Шеър сеҳри

ШОИР БОЛА

Фавқулодда топишдилар иккала ёш,
Қиз ҳуснда тенгсиз эди мисли лола.
Иккисин ҳам сийлар эди сахий қуёш,
Қуёшим, деб куйлар эди шоир бола.

Булбул бўлиб лоласини куйлар эди,
“То ўлгунча сени куйлаб ўтаман”, деб.
Қиз ҳам ёниб севгисини сўйлар эди,
“Сен бўлмасанг ўзни сувга отаман”, деб.

Бири Лайли, бири гўё Мажнун эди,
Қаттиқ эди ўртадаги аҳду паймон.
Бир куни қиз ошиғига “хайр”деди,
Жўнаб кетди узоқдаги юрти томон.

Тақдир қурғур бу ўйинни тан олмади,
Йигит қизни изламади бошин эгиб.
“Бу хўрликка” қиз ҳам сира чидолмади,
Аламидан у бошқага кетди тегиб.

Рости, дўстлар, шоирга кўп ёмон бўлди,
Ётиб қолди кўкрагини захга бериб.
Эҳ-ҳе, қанча сувлар оқиб тамом бўлди,
Ундан бери қанча қорлар кетди эриб.

Аммо ҳануз тунлар кўкка нигоҳ тикар,
Хаёлини тарк этмайди ўша лола.
Ҳамон уни тушларида кўриб чиқар.
Ҳамон унга шеър битади шоир бола.

1976

Амирқўл Пўлкан

Шеър сеҳри

АРМОН

Учардим, юксакка учардим,
Елкамда оғир юк бўлса ҳам.
Юлдузни, фазони қучардим,
Қучмоқлик кўп буюк бўлса ҳам...

Кўксимдан армоним кетмади,
Армоним қанотсиз, ҳам ғариб...
Учардим қувватим етмади
Рад бўлган севгимни кўтариб.

1969-1973

Амирқўл Пўлкан

Шеър сеҳри

СЕНИ ЭСЛАБ

Туни бўйи юммадим кўзим,
Мен ўзимни қийноққа олдим.
Ўйларим бас бўлмади бир зум,
Хаёлларга чулғаниб қолдим.

Юлдузларга дардимни айтиб,
Юрагимни очиб ташладим.
Тонг бўзаргач кулбамга қайтиб,
Қаламимни шеърга бошладим.

Шунда илк бор титради қўлим,
Жигаргинам тўкилди, инон.
Сен қоғозга тушдингу, гулим,
Шеърдек бўлиб кўринди жаҳон.

Қисматимга шукрона айтиб,
Тўлишмаган бахтимни топдим.
Севолмадим мен бошқа қайтиб,
Доим сени ихтиёр этдим.

Не ўтсаки, қўмсадим, ёндим,
Ташлолмадим ўйларга соя...
Эҳ, бир пайтлар сенга ишондим,
Бу кун хорман ўтмишим дея!

1969

Амирқўл Пўлкан

Шеър сеҳри

ҚАЛАМ ҚОШИМ

Кўзингга термулиб гоҳи қолурман лол, қалам қошим,
Бу оддий ҳолга айланмиш, нетай бу ҳол, қалам қошим.

Тунда юлдузлар гурунгин тинглолмам кўпдан бери,
Гарчи сенсиз тингламоқ ҳам бўлур уввол, қалам қошим.

Тонггача кўз юмолмасдан номинг куйлаб ғазал битдим,
Қабул айла қасидамни, қўлингга ол, қалам қошим.

Аросатда, нетонг, кўнглим, қора қошинг қаросидай,
Бутун меҳри-вафом сенга, дилингга сол, қалам қошим.

Амирқул ишқи домингда, уни ташлаб йироқ кетма,
Ўзимни сенга бахш этдим, ўзим-ла қол, қалам қошим.

1970

Амирқўл Пўлкан

Шеър сеҳри

ТАШНАЛИК

Қалбим, сен бор, баъзан йиғлайман,
Сен борсанки, куламан хандон.
Кечир гоҳо билмай тиғлайман,
Гоҳо сиғмай қолади жаҳон!

Сен борсанки, орзулар ошно,
Сен борсанки, толега ёрман,
Кўзларим ҳам ёғдуга ташна,
Бир ёғдудай туйғуга зорман.

Сен борсанки, куйлаб тўймайман,
Табиатнинг рангларин мақтаб.
Сен борсанки, сўйлаб тўймайман,
Шеър айтаман кимгадир атаб.

Сен борсанки, ёнмоққа шайман,
Севгидан ҳам эмасман йироқ.
Дунёда мен севиб яшайман,
Ишқсизлардан қўрқаман бироқ.

