‼️Венгриядагы шайлоодо оппозиция жеңишке жетти

✔️Орбан жеңилүүсүн мойнуна алып, Петер Мадьярды куттуктады. Анын “Тиса”партиясы парламенттеги көпчүлүк орундарды алат.
Шайлоого беш партия катышты, анда эки партия чыныгы атаандаш болчу: өлкөнү 16 жылдан бери башкарып келе жаткан Виктор Орбан жетектеген “Фидес” жана Петер Мадьярдын “Тиса” партиялары. Көз карандысыз коомдук пикир сурамжылоолору оппозициянын чоң жеңишке жетишин алдын ала айткан.

‼️“Карылыкка моюн сунду же акчасын аяп жатат”-Президент Салымбеков боюнча

✔️Президент Садыр Жапаров «Дордой» базарынын ээси Аскар Салымбеков сөзүнө турбаганын билдирди. Айтымында Салымбеков Дордой базарына шарт түзүп жаңыча салуу үчүн 100 гектар жер трансформация кылып берүүнү суранган, бирок убадасын аткара элек.

✔️Жапаров ошондой эле Ош базары бир нече айдан кийин жаңы жерге көчүп кетерин белгиледи. Андан кийин бийлик бардык күч-аракетин Кара-Суу базарына бурат, ал жерде жүк ташуучу контейнерлердин ордуна соода борборлору курулат. Жапаров базар маселеси анын жеке көзөмөлүндө экенин кошумчалады.

‼️УКМК жетекчисинин мурдагы орун басары Даниел Рысалиев кармалды

✔️Улуттук коопсуздук боюнча мамлекеттик комитеттин мурдагы жетекчисинин орун басары Даниел Рысалиев кармалды.
Бул тууралуу Kaktus.media жазды. Маалыматка караганда, Рысалиев кечээ Ички иштер министрлигинин Башкы тергөө башкармалыгы тарабынан суракка чакырылып, андан кийин кармалган.

✔️Ташиевдин тушунда ал Киберкоопсуздук боюнча координациялык борбордун директору болуп иштеп, 10-февралда кызматтан алынган.Кечээ аны менен кошо дагы эки чалгын кызматкери да кармалган.

‼️Бишкекте сирень терген кишиге 5500 сом айып пул салынды

✔️Мунципалдык инспекция сирень, жоогазын жана башка гүлдөрдү үзүү
ошондой эле жашыл аймактарды бузуу — административдик укук бузууларга кирерин эскертти.

‼️Чыңгыз Айдарбеков БШКдан депутаттык мандат берүүнү талап кылды

✔️Жогорку Кеңештин депутаттыгына Бишкектеги №21 шайлоо округунан талапкер Чыңгыз Айдарбеков ага мандат берүүнү талап кылып Борбордук шайлоо комиссиясына арыз тапшырганын билдирди. Ал Куванычбек Конгантиев мандатынан ажыратылгандан бери бир айдан ашык убакыт өткөнүн, бирок Боршайком мандат боюнча ага бир да жолу расмий жооп бербегенин кошумчалады.

✔️Эске салсак, №21 округдан шайланган Куванычбек Конгантиевдин мандаты 10-мартта жазган арызынын негизинде алынып, кийин өзү Улуттук коопсуздук боюнча мамлекеттик комитеттин тергөө абагына камалган.
Добуштардын саны боюнча андан кийинки орунда турган Чыңгыз Айдарбековго мандат бериле элек. Борбордук шайлоо комиссиясы талапкердин соттуулугу бар-жогуна байланыштуу Ички иштер министрлигинен маалымкат күтүп жатканын кабарлаган.

‼️Аида Исатбек кызы министрдин орун басары болду

✔️Экс-депутат Аида Исатбек кызы Эмгек, социалдык камсыздоо жана миграция министринин орун басары болуп дайындалды.
13-апрелде ал министрликтин эмгек жамаатына тааныштырылды.
Исатбек кызы Жогорку Кеңештин 7-чакырылышында депутат болгон.

‼️Октон жаракат алган жоокер каза болду

✔️2004-жылы туулган И. уулу А. квалификациялуу медициналык жардам алып, өмүрдү сактап калуу чараларына карабастан, Алай районунун Гүлчө шаарындагы ооруканада каза болду.
Учурда мамлекеттик чек ара кызматы ички иликтөөсүн улантууда.

