...

راح بليتي 💔

"محطات عديتهن مامش عرف"
مودع بالله يا كوكب

احزان سبعة بفرح واحد
ليلية دمع يلبس ضحك واحد
على گد الايام وگد الفلوس
ازنود سبعة بردن واحد
ربع جايس ربع
صاير الف الفين
ثلاثة
اربعة
خمسة
ستة
سبع حلوات ينتظرن كحل واحد
سمواتك بنياتك مظلوماتك السمرات
جبتلهن گمر واحد
... علي نغيمش

تايه يحب تايه بكل تيها عين
بكل تفاصيله حنين
لا ابنادم دله ودنه
ولا تعب ناوشنه طين
تايهين
اثنينه ياحبيبي تايهين
لا وطن سجل عشگنه
ولا نفوس اتعدنه زين
غريبين
اثنينه ياحبيبي غريبين
عزبينه بحبنه لافراح السنين
بكل مهجنها انگول وين
هذا ياهو اليشترينه
غالين
وبنفس الحزن كلش رخيصين
چريمين
اثنينه ياحبيبي چريمين
حزين يحب حزين بكل اغانيه
دلاله وشوگه مو ليه
لا ضحك مر على شفنه
ولا بياض الياسمين
حزينين
اثنينه ياحبيبي حزينين
ضحية تحب ضحية
خطية تحب خطية
العليه يجره علية
مساچين
اثنينه ياحبيبي مساچين
عراقي يحب عراقي بكل ونينه
وعينه على الذبح ماضگنه تينه
وطن ينطر وطن ياگاعنه وبعدين
عراقيين
اثنينه ياحبيبي عراقيين
... علي نغيمش

ابو جسال

انت الماورثت المال
تاليتك
مثل
وابو جسال
بطرگ الجال
شيب ويشتغل عمال
ابوجسال المعدل
يسهر للصبح
والضحى يتبهذل
ابن شعلان يا صيته
يدفع بالحزن والاخ تاليته
محد عرف ماهيته
النوارس تندل الحيته
يا ياسين الرميثي ليش ربع حسين
عشره وي الشوارع والعمر بالدين
هدمهم وي وجهم طين
ابو جسال ينذر ماي گصته الخاطر اولادة
وابو عزو يجرهم بالنعل سادة
وبضل ضحكت السادة
لو ترجع الطيني اثنينها اگوادة
بس الفرق واضح والبشر عادة
يغثونك
يحبونك
يشاقونك
يخيعونك
خيعوني عليمن خيي خيعوني
على حزني الطفه عيوني
لو عالاه
الماخلت ضلع سالم من متوني
حمال وعراقي
بعد شيسوي بيه الله
ادور بالرزق تدوارة اسم الله
اعثر بالگصايب شال
ونسم بالزلوف اشمال
اگوم الطاري تمري اهلال
واعيد بالاطفال ارجال
اعيد من ضرسهم يشكر اتعابي
اكيف من اشوفن شاب عزابي
ولو عمر الضنه ما تعب اليمه
ولو كبر الحمل ماثگل البوية
لچن خوية حمد خوية
اذا حمال لتخلف
ولا تبلي البلد ببنه
ماعايز يتامه ابن العراقيات
ولا عايز خدم ابن الشرب حبنه
واذا كلش تحبها وهي هم تهواك
صوغلها النجم بسماك
بس گللها مكفولة
عيشه وگوة ماتنراد
ولا تعبر بهلهولة
چزت بني ادم من بني ادم
حنضل سم
لا تجزي بحلا
لا هي تخلص شم
ذم ودم
... علي نغيمش

عايشتلك هي
بكل گلبها بكل قواها
تنبض وتترية
بكل نفسها بكل هواها
معتبرتك رية
اول واخرها انت
بصوت وبكل سكته
تحبك بكل روحه وبكل جية
عايشتلك هي
حاسبتلك كل ثواني الانتظار
راسمتلك كل تضاريس الخضار
شام جيدك
كل مساماتك وريدك
بقيد وبحرية
عايشتلك هي
گدرت شوگك عليها ولبسته
وماذبته
حضنته وشم شمته
باسته وحمدت شكلها
جسته وخلتك ضلها
بذلة وبشخصية
عايشتلك هي
واعيتلك والاوادم جاهله بعيشتها
صاحيتلك والاحلام ارماح ماخلتها
باقيتلك ماتنام
صايغتلك خام خام
اخيوط للفجرية
عايشتلك هي
لو نوت تعصب حزنها
تشتكيك
وتشهيك
لو تنست بيك
ووحامك عليك
والعمر وياك فرحة
والصدر وياك شرحة
وانت هي
عايشتلك هي
... علي نغيمش

هاي اليسمونها الوادم تعاسه
انتكاسه

ومتعود على الغربه
نبي وصحبه
زاد بدون وجه امي
اتخيله يگص لحمي
رغم كل ضيمي من عدهن
اشتاگلهن اعيوني
ابديهن
احب لوني
واحب تعبي وتفاصيلي
ولأني ماعشت جيلي
صرت كل ميل امشي وياه
يتراهق دقايق عمر ماانساه
ارد ايام وحدي
بطرگ جدي
لعب هذا الوكت ينتهي ومايبدي
وانه شعندي
غريب وكل غريب بلا مدينة يعيب
حبيب وكل حبيب بلا حبيبه يشيب
تايه
كل اغاني ادلي گلبي
تعزف بضلعي نشدها
ضايع
كل شعر شعبي قصدها
امراد للجيل اليجي
كل ضحك سني بچي
اهواي بجروحي حچي
دمي عايش على طولي
السكته تتغذه على الگولي
رغم صوتي الداخلي
ماصحت بيه خفت لا ابتلي
خايف يگولون مل المخملي
... علي نغيمش

صوتي الداخلي

...

انت وحبك
تضحك على الايام
وحدك انت بكل بياضك يا سلام
كل ضلام يلوح شمسك
ينتهي وتبدي صبح
كل خسارة تجيس شفتك
تنتهي وتبدي ربح
يا نهاية الكل بداية
ويا بداية الكل نهاية
انت غيرت العوايد والتقاليد القديمة
الشاف حسنك ينسى ضيمة
وانه من يوم العرفتك
صرت الوم اليشتريني
صرت ماهم لليجيني
عينك تگلي احتويني
شوف دربك
لا اطيحك عيني
الكل حزن وجهة نظر
بس انت طيني
ودينك يواسيني
ياااشگدك
فصلت عمرك عليه
وعوزتني وچملتني
وشاورتني اخر محنه
وگتلي بيه
وانه ماگتلك
شگلك
مستحيك بكل وحكاحة
