قصيدة ليلة الوحشه
----------------------
الليله ليلة الوحشه يوليــــان
صرعه اعالترابه ازلام عدنان
-------------------------------
صــــرعه اعلترب اولاد الانجاب
ضـــــل حسينه مسلوب الاثياب
گمر عدنان يــــــم العلگمي غاب
شيصبر الگلب كل هاذه المصاب

زينب واليتامه بلايه صيوان
الليله ليلة الوحشه يوليـــان
--------------------------------
زينب واليتامه ويــــن يرحون
هاي الگــوم بخيامي يحرگون
شيلم اليتامه شلون يأم عـون
بعيون العقيله اضلم الكــــون

هاذه يصيح خايف ذاك عطشان
الليله ليلة الوحشه يوليــــــــان
----------------------------------
هاذه الليل اضلم ماكو حــــراس
سكنه تصيح دلــوني اعله عباس
هـــاي شلون محنه تشيب الراس
وانه من الهضم مختنگه الانفاس

شلون بحالها الطاحولها اخوان
الليله ليلة الوحشه يوليــــــان
----------------------------------
شلـــــــون بحالها تسمع يصيحون
حضرو انياگ هزله الهـاي الضعون
درت وجهي الكفيلي وكتله يردون
نصعد والعليل برچبته شلــــــــون

هاي انياگ هزل وحنه نسوان
الليله ليلة الوحشه يوليـــــان
---------------------------------
خويه وداعة الله احنه ماشين
لــــــو بيدي اضلن يمك اسنين
حداي الضعن چتــال الحسين
ماندري بدربنه خويــــه لاوين

رفعو روس خواني اعالسنان
الليله ليلة الوحشه يوليـــان
--------------------------------
حده بينه الضعن ماندري ياصوب
وهــــاي طفال عندي زغار وتلوب
شما اصبر الگلب والصبر چندوب
شو يمشي الوكت ويــاي مكلوب

وصدن للكفل وكت العتب حان
الليله ليلة الوحشه يوليـــــــان
------------------------------------
خادم الحسين ع عبدالله كريم الشميساوي

قصيدة لدفن الأجساد الطاهره.
-----------------------------------
وين هاشم خلها تفزع،،،صيحو حيهم بالعرب
هاذي اجساد النشامه ،،، امعفره فوگ التـرب
------------------------------------------------------
فزعـــــه لولاد الزچيه الضلو ابحر الشمس
اليوم ثالث بالمعاره ماكو نخوه بهل رجس
هـــــــاذي احقاد ال اميه لا اليوم ولا امس

ثار من يوم السقيفه ،،، ثـــار بالسيف انكتب
وين هاشم خلها تفزع ،،، صيحو حيهم بالعرب
------------------------------------------------------
ضل ابو السجاد مرمي ماكو واحد غسله
عادت الميت نغسله وفوگ المتون اعتله
هــاي ماصارت يعالم بس الحسين وهله

جسمه متوذر يعـــالم،،، ثـــــوب العليه انسلب
وين هاشم خلها تفزع ،،، صيحو حيهم بالعرب
---------------------------------------------------
والحوافر فوگ صدره گامت ادوس وترض
هــــاي خيل الاعوجيه داسته طول بعرض
هـــــاي بس امة محمد ينذبح بيها الفرض

هــاي بصمة عـــار تبقه،،، عـــالجبين وتنكتب
وين هاشم خلها تفزع ،،، صيحو حيهم بالعرب
--------------------------------------------------
جثة العبـــاس ضلت طايحه اعله المشرعه
جوده والرايـــــــــــه رميه والزنود امگطعه
الف وسفه اعله ابو فاضل طاح محد شيعه

هاذه عنوان الاخــوه،،، الغيـــره البراسه لهب
وين هاشم خلها تفزع،،،صيحو حيهم بالعرب
---------------------------------------------------
هــــاي الاقمار المنيره بالدموم امعفره
قمار متخضبه ابدماها والرگاب امبتره
صــار ايام وليالي اجسادها فوگ الثره

متانيه الدفان يوصــــل،،، اصبح بعيد الـدرب
وين هاشم خلها تفزع،،، صيحو حيهم بالعرب
---------------------------------------------------
آه يالوعة رضيع الضال ملفوف ابمهد
هاذه ازغر عمر بيهم وكتمل بيه العدد
هاذه اخــر نحر بيهم دمه للباري صعد

