Вилоят ҳокими Шуҳратбек Абдурамоновнинг бу галги “Ёшлар куни” доирасидаги учрашуви 9-синф битирувчилари тақдирига бағишлангани билан алоҳида аҳамият касб этди. Бобур шаҳридан видеоконференция шаклида ўтказилган очиқ мулоқотда мактаб директорлари ва олти мингдан зиёд ота-оналар фаол иштирок этди.

Йиғилишда таъкидланганидек, 9-синф — ёшлар ҳаётидаги энг масъулиятли босқичлардан бири. Бу даврда орзулар ҳали аниқ мақсадга айланмаган, қарор қабул қилишда иккиланишлар кўп бўлади. Шу боис, ёшлар танловда адашмаслиги учун уч муҳим таянч — давлат, мактаб ва ота-она бирдек масъул экани алоҳида урғуланди.

Бугунги кунда давлат томонидан ёшлар учун кенг имкониятлар яратилган. Энди эса устозлар ва ота-оналарнинг вазифаси — фарзандлар қалбига йўл топиб, уларнинг қизиқишлари ва қобилиятларидан келиб чиққан ҳолда тўғри йўналиш беришдир.

Жорий йилда 57 мингдан зиёд ўқувчи 9-синфни тамомлайди. Албатта, уларнинг кўпчилиги олий таълимни орзу қилади. Бироқ статистика шуни кўрсатмоқдаки, ҳар йили барча битирувчилар ҳам талабалик бахтига муяссар бўла олмайди.

Вилоят раҳбари бу масалага тўхталар экан, ота-оналар фарзандларига фақат олий таълимни мажбурий мақсад сифатида қўймасдан, уларнинг шахсий орзу ва интилишларини ҳам инобатга олишлари зарурлигини таъкидлади. Зеро, тўғри танланган касб — мустаҳкам келажак пойдеворидир.

Сўровномалар натижасига кўра, 9-синф битирувчиларининг 34 фоизи, яъни қарийб 20 минг нафари техникумларда таҳсил олиб, бир вақтнинг ўзида ҳунар эгаллашни истамоқда. Бу эса замонавий касбларга бўлган қизиқиш ортиб бораётганини кўрсатади. Шу билан бирга, техникум битирувчилари учун олий таълим муассасаларига имтиҳонларсиз иккинчи курсдан қабул қилиниши каби имтиёзлар ҳам яратилган.

Замон билан ҳамнафас равишда янги касб ва ҳунарларга эҳтиёж ортиб бормоқда. Учрашувдан кўзланган асосий мақсад ҳам — ёшларнинг қизиқишларини ўрганиб, техникумларда айнан шу йўналишларни ривожлантиришдан иборат экани қайд этилди.

Бугунги техникумлар аввалгидек фақат назарий билим берувчи муассаса эмас. Улар замонавий ишлаб чиқариш корхоналари билан узвий боғланган бўлиб, ўқувчилар ўқиш билан бирга ишлаб, ойлик маош олиш имкониятига ҳам эга. Бу эса ота-оналар қарашини тубдан ўзгартирмоқда.

Таълим тизимидаги бу янгиликлар нафақат ёшларни касбли қилиш, балки иқтисодиётга малакали кадрлар тайёрлаш, ҳудудларнинг барқарор тараққиёти ва инвестицион жозибадорлигини оширишга ҳам хизмат қилмоқда. Энг муҳими, ота-оналарни фарзандлари келажаги борасидаги хавотирлардан халос этмоқда.

Andijan.uz|Facebook|Instagram|Youtube|X

Андижон вилояти Кенгаши делегацияси тажриба алмашиш мақсадида айни кунларда Жиззах вилоятида бўлиб турибди.

Ушбу ташриф Ўзбекистон Республикаси Президентининг маҳаллий давлат ҳокимияти вакиллик органлари фаолиятини 2030 йилга қадар ривожлантиришга қаратилган фармони асосида амалга оширилмоқда.

