«Чӑваш халӑх сайтӗнче» ҫӗнӗ пай хушрӑм: Телеграмри каналсенчи кӑсӑклӑ материалсем. Вӗсене, паллах, хамӑр суйлӑпӑр.

Ку пая унчченех ӑсталанӑччӗ, анчах «Ҫӗнӗ Капкӑн» валли. Кайрах тытса пыма вӑхӑт ҫитми пулчӗ, ҫапла май вара сайтран ку пая илнӗччӗ. Халӗ вара урӑхларах турӑм: хальтерех кӗртнӗ 10 сообщенинчен пӗрине кӑтартӗ. Ҫӗнелессе яланхи пекех 15 минутра пӗрре ҫӗнелсе тӑрӗ.

Хӑш каналсенчи сообщенисем пулӗҫ-ха? Паллах, хамӑра ҫывӑх каналсенчисем. «Ҫӗнӗ Капкӑн», «Рувики чӑвашла», «Аҫтахар картишӗ» тата ыттисем те. Хам эп кулленех «Чӑвашла шухӑшла», «Вӗт шӑрҫа», «Сергеевна» пеккисемпе паллашса тӑратӑп. Вӗсенче тухнӑ кӑсӑклӑ сообщенисем те пулӗҫ. Суйланӑ чухнехи тӗп критери: каналти сообщени чӑвашла пулни (харӑсах вырӑсла та чӑвашла та ҫырнӑ пулсан та суйламӑпӑр пуль). Вырӑслисем валли те вырӑсла версире ҫак блока хатӗрлес шухӑшлӑ. Анчах каярах… (паян кун ҫумӑрлӑ пулать теҫҫӗ те, тен, паянах ӑсталӑп...)

Сайтра ҫак пая вырнаҫтарнин тӗп тӗллевӗ: телеграмри чӑвашла каналсем пирки халӑх патне ҫитересси. Аттук вӗсем, тен, пӗлмеҫҫӗ те!

Тата, ман шутпа, хамӑр хушӑра пӗр-пӗрин каналӗсене хутран-ситрен рекламӑласан та пӑсмӗ.

#ЧӑвашХалӑхСайчӗ #ЧХС #программӑлани

Манӑн проект лакса ларнӑ. Эсир манпа лайăх кун ҫинчен хальччен калаҫман пулсан, ҫырса ярӑр.
Тавах

Тин кӑна Кукӑль.Тӑлмачра интереслӗ функци асархарӑм. Куҫарнӑ предложени ҫине пуссан темиҫе вариант сӗнет.

Вӑл кӑна та мар — кашни вариантӑн тата каялла куҫарни пур.

Хамӑр «Атӑл.Тӑлмачра» та ку функци евӗр япалана ӑсталамалла пуль.

#ҫӗнӗренпӗлни

🎆 Тӑванӑмӑрсем! Атьӑр-ха, кӑшт та пулин вӑхӑт тупса, Mozilla Common Voice-ра сасӑсен базине пуянлатар!

Мӗн тума ку кирлӗ-ха? Ара, тӗрлӗ сасса лайӑхрах палласа илмешкӗн. ASR (сасӑран текст тӑвасси) текен япала тӗрлӗ сасса аванран палласа илсе тӗрӗс текстлатӑр тесен 100 сехет ҫырнӑ сасӑ кирлӗ. Чӑваш чӗлхи валли хальлӗхе 70 сехете яхӑн кӑна пур. Тепӗр 30 сехет кирлӗ. Пулас ӑрусем валли хӑвӑр сасса ҫырса хӑварни те пит аван пулмалла!

https://chuvash.org/news/29888.html — сасӑ мӗнле ҫырмаллине ҫакӑнта ӑнлантарса панӑччӗ.

Ҫавӑн пекех хӑвӑр сассӑра Чӑваш чӗлхи корпусӗнче те ҫырма пултаратӑр. Унта ҫакнашкал функционал тӗп страницӑра вырнаҫнӑ. Тӗплӗнрех унпа мӗнле ӗҫлемеллине ҫак каҫӑпа ӑнлантарса панӑ: https://corpus.chv.su/content/voice.html

Такам тӑвасса ан кӗтӗр! Эсир хӑвӑр тусан кӑна ӗҫ ӑнӑҫлӑ пурнӑҫланӗ! Паянах, ырана хӑвармасӑр темиҫе пуплевӗше сасӑласан — тата та аванрах!

#йыхравсем #пулӑшу

Паян 300 ытла сыпӑк ҫыртӑм. Ҫапла май хам ҫырнӑ пуплевӗшсен шучӗ икӗ пинрен иртрӗ. Апла пулин те эп чи малта мар :(. Манран ытларах тепӗр виҫӗ ҫын сасӑ ҫырнӑ.

Сӑмах май, хамӑр корпусра эп ҫырнӑ (тата, паллах, видеорепортажсенчен кӗртнӗ) сасӑ калӑпӑшӗ 7 сехетрен иртрӗ. Mozilla Common Voice-ра пӗтӗмпе 28 сехет ҫырса илнӗ пулсан, пирӗн корпусра — 39 сехет ытла (вӗсенчен 30 сехечӗ Алинӑн).

#ҫитӗнӳсем

Куккуксем

Динамиксенчен юрӑ шӑранать. Игорь Никифоров «Куккуксем» юрра юрлать.