والذنب عطشان رايــد ،،، شربه وتروي الگلب
وين هاشم خلها تفزع ،،،صيحو حيهم بالعرب
---------------------------------------------------
خادم الحسين ع عبدالله كريم الشميساوي

قصيدة رد ليه المهر خالي
-------------------------------
نادت وين ابو الحملات،، ردليه المهر خالي
مابين الزلــــم والخيل ،، آنه بعازت الوالي
--------------------------------------------------
وينك ياابو الشدات آنـــــــه بساعة الشده
رتك بالخيم موجود خويــــه العايل اترده
وعله اختك يراعي الزود گام الشمر يتعده
ونته الـــي تحط لناس كلمن طينته بخده

وسفه ياگمر عدنان،، ماشفت الجره بحالي
نادت وين ابو الحملات،، ردليه المهر خالي
-----------------------------------------------؛-
رد ليه المهر مهضوم يصهل والدمع سايل
طــــر بساحة الميدان خالي والسرج مايل
طلعن شافته النسوان صاحن گوم يالكافل
والگوم اعتنت عباس مشعل للخيم شاعل

نار وبالخيم عبــاس،، هجت بالعره اطفالي
نادت وين ابو الحملات،، رد ليه المهر خالي
-------------------------------------------------
انشدنك يمهر حسين ويـــــن حسين خليته
وين بيا كتر مطروح شو چنه انگطع صيته
طـــــاح بساحة الميدان چنه يگول حسيته
مشيت اتعثر ابممشاي نايـــم عالثره الگيته

هاذه انته يبو السجاد،، لــــو آنه انشده بالي
نادت وين ابو الحملات ،، رد ليه المهر خالي
----------------------------------------------------
شفته شلـون ياشوفه اسهام وتنهش ابجسمه
ماضـــــــــل بي كتر عامر اخوي امسبح ابدمه
صحت حيل بنفس مخنوگ هاذه حسين يايمه
مـــوذر يأم حسن عالگاع لحگي حسينچ ابهمه

كفيلي اعله نهر مطروح،، صحته ومااتنالي
نادت وين ابو الحملات،، رد ليه المهر خالي
-------------------------------------------------
مصيوب بسهم چتــــال يمه ونابت ابصدره
ثلثين الچبد وياه طالع مـــــــن خلگ ضهره
حضنته وحرك اشفافه بصدري تكسرت عبره
يام حسين هاذه حسين رايــــد صبر هاكبره

باچر امشي يأم حسين،، والحداي چتالــــي
نادت وين ابو الحملات،، رد ليه المهر خالي
----------------------------------------------------
خادم الحسين ع عبدالله كريم الشميساوي

قصيدة (ريحة الدخان بيه ) لسيدة رقيه ع
------------------------------
محد بگدي تأذه وحمل ذيچ اهمومي
ريحة الدخان بيه وتارسات اهدومي

آ يدنيه آ يدنيه
-------------------------------------
بنيه آنـــه وعودي توه بعين والدها حله
عطشوني وذبل عودي وانه چنت امدلله
اللـــــــــه لا ينطيه كون اليتماني بكربله

ازغير عمري ويتماني ومني طير نومي
محد ابگــدي تأذه وحمل ذيچ اهمومي
---------------------------------------------
حضرو ذيچ المحامل بينه حارت عمتي
اذكريت شلـــــون بيده عمي نوخ ناكتي
عمي ضل اعالشريعه وانه حرت برچبتي


بالسناسل گيدونه بنوح اخلص يومي
محد بگدي تأذه وحمل ذيچ اهمومي
--------------------------------------------
نمشي بدروب الهظيمه وروسهم فوگ السنان
الهظيمه نخاف نبچي نبچي وي صوت الاذان
خـــاف من يسمع بچينه يلچم اجروح الاذان

سطرت الحاقد تعرور غيرتلي ارسومي
محد بگــــدي تأذه وحمل ذيچ اهمومي
--------------------------------------------
اه مـــــن ذيچ الخرابه البيها اخر دنيتي
كل بلاوي الدنيه ماكـــو بلوه تشبه بلوتي
غمضت عيني ولوني شفت ابوي بنومتي

ليش يابويه عفتني وسولفتله اعلومي
محد بگدي تأذه وحمل ذيـــچ اهمومي
---------------------------------------------
فتشت عيني ابخرابه جرحي ضل بلا شفه
صحت ياعمه تعالي الوالي من عيني اختفه
كتله شوف امتوني بويه وذني اديه مچتفه

