اليوم وصلت كربله بضعونها
زينب شغير الدمع بعيونها
**
جايتهم من سفر كله قهر
مفارگتهم صار أكثر من شهر
هيه تجري عيونها مثل المطر
وين أهلها هلبت يشوفونها
**
باالصحار گطعت دروب الألم
ركض بيها العمر چن ركضت سهم
تجري دمعتها اذا شافت علم
باالكفيل ورايته يذكرونها
**
لكربله متعنيه اجتهم زايره
چم مدينه وچم خرابه عابره
چم گبر صاح الها نرجو المعذره
على الفرگه زينب يحاچونها
**
من دمعها نگع اتراب الثره
شسوت بزينب هذيچ المگبره
ياخواني جيت اشوفنكم تره
صاحت ورادتهم يسمعونها
**
يهل گلبي تصيح صيحت فاجده
وعله گبر حسين خرت ساجده
جيت اشوفك كلشي أبد مارايده
وانه ادري الخوه انت تصونها
**
الافراگ هوايه اخذ منها عمر
مدلله وتجرعت ضيم وهجر
بكربله اخر مره يمكنها تمر
تموت برض الشام ويدفنونها
**
سعد العبودي

خويه يابوسكينه
وينه گبرك وينه
٠٠٠٠٠٠
امن السبي جيتك يخويه آنه زينب آنه
حسين يبن امي حبيبي امن المشي تعبانه
اعثر ابممشاي خويه لشوفتك لهفانه
وينه گبرك گلي وينه انهض تلگّانه
بحيره لتخلّينه
وينه گبرك وينه
٠٠٠٠٠٠
هذا راسك بين اديه خويه جبته ويايه
للجسد لازم نرجعه امعذّبينه هوايه
هاي اطفالك جبتها وكل بناتك هايه
بس رقيه تدري بيها ماتت امدمّايه
أدفنتها وجينه
وينه گبرك وينه
٠٠٠٠٠٠
اربعين امن الليالي فارگيتك بيها
عالرمل عفتك يخويه جثّه ومسلبيها
غصب عني من عفتكم اختك اميسريها
يا حُسين وروحي يمك كل وكت تدريها
انهض ودلّينه
وينه گبرك وينه
٠٠٠٠٠٠
ياحبيبي حسين خويه جيتك تلگّاني
زينب المسبية اسمي والحزن عنواني
امن التعب مابيه امشي والسبي اذّاني
شيّبت يحسين خويه من قهر عدواني
بالألم ردّينه
وينه گبرك وينه
٠٠٠٠٠٠
بهيبه وبعزّ وحميه امن الوطن جبتوني
ليش يبن امي غريبه بالغرب عفتوني
بلا خدر للشام وسفه عالهزل يسبوني
آه من جرح الشماته دم تسيل عيوني
ما سئلتو علينه
وينه گبرك وينه
٠٠٠٠٠٠
ريت ميته وياك خويه وندفن بترابك
ولا اطب مجلس يزيد وانهضم بغيابك
بية يتشمّت يخويه فوگ جرح مصابك
بالطشت راسك يضربه مبتشر بخضابك
خويه يا والينه
وينه گبرك وينه

سيد زيد الفحام

حـسيـن الـك رديـت من ذاك الـيـسـر
يـا عـزيـز الـروح مـشـتاگـه شـكثـر
......................................
جـيتـك وگـايدنـي شوگـي ويحـدي بـضعونـي الوجـع
حسـين ما صـارت مـصـيـبـه ولا گـلب مـثلي انـفـجـع
فـرهـدونـي خـلاف عـيـنـك لا غـيـور الـنـه الـفـزع
وسـوط عـدوانـك تـجـسـر بـالـمـتـن خـويـه انـطـبع
شـگـد صـحت عـباس لـكـن مـا حـضـر
حـسيـن الـك رديـت من ذاك الـيـسـر
..........................................
كـون تـگـعـد حتى اگـلك شوف حـالي وحيـرتـي
مـن خـذونـي بعـيـد عـنك انـا کبـرت بـلـوتـي
شـلـون اعـوفـك والله حــيره وانت گلبك ديرتي
و يا وطـن بـعدك اسـكنه ويـاوحـشتـي وغـربـتـي
مـيـت يـگـلـولـي واخـتـك تـنــتـظـر
حـسيـن الـك رديـت من ذاك الـيـسـر
...............................................
عـذبـتـنـي الـكوفـه خـويه وبيه تركـت چـم جـرح
مـچـتـفـه طبـيـت ليـهـه وانـت راسـك عالـرمـح
ويـا غـريـبـه بـحقـد صـاحو خلصو اهـلـچ ذبـح
من عهـدهه ومـاي وجـهـك ما طـلـع لاخـتك صبـح

