Ба муносибати Рӯзи ҷаҳонии озодии матбуот дар шаҳри Душанбе ҳамоиши “Ташаккули ояндаи осоишта: пешбурди озодии матбуот барои ҳуқуқи инсон, рушд ва амният” оғоз шуд.

Дар ин чорабинӣ, ки дар меҳмонхонаи "Ҳаёт реҷенсӣ" (Hyatt Regency) ҷараён дорад, рӯзноманигорон, коршиносон ва намояндагони созмонҳои ҷамъиятиву байналмилалӣ ширкат доранд.

Онҳо дар ҳамоиш мушкилоти имрӯзи расонаҳои кишварро баррасӣ хоҳанд кард.

⏺Хабарҳои бештар ➡️ Telegram ва MAX

📖Диди нав ба мавзӯи куҳан. Китоби нави “Бозиҳои қисмат”-и Холиқназар Ҷумъазода аз чиҳо қисса мекунад?

Китоби нави Холиқназар Ҷумъазода, нависанда ва ҳаҷвнигори шинохта, бо номи “Бозиҳои қисмат” нашр шуда ва дастраси аҳли адаб гардид. Он маҷмӯаи қиссаву ҳикояҳои дар солҳои 2006-2010 иншошударо фаро мегирад.

Ин асар бо таҳрири шоир Салими Зарафшонфар ва бо пешгуфтори адиб Зариф Ғулом рӯи чоп омадааст. Муаллиф ин маҷмӯаро “фарзанди панҷуми маънавӣ”-и худ хонда, зикр мекунад, ки бар хилофи навиштаҳои қаблии ҳаҷвияш, ин китоб бо муҳтавои ҷиддӣ ва моҷароӣ омода шудааст.

Ҷумъазода дар ин маҷмӯа бештар ба мавзуъҳои доғи рӯз, аз ҷумла ҳаёти оилавӣ, муносибатҳои мураккаби зану шавҳар ва мушкилоти зиндагии ҳамсарон таваҷҷуҳ намудааст.

Дар қиссаҳои китоб фоҷиаҳои хонадорӣ ва талошҳои қаҳрамонон барои ҳифзи номи неку ободии хонадон бо маҳорати баланди бадеӣ инъикос ёфтаанд.

Холиқназар Ҷумъазода кӯшиш ба харҷ додааст, ки тавассути образони сохтааш ба хонанда роҳҳои беҳтари ҳалли масъалаҳои оиладорӣ, тарбияи дурусти фарзанд ва эҳтироми волидонро нишон диҳад.

Худи муаллиф дар асарҳои худ ба масъалаи хиёнати ҳамсарон ва оқибатҳои ногувори он низ дахл карда, дар баъзе қиссаҳо, аз ҷумла “Ҷодари хунини гуларӯс”, навоварӣ нишон додааст.

Ӯ дар ҷараёни кушодани гиреҳҳои ҷиноятӣ на танҳо кормандони мақомотро, балки нақши рӯзноманигоронро низ дар ошкор кардани ҳақиқат муҳим арзёбӣ мекунад. Инчунин, нависанда ба мавзӯи безурётӣ ҳамчун як фоҷиаи рӯҳии инсонӣ рӯ оварда, ҳолати равонии қаҳрамонони худро дар лаҳзаҳои душвори зиндагӣ бо диди нав тасвир намудааст.

Адиби шинохта Зариф Ғулом дар пешгуфтори китоб навиштааст, ки Холиқназар Ҷумъазода аз уҳдаи ин вазифаи масъулиятнок бо сари баланд баромада, қиссаҳои шавқангез ва таъсирбахш офаридааст.

Ӯ таъкид мекунад, ки забони маҷмӯа хеле сода, оммафаҳм ва равон буда, муаллиф ҳангоми таълифи он аз мақолу зарбулмасалҳои халқӣ ва шеъри шоирони классику муосир фаровон истифода бурдааст.

Ба ақидаи Зариф Ғулом, Холиқназар Ҷумъазода ҳоло дар авҷи камолоти эҷодӣ қарор дорад ва ин китоб бешак писанди хонандагони соҳибзавқ хоҳад гашт.

Бояд гуфт, ки ин китоби панҷуми Холиқназар Ҷумъазода аст. Қаблан китобҳои “Парандаҳои муҳоҷир” (соли 2013), “Биё, ки фолат бинам” (соли 2021), “Ашкҳои зери борон” (соли 2022) ва “Хандасарой” (соли 2024)-яш ба дасти хонандагон расида буд. Китоби ҳаҷвии “Биё, ки фолат бинам”-и ӯ соли 2021 “Китоби сол” эълон шудааст.

⏺Хабарҳои бештар ➡️ Telegram ва MAX

#СОҲИБҶАШН

♦️Соли 1914 – Мавлуди Зиёдулло Шаҳидӣ, арбоби ҷамъиятию фарҳангӣ, оҳангсоз.

Зиёдулло Шаҳидӣ барои ташаккули санъати мусиқии касбии тоҷик саҳми арзанда дорад. Асарҳои эҷоднамудаи ин поягузори мусиқии касбии тоҷик на танҳо дар Тоҷикистон ва Осиёи Марказӣ, балки дар бисёр кишварҳои олам мақоми махсус дорад. Шаҳидӣ муаллифи беш аз 225 асари мусиқӣ буда, ҳар яки онҳо дар санъати мусиқии тоҷик ҷойгаҳи худро дорад.

Шаҳидӣ бо осори классикон, аз қабили Рӯдакию Фирдавсӣ, Ҳофизу Хайём ва Бедил, аз дурдонаҳои беназири “Шашмақом” огаҳии хос дошт ва албатта ин ганҷинаи бебаҳои ниёгони миллати мо ба эҷодиёти пурғановати ӯ таъсири амиқ расонидааст. Зиёдулло Шаҳидӣ 25 феврали соли 1985 дар синни 70-солагӣ аз олам даргузашт.

♦️Соли 1972 – Зодрӯзи Ҷамшед Муртазозода, ҳуқуқшинос, вакили собиқи парлумони Тоҷикистон.

Ҷамшед Муртазозода яке аз мутахассисони варзидаи риштаи ҳуқуқи гражданӣ дар Тоҷикистон дониста мешавад. Ӯ доктори илмҳои ҳуқуқшиносӣ, профессори кафедраи ҳуқуқи граждании факултети ҳуқуқшиносии Донишгоҳи миллии Тоҷикистон, доктори илмҳои ҳуқуқшиносӣ ва Шӯрои илмию машваратии Додгоҳи олии иқтисодии Тоҷикистон аст.

Ӯ факултети ҳуқуқшиносӣ ва шуъбаи аспирантураи Донишгоҳи миллии Тоҷикистон ва шуъбаи докторантураи Академияи хоҷагии халқ ва хизмати давлатии назди президенти Русияро хатм карда, дар Донишгоҳҳои Маҷористон, Итолиё, Шветсия, Русия такмили донишу ихтисос кардааст.

Муртазозода аз соли 2015 то 2020 ба унвони вакили Маҷлиси намояндагони Маҷлиси Олии кишвар узви Кумитаи илм, маориф, фарҳанг ва сиёсати ҷавонон буд. Моҳи марти соли 2020 дубора ба унвони узви Ҳизби халқии демократии Тоҷикистон вакили Маҷлиси намояндагон интихоб шуд.

⏺Хабарҳои бештар ➡️ Telegram ва MAX