كلي يابويه اصبري والمنيه اتحومي
محد بگدي تأذه وحمل ذيچ اهمومي
--------------------------------------------
وعتله صــــوت النياحه وجابو الراس ابطشت
كتله بويـــه افتحلي عينك شنهو ذنبي تيتمت
شهگه من شهگات روحي اخر انفاسي الفضت

عمتي ضلت تنادي عمه بسچ گومــي
محد بگدي تأذه وحمل ذيچ اهمومي
---------------------------------------------
خادم الحسين ع عبدالله كريم الشميساوي

قصيدة الشفاه الذابلات
--------------------------
عالهزل مـــن ركبو عماته
ترادمن حدر الضلع آهاته
----------------------------
يشوف عماته وخــــواته مچتفات
روس تمشي اويلضعن فوگ القناة
ام حسبت بالشفاه الـــــــــذابلات

ترتلت فوگ الرمح آياته
عالهزل مـن ركبو عماته
------------------------------
عترة الهادي واهـل بيت النبي
نصبغن بلون الترب ذيچ العبي
مخدرات العتره راحــن لسبي

الچانن ابيت الوحي منوراته
عالهزل مــــــــن ركبو عماته
------------------------------
شافن بدرب السبي الماينهضم
شافن انـــواع المتاعب والالم
نظرت الحاقد امض من السهم

بينه يتشفه وترف راياته
عالهزل مـــن ركبو عماته
-------------------------------
طبت الديوان مو لام الخدر
راس كافلها طلب منها العذر
هــاي ضلت تحفر بگلي حفر

صدري بيه تكسرت حسراته
عالهزل مــــــــن ركبو عماته
-------------------------------
تشفو براس الولي حيل اعتدو
ليت اشياخــــــــي ببدر شهدو
هاذه ثــــــــار وبيه كلهم رددو

وحنه نعرف مقصده وغاياته
عالهزل مـــــــــن ركبو عماته
------------------------------
راس ابوي يضربه گدام المله
كلها تعـــرف ثغره ياهو القبله
راس ابن بنت النبي اويلعايله

چون بگلبي تره احچاياته
عالهزل مــــن ركبو عماته
-----------------------------
خادم الحسين ع عبدالله كريم الشميساوي

👍نعي حسيني
----------------
عگب مالملمت حيلي مشيت آنه بگايه الحيل
اگلب بالجثث بيــــــــــدي ودور بين المچاتيل
اعثرت بوليدي وگتله الخالك رايحه ابهليل
مشيت اتخطه بحساسي عطر مايقبل التضليل
لگيته بساحة الميدان مايــــرهم لخوي الشيل
جسمه امطشر اعالكاع شمسويه بخوي الخيل
ماضـــــــل بي كتر عامر من كل كتر دم يسيل
صدگ يحسين هذا انته ليهز مهدك نزل جبريل
السيف الگطع اوداجك ذبح دين الله والتأويل
اشكيلك يابن حيــــــــدر گام الشمر بينه ايعيل
باچـــــــــــر لسبي نمشي ونته اضل بلا تغسيل
تضل اوصالك اعله الكاع راسك عالرمح ويميل
باچـــــــر ننهضم يحسين وتحمل هضمهم چيل
شلــــــون باطبت الديوان لـو گام بشتمنه يهيل
كل هاذه وبعد يحسين اشوفن من سبينه الويل
--------------------------------------------
خادم الحسين ع عبدالله كريم الشميساوي

قصيدة (هاي زينب ردت اويضعونها)
-----------------------------
هاي زينب ردت اويضعونها
ويـــن هاشم خلهم يعزونها
-----------------------------
هـــــاي زينب عاودت من السير
عاودت لديارها بلايــــــــه الگمر
من المصايب والمحن بيها شكثر

هــواي متغير شكلها ولونها
هاي زينب ردت اويضعونها
--------------------------------
گـــــوم يمحمد لفت ام الحزن
والحرم من شافن محمد بچن
وين شبان المشت ويه الضعن

محمله هموم وحچي امن عيونها
هـــــــــاي زينب ردت اويضعونها
——---------------------------------
چنها موش ام الخدر هاي الاجت
هــــــــــاي مامعقوله هيچ تغيرت
مدري شبسرعه بعجل شو حدبت