Сен борсанки, чўчитмас ўлим,
Ҳаёт каби шеърим суюклик.
Фақат бахтга ташнадир кўнглим,
Ташналик ҳам асли буюклик.

1976

Амирқўл Пўлкан

Шеър сеҳри

БИР ПАРИ БОР

Бир пари бор, яшар йироқда,
Ҳуснда ҳам тенгсиз гуландом.
Бир пари бор, яшар йироқда,
Хат битурман унга дамба-дам.

Бир пари бор, яшар йироқда,
Эртаклардан бунёд бўлган жон.
Бир пари бор, яшар йироқда,
Кўрмоққа ҳеч бермайди имкон.

Бир пари бор, яшар йироқда,
У ҳаммага соҳиби фармон.
Бир пари бор, яшар йироқда,
Мен ҳам унинг васлига зорман...

Ўша менинг Қуёшим, Ойим,
Осмон каби заминдан йироқ.
Борай десам рад этар доим
Ва Ўзи ҳам келмайди, бироқ...

1976

Амирқўл Пўлкан

Шеър сеҳри

ХАЁЛ

Агар шу ер кирсайди тилга,
Гапирсайди шу қадим тупроқ.
Номард яроғ олмасди қўлга,
Ботир асло бўлмасди қўрқоқ.

Агар шу ер кирсайди тилга,
Гапирсайди шу қадим Осмон.
Ўлим фириб бермасди дилга,
Балки минг йил яшарди инсон.

Агар шу ер кирсайди тилга,
Гапирсайди қоялар, тоғлар.
Сурунмасди ҳеч кимса йўлда,
Ҳаётда ҳам бўлмасди доғлар.

Агар шу ер кирсайди тилга,
Гапирсайди шу қадим Қуёш.
Айланмасди саройлар кулга,
Ариқлардан оқмасди кўз ёш.

Агар шу ер кирсайди тилга,
Бир мўъжиза рўй берса гўё,
Инсон ўзин урмасди пулга,
Ғазо нима – билмасди дунё!

Агар шу ер кирсайди тилга...

1975

Амирқўл Пўлкан

⚜️TAKLIFNOMA⚜️

Hurmatli ADABIYOT MUXLISLARI!

Sizni O‘zbekiston Yozuvchilar uyushmasi a’zosi, otashnafas shoir Azim SUYUNning "TANLANGAN ASARLAR" i va adabiyotshunos olim Qozoqboy YO‘LDOSHning “AZIM SUYUN shaxsiyati va ijodiy qiyofasiga chizgilar” nomli kitobi taqdimotiga, hamda fotograf Ahmad TO‘RAning “KO‘NGIL KENGLIKLARI BO‘YLAB" nomli shaxsiy fotoko‘rgazmasiga taklif etamiz.

⏰ 20-iyun, soat 16:00 da

📍 Manzil:O'zbekiston Yozuvchilar uyushmasi

Ⓜ️ "Milliy bog'" metro bekati

O‘zbekiston Yozuvchilar uyushmasi Axborot xizmati

📱Rasmiy sahifalarimizga obuna bo‘ling!
Telegram | Instagram | Facebook | YouTube

Шеър сеҳри

ОРЗУ

Қуёш кулар қошимда,
Толегинам ёр менинг.
Йигирма беш ёшимда,
Оқ бедовим бор менинг.

Оқ бедовим суринмас,
Менчи уни қистайман.
Йироқдаги орзуга
Тезроқ етмоқ истайман.

Аммо ўша орзуга
Етишганлар камдан-кам.
Сарҳади йўқ, чеки йўқ,
Кўринмайди уфқи ҳам.

Юлдуздай тез оқади,
Талпинади оқ бедов.
Етишолсам бахтлиман,
Йўқса – бахтим беаёв...

1968

Амирқўл Пўлкан

Эътироф

O'G'LIM TEMURGA
Erkin Bozorov she'ri

27-iyun. TEMUR 7 yoshda!!! Tug'ilgan kuning muborak bo'lsin og'lim!

Senday farzand bilan meni siylagan Xudoyim seni ham go'zal hayot, uzoq umr va porloq tole' bilan siylasin!
_______________

Bu kun Ommaviy axborot vositalari xodimlari kuni hamdir. Sohada faoliyat yuritib kelayotgan barcha qadrdonlarga kasb bayramlari muborak!
To'y to'yday, echki qo'yday bo'lsin! Bayram bo'lsa qo'shaloq bo'lsin!😃 Tabriklayman!

@erkinbozorovv

Ushbu videorolik Navoiy viloyati Xatirchi tumanidagi Chig'atoy qishlog'idagi shoir uy muzeyida tayyorlandi.

O'qidi: Abdullayeva Sanobar

Юлдуз

Ўзимни хаёлга отаман бирров,
Бир асов хилқатда ўтмоқда кунлар.
Хаёлда юлдуздек ярқиллар биров,
Хаёлда юлдуздек милтиллар кимлар.

