#احوالات_شهادت_امام_باقر_علیه_السلام_گریز_به_دفن_حضرت_امام_حسین_علیه_السلام


اَئمّه گُلشنِ عالمدَه تَک به تَک گُلدور
اِمامِ باقرَه فِکریم وَلی تَوسّلدور

قَلمدَه بیر جَرَیانِ رِمُوزِ مُحنتَه باخ
مَجازیدَن گُوتور اَل ای گُوزوم حَقیقتَه باخ

حَقیقت اَهلی حَقیقت امامِ باقر دور
حَقیقت اُوسته اُونا یُوز وِیرن مُصیبتَه باخ

گُوروبدی مُحنتِ زندان، مُصیبتِ غُربَت
او قَلبِ عالمِ اِمکاندا صَبر و طاقته باخ

آپاردی شامیدَه هُشّام اِیلدی مَحبُوس
نِجه گِیئوب دِیمُورَم، ماجرای رِجعتَه باخ

یِتیشدی هر یِره گُوردی اَذیّت و آزار
غَریبه باخ، غَم و اَندوه و دردِ غُربتَه باخ

گَلوب مَدینه دَه بیر مدّت اُولدی خانه نِشین
نه بیر گَلوب نه گِیدَن اِبتلای وَحدتَه باخ

مَدینه حاکمینَه شامیدَن یازوب هُشّام
امامی اُلدوره، ماُمُوره باخ، کِتابتَه باخ

ولی اُولانمادی نائل بو مَقصدَه او دَنی
اُوزی جَحیمَه رَوان اُولدی، عَکسِ نیّتَه باخ

اگر چه اُول شَهی مَقتُول اِیدَنمدی هُشّام
اُونون یِریندَه اُولان جانشینِ نَخوَتَه باخ

امامِ باقرَه عَبدُالمَلک مَعاصر اُولوب
او بی حَیادَه اُولان بُغضَه باخ، عَداوتَه باخ

امامی قویمادی دورِ زَمانه آسُودَه
اُونا عم اُوغلیسی زِید اِیلیَن اَذیّته باخ

نه قَدر جُور و جَفا زِید اِیدوب او مَظلومَه
دِینمُورم، او دَنی طَبعیدَه رَذالتَه باخ

اِمامَت اُوستَه اِمامیلَه باغلادی کَینه
زِهی عَجَب آرالیقدا اُولان قَرابتَه باخ

امام قَتلینَه اِیتدی خَلیفه نی مَجبُور
او بی مُروّت اِیدَن فِعلَه باخ، سِعایتَه باخ

اِیدوبدی آیهء اَجرِ رِساتی اِنکار
جَفا و جُوریدَه عَبدُ المَلکدَه سُرعَته باخ

خیال اِیدوب اِیدَه زَهرا چِراغینی خامُوش
او کُور دِلدَه گُوگُل خانه سیندَه ظُلمتَه باخ

درست اِیلدی بیر زینِ اَسب او بی اِیمان
سَواریدی زَهریلَه، اَول شُومِ کینه فِطرتَه باخ

مَدینه حاکمینَه یُولّادی همان اَیَری
غُرورِ سَلطنت و نَخوَتِ ریاستَه باخ

قویُوب هَمان اَیَری بیر آت اُوستینَه والی
امامَه یُولّادی، تَدبیَره باخ، سیاسَتَه باخ

امامی مَکریلَه اِیتدی هَمان آت اُوسته سَوار
اُوتانمادی او زِنا زاده بیر جَسارتَه باخ

بُلوردی زَهریلیدی اُول اَیَر امامِ عَلیم
وَلی مینِیدی گرک، مُقتَضای حِکمتَه باخ

او زَهر اِیلدی تاثیر حُجّتُ اللّهه
پُوزولدی حالتی بیر اِنکسارِ حالتَه باخ

وجودِ اَقدَسِ سُلطانِ دین اِیدوب آماس
تَصوّر اِیله، او زُهرِ جَفادَه شدّتَه باخ

هَمان او حالیلَه پیغمبر اُوغلی جان وِیردی
شَهید اِیدَن اُوز امامین وَفاسیز اُمّتَه باخ

امامِ جَعفرِ صادق وِیروب آتاسینا غُسل
کفَن اِیدوبدی، مَزاره قُویوب، جَلالتَه باخ

بُو دور شَریعتِ پِیغمبر اُلسَه هر مُسلم
اِیدَه لّه غُسل و کفَن، بُو گُوزل شَریعتَه باخ

جَوان اُوغول نَه گُوزل دور آتانی قَبره قُویا
نَقیض مَطلبه باخ، کَربَلادَه مُحنتَه باخ

حسینون اَکبری اُلمُوشدی، کیم اِیدِیدی کفَن
قوری یِر اُوستَه قالوب جِسمِ پاکی، حَسرتَه باخ

بدَن یارالی، قوری یِر، جَنازه سی عُریان
او پاک جِسمیدَه باشدان باشا جَراحتَه باخ

ووروبلا گُون کیمی باشین جِدایه اهلِ جَفا
بَلالی زِینبه مَحشَردی، بیر قیامَتَه باخ

دِیمَه اُولونمادی مَظلوم امامَه غُسل و کفَن
کُتُب دَه مُعتبر اَخبارَه باخ، رَوایتَه باخ

وِیروبلَه قانیلَه غُسلین عزیزِ زَهرانون
حُُنوطِ جسمِ شَریفیندَه قانلی تُربتَه باخ

اَلنلَر اِیچره حسینون بیر اِمتیازیدَه وار
سُوالون اُولسا جَوابیندَه طرزِ صُحبتَه باخ

بو رَسمیدور اُلنَه اُوچ کفَن اُولور امّا
حسینه بِِش کفَن اُولدی، جَلال و عزّتَه باخ

یارالاریندان آخان لَختَه قاندی بیر کفَنی
اِیکیمجیسی خَس و خاشاک اولوبدی، خَلعتَه باخ

اَمان اُوچومجی کفَندَن که اِیتدی سُمّ خُیول
اوزی دِیوب سَحَقونی، همان عبارتَه باخ

مُخدّراتین اُولوب زُلفی دوردومُونجی کفَن
جَنازه اُوسته عَیالِ شَهِ وِلایتَه باخ

مُحجّبات پَریشان اِیدوبلَه زُلفلَرین
اِیدولّه جِسمِ حسینه کفَن، مُحبّتَه باخ

ندور بِشیمجی کفَن، شَرحینَه حَیا اِیدورَم
گَلوب آتانی اُوغول دَفن اِیده، او ساعتَه باخ

آتا جَنازه سینه بیر حَصیر چُولقالادی
وِجودُه باخ، کفَنه باخ، او کانِ رافتَه باخ

اِیدوب آتا اَیاقی آتدا دَفن قارداشینی
یاتوب آتا بالا بیر یِردَه، خوش فَراغتَه باخ

طوافِ مُرقدِ شش گُوشه بیردَه اُولسا نَصیب
#حسینی اِیلَه دعا، صِدقیلَه اِجابتَه باخ

التماس دعای فرج

#سعدی_زمان

#مجموعه_کانالهای_ادبیات_آئینی_عاشورایی