لاتنشدون السبيه اشلـــونها
هاي زينب ردت اويضعونها
----------------------------------
ذيچ زينب من مشت ويه الكفل
هــاي زينب ثانيه بلايه الاهــــل
راكض اوياها العمر موبس شكل

يعني زينب بالغــرب اذوها
هاي زينب ردت اويضعونها
---------------------------------
يأل هاشم وينكم شوفو الجره
مـــــــو غريبه هاي زينبكم تره
خـــــل تنوح اياها كل امخدره

وخل تراويكم سياط امتونها
هــاي زينب ردت اويضعونها
----------------------------------
بالمصاب الصــــار ماعدكم علم
لو حچت عن المصايب والهظم
لسان لايگــــدر يوصفه ولا قلم

عالهزل ام الخـــدر يسبونها
هاي زينب ردت اويضعونها
--------------------------------
خادم الحسين ع عبدالله كريم الشميساوي

قصيدة (شموخ زينب)
-----------------------------
كتلو زلمها ،،،،،،، حركو خيمها

عدها العزم زاد بنت الزچيه
------------------------------------
كتلو زلمها ومابچت. لا نزلن ادمــــــــوع العين
رغم المصاب ومحنته زينب تراعي الامـــــرين
وگفت عله امتون الصبر مو صبر واحد صبرين
شالت اخــــوها بكل فخر قربان قدمت حسين

طايح علمها ،،،،،،،، كتلو زلمها

هيچ القدر راد مچتوفه اديه
عدها العزم زاد بنت الزچيه
-----------------------------------
كافلها طايـــــح عالنهر وخيامها بعازت ماي
لكـــن عزيزات النفس ماطلبن الحاجه بهاي
ماطول طايح كافلي غيره فلا يروي اضماي
حـــر العطش ماينحمل زينب تحملها هواي

كتمت المها ،،،،،،،، كتلو زلمها

وي العدو اعناد زينب ابيه
عدها العزم زاد بنت الزچيه
--------------------------------------------
حرگو صواوين الحرم هجن بنات الزهره
نيران شبت بالخيم والدنيه صارت حمره
وكفت مثل جذع النخل كلها تلوذ ابكتره
لبوت علي الماتنچهب بنت الزچيه الحره


رادو هضمها ،،،،،،، كتلو زلمها

هاي ام الامجاد والهاشميه
عدها العزم زاد بنت الزچيه
--------------------------------------------
رادو هضمها بالسبي عالرمــــح روس الوليان
صوت البلاغة بمجلسه وخطبتها صارت عنوان
ايدوي بأركان القصــــر والصده يسمع الجيران
سكتت افواه الزلـــــم والناس صارت خرسان

نشرت ضلمها ،،،،،،،، كتلو زلمها

مارادت اضماد بيه الحميه
عدها العزم زاد بنت الزچيه
-------------------------------------------------
سارو عله اضهور الهزل بالحشمه مرفوع الراس
من الروس ماطاحت عبي مكابلها راس العباس
لا دمعه طاحت من جفن لا ونه سمعتها الناس
بنت الزچيه الطاهـــــره بالعفه مامش مقياس


وصتها امها ،،،،،،،،، كتلو زلمها

وديـــارها ابعاد للغاضريــــه
عدها العزم زاد بنت الزچيه
-----------------------------------------
شافو دمعها ونحنت لمن لفت يـــــــم گبره
سالت مدامعها وجرت شكد الصدر بي عبره
گلبي شكثر خاوه الصبر يمك نفذ كل صبره
يحسين دارت دنيتي والدنيه كلــــش غبره

تسگيني سمها ،،،،،،، كتلو زلمها

جرحـك فلا هاد هضموني اميه
عدها العزم زاد بنت الزچيـــــه
----------------------------------------------
خادم الحسين ع عبدالله كريم الشميساوي

قصيدة گوم ياخيلها
----------------
گــوم ياخيلها
حشمت كفالها
----------------
زينب تحشم يسبـــــع الگنطره
لاتضل نايــــــــم تراني محيره
الخيل لخيام الحرم وصلت تره

ونته غيرك مالها
گــــــوم ياخيلها
-----------------------
گـوم ياشبل الصميده وشوفنه
بالغـــــرب عباس ليش تعوفنه
هاذه وضعك حيل زيد خوفنه

عالنهر ماجالها
گـــوم ياخيلها
-------------------
گوم سل سيفك يبو سيف الكلف
گــوم خل سيفك بالارگاب يغرف
للحرم مامش گــــــرابه ولا عرف