Зотан мен юлдузни олмасдим тилга,
Кўзларда кўргандим унинг сеҳрини.
У кўзлар юлдузни эслатар менга,
Менга боғлаганди оташ меҳрини.

Мен ўша юлдуз деб гоҳо ғам чекдим,
Гоҳида бировдан қизғондим уни.
Телбалик йўлига умримни тикдим,
Қалбда олиб юрдим уни ҳар куни.

Каптардек бир тонгда силкиди қанот,
Ўзга бир манзилни айлади ошён.
Мени ҳам хас каби учирди ҳаёт,
Мен учиб юрибман ўшандан буён.

Энди мен ёнмасман юлдузни эслаб,
Бу ҳаёт дилимга бир умид солди.
Энди мен юлдузни ўйлайман эснаб,
У энди нуқтадек кичрайиб қолди.

1972

Амирқул Пўлкан

Ошиқлар

Гулнор кампир ошиқ бўлди
Олтмиш икки ёшида.
Куйлагани қўшиқ бўлди,
Ўсма қўйиб қошига.

Вафодори чўлда экан,
Боғбон экан мақталган.
Шоир экан, шеъри боркан
Маҳбубига аталган.

Уйланмаган экан чол ҳам,
Бўйдоқ экан у ҳамон.
Илк севгиси бошланганда,
Вақт топмабди нотавон.

Хат ёзишиб турар экан,
Ёзувлари лотинча.
Орадаги муҳаббат ҳам
Билинг, эмас вақтинча!..

Тез орада... Карнай-сурнай...
Ёр-ёр учар ойгача.
Кўп яшасин, Гулнор кампир!
Соғ бўлсинлар – тўйгача!

1967

Амирқул Пўлкан

Секин-секин

Чўлга кетмоқ бўлдим бу йил,
Унамади отам лекин.
Онам деди: “Бироз қуйил!
Улгурасан секин-секин”.

Акам деди: “Қишлоққа бор!
Кўксингга сал тегсин эпкин.
Ҳали ёшсан, не ғаминг бор,
Уйланиб ол секин-секин”.

Тоғам деди: “Сотувчи бўл!
Чой пулинг ҳам бўлар текин.
Бу дунёда ўйна нуқул,
Эт қўясан секин-секин”.

Аммам айтар: “Қолгин шунда!
Роҳат қилиб олгайсан тин.
Офтоб уриб кетгай унда,
Қорайгайсан секин-секин”.

Холам айтар: “Ўқишга кир!
Институт қандоқ яқин.
Етар энди югур-югур,
Ўқигайсан секин-секин”.

Ён қўшнимиз сўзлар шитоб:
“Чўлга бориб экма экин!
Яшамоқнинг йўлини топ,
Бой бўласан секин-секин...”

Мен тинглайман ғиринг демай,
Қалбда эса довул, чақин.
Улар ҳали кўп гапирмай,
Эшитгайман секин-секин.

Ўгитлардан қотар бошим,
Кўтаролмай виждон юкин.
Ўтяпти ҳам йигит ёшим,
Қарияпман секин-секин.

1973

Амирқул Пўлкан

SEKIN-SEKIN
Amirqul Po'lkan she'ri

Erkin Bozorov o‘qidi

Tasvirchi: Qosimxon Ziyabekov
Prodyusserimiz: @prestigetraveluz

@erkinbozorovv

Шеър сеҳри

ДАҲО

Гўё қўлда ҳаёт лангари,
У ўзини ҳис этар даҳо.
Сўз айтмоқдан тинмас лаблари,
Бошқаларга бергайдир баҳо.

Аллакимдан баҳс қилар сизга,
Рад этмоққа бермайди имкон.
Меҳрибондек кўрингай кўзга,
У ҳар қайда топгайдир макон.

Кир қидирар тирноқ остидан,
Фолбинлардек айтгайдир таъбир.
Қутулмайсиз унинг дастидан,
Ёқа ушлаб, қилгайсиз сабр.

Сўйлаб тунни улайди тонгга,
Тугаб борар сизда ҳам тоқат.
Нотўғри, деб бўлмайди унга,
Ёқангиздан олгайдир, ҳайҳот!

Эзмаланиб, бағрингиз тиғлар,
О, улар кўп бизнинг асрда.
Йиғлаганда шеър билан йиғлар,
Гапиргайлар фақат насрда.

1975

Амирқул Пўлкан

Шеър сеҳри

ОВ ГАШТИ

Учта улфат овга чиқдик
Итимизни етаклаб.
Ҳаммамиз ҳам овга ўчмиз,
Баримиз ҳам ов талаб.

