سۆز و نەوای دڵ یاران یاوەران
ماچۆ نەو وەهار تەشریفش ئامان
پەنگوو داریانی شاهۆ و ئاسێڵان
هێڕنس، هانەوەز، بەرزی هانەسان
ساوەرۆ و نوورە چنی کۆساڵان
ئننەو تەوەناش سڵام هەورامان

کرێن، وەزە پووچ، وڕا و نەوەسار
مەنیجەخانێ تەڵانە و نجار
زازی پۆشانش کاڵای نەو وەهار
بەننەنە و بەننەن، بەننەن مێرگەوار
گاهۆڵە و دەشتە، تەت و شروەسان
هەزار ئاننەتەر سڵام هەورامان

تاوێر و ڕەزڵە ئاتەشگا و شارا
هێڵاو و گەزەن ئا سەردیارا
گەردە و شەوێسەر گردوو هەوارا
سەف سەف گۆراڵێ وێشا ونارا
میشیاو و سەریاس بەرزی کەڕیسان
ئننەو ئا کوا سڵام هەورامان

باخچە و هانەدەشت سەفای هانەکۆڵ
حەوت کەشێ و مێویە #ئەسپەرێزی چۆڵ
سەربەرزە و سەربەرز بەرزی شنگەهۆڵ
باخەکۆن، نوێن، گۆڵی و کراویەدۆڵ
شنروێ بەرزە ،بەرزیش هۆرئامان
بە بەرزی بەرزایش سڵام هەورامان

گراڵە و دشە خانەگا و ویار
کەلیانە و کەلیان شاری پاوەشار
هەجێج و نوێن، بڵبەر و ژیوار
شێخا و بەلەبزان، وەزڵیە و تەشار
هیروێ و نەیسانە، نەروی و شەڕەکان
ئننەو ڕۆخانەی سڵام هەورامان

تەتە و مای پیرە بەرزوو داڵانی
ژاڵانە و سلۆر تا قەڵاخانی
هەوشەو بارامی یا تەختوو سانی
یانی وەیوەنە بووکوو مارانی
بەرزەڵنگ دامان وەرکەمەر کاوان
ئننەو ئا گوڵا سڵام هەورامان

بنویسە فەیسەڵ پەی هەورامانی
ویرت بسپارە ویروو دەورانی
نەوسودٚە و شۆشمێ تا هەزارانی
ژاوەرۆ ئەشقی یا حەوزی خانی
شاری هەورامان قەدٚیم ئەیامان
بە بەرزای تارێخ سڵام هەورامان

هانەگەرمڵە، کەمینە و دزاوەر
نۆدشە و بێدٚەرواس شنەی ئاویسەر
شنەو شەرامی نەسیمێ سەحەر
قەیاسەن چنی خەزەر و ڕامسەر
هانەودننێ تا، بەڵخە و سۆسەکان
ئی دیم و ئەو دیم سڵام هەورامان

تەوێڵێ و سەرگەت گوڵپ و گەچینە
بیارێ قودسێ ڕووی سەرزەمینە
ئەلئەزهەر چێشا هەزار بە وێنە
ماواو ساڵحان ماچی مەدینە
ناڵە و سۆزشان تا گەردوون یاوان
بە هەزار سۆزەو سڵام هەورامان

هانە پووینە و سێ ملە، لارەکاو
میراوا و ویمیر، وەزە و هانەساو
هانەو کلووری و دەل و دێوەزناو
ڕوار و دەڵەمەرز دەگاگا و دۆڵاو
هەم #گەردلێ وەشەن هەم گەردەمیان
ئننەو هانەکات سڵام هەورامان

سەراجگاو ناوێ، بەننەن، دەرەویان
کوڕەمیانە و کەلی ئاشقان
ئاریان، ئەوێهەنگ، زۆم و پاڵنگان
هۆیە و سەرهۆیە و بەننەن بێساران
دەرەو مێڵەوێ چۆڵانا و شیان
ئننەو ئا کشا سڵام هەورامان

هانە وەیسکەرەم یا هانە ڕۆسەم
سەربەرزان کاوان سەما و هەور و تەم
هانەو ئافتاوێ ئی چەم و ئەو چەم
هەورامان گردش ماچینە ئێرەم
پلوورەوارانێ و هانە شوانان
پەڕوو ئی دنیای سڵام هەورامان

ژۆنی و پایگەلان ماوای تەوریوەر
ژنێن و گواز، سەرڕێز، چەشمیدٚەر
جۆڵانێ و دووڕوو، گۆزێڵ و وێسەر
گلێنە و ژۆنی سەرچی و تەنگیسەر
کەڕاوا و ڕەزاو چەمی شامیان
هەزار ئاننەتەر سڵام هەورامان

دەرەکیە و دزڵی شاری سەڵواوا
تا، باخوو بەیاش تازە خەواوا
سەرنەهاڵ و بڵ تا هەواساوا
نیەری سەرسەوز، هاژەو شەتاوا
دەمەیەوە و لار، بەرزی عەودٚا٘ڵان
ئننەو چنووریش سڵام هەورامان

کەماڵا و کەماڵ تا سەروو پیری
ئاسانەو سەیدی و هەیاسی ژیری
کەلجی و سلێنە، بەرزوو هەیشووری
پۆشانش کاڵا و ئاڵاو چنووری
ژەرەژی وانا سەحەر جە هەردان
ماچا سەدٚ هەزار سڵام هەورامان


#فه‌یسه‌ڵ_هێدایه‌تی



✍نا ونیشانێ ئا کەشاو ئا هەواراو ئا ژیوگایا کە ئێمە شۆنیشارە مەگێڵمێ و دڵوازێنێ چی سەبکە شێعریەو کاک فەیسەڵ پاویینە دیارێنێ. پەنەوازەن ئینیشا بزانمێ تا بەشێوی فرەینەو جۆغرافیاو هەورامانی وەنەمان دیار بۆ. حەیفا ئاو و خاک و سەیرانگایەکاو وەڵاتوو هەورامانی نەلەی بیمێ، بەڵام خاتراتێ وەڵاتانێ غەریبێ گێڵنمێوە پەی پاڵ دەسەکەیمان.  س.ع

┏🌸🌿🌼   ━━━━━━━━┓
   @aspariz94 ئەسپەرێز  چێڵکڕ 1403
┗━━━━━━ 🌼🌿🌸 ━━━┛