الرايه محد شالها
گــــــوم ياخيلها
---------------------
النـــــار شبت بالخيم ها يالكفل
وحنه ماعـــــدنه عشيره ولا اهل
ونته راعي المرجله اربات الفحل

هاذه زينب حالها
گــــــوم ياخيلها
--------------------
الچان ماتنهض اجيك امگبعه
مو محلها تنام فوگ المشرعه
هـــاي ثارات وخذوها امربعه

الدينه مدري شمالها
گــــــــــوم ياخيلها
-----------------------
الماي ماردناه بس كونك ترد
للحرم ماضل يبو فاضل سند
للمصايب والمحن خل استعد

حضرولي اجمالها
گـــــــوم ياخيلها
--------------------
حضرولي اجمالها وباچـر سبي
اللوذ ياعباس باچــــــــر بالعبي
يحدي بضعون الهواشم ناصبي


زينب اويطفالها
گـــــوم ياخيلها
-------------------
ياگمر هاشم بعد ماضل امل
بيوم حطو بيد زينبكم حبل
جار وكتي وبعد مايلتم شمل

راحت وضل بالها
گـــــــوم ياخيلها
--------------------
راحت وضــــــل بالها يم كربله
گـــــــوه راحت بالهموم محمله
شلون تمشي وي خوله وحرمله

زينب وچتالها
گــوم ياخيلها
------------------
زينب وچتــالها ودرب اليسر
تريــــد ياعباس زينبكم صبر
ريتك كون بهاي لاطال العمر

حاقد اليبرالها
گــوم ياخيلها
-------------------
خادم الحسين ع عبدالله كريم الشميساوي

قصيدة لشهادة الامام السجاد ع.
-------------------------------
بالدنيه ميت مرتين ،،، سم ناصبي وطف حسين

آنــه العليل المهموم
من كربله الحد اليوم
--------------------------------------------------
ضلت صــــــــورهم تارسات اعيوني
شايل المهن آنـــــــــــه فوگ امتوني
كـل شربه چن اسمع صياح اضعوني
يختلط دمعي وي اكــــــــل ماعوني

والنار صارت نارين ،،، بالدنيه ميت مرتين

غصه وتضل بالبلعوم
آنــــه العليل المهموم
--------------------------------------؛---------
يوميه صــــــــــــوره تنعرض جدامي
يبدن ابعمي وينتهن بخيامـــــــــــــي
حــــــال العقيله وعطش ذيچ ايتامي
وانه اعله هــــــل حال انكضت ايامي

مو صبر واحد صبرين ،،، بالدنيه ميت مرتين

مايشفه جرح المهضوم
آنـــــــه العليل المهموم
---------------------------------------------------------
كـــــــــــل هاذه شفته وعايشت آلامه
بس اليحز بينه الگصيره ايامـــــــــــه
عبدالله اخـــــوي السهم موش اولامه
هوايه السهم عبدالله مثــــــل الخامه

والنحر صاير نصين ،،، بالدنيه ميت مرتين

تلگت اخيها ام كلثوم
آنــــه العليل المهموم
----------------------------------------------------------
آنــــــــــــــــه العليل الماتهنه ابعمره
آنـــــــــــه الابوه بسيف حــزو نحره
آنـــــه آلاخوته امصرعه اعله الغبره
يراد كــــــــــــون اصبر صبر هاكبره

امنين اجيبنه امنين ،،، بالدنيه ميت مرتين

مكتوب اعيشن مالوم
آنــــه العليل المهموم
-------------------------------------------------------
ضليت اعــــــــــاني والمصايب وياي
خنجر يكصص بالجلد گيــــــد اعداي
طبع السناسل بالجــــــدم ضلت هاي
ورياگي مـــره وحنضل بريجي الماي

بگيد السناسل ماشين ،،، بالدنيه ميت مرتين

ماضاگت اعيوني النوم
آنـــــــه العليل المهموم
-----------------------------------------------------
جـــــــــــــارو عليه وماتكفو بالصار
دسولــــي سمهم وشتعل چبدي بنار
بس آنــــــه عندي امشيعين وانصار
مـو مثل ابوي الجسمه صاير طشار

لحسين ماكو مشيعين ،،، بالدنيه ميت مرتين

لحسين ماضلت گوم
آنــــه العليل المهموم
-----------------------------------------------------
خادم الحسين ع عبدالله كريم الشميساوي