بالبداية لازم نلتزم بخطة لهذا الشهر ونحصل على نتائج حتى إذا كانت قليلة بس نعتبرها إنجاز النا
اول شي نهتم بالأكل ونحاول نمتنع من الحلويات الي بيها شكر هواي ما راح أمنعكم من كلشي راح انطيكم اكو أنواع سعراتها قليله ونكدر نأخذها مرتين بالأسبوع وراح نحاول نقلل من الكاربوهيدرات الي هو الخبز والمعجنات نقلل شوي شوي لحد ما نكطع الخبز ونركز على شرب الماء نحاول نشرب لترين ونص او نخلي خطة هم علمود الجسم ما يجف ويبقى رطب وراح انزل الكم الوصفات الي تفيدكم بالريوك والغده اكيد نتغدة ويه اهلنا بس احاول انطيكم خطه علمود تأكلون اقل الأشياء علمود لا نزعل الوالدة

والي يريد يصعد وزن هم راح يشوف أكلات بيها سعرات حراريه تفيدة بس شنو نصعد بصورة صحيحة يعني مو اكل اكل وبالآخير يصير تكدس دهون بدون فايدة نحاول نخلي طريقه الصعود صحيحة وبالاكل المناسب
وان شاء الله أشارك الكم كل المعلومات الي تفيدكم

وما راح أصعب عليكم الأكل واكلكم لازم فلان شي ولازم تأكلون اكل غالي راح نسوي كلشي بالأشياء الموجودة بالبيت ونخليها صحية شكد ما نكدر ولا راح اتفلسف على احد بيكم واحاول انقل تجربتي لهاي الرياضه واشارك الكل بالمعلومات المفيدة

شبابنا الطيبين اليوم راح احاول أوصل الكم فكرةالأكل بالبيت وشنو الهدف من هذا الفكرة ونبدي خطوة خطوة دائما الأحلام الكبيرة تبدي بخطوات صغيرة وان شاء الله نوصل للشي الي نريدة

الصيام المتقطع هو نوع من أنواع الأنظمة الغذائية الي يركز على الوقت يعني شوكت راح ناكل الوجبه وشكد نصوم وراها وبالأغلب اني أشوف اغلب العوائل يعني الي يكعدون من وقت يأخذون وجبة الريوك بالسبعه الصبح والغداء مالتهم يصير بالوحدة والعشاء بالثامنة ليلاً هنا راح نشوف فرق بالساعات بين كل الوجبات بس الي راح أوضحه الكم طريقه الأكل مالتكم

الناس الي هسه تريد تبلش بالرجيم والي اوزانهم عالية وما يسيطرون على انفسهم كدام الخبز والصمون راح نتبع وياهم طريقة التقليل ويدور برأسكم سؤال شنو طريقه التقليل مثلا اني اكل الصبح صمونة لو خبزة راح احاول اخليها نص صمونه لو نص خبزة علمود اقنع عقلي شوي شوي انو أكلنا من الشغله الي يحبها وبالغدة نحاول هم إذا جنتو تأكلون خبزة هم نحاول نخليها اول أسبوع خبزة وجبة العشاء راح نكطع منها الخبز والصمون هذا اول أسبوع وبالاسبوع الثاني راح نقلل من الخبز بوجبة الغداء نخليها نص خبزة والريوك كذلك يبقى نص صمونه لو نص خبزة وبالاسبوع الثالث راح نكطع الخبز من الغداء والعشاء علمود بهاي الحاله جسمنا تعود على التقليل

وجبة الريوك والي تعتبر اهم وجبة راح انطيكم أنواع بأسعار رخيصة وأكثر شي مفيد وسعرة مناسب هو البيض راح نخلي الوجبة مالتنا الأولى عبارة عن بيضتين كاملة نسويها بزبدة الي هيه العلبة ام 500 دينار واكو ب1000 دينار وياها نص صمونة واذا تكدرون تشترون اكو نوع من التوست ابو الشوفان الي موجود بزاد الخير هم سعرة مناسب نكدر ناخذ قطعتين توست وهاي نعتبرها وجبة جيدة بسعرات حرارية مناسبة

وهم اكو أنواع أجبان احاول انزل الكم اكو فيدوهات ينشرون بيها السعرات الحرارية الي موجودة بالأجبان

