـل الـحـر خـلـنـي وي ازلامـك
مـلـح الـمـجـالـس غــزر ابـخـدامـك


هـاني ناصـر السـعيـدي

موشح لأم البنين ع
عَاهِدوني اليوم يهل المرجلة
ما تعوفون الحسين بكربلة
___
جمّعتْ اولادها أم البنين
بيوم شال الكربله ضعن الحسين
تگلهم اطلبكم رباي وهذا دين
والوفه بالطف يفرسان الفلا
_
گلها ابو فاضل ييمه ادللي
ولدج وكل الواحد البيهم علي
سيوف هاشم بيهه كل هم ينجلي
من نطب بالطف تصير الزلزلة
_
انا اعرف ولدي بس ارد اطمئن
حاذروا لا تنهظم أم الحزن
ينكسر گلب العرش لمن تون
مدلله ولازم تظل مدلله
_
خل تطيح ارگابكم گبل الخيم
الموت ياولدي ولا سبي الحرم
هاي ساعات الشيم يهل الشيم
خدر هاشم كل دمه يرخص اله
__
إنتفضوا وغيرتهم اتهز الفضه
صاحوا احنه اربات ابونه المرتضى
تنچوي من صدورنا نار اللضى
احنه ما بينا اليهم بمقتله
_
لا تهمين ونشم احنه الهوى
زودنا العباس وبجفه اللوى
راح نعلنها القيامه بنينوى
سيوفنا سور لخيام البسملة
__
خادم اهل البيت (ع)
الشاعر عبد العظيم احمد الابراهيمي

نعي مفجع
ام البنين

هـاي ام الـبـنـيـن اشـضـال عـدهـه
ليل انهـار دمـعـتـهـه اعـلـه خـدهـه
لا تـنـشـف الـعــيـن ولا تــســدهــه
اربــــع ولــــد راحــــــوا ولـــدهـــه

ضـل الـنـوح عـدهـه بـهـل مـديـنـه
وياهو الـيـجـي اتنشـده الـحـزيـنـه
هـلـبـت ظـعـن مـــر اعـلــه عـيـنــه
ونـيـنـه ثـاري الـبعـد يكتل ونـيـنـه

وطـول الـلـيـل تـتـسـلـه ابـچـيـهـه
لا واحـــد نــشــد لا مــر عــلـيــهــه
اتــانـي الـولــد بـلـگــت تـجــيــهــه
بس بحـسيـن وخـوانــه حـچـيـهـه

                                      *---------------*---------------*

✍خادم ام البنين (ع)
الشاعر رعد الجريخي

#دخول ام البنين على السيدة زينب(ع)بعد رجوعها الى المدينه

كلولهه ام عباس عالباب
التنحب شما طاريج ينجاب
ثكل الوجع يرادله احباب
لمتنه ذيجه منين تنجاب

احچيلي يمه شصار ماصار
مبين بوجهج ضيم الغيار
شصاير بذيح الروس الكبار
طالو عليج الجانو اكصار

يمه الحسين انسلب هدمه
وضل عاري فوك الرمل جسمه
ضل الهوى لو مره يلجمه
وانه انثلم كلساع ثلمه

التمينه كلنه بخيمه وحده
وضكنه ذبحهم شده شده
ذباحهم يدنه عمده
حتى اسمع وحيلي يرگده

كمنه نون ون المجاريح
وضل ينكل بحسراتنه الريح
من ننضرب بالسوط ونصيح
يضل الحسين يكوم ويطيح


مصطفى حرب
يقرأ بثواب والدي

#علي #الاكبر ع

علي الاكبر من نزل ميدانها
ثغيب بالحومه اعتله بفرسانها
ـــــــــــــــــــــــــــــــــــــــــــــــــ
من نزل للحومه مغضب عدل لف الثامه
داسها اكبار الشوارب دوس حدر اجدامه
تخيل المهره وتحزم بيده ضب صمصامه
سيفه ما يخطه اليريده عدل نص الهامه

حفاي ركضت للنجف شجعانها
علي الاكبر من نزل ميدانها
ــــــــــــــــــــــــــــــــــــــــــــــــ
جنه حيدر من نزل وزلزلاها الحومه
عاد صولات الصميده وذكرها بيومه
سبع بالطف ماتكلم وخوف صك زردومه
والوكف ميت تحسبه شرد ذب اهدومه