Шухӑшларӑм та — вӗт чӑннипе ҫак юрӑ пирӗн чӑваш халӑхӗ пирки. «Чӗппи ӳснӗ ун ют йӑвара…» — чӑн та, хамӑр чӑваш пулин те, ачасем пирӗн чӑваш йӑвинче мар, ют йӑвара ӳсеҫҫӗ. Куккука ҫапла ҫутҫанталӑк туса янӑ-ха та ӗнтӗ, анчах хамӑр халӑха вара ятарласа ҫапла ҫул ҫине тӑратаҫҫӗ. Ирӗксӗртен вара «Тăван амăшĕпе тăван хĕрĕ пĕрле Пĕр-пĕрне палламаççĕ çаплах» пулса тухать те. Ашшӗ-амӑшӗ чӑвашла калаҫать, ачи-пӑчи — вырӑсла. Ӑнланмаҫҫӗ пӗр-пӗрне…

Пуҫа килнӗ шухӑша ҫырса хурас терӗм… Сайтра вырнаҫтармашкӑн ҫавах та статья валли кӗскерех...

#шухӑш

Чӑн та пирӗн хушшинче тӗлӗнтермӗш ҫынсем питӗ нумай. Эпир вӗсем ҫинчен пӗлместпӗр те. Ак паян Ефремов Панфил Афанасьевич ҫинчен пит нумай пӗлтӗм: https://cv.ruwiki.ru/wiki/%D0%95%D1%84%D1%80%D0%B5%D0%BC%D0%BE%D0%B2_%D0%9F%D0%B0%D0%BD%D1%84%D0%B8%D0%BB_%D0%90%D1%84%D0%B0%D0%BD%D0%B0%D1%81%D1%8C%D0%B5%D0%B2%D0%B8%D1%87 . «РУВИКИ чӑвашла» каналта «Кӑсӑклӑ» рубрикӑра вырнаҫтармалла та анчах паянхи кун валли унта урӑх статья суйларӑмӑр (ӑна Владислав хатӗрлет).

Вӑт, чӑн та, питӗ вӑйлӑ этем! Улӑп! 13 ҫулта ашшӗсӗр юлнӑ, йӑмӑкӗсемпе пиччӗшӗсене хӑй ӳстернӗ темелле. Шкулта пӗлӳ илсе Хусанти учительсен семинарийӗнче экстерн мелӗпе экзамен тытнӑ, учитель профессие алла илнӗ. Каяран 56 ҫул хушши ачасене вӗрентнӗ (вӗсенчен 40 ҫул — тӑван ял шкулӗнче).

Паллах, ку мар мана тӗлӗнтерчӗ. Ишек шкулӗнче вӑл механизациленӗ ӑслатӑх лаҫҫи (мастерской) тунӑ, унта ҫил вӑйӗпе ӗҫлекен генератор та вырнаҫтарнӑ пулнӑ. Хӑйӗн конструкципе сӳре ӑсталанӑ, тӑван колхоз валли тырӑ типӗтмелли хатӗр туса панӑ. Тата ку ҫын йывӑҫран велосипед (эп ку транспорт хатӗрне питӗ кӑмӑллатӑп) ӑсталанӑ! Унпа ярӑннӑ чухне ялти пӗтӗм ача курма тухнӑ тет.

Ҫакӑн пек биографисене вуланӑ хыҫҫӑн хӑвна ытла та пӗчӗк ҫын пек куратӑн...

#шухӑшсем

Телеграммра чӑвашла ҫыракан ҫӗнӗ канал уҫӑлнӑ: Фактсем. Вӑл тӗнчере кӑсӑклӑ ӗҫсем пирки ҫырма тӗллевлет.
https://t.me/factsem

Чӑвашла ҫӗнӗ каналсем уҫӑлни яланах савӑнтарать. Уйрӑмах, ҫакнашкаллисем. Тематики те «РУВИКИ Чӑвашла» канала ҫывӑх. :)

#пӗлме

Паян — Пӗтӗм тӗнчери куҫару кунӗ! Ҫак куна мӗнле палӑртма пулать-ха?

1) «Атӑл.Тӑлмач»-ра куҫарнӑ пуплевӗшсене хакласа тухма. Ҫапла май куҫару пахалӑхне каярах ӳстерме май пулӗ.

2) Чӑваш чӗлхи корпусӗнче чӑвашларан вырӑсла куҫарса. Паллах, ку ӗҫе тӑвиччен регистрациленес пулать. Корпусра пулӑшакан хатӗр те пур — унпа усӑ курса куҫару ӗҫне хӑварт туса ирттерме пулать!

#куҫару

РКН Раҫҫей халӑхне ӑслӑрах та ӑслӑрах тӑвасшӑн курӑнать. Мӗнле пуҫпа шухӑшлаҫҫӗ — ӑнланмастӑп. Ак илчӗҫ те Дискордра блокласа хучӗҫ — ман вара вӑл ӗҫ инструменчӗ.

Пӗрисем тӗнчене ҫутӑрах тума тӑрӑшаҫҫӗ, кӑсем вара — тӗксӗмрех тӑвасшӑн. Сӑмах ҫитмест.

Юрать-ха блокланинчен хӑтӑлмалли мел тупрӑм… Тата мӗн шухӑшласа кӑларӗҫ-ши? Блоклани кама ырӑ тӑвать? Йӗрке пӑсакансем вӗсем ахаль те шӑтӑк тупӗҫ, нуша куракансем — ахаль ҫынсем кӑна вӗт! Халь критиклеме юрамасть те — мӗн тӑвас теҫҫӗ, ҫавна тӑваҫҫӗ! Кашни утӑмӗ вӗсен тӗрӗс тесе шутлаҫҫӗ пуль… Анчах критиклени тӗрӗс мар утӑмсенчен упрама тивӗҫ. Шӑп ҫав япалана эпир ҫухататпӑр та... Ырри патне ҫакӑ пӗрре те илсе пымасть.

//Чӑтӑм ҫук ӗнтӗ! Йӑлӑхтарса ҫитерчӗҫ ӗҫлекен япаласене ватса!

#шухӑшсем