Биримизда “қўш оғиз” бор,
Биримизда – “ўн олти”.
Тоққа ҳали етар-етмас,
Кун ҳам чошгоҳ бўп қолди.

Бир пайт менг ёнгинамда
Тустовуқ “пир” этди-ку.
Орқасидан ўқ бўшатдик,
Лекин учиб кетди у.

Секингина бир бутанинг
Сояладик остида.
Кўзларимиз олазарак –
Ўлжамизнинг қасдида.

Ётиб олдик уччаламиз,
Уч томонга тикилиб.
Ниманидир кутар эдик,
Жигаримиз тўкилиб.

Қани энди овоз келса,
Эшитилса ё бир сас?
Қараб турсам, бу аҳволда
Ухлаб қолиш ҳеч гапмас.

Улфатларни туртиб қўйдим,
Имо қилиб тўрвага.
Дарров бири қозон осиб,
Уннаб кетди шўрвага.

Семизгина қўй гўштининг
Ҳиди урди димоққа.
О, азизлар нима етсин,
Тоғда таом емоққа!

Ва айниқса, “юз-икки юз”
“Отсанг” борми “оқи”дан.
Ҳатто имлаб юлдузни ҳам
Туширасан тоқидан.

Ғам-ташвишдан асар қолмас,
Эсламайсан уйни ҳам.
Бор дунёни унутасан,
Ана дам-у, мана дам!..

Биз ҳам худди шундай қилдик,
Бўшатилди уч шиша.
Қани энди бундай дамлар
Бўлиб турса ҳамиша.

Сал кайфимиз ошибди-ю
Ҳамма нарса бўпти ҳал.
Шаҳар томон қайтишибмиз
Ит етаклаб галма-гал.

Оёқларда дармон қуриб,
Тилиниб эт-бетимиз,
Омон-эсон уйимизга
Олиб кепти итимиз.

Шундан бери тоғ десалар,
Юрагимиз ўйнайди.
Лекин ўша ов гаштини
Кўзимиз ҳеч қиймайди.

...Эрта-индин бизлар яна
Ов қўшиғин айтамиз.
Гар милтиқда отолмасак,
Қўлда ушлаб қайтамиз...

1974

Амирқул Пўлкан

👉 https://t.me/amirqulpulkan 👈

Шеър сеҳри

ТУМОВ ДОРИ

Қишда бироз бўлдим бетоб,
Лаб-лунжимга тошди учуқ.
Дори-дармон истаб шу тоб
Аптекага бордим учиб.

Кутиб олди ёш бир санам,
Кўнгил сўрди, ширин кулиб.
Унутилди оғриқлар ҳам,
Уйга қайтдим кўксим тўлиб.

Йўл-йўлакай куйлар эдим,
Тил айланмай минғир-минғир.
Ҳамон уни ўйлар эдим,
Қўймас эди хаёл қурғур.

Қайта бордим эртаси ҳам,
Қарши олди дардим сўраб.
Ёнар эди бутун танам,
Мен лол эдим унга қараб.

Энди ҳар кун шудир аҳвол,
Қатнов ошар борган сари.
Қизга бу иш келмас малол,
Бераверар тумов дори.

Не ҳам қилгум яшириб гап,
Севиб қолдим сўнгги дамда.
Ҳаммасига тумов сабаб,
Тумов қурсин бу оламда...

1970

Амирқул Пўлкан

👉 https://t.me/amirqulpulkan 👈

Шеър сеҳри

АРАЗЛАШИБ ҚОЛДИ УЛАР

Аразлашиб қолди улар,
Тушиб кетди қош-қовоқ.
Эр хотинга “калла” деди,
Хотин деди “бошқовоқ”.

Хотин қурғур бийрон экан,
Сўйлаб тили толмади.
Эрнинг қирқ бир қилиғидан
Биттаси ҳам қолмади.

Чидолмади аламига,
Эр ҳам турди ўрнидан.
Босиб-босиб чекиб олди,
Дуд бурқситиб бурнидан.

Сўнгра ўтли кўзлар билан,
“Рақиби”га қаради.
Кеча ўзи олиб келган
Қил арқонни сўради.

Айтганини олиб қўлга,
Тузоқ қилди учини,
Ўзин осиб, хотинидан
Олмоқ бўлди ўчини...

Дод, демади шунда хотин,
Эр ҳам ипни ташлади.
Гоҳ қизариб, гоҳ бўзариб,
Шошилиб гап бошлади:

“Кечир мени, хотингинам,
Қуриб кетсин тузоқлар.
Ахир ипга ўзни оссам,
Ипсиз қолар бузоқлар!..”

Хотин ҳамон тик турарди,
Койиб эрнинг ишини.
Эри бўлса жилмаярди,
Кўрсатиб жез тишини...

1972

Амирқул Пўлкан

👉 https://t.me/amirqulpulkan 👈