#میلاد_حضرت_زهرا_گریز_به_حضرت_علی_اصغر_علیهما_سلام


بو گُوندَه حَیّ لَم یَزل اِظهارِ قدرت اِیلدی
پیغمبره زَهرا کیمی بیر قیز کَرامت اِیلدی

زَهرا نه زَهرا، عصمتِ کُبری اُوزی خِیرالنسا
صدیقه، مَرضیه اُولان کُفو علی المُرتضا
اُون بیر اِمامین مادری، کانِ ادب، کنزِ حَیا
اِسمین آتاسی مایهء فخر و شَرافت اِیلدی

وِیردی آنا بَطنینده سس هانسی آنایه بیر بالا؟
هانسی اُوشاق شاُنیندَه وار دلدَن آنا دردین آلا؟
قویموب آناسین بو خانم، تک اِیودَه بی مُونس قالا
گلدی آناسیله دله بَطنینده صُحبت اِیلدی

اِیودَه خدیجه هر زَمان غم لَندی، یوز وِیردی اَلم
قلبی دوتولدی غصه دَن، دولدی گُوزینه اشگِ غم
لَحنِ فَصیحیله اُونا سس وِیردی اُول مَریم شیم
هر دَم آناسین، فاطمه، صبره هدایت اِیلدی

دوُزدی خدیجه صَبریله هر بیر غمی اِیتدی قَبول
باشه وِیروب اُوز گُونلَرین، گه شاد گاهی دل مَلول
اُولدی یاخین قُویسون قَدم بو دارِ دنیایه بَتول
بیر بیر خَدیجه مُنتسَب نِسوانی دَعوت اِِیلدی

یِتدی قُریشین سر به سر نسوانینه بو اِختبار
بیر فردی اَصلاً گَلمدی، اُولدی خدیجه دلفکار
بو اَمره راضی اُولمادی لُطفه گلوب پروردگار
دوندردی حالِ یاسینی مَحض مَسرت اِیلدی

سارا او ساعتدَه اُونا اُولماقلیقا همدَم گَلوب
سارا نه یالقیز، آسیه سارائیله با هم گلوب
کُلثوم موسی خواهری، عُمران قیزی مَریم گلوب
زَهرا آناسینه اُولار فَخریله خدمَت اِیلدی

تا قویدی دنیایه قدَم، پاک و مُطهر فاطمه
نُوریلَه مَکه اِیولَرین اِیتدی مُسخر فاطمه
سالدی ایشیق دنیایه چون بدرِ مُنوّر فاطمه
باجادی خورشیدی دِیسم نُوری خجالت اِیلدی

دولتسرایه اُون نَفر حُوریه گَلدی مُشگ مو
هر فردی جام اَلدَه دُولی کُوثر سویوندان مو به مو
جسمِ بَتوله وِیردیلَر کُوثر سُوئیله شُست شو
جنّت لباسیله قَدِ رَعناسی زینت اِیلدی

خوش لَحنیلَه نطقه گَلوب دُختِ رسولِ مُمتحَن
آچدی لَبِ لَعلین گَلوب گُفتاره اُول شیرین سُخن
جاری اِیدوب دلدَه او دَم ذِکرِ خدای ذُوالمنن
الله وَحدانیتین اِقرار او حضرت اِیلدی

عرض اِیلدی مندَن آتام پیغمبره اُولسون سلام
سیّددی پیغمبرلَره ذاتاً اُوزی خِیرالَانام
بیردَه عم اُوغلوم حِیدره، صُلبوندَه وار اُون بیر امام
بیردَه سلام اُولادینه اُول کانِ عِفت اِیلدی

نورِ جمالِ فاطمه گُویلردَه سالدی شَعشعان
اُولدی مُسخر سر به سر اُول نُوریله هفت آسمان
مُژدَه وِیروبلَر بیر بیره حُوریه لَر شادی کُنان
سبّوحیان گُویدَه بنا بیر بزمِ عِشرت اِیلدی

آلدی خدیجه شُوقیله آغوشه اُول غُنچه تَری
سُود وِیرماقا پِستانینه سالدی بَتولِ اَطهری
پِستان و سُود گَلدی دله، یاد اِیت رُباب و اصغری
سُودسوز آنایه، آج بالا باخدوقجا حَسرت اِیلدی

نه صبر آناسیندا قالوب، نه تاب او شیرِ خواردَه
نه سُو اُولوب وِیرسون اُونا، نه سُود او بختی قاردَه
نه سینه سی اُوسته یاتوب نه یوخلادی گَهواردَه
شدّت سوسوزلوق سُوزِشی ساعت به ساعت اِیلدی

نه چاره تاپدی بینوا تا رفعِ آلام اِیلسون
نه دل بولوردی دل دیوب اُول طفلی آرام اِیلسون
اصغر نه دل آچمیشدی تا اُوز دَردین اِعلام اِیلسون
یاندی بالا، باخدی آنا، دَردیندَه شرکت اِیلدی

سُودسوز بالایه آج بالا، حَسرتله باخدی آغلادی
گه اَمدی لَعلِ لَبلَرین اَشگین عُذاره باغلادی
گه چَکدی آهِ آتشین قَلبِ ربابی داغلادی
آغلار آناسیندان بالا، تاراجِ طاقت اِیلدی

سولموش گُوروب غُنچه گُلین، گُل تک یانوب سُولدی آنا
دولموش گُورندَه گُوزلَرین بیر ابر تک دولدی آنا
گُوردی یانور عَطشان بالا، یاندی کباب اُولدی آنا
باخدوقجا آرتدی حَسرتی، اَندوهی شدّت اِیلدی

بانی اُولوب بو مَطلبه #کاتب_حسین نوحه خوان
#تائب وِیروب دور بو سوزه بو طرزیله شَرح و بیان
ماُجور اُولور بو نوحه دَه، هم نوحه خوان هم سوز یازان
#تائب دِئدی بو سوزلری، کاتب کتابت اِیلدی

وِیرم قسم یارَب سنی شَهزادَه اکبر جانینه
دین اُوسته حَلقیندَن آخان شش ماهه اصغر قانینه
وار دور مَریضی #تائبین عاجز قالوب دَرمانینه
سن وِیر شَفا، کیم ناخوشا سن تک طَبابت اِیلدی

التماس دعای فرج


#زنده_یاد_تائب_تبریزی

#مجموعه_کانالهای_ادبیات_آئینی_عاشورایی

#استوری

عالم تمام غـرق تمنای فاطمه‌ست
اصلا دلیل خلق ، تماشای فاطمه‌ست
باشد به زیر سایه‌ی مهرش تمام خلق
هر ذره‌ای که زیر قدم‌های فاطمه‌ست

#میلاد_حضرت_زهرا_س_مبارک♥️