هذا حيدر بالحرب فنانها
علي الاكبر من نزل ميدانها
ــــــــــــــــــــــــــــــــــــــــــــــ
مبتسم طب للحرب وفنهم يلاكونه
هذا شبل حسين بالطف كلهم يعرفونه
علي الاكبر عالي اسمه وهمه كلهم دونه
جبل ونبص العساكر شلون ويزيحونه

وآل اميه حتارت بشجعانها
علي الاكبر من نزل ميدانها
ـــــــــــــــــــــــــــــــــــــــــــــ
غار شبل الغضنفر وتيهت مشرادها
الراي بيده بكفيه هوه شلون تمشي رادها
لا مفر من يده يحصل الطرق كلها سادها
تحت امره الحومه كلها الزلم بالطف كادها

طوگ صار عليها سد بيبانها
علي الاكبر من نزل ميدنها
ـــــــــــــــــــــــــــــــــــــــــــ
هذا ابن هاشم وهاشم سباع كلهم قاده
بالحرب نار ومراجل هيبة ولد الساده
نزل طوفان المگابر الموت شد عناده
الشرد لاحه بعيونه خزرته صياده

حارت الوادم علي دفانها
علي الاكبر من نزل ميدانها
ـــــــــــــــــــــــــــــــــــــــــــــ
من نزل صكت الحومه وضيعاها انفاسها
خربط اصفوف العساكر طشراها وحاسها
دنكت ليده الكتائب تريد سالم راسها
طأطأت يمه القبائل تريد تحفظ ناسها

تغيرت كل الزلم الوانها
علي الاكبر من نزل ميدانها
ــــــــــــــــــــــــــــــــــــــــــــــ
تمت بعون أسد الله الغالب
العبد الذليل علي الكعبي

اليله كلش مضلمه علخواني
ياكلب توگــــف بعد شمتاني
----------------------------
اليل جل ياخــــويه وانه بعازتك
وماكو واحـــــد عاني علجنازتك
شاب راسي من الحزن لمن رحت
وفردهو جسمك وشمرو رايتــك

فراگ وجهك خويه حيل اذاني
ياكلب توگـــــف بعد شمتاني
----------------------------
متانيه تـــرد يابو فاضل للخيام
ماحسبت اطيـح وتصيبك سهام
كلبي مايصبر على فراگك يخـوي
شلون أگضي اليل ياخــويه وانام

كلبي جودر بالحـــزن ويعاني
ياكلب توگــــف بعد شمتاني
----------------------------

ياكلب راح العــــزيز اليـــــله
طاح فــــوگ النهر ونهد حيله
ماكو يمه خـــوان لا يمه معين
الخيل فوگه ادوس ياهو يشيله

راح اخـــوي الوحدي وخلاني
ياكلب توگــــف بعد شمتاني
-----------------------------
ضامي طاح اليوم اخــوي علنهر
وكلبي احس بطيحته اليله نفطر
يروح عني الحيـــد ابد ماحسبت
الكمر مات اليـــوم ياناس الگمر

ومـــــن وراها تشمتو عدواني
ياكلب توگــــف بعــد شمتاني
-----------------------------
الشاعر سيد حسن الياسري
,,,,,, نزال ,,,,,

يا مسلم أخذها وحل شكو عكده
وي حسين شوف الكوم لو ضده
 ••••••••••••••••••••••••••••••••••••••
تاخذها الرساله الكوفه منتظره
بيك حسين ساند يمنته وظهره
ترد جواب منهم تاخذ البشره
وترد لأبن عمك بأقصر المده
 ••••••••••••••••••••••••••••••••••••••
مضمون الرساله البيدك اقراها
وضحلهم أخوك حسين دزاها
اقره بصوت عالي هذا معناها
لبينه كتبكم كلهم وتهده
 ••••••••••••••••••••••••••••••••••••••
كللهم أخوي حسين هل قادم
ألكم جاي هو وكل بني هاشم
يصلح جاي بأمه جده موظالم
موش عليهم السيف بطن غمده
 ••••••••••••••••••••••••••••••••••••••
بأحسن وجه مسلم تمم الحجه
والقاها عليهم عدله مو عرجه
ألهم بين حسين وشني نهجه
وحط كلمن عليهم طينته بخده
 ••••••••••••••••••••••••••••••••••••••
للمسجد خذاهم صلئ بالوادم
حس مسلم عليهم والغدر والم
يمشون ابراه حس بيهم وعالم
بس اندار مغدور وصفه الوحده
 ••••••••••••••••••••••••••••••••••••••
راد بكل طريقه يوصل جوابه
لحسين ويكله الكوفه جذابه
ولا تقدم يخوي تغدرك ذيابه
تحاصر والقصر ماخوذ من زنده
 ••••••••••••••••••••••••••••••••••••••
#محمد_هادي_المشرفاوي

