Сирӗн «Яндекс.Клавиатура» ларать-и? Ҫак каҫӑпа лартма пулать. Унта вара чӑвашла клавиатурӑ та пур. Хамӑр чӑвашсемпе чӑвашлах ҫырсан пит аван!

❓ Кунта вара ӑна смартфон ҫине мӗнле лартмаллине ӑнлантарса панӑ.

📌 Ӗнер каярах сӑнасарах пӑхрӑм та — мӗнпур вывескӑсенче ҫармӑсла ҫырнӑ иккен. Пирӗн Шупашкарпа танлаштарсан ҫакӑ чӑн та питӗ тӗлӗнтерет.

❓Андрей Чемышевран (@mari_kanal) ыйтрӑм та — ку мӗншӗн ҫапла пулнине ӑнлантарса пачӗ. Иккен, хулара вывеска ҫакма усламҫӑсен малтан проект хатӗрлемелле. Ҫав проекта вӗсем хулари комиссине (архитектура енӗпе ӗҫлекенсем патне) илсе кайса кӑтартаҫҫӗ. Лешсен вара килӗшни пирки алӑ пусмалла. Вӑт, вывескӑсем пурте тенӗ пекех хӑйсен чӗлхипе пулни йӑлт ҫавна пула иккен — ҫармӑсла ҫырни ҫук пулсан алӑ пусмаҫҫӗ кӑна, тӳрлетме ыйтаҫҫӗ. Ман шутпа пирӗн тӳре-шаран ҫак опыта тем тесен те алла илмеллех! Унсӑрӑн Литература музейӗн вывескипе сиксе тухнӑ пӑтӑрмахсем малашне те пулӗҫ.

Ҫармӑссем, тӗрӗссипе, наци туйӑмӗ тӗлӗшӗнчен чӑвашсенчен пӗрре те малта мар ӗнтӗ. Хула тӑрӑх самай утса ҫӳрерӗм, хӑйсен чӗлхипе калаҫнине сайра тӗл пултӑм. Мана Шупашкара илсе каякан автобус водителӗ пӗр хӗрерӑмпа телефон урлӑ калаҫса пычӗ… Вырӑсла калаҫрӗҫ. Эп маршруткӑн хыҫнелле ларатӑп пулин те вӗсен калаҫӑвӗ лайӑх илтӗнсе пычӗ. Калаҫӑва вӗҫленӗ май хӗрарӑмӗ чӑвашла каларӗ. Кайран вара: «эп сана ҫакнах халь чӑвашла каларӑм» тесе ӑнлантарса пачӗ… Автобусӗ Йошкар-Олариччӗ… 🚌

Апла пулин те кӳршӗллӗ республикӑра ҫармӑсла ҫырнисем ытларах тӗл пулаҫҫӗ. Тулашра кӑна мар, шалта та. Пирӗн патри столовӑйра пӗрре те пулин чӑвашла ҫырнине асӑрхаса-и? Ҫук пуль. Вӗсен патӗнче вара — куртӑм. Ку ман шутпа йӑлтах тулашра ҫӑрмӑсла ҫырма ыйтнипе ҫыхӑннӑ. Халӑх хӑнӑхса ҫитнӗ те — хӑйех тӳрех ҫармӑсла та ҫырса хурать /пирӗн вара ҫак япалашӑн «ҫӑпӑҫма» тивет :(/.