Андижон вилояти Кенгаши раиси Ўктамжон Охунов бошчилигидаги делегацияни Жиззах вилояти ҳокими Улуғбек Мустафоев қабул қилди. Самимий ва ишчан руҳда ўтган учрашувда икки ҳудуд ўртасидаги ҳамкорликни янада мустаҳкамлаш, депутатлар ҳамда котибият ходимлари ўртасида илғор тажрибаларни кенг жорий этиш масалалари атрофлича муҳокама қилинди.

Бундай мулоқот ва тажриба алмашувлари маҳаллий Кенгашлар фаолияти самарадорлигини ошириш, ҳудудлардаги ислоҳотларни янада жадаллаштиришга хизмат қилиши билан аҳамиятлидир.

Andijan.uz|Facebook|Instagram|Youtube|X

Пахтаобод тумани Сой маҳалласи бугун изчил тараққиёт ва янгиланиш жараёнларини бошдан кечирмоқда. Маҳаллада ички кўчаларни асфальтлаш ишлари жадал суръатларда олиб борилиб, аҳоли учун янада қулай ва хавфсиз муҳит яратишга хизмат қилмоқда.

Айни пайтда замонавий техника ва илғор технологиялар ёрдамида йўлларга сифатли асфальт қопламаси ётқизилмоқда. Бу эса нафақат транспорт ҳаракатини енгиллаштириб, балки аҳолининг кундалик ҳаётида учраётган қатор ноқулайликларни бартараф этмоқда.

Шу билан бирга, оғир тоифага кирган маҳаллаларда ҳам ишлар жадал суръатларда ташкил этилиб, ҳудудларни тубдан янгилаш ва инфратузилмани яхшилашга алоҳида эътибор қаратилмоқда.

Бундай кенг кўламли ободонлаштириш ишлари маҳалланинг ташқи кўринишига кўрк бағишлаш билан бирга, уни янада яшаш учун қулай ва замонавий ҳудудга айлантирмоқда. Энг муҳими, бу ўзгаришлар аҳоли фаровонлиги ва турмуш даражасини юксалтиришга мустаҳкам замин яратаяпти.

Andijan.uz|Facebook|Instagram|Youtube|X

Айни дамда Андижон вилояти ҳокими Шуҳратбек Абдураҳмонов бошчилигидаги делегация Афғонистонда амалий ташриф билан бўлиб турибди.

Делегацияни Афғонистон Савдо ва инвестициялар палатаси раиси Мухаммад Саидкарим Хошимий, Ўзбекистоннинг Афғонистондаги Фавқулодда ва мухтор элчиси Ойбек Усмонов ҳамда Савдо ва саноат вазири ўринбосари Мавлавий Шахобиддин Сакиб кутиб олди.

Ташриф доирасида делегация Кобул ва Ҳирот шаҳарларида бўлиши режалаштирилган бўлиб, Ҳирот шаҳрида янги савдо уйини очиш ҳам кўзда тутилган.

Ушбу ташриф Афғонистон бозорини ўрганиш, маҳаллий талабга мос маҳсулотлар ишлаб чиқиш, экспортни кенгайтириш ва икки мамлакат тадбиркорлари ўртасида барқарор ҳамкорликни йўлга қўйиш мақсадида ташкил этилди.

Andijan.uz|Facebook|Instagram|Youtube|X

Хабарингиз бор, Андижон вилояти ҳокими Шуҳратбек Абдураҳмонов бошчилигидаги делегация ҳозирги кунда Афғонистонда амалий ташриф билан бўлиб турибди. Ташриф дастури доирасида делегация аъзолари ўз сафарини Андижон фарзанди, буюк мутафаккир ва давлат арбоби Заҳириддин Муҳаммад Бобур қабри ҳамда Бобур боғини зиёрат қилишдан бошлади.

Маълумот ўрнида: Бобур боғи 1528 йилда Заҳириддин Муҳаммад Бобур томонидан лойиҳалаштирилган ва барпо этилган. Ушбу тарихий маскан «Гузаргоҳ» деб номланган ҳудудда жойлашган бўлиб, ғарб томондан Чеҳелстун йўли ва Дориламон йўли, шарқдан Шир Дарвоза тоғлари, жанубдан эса Чеҳелстун ҳудуди билан чегарадошдир. Боғнинг умумий майдони 11 гектарни ташкил этади.

Andijan.uz|Facebook|Instagram|Youtube|X