‼️”Мыйзамсыз кустургандар жазасын алат”- Садыр Жапаров

✔️Президент Садыр Жапаров журналист Ыдырыс Исаковго берген маегинде УКМК тарабынан мыйзамсыз кустурууга кабылган ишкерлер боюнча жооп берди

‼️Курманбек Бакиевдин бир тууганы Ахмат Бакиев каза болду

✔️Бул тууралуу маалымат ачык булактарда пайда болду. Ага ылайык, Ахмат Бакиев Өзбекстандын Ханабад аймагында жашаган жана көптөн бери оорудан жапа чегип жүргөн.
Алдын ала маалыматтарга караганда, ал бүгүн Манас шаарында жерге берилет.

‼️Ошто үйү буздурулгандарга кенемте төлөнүп берилет

✔️Оштогу мыйзамсыз курулуштарды иретке келтирүүдө үйүнөн ажыраган жарандарга кенемте төлөп берилет. Мамлекет башчысы Садыр Жапаров Ош шаарынын тургундары менен болгон жолугушууда үйлөрү бузулуп, кенемтесин ала албай жаткандардын маселеси көтөрүлдү. Президент курулуш тармагындагы мүчүлүштүктөрдү жана жарандардын менчик укугун коргоо зарылдыгын моюнга алып, бул көйгөйдү чечүү тапшырмасын берди.
Ош шаарынын мэри Жанар Акаев кенемте алмашуу жолдору менен чечилип жатканын билдирди.

“Алардын дээрлик 10% чечилген. 90% азыр биздин мойнубузда. Бирок биз айрым жерлерди трансформация кылып, алмашуу жолу менен чечип жатабыз. Мэриянын балансындагы жерлер, батирлер бар. Мисалы, ошол эле Касымбеков көчөсүндө, Юго-Востокто бир топ ири объектилерди чечтик. Отузга жакынын алмашуу жолу менен чечтик. Мэриянын балансында турган үйлөрдү бердик. Айрым учурда жерлерди иштетүүгө бердик. Чоң маселелердин бир тобун чечтик",

- деди Жанар Акаев.

‼️УКМКнын төрагасынын мурдагы орун басары Тимур Шабданбеков кармалды

✔️Аскер прокуратурасы Улуттук коопсуздук боюнча мамлекеттик комитеттин (УКМК) төрагасынын мурдагы орун басары Тимур Шабданбековду кармады. Бул тууралуу ЖМКлар жазды.
Маалыматка караганда, УКМКнын дагы алты кызматкери кызмат абалынан кыянаттык менен пайдалануу боюнча шектелип кармалды.

‼️“Ред Петролеум” май куюучу жайлар тармагынын директору кармалды

✔️“Ред Петролеум” май куюучу жайлар тармагынын башкы директору Акылбек Маматов кармалды.
Белгилей кетсек, Акылбек Маматовдун үй-бүлөсү Улуттук коопсуздук боюнча мамлекеттик комитеттин (УКМК) мурдагы жетекчиси Камчыбек Ташиевдин үй-бүлөсү менен байланышта. Маматовдун атасы Ташиевдин Кыргыз футбол союзундагы орун басары болгон.

‼️Даниел Рысалиев үй камагына чыкты

✔️Улуттук коопсуздук боюнча мамлекеттик комитеттин (УКМК) камакка алынган мурдагы төрагасынын орун басары Даниел Рысалиев үй камагына бошотулду.
Чечимди Биринчи май райондук соту кабыл алган. Ага ылайык, Даниел Рысалиев 11-июнга чейин үй камагында болот.
Ушул эле баш коргоо чарасы экинчи айыпталуучуга, УКМКнын бөлүмдөрүнүн биринин мурдагы башчысы Урмат Нарбаевге да колдонулду.

‼️Масалиев Айдарбековго мандат берилиши керектигин билдирди

✔️Мурдагы депутат Исхак Масалиев Чыңгыз Айдарбековго мандат берилиши керектигин жазып чыкты. Ал Борбордук шайлоо комиссиясынын Айдарбековдун "мурдагы жашоосунан" кошумча маалымкаттарды талап кылуусу суроолорду жаратып жатканын айтты.
Масалиев Айдарбеков буга чейин Жогорку Кеңештин депутаты болуп иштеп, бардык зарыл болгон процедураларды аткарганын эске салды.

"Мыйзамды каалагандай чечмелөөгө болбойт. Болбосо, оюн жүрүп жатканда эрежелер өзгөрүп кетеби?", -

деп суроо салды ал.

✔️Масалиев процессти кечеңдетүү мыйзамдын өзүн жокко чыгарат жана шайлоого болгон ишенимди төмөндөтөт деп эсептейт.