تـذكـرت حيـدر ابـونه وانعـصر گـلبي عـصر
حـسيـن الـك رديـت من ذاك الـيـسـر
.....................................................
ارد افـك بـيـبـان حـزنـي ويمك احچي الي شفت
ويـا عـذاب الـشـام ذاك الـمنـه حـيـل تـمـرمـرت
عيد عـدهم من وصلـنه وخـارجـيه انـه اصـبحـت
وطـبـت الـديـوان كـلفه بـياهـضم حـين دخـلـت

شـلـون طـبتـي وانـا ذيـچ ام الـخـدر
حـسيـن الـك رديـت من ذاك الـيـسـر
...................................................
خـويه رديـت بـدمـعتـي ونـار تـلهـب بـالگلـب
واخ يـا ثـكـل الامـانـه حسـين تدري شـكد صعـب
يـمـك عـيالـك جـبـتهـم مـن هـدت نـار الـحرب
ولـو تـنـاشـد عـن رقـيـه مـاتـت بـديـرة غـرب

صغـيرة و بـفـرگـاك مـارادت عـمـر
حـسيـن الـك رديـت من ذاك الـيـسـر
.............................................
✍️. ابـو مـنـتـظـر الـحـريـشـاوي

بخطوة عشگ ودموعي لهواي
يحسين اجيت بشوگي مشاي
…………………………………………………
من الذر وانه  بحبك همت  ياعشگ الگلوب
ولمن صرت   بيك امنت    يااغله محبوب
وي كل نبظ   اسمك يدگ   ابگلبي مكتوب
بهدمي احس  قلة وفه       لن انته مسلوب

يوم اربعينك هذه  هل  جاي
يحسين اجيت بشوگي مشاي
……………………………………………………
قربان الك    روح وجسد   متهمني الاخطار
مقصر انه    ومشي الك     يم فضلك ازغار
يل عزبت   لله بطفل        يحسين  وكبار
گالو طحت   فوگ الثره   وذاك الرمل حار

يذكرني  بيك شما شفت ماي
يحسين اجيت بشوگي مشاي
…………………………………………………………
مو للاجر    جيتك عبد     ياسر الافلاك
لمن سمع     بزيارتك        هذه الگلب جاك
عن هل بشر    خل ابتعد   بس ابقه وياك
لله شكثر    ارفع شكر     محبوبي خلاك

شكرا   يربي  بنعمتك   هاي
يحسين اجيت بشوگي مشاي
……………………………………………………
الخطوه بألف  حجة سمعت يحسين الاخبار
بس بشرط    عن معرفه   موكل جدم سار
رايد فقط  خادم الك      ياسيد الاحرار
عنده بخت  لسمه انكتب  يم شيخ الانصار

هذه الشرف  مامثله  مولاي
يحسين اجيت بشوگي مشاي
…………………………………………………………..
خادمكم قاسم المالكي