أبو طاهر من دخل كوفانهه
أتخيل المهره ولكد بعنانهه
#######################
غار بيهه وصارت الشرده حِلِم
بحافر المهره يدوس عله الزِلِم
گال مسلم چفي يحلاله الرَدِم
بسفي أگص روس الزِلِم ولسانهه
#######################
هيبة الكرار مُسلِم من وِگف
چن جهنم عينه والعسكر رِجَف
الگوم گالت علي ساكن بالنجف
شجابه للكوفه ورعَب فرسانهه
#######################
بسطرة الحمزه تولاهم سَطر
ضيگ عليهه الدرب محد يُمر
رماح طاحت من كشخته والسُمر
الكشخه لفعاله ويظل عنوانهه
######################
رغم ظل وحيد لكن عن ألف
لاترعبه رجالهه ولاكل حِلِف
چنه عزرائيل برواح أيخَطِف
الكوفه رحه ويطحن بميدانهه
#######################
نَشعه طوعه ولبن هاشم هلهلت
الخيل مرعوبه والأصوات أعتلت
والازقه من الزلم كلها امتلت
من جثثها وروسهه وذرعانهه
#######################
لخادم أهل البيت (ع)
سيف سعد آل عريثم
ت/07815142062
07739324102

حـي الله مـسـلـم *** حـي الله مـسـلـم
.......................................
ضـك الـدرع بـمـتـونـه غـيـرة گمر عدنان
شـال الزلم بچفوفه شمرها عله الحيطان
سيفه علي و ريشاته مـاخذها من عباس
رعـدت رعـيـد الـحـومه ونشلعت البيبان

تـتـراڪض الڪوفـه طباهم البين
مـسـلـم يـبو الغير يا زود الحسين

غـار المهر بالـهـيـمـه و مـعـصـب الخيال
و الـزلـمـه ذب هدومه و الي شرد رجال
بعيونه مسلم شـاره يخزرله زلمه يموت
عـمـه علي البچفوفه خيبر لـفوگ انشال

تـاهـت بـهـاليـها شـال الحياطين
مسـلـم يبو الغير يا زود الحسين

خـيـالـه ضــاعـت بـيــهـا و تـريـس الـوفـاي
بچفوفه شال الـجـربه مو طاسه مالت ماي
طوعه بهلاهل صاحت حي الله هل نوماس
يـمـتـه عـبـي الـخــيالـه يالترهب انته هواي

حـي الله زلــمتـنـا يمڪحل العين
مـسـلـم يبـو الغير يا زود الحسين

دخـن والي مـلاگـيهـا يردمها خـيل بخيل
عـرڪه وخلات العركه كلها تصيح دخيل
ياكل زلـم ضـل سيـفـه گـام بـرحاها يدير
حمزه وعلي بصولاته من الله شايل حيل

بـچـاهـم بحـيـلـه دخنها صوبين
مسلم يبو الغير يـا زود الحسين

عرگـت زلـم چـفيته والامـه تـجـدح نـار
مـن تـبـرد يشـد بيها مسلم ثجيل وحار
شـردهـم مـن الڪوفه خـلاهـم متيهين
هـيـبـة عـلـي الماخذها مـن هيبة الجبار

مـاگـدرو عـيـونـه بـچـة الميادين
مـسـلم يبو الغير يا زود الحسين
........................................

الشاعر‌ محمود الموسوي

حي الله الانصار
حي الله الانصار
،،،،،،،،،،،،،،،،،،،،،،،،،،،،،،،
هــــــلا بالأنصار صاحـــت كربله وحياهم
هلا بألدگــــــو ثوايــــــه وشيخهم وياهم
هــــــلا بزلام الكلافه وصاحبين الصاحب
طبــــــو السبعين زلمه وطبـــو شمحلاهم
،،
حسين بيكـــم فرحان،،، ينصاره
الزلـــــم منكم صوبين،،، محتاره
حسين رايــــح للموت،،، ينصاره
عالموت كضو الميدان،،، ينصاره
،،
خـــــل الزلم والخيل بيكم تحتار
جدامه طبو اعله الحرب يالأنصار
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
راية الأنصار رفــــــــت ياهـــــلا بهل رايه
بيكـــــم العباس كيــف والحسين هوايـــه
احـــــر مـــن الجمر چانـــت زينب اتانيكم
والعقيله تريـــــــــد منكم للحسين احچايه
،،
هنيالـــــه اليموت وياه،،، هنياله
وام الحسن تتلگاه،،، هنيالـــــــه
كلمن وگـف وي حسين،،، هنياله
بعازة زلم ماخـــــــــلاه،،، هنياله
،،
ويـن اليحـــب حسين صاحت زينب
وسيف اعله سيف اگبال زينب چلب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
حسين يالانصـار بيكـــم زامـــــط العيالــه
سمعت بطاري حبيــــــب وجفلت الخيالــه
شلون بالله اليوم بينه الزلم بالطف صاحت
الشرد منكم خوش زلمه چــي شرد هنيالــه
،،
اليـــوم منكم محتار ،،، عسكرها
ازغار شردت واكبـــار،،، عسكرها
اليــوم كلش مخبوص،،،عسكرها
شصار مايدري شصار،،، عسكرها
،،
اليوم العساكـــــر كلها ترجف خايفه
اواحـــــد يگل للثاني شنهي السالفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هلا بربـــــع الغالي صاحــت بالخيــم علويه
هلا يالماعفتو اخوكـــــــم ياهــــلا بهل جيه
وشيخهم گاللها ابشري وداعتـــــــچ مگضيه
شويه يخت حسين هاي واحنه موش شويه
،،
جدامه يالحره نطيــح،،، جدامه
وسرع نصير من الريح،،، جدامه
نذبـــــح ومانتعب دوم،،، جدامه
حي الله بالموت نصيح،،، جدامه
،،
نگلبها يم عــــون اليــــــوم لعيونــــه
واليشرد مـــــــــن الانصار خيعونــــه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
،،،، شور للأنصار،،،،

موشح إلى انصار الامام الحسين عليه السلام

خطــوا الأنصــار آيـــات الشـــرف
ورخصوا دمهم لجل أقدس هدف

*---------------*---------------*

رخَصّــوا دمهــم  لجــل  ديــن  الإله
والله لحسين السبــط دينــه اجتباه
هــو يحــي الديـن من نحره ودماه
ومثـــل دم حسيــن هم دمهم نزَف

*---------------*---------------*

خطـــوا الأنصـــار آيـــات الــــولاء
يــوم نزفت عالارض ذيــچ الدماء
سجلوا أروع دروس مـن الـــوفاء
نهـــر والضامي عذب حبهم غرَف

*---------------*---------------*

خطوا أســرار المجد أهل الصـمود
يوم لحسين انتمــوا صــارو جنود
همّــه سبعين وتـعنـــوها الحشـود
ولا شخص منهم ابــد گلـبه رجَف

*---------------*---------------*

خطـــوا الأنصـــار بالطـــف انتصـار
مثله ما أظن بالسمه وبالارض صار
الله كــرمهـــم أوي حســين المـــزار
أباب أبـو أليمه الدهـــر الهـم وگـَـف

*---------------*---------------*

خطـــوا الأنصــار أعظـــم ملحمـــه
حيرت أهـــل الأرض وأهل السمــه
وقعوا لحسين مـــن فيـــض الدمه
موقـف أبكل جيل مثله ما أنَوصَف

*---------------*---------------*

خطوا أوي حسين لــوحة كبــريــاء
مــن تفايض دمهم ابطـــف كربــلاء
سجلــوا أنبـــل دروس مــن الآبــاء
وحگه هـــذا الكون بيهم لـــو هَتَف

*---------------*---------------*

خطو آيات الدمـه بـأرض بالطفــوف
ورخصــو ذيــچ  المنــاحر للسيـــوف
مثل هاي التضحيه ما أظــن نشـوف
الحب جنـون الهم عبــر حـد الشَغـَف