‼️Иран Перс булуңундагы мамлекеттерден келтирилген зыяндын ордун толтурууну талап кылды

✔️Тегеран АКШ менен Израилдин ортосундагы операция учурунда келтирилген зыяндын ордун толтурууну Бахрейн, Сауд Арабиясы, Катар, БАЭ жана Иорданиядан расмий түрдө талап кылды.
Ирандын БУУдагы туруктуу өкүлү Амир Саид Ираванинин катында бул өлкөлөр өз аймактарын камсыз кылып, айрым учурларда жарандык объектилерге кол салууларга катышканы айтылат.

✔️Ошол эле учурда Перс булуңундагы мамлекеттер жана Иордания операцияга катышканын четке кагууда. Ошол эле учурда Тегеран алдын ала келтирилген зыянды 270 миллиард доллар деп баалап жатат.

‼️"Өч 2" тасмасы Кыргызстанда көрсөтүүдөн алынды

✔️Маданият министрлиги “Өч 2” көркөм тасмасын өлкө аймагында көрсөтүү токтотулганын билдирди. Маалыматка караганда, 13-апрелде министрликке караштуу Кинематография департаментинин комиссиясы ушундай чечим кабыл алды.

“Эксперттик комиссия тарабынан тасманын мазмуну кеңири талданып, анын ичинде зомбулук, ырайымсыздык жана коомдук-адептик нормаларга каршы келген көрүнүштөрдүн басымдуулугу белгиленди. Ошондой эле тасмада позитивдүү социалдык баалуулуктарды жайылтуу, зомбулукту айыптоо же тарбиялык маанини берүү элементтери жетишсиз экени айтылды”,

- деп билдирди министрлик.

✔️Комиссия жыйынтыгында тасманын мазмуну коомчулукта терс реакция жаратып, айрыкча жаштар арасында терс психологиялык жана моралдык таасир тийгизүү коркунучу бар деген тыянакка келди. Буга байланыштуу “Кыргызтасмасы” киноборбору мамлекеттик мекемесинин директору Алмаз Түлекеев кызматынан бошотулду. Кинотеатрларга тасманы көрсөтүүдөн алып салуу милдети коюлду.

‼️Ысык-Көлдө баңгизат лабораториясын уюштургандар кармалды

✔️Атайын кызматтын кызматкерлери Ысык-Көлдөгү баңгизат лабораториясын аныктап, тинтүү жүргүзүштү. Шектүүлөр далилдерди өрттөөгө аракеттенишкен.
Улуттук коопсуздук боюнча мамлекеттик комитет учурда кылмыштуу схеманын уюштуруучулары кармалганын билдирди.
Натыйжада, психотроптук заттарды өндүрүү жана сатуу үчүн колдонулган 10 кг ашык заттардын жана химиялык компоненттердин аралашмасы алынды.

‼️“300 сомдук маселени көтөрүп жүрөт”-Жапаров депутаттарды сындады

✔️Чоң-Алай районунун тургундары менен жолугушууда Садыр Жапаров Жогорку Кеңештин депутаттары майда-чүйдө маселелерге көңүл бурбай, улуттук маанидеги маселелерди көтөрүшү керек деп билдирди.
Мамлекет башчысынын айтымында, парламент конкреттүү маселелерге көңүл бурбай, миллиарддаган жана триллиондогон сомдорго байланыштуу маселелерди чечиши керек. Мисал катары ал айрым парламент депутаттарынын иш-аракеттерин келтирди, алар, анын айтымында, маанисиз маселелерди көтөрүшөт.

✔️Белгилей кетсек, буга чейин депутат Эрулан Кокулов 300сом айып пул үчүн Жол кайгуул кызматкери менен жаңжалдашкан. Жана ал маселени Жогорку Кеңеште айтып чыккан.

‼️Улан Сариев №19 шайлоо округу боюнча Жогорку Кеңештин депутаты болду

✔️Борбордук шайлоо комиссиясы ага белгиленген үлгүдөгү күбөлүк жана төш белги тапшырды.
Эскерте кетсек, буга чейин депутат Абдылдабек Эгембердиев мандатын тапшырган. Ал эми Рамис Жунусалиев анын ордуна келиши керек болчу, бирок ал алдамчылык боюнча айыпталып, Улуттук коопсуздук боюнча мамлекеттик комитеттин тергөө абагында болгонуна байланыштуу мандаттан баш тарткан.
Кийинки орунда Улан Сариев болгон.

‼️Кытайда BYD электромобилдерин чыгаруучу заводдо өрт чыкты

✔️Кытайдын Шэньчжэнь шаарындагы BYD электромобилдерин чыгаруучу заводдо өрт чыкты.
Өрт тез жайылып, окуя болгон жерге бир нече өрт өчүрүүчү бригадалар жөнөтүлгөнү кабарланууда.
Жаракат алгандар тууралуу маалымат жок.