متعوبه  ومتيها  الدرب  متعوبه 
             .....................................
ليا ديره اروح ويازلم تحميني 
ليا خيمه اطب ونار  ماتجويني
عافوني اخوتي لوحدي مخليني
عكب الكفلني غربه التماشيني
بذيج الصحاري والشمس حراگه
تمشي اعله كيف وتعبتني الناكه
            .....................................
بلهيمه  اضلن لو اطب لخيامي
كلهن شفتهن عطبن جدامي 
وين اطي  وجهي أوين اضم ايتامي
كاع الله شوچ وأنه ترفه جدامي
وي الأجانب حايره وتعبانه
بلعومي يابس وشكثر عطشانه
                ..................................
تانيتكم وعيوني ضلت شابحه
وراس الكفلني ماغفيت البارحه
محتاره عدمن راح اسوي الفاتحه
وأنه اعله ناگه ومدري المن رايحه
  مات الحسين ومات راعي الرايه
بنص الخرايب  راح اسوي قرايه
             ....................................
ماريد اطبها وطببوني الكوفه
مستحيه چيفن بلحبل مجتوفه
ماريد اصير بكل حلگ سالوفه
بت الرساله وبلخلگ معروفه
بحجار ضلو ياهلي يشمروني
ومن احچي چلمه بحيدر يعيروني
           ......................................
وين الهواشم هوسو بديارهم
ركبت حرمهم علهزل وزغارهم
حل الضلام ومالفتنه أخبارهم
عال اعله اختهم ماصبر چتالهم
من واحد الواحد افه يودوني
ماچن چبيره وكامو يعذبوني
               ...................................
لشام  نمشي لونضل هنانه
يحسين  فشله ماتروح  ويانه
يتعير الما يمشي وي نسوانه
خويه اعله بختك زينبك تعبانه
متعوبه  من حر الشمس والهيمه
يلكتلي  اصيرلچ عبايه وخيمه
                ..................................
مصطفى  الصالحي
من ارشيف2019

ردت ودمـــع السبي بعـــيونهه
والمصايب غيرت كــــل لونهه
ـــــــــــــــــــــــــــــــــــــــــــ
ردت ابياحال من جــــور السبي
من الشمس احمرصبح لون العبي
هاي بت حيدر علي وطــــه النبي
كلفه بت الزهره من يسبوهه
ـــــــــــــــــــــــــــــــــــــــــــ
وسفـــــه يسبون العقيله أم الخدر
من بعد مامشت بالطف عالجمر
من بعد عباس حاديهه الشمر
الدنيه دارت وختلف مضمونهه
ـــــــــــــــــــــــــــــــــــــــــــ
وختلف مضمونها أوركبت هـــزل
وصار حادي ضعونها واحد نذل
ويكطع دروب الصحاري وما يمل
وظل عالتربان حامي ضعونهه
ـــــــــــــــــــــــــــــــــــــــــــ
لفت مشتاكه تـــــدور عالگــــــــبور
وين أخوتي أتصيح مگطوعه النحور
بالچـــــــــفون أدموعها ظلت تفــور
أخـوتها كـــون الحره يتلكونهه
ـــــــــــــــــــــــــــــــــــــــــــ
كون يتلكـونها بدمــــــعــه وحزن
من العقيله باليل ماغمض جفن
والدليل أعله الأهل دومه يحــن
وحنت ورادت تداوي أمتونهه
ـــــــــــــــــــــــــــــــــــــــــــ
كـــامـــت إتشم بالتراب البي عـــطر
عطر ابو السجاد ظهره المــنـكسر
وعطر كافلهه الرخص لخته الـعمر
لوتحــشمه مايخيب ضنونهه
ـــــــــــــــــــــــــــــــــــــــــــ
خادمكم قيس عوده الكعبي

مرد الروس يوم الاربعين نعي مولاتي زينب عليها السلام

ماتگعدون ...تتلگون زينب ماتگعدون
شابت تره ام عون ... من السبي شابت تره ام عون
ماي تردون ... بس لابعدكم ماي تردون

رديت رديت ... وي روسكم يحسين رديت
هل جيت هل جيت ..وبلا رقيه من الأسر جيت
للبيت للبيت... مالك بعد جيات للبيت

عودة السيدة زينب عليها السلام إلى كربلاء




صاحت والگلب ينبض محنّه
خِـذنــه يا عــلـي لگبور أهلنه
.....................................................................................................................

زينب رجعت امن الشام مكسوره
لن بــيــت الهواشــم مِنهدم سوره
فگدت چم عزيــز وراجعـه اتزوره
مردّ الروس فجعه اتخـيّل الصوره

گلب زينب أبـــد ما عاف ونّه
خِـذنــه يا عــلـي لگبور أهلنه
.....................................................................................................................

تگلـــه يا علي الـســجــاد يعيونــي
ما أعتب واگــول اخوانــي عافوني
بس مشتاگه روحي ومنخطف لوني
إخوتي وراجعه امن السبي يدروني

بديار الغُرب وشـبــاقــي إلنه
خِـذنــه يا عــلـي لگبور أهلنه
.....................................................................................................................