*---------------*---------------*

الشاعر
موسى البديري

اليوم طـــب البالشدد ينخونه
ابو فاضــــل ياحــلات  عيونه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
حرب والعباس متوسط الحــرب
عركه مـــو عالبال وتوگف الگلب
ماكو واحــد يطلع بكيفه ويطب
الماشـــــرد خسران بيها وينغلب
ذبــح بيها وبيها دم
وذاك من ذاك السلم
الشرد مــن عباس الف خيعونه
،،،،،،،،،،،،،،،،،،،،،،،،،،،،،،،،،،،،،،،،،،،،،،،
اليوم لارايه الترف لايعله صوت
الهوه يترخص اذا رايـــــد يفوت
صــار وادي كربله وادي السكوت
المايموت اليوم ينخه الله يموت
اليوم شيخ المرجله
تحزم وطــب كربله
علي الثانـــــــي الوادم يسمونــه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
طـــــب المبچي الزلم وعليها غار
ضلمه صارت كربله وضاع السفار
تگــــول نص اليـــــل ماچنها نهار
وين ماتنگل جـــــــدم تلگه حمار
الگاع مــن كثر الدمه
حمره صارت والسمه
اعليها هـــد وبيرغه اعله متونه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
هــــذا ابـوه البالحرب مايستراح
هذا البزغره ويحــب طگ الرماح
هذا هوه المنه نص الجيش طاح
هذا اليحب العرك موش الصياح
طــــب المبچيها طب
وسيفه يلتف عالرگب
گمر عالـــي وفنهم يلوحونـــــــه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
گال ارجعها العلـــــــي والنهروان
گال اخلي الدم يسيل بكل مچان
مامعارك يابو الاكبر مــــــن زمان
هاي ساعتها ترئ وحــــان الاوان
وحگ زينب وانه اخوك
راح اسوي شسوه ابوك
راح اهـــــــــدن واطلب التردونه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
،،، نزال لبو فاضل،،،

نعي جديد.. عندما وقع ابا الفضل العباس عليه السلام نادا ادركني اخي يا حسين وكأني بالامام الحسين عليه السلام خرج محني الضهر من الخيام وهو ينادي الآن انكسر ظهري وقلت حيلتي وشمت بي عدوي

الحسين عليه السلام
===============
اجاه الصوت يندب خوية يحسين
طلع محني الظهر من الصواوين
ما يدري بطريجة وين ما وين
يصيح بصوت اشرلي باليدين
====================
إذا تسمعني خوية ارفعلي ايدك
يبو الغيرة انكسر ظهرة عضيدك
اسمعك من صحت بس ما افيدك
وحيد ابگيت من گطعوا وريدك
====================
من صوب الشريعة الصوت اجاني
اعله شاطي الماي ناداني مچاني
مذهول الفكر عباس ماني
كسر ظهري الدهر خوية وعماني
======================

كاني بالعباس عليه السلام يجيب اخاه الحسين عليه السلام
================
العذر لله والك چفيني ماهن
أأشر بيش يحسين وتراهن
وعيوني السهم خوية طفاهن
اخذ من النضر وسفة وعماهن
=====================
علامة اطيك جثة ابلاية چفين
والراس انفلكَ والسهم بالعين
وجربة اعله الصدر وسهام صوبين
وجسمي من الطبر صاير نياشين
====================

الحسين عليه السلام
================
دليني على چفوفك يعباس
وين بيا كتر گطعوهن الناس
اويلي عليك خوية شصار بالراس
تلاگف بالهوة وتجر بالانفاس
===================
راسك ارد احطة بحجري وانعاك
ودمك ارد امسحة بطارف لواك
عد راسك اخيك فكلي عيناك
نويت تروح عني الله وياك
===================
عمت عيني يخوية تلوج عطشان
يحزام الظهر يا تالي الاخوان
راح ابقى وحيد ابين عدوان
حرمنة اتظل يخوية بغير وليان
=====================

عندما وصل الحسين عليه السلام و وقف عند رأس ابي الفضل والعباس عليه السلام ولم يعرفه وكأني به

يمن گاصد علية الصوت اسمعة
احلفك راسي خلة ولا تگطعة
تمهلني اريد وحالي ترعة
لما اخيي يجيني وارد اودعة
==================
اخير وداع هذا ابين الاخوان
عزيز الروح گلبة اعلية لهفان
ما اشوفة اخاف وعمري خلصان
يبو اليمة اخوك عليك عطشان
===================

جواب الحسين عليه السلام
===============
عد راسك اخيك انة الحسين
اشوفك لا عيون ولا الچفين
لواك بيا كتر طايح والايدين
تتانيك الاطفال وتربي العين
=================
متانينك يبو الغيرة على الماي
وسكنة تصيح ها عمي يوفاي
حاضن جربتك وسهامها هواي
مثلك ما حصل عباس سگاي
==================
امدد والسهم طفاها العيون
احط ايدي وشيلك مدري شلون
مطبر من أشوفك موش بالهون
حرم واطفال بالخيمة يتانون
==================

أسالكم الدعاء رائد