الوجبة الثانية الغداء
اكيد وية الأهل وراح نحاول احنه نتحكم بالأكل الي تسوية الوالدة
واهم صنف عند الناس بالغداء هو التمن واغلب الناس ايضاً ما يقاومون التمن وياكلون هواي من عندة احنه نحاول نخلي عدنا صحن مقدس حجمه شوي جبير علمود نخلي بيه الأصناف الي نأكلها نخلي تمن وعلية لحم أو دجاج حسب طبخ الوالدة ونخلي خيار لو اي نوع من أنواع الخضار والخضرة اهم شي والي مايحبون الخضره عمرهم خسارة لان سعراتها قليلة وتكدر تشبعنا بسرعة

التمن راح نحاول نقلل من عندة وهم يدور السؤال برأسكم شلون راح نقلل مثلا انتم تأكلون ماعون كامل تمن احنه نحاول نحسب كم خاشوكة مال تمن بالصحن مالتنا كل ما نقلل كل ما احسن مثلا المس الواحد بيه ١٥ إلى ١٣ خاشوكه تمن احنه نخليهم عشرة وكل فتره نقلل لحد ما نوصل ٦ إلى ٥ خواشيك تمن

وجبة العشاء هيه أساس السمن لان راح تأكلون خبز ومرات تمن وهذا شي غلط نحاول بالعشاء نعتمد على الزلاطة أو مثلا مثلا الي أتبعتة اني وخلاني انزل وزني هو الخيار والسماگ ومرات جاجيك بنوع روبة قليلة الدسم وهم عليها شوي ملح ومو يعني اكول الكم أكلو جاجيك وتسون بجدر جبير هيج كون منكاسة مناسبة

هذا الي اقصدة

تمن 6 خواشيك وصدر دجاج سلك طبعا الوالدة مسويه بالدهن الهم واني وصيتها كلت الها اريد بدون التگلاة

اليوم وصلنا للشباب الي تريد تزيد وزن
زيادة الوزن بصورة عامة تعتمد على زيادة الوجبات يعني بدال ما تأكل ٣ وجبات باليوم هذا الشي الاعتيادي ويه الأهل احنه شنو راح نضيف راح نضيف وجبتين زيادة يصيرون خمس وجبات ونركز على نوع الوجبات يعني ما ناخذ هواي دهون لان بهاي الحالة راح نزيد دهون وما نستفاد شي نحاول نزيد نسبة الدهون بس بصورة مناسبة والشباب الي يتمرنون بالقاعه يحاول يخلي وجبه قبل التمرين بساعه وجبه بعد التمرين بنص ساعه من غير ال٣ وجبات العادية واكو مشروبات سعراتها الحرارية عالية احاول انزلها الكم وتكون أسعار المنتجات مناسبة وان شاء الله ايضاً توصلون للجسم المناسب

الشوفان اغلب الناس ما تحب الشوفان بس هو اكثر كارب مفيد لان يشبع وينفع تضخيم وتنشيف
اليوم الموضوع كله للتضخيم انطيكم مشروب مفيد جدا للتضخيم تأخذون 100 غرام شوفان وياها 5 تمرات وحليب 250 مل كامل الدسم واذا تحبون تضيفون موزة راح يصير رهيب وراها بالخلاط وهذا افضل مشروب للتضخيم والمواد مالتة اسعارها مناسبة

شبابنا الطيبين اليوم انطيكم التمارين الي ما تأخذ وقت طويل من عدكم بس شنو نسويها قبل الإفطار يعني اول ما نكعد النوم نشرب شوي ماي ونسويها الي هيه تمرين الفاكيوم وتمرين البلانك ما يأخذ ٥ دقايق من وقتكم اول ما تكعدون من النوم الي راح تفيدنا بشد الجسم وايضاً راح تشد البطن

اني مجربهم وأضمن الكم هاي التمارين شكد مفيدة

ابحثو عنهم باليوتيوب وراح تشوفون النتائج شكد حلوه خلال هاي العطلة أتمنى نستغل العطلة بصورة صحيحة علمود نحصل على افضل نتائج

هذا تمرين الفاكيوم نحاول نسوية اول ما نكعد من النوم على معدة فارغة والنتائج مالتة عظيمه جداً

وهذا تمرين البلانك