ودّيــنــي تگله الگــبــر أبــو الأكــبــر
من عاشـــر مــحــرم گـلـــبــي يتفطّر
أريد أنحب نحــيــــب الفاگـــده وأكثر
شرط كون ابونــيــنــي الصخــر يتفسّر

وعلى هضم السبي أحچيله عنّه
خِـذنــه يا عــلـي لگبـــور أهـلــنه
.....................................................................................................................

تره ســيــف المواجــع للعــظــم واصل
رجعت الـكــربــلـــه لا رايــه لا كــافـــل
أريد أشــبــع بچــي يم گبـــر أبو فاضل
أشــم اتــراب اخــوي وأشــرح الحاصـل

وجوب انزور أبو الغيره الكفلنه
خِـذنــه يا عــلـي لگـبـــور أهلنه
.....................................................................................................................

آني أم الصــبــر مــعــروف عــنــوانــي
أنـــواع الــقــهــر هالــزمــــــن راوانـــي
وحق ضلع أمي روحــــي تريـــد ولياني
أصيح امـــن الســبـــي ردّيـــت يخواني

تفارگنه ونــِرد نجمــع شملنه
خِـذنــه يا عــلـي لگبور أهلنه
.....................................................................................................................

حرم وايتام كلــهـــه إويـــاي ملهــوفه
والـمفـــارگ حبيبــه رايــــد يـشـــوفــه
دلّيني أبو فــاضـــل وينــهــــه إچفوفـه
وأشوفه جروح إديّــه الأمس مچتوفه

مفجوعين لــن ضايــع أملنه
خِـذنــه يا عــلـي لگبور أهلنه
.....................................................................................................................

هاي إگبور أهـلــنــه البـــقــت ذكراهم
وهـــذا الأربــعــيــن وهسّــه جــيـناهم
من راحو خذوهــــه أرواحــنــه اوياهم
بنــفــس اليـــوم كلــهــم مـــن فگدناهم

تجري ادموعنه وننحب بعدنه
خِـذنــه يا عــلـي لگبور أهلنه
.....................................................................................................................

خادم الإمام الحسين عليه السلام
عمار هليل الواسطي

الله يعين زينب ردت شلون
٠٠٠٠ ٠٠ ٠٠٠٠
من درب السبي ماظلت امتون
يخواني اريدنكم تفزعون
الله يعين زينب ردت شلون
٠٠٠٠٠٠٠٠٠٠٠٠٠٠٠
تدرون المجالس موش الام عون
اطب ديوان والوادم يضحكون
الله يعين زينب ردت شلون
٠٠٠٠٠٠٠٠٠٠٠٠٠٠٠
عليه شكال يعباس يحجون
يهل الغيره خويه شلون ترضون
الله يعين زينب ردت شلون

حجي عله ختك يبو فاظل يشمرون
لو ميته اگولن سهله وتهون
الله يعين زينب ردت اشلون

  عليه الناس بالمجلس يأشرون
من الشام اجت معميه العيون
الله يعين زينب ردت شلون

فلاح طالب الماجدي

استشهاد الرضا ع

هذا موتك يالرضا يمك حظر
بس اشوف الكربله درت النظر
من تذكرت الضلع انحصر بعيونك دمع
****
شنهو مر بخاطرك / ونته موت امجاورك
بينك وبين المنيه دمعه وحده
هذا چبدك بالطشت / ونته للطف تلتفت
انسيت جرحك والحزن فوگك تبده
تريد تنحب يالرضا / عله ضلوع مرضرضه
وعله الثلموها ابسهم مرتين چبده

بجرحك اوتقره الزياره امن البعد
ياسلام الله اعله نحره والچبد
تقره بس ما تنسمع انحصر بعيونك دمع
****
يا غريب بلا وطن / رموش عينك حدبن
دمعة الغربه ثجيله وبيها حرگه
شاغلك چنه الضعن / الزينبيات انسبن
هايه ينرادلها يالمسموم شهگه
حرمه ما بين الغرب / وسفه عمتك تنضرب
متون زينب من ضربهم لسه زرگه

بچبدتك ما فكرت لا غربتك
بس شغل بالك سبيها عمتك
امصابها ما ينجرع انحصر بعيونك دمع
****
هذا مو موتك اضِن / العرّگ اجبينك حزن
كل مصايب كربله بگلبك جرحهن
دمعك الينزل حمر / يرسم بعينك نحر
گطره گطره اتطيح عالخد وتلمهن
شما كثر بيك الالم / اگبالك اتصير الخيم
تشوف چم طفله وطفل يسحگ جمرهن

تبچي وگبالك شفت منهو العثر
تركض وتوگع رقيه اعله الحجر
ظل جدمها بي طبع انحصر بعيونك دمع
****
يالعميت امن البچي / إبلهاتك غص حچي
يبن موسى اتريد تذكر يافجيعه
صبت اجبينك نهر / چنك اذكرت الگمر
ويلي عالعباس وچفوفه گطيعه
عينه صكاها السهم / وطاح من عنده العلم
وتالي وي جوده تبده اعله الشريعه

سكنه يم خيمتها ضلت تنتضر
ما اجه العباس بس جاها الشمر
وسفه سكنه تندفع انحصر بعيونك دمع
****
بعد تنضر ياجرح / راس جدك عالرمح
وللرمل مكشوف ظل حسين نحره
رحمة الحافر شمر / والجرح ما يستقر
العشره فزعن ونمرد عالغبره صدره
كل مكان بكربله / بيها طاحت وصله اله
وبالعبايه اتعنت اتلمهن الزهره

يالرضا جدك تسلب ونسحگ
والترف صدره على ضهره انطبگ
ونگطع منه صبع انحصر بيعونك دمع
****
بين حسرات وشجن / تربي عينك للچفن
تدري جدك ظل ثلاثه اعله الترايب
من اجه وكت الدفن / انترست الدنيا حزن
السماء ابدفنته شافت عجايب
امن البچي اوليده انعمه / بالحصيره لملمه
اگبال هالموقف تره ازغيره المصايب

علي السجاد امن اجه ايلم الجسم
بكل اراضي كربله ظل بي يلم
جسمه صعبه ينجمع انحصر بعيونك دمع
****


الشاعر اياد الديراوي

اميــرات الهـواشـــم طبــن الشــــام
سبيــات وأخــوهن راسـه جــــــدام
ـــــــــــــــــــــــــــ
جبيـره اعله العــلاوي طبت السوگ
وهظيمه ابلايه محمل صعدن النوگ
جدمهن والگلب يانـــاس محـــروگ
ويا شــــام الشماته لزينب اشضــــام
ـــــــــــــــــــــــــــ
تعبـن والدرب خلص جـراحــــــات
من عگـب الخــدر صـارن سبيــات
وخلص عمر زينــب گـلـه حســرات
گلبـــها اعله الكفلها اهـواي محتام
ـــــــــــــــــــــــــــ
شكثر ساعــــات خلوهم يتانـــــون
حتى الشـــــام يجهز من يطـــبون
الماعدهم شـــرف باجــر يعيـدون
وكل ساعه انتظـار بمية الف عــام
ـــــــــــــــــــــــــــ
الناس اتجمهرت وتعــاين اشصـار
شي تشمر حجي شي تشمر احجار
وگلوب الفـــواطم تشتعـــل نـــــار
حرگ اگلوبهن جـن حرگ الخيــام
ـــــــــــــــــــــــــــ
اميرات وعليهن نضرو النــــــاس
وادم لاشرف لاغيره واحســـاس
وفوك اعله الرمح يا راس عباس
دخن وارتعد جن غيض ابو الثام
ـــــــــــــــــــــــــــ
طبـو والفرح بالشـــــام جــن عيد
واطبول وهلاهـل گـــامت اتزيـد
وطبت للقصــر زينــب على أيزيد
وبخطبتها طاحـت روس الاصنـام
ـــــــــــــــــــــــــــ
رغم مذبوحـه كل اخـوانها ام عون
الطواغـــي اگبـالها كلهم يدنـگــون
اليكتبون اعله زينـــب خل يكتبون
ذلت عرش اميـه بت الاكــــــــــرام
ـــــــــــــــــــــــــــ
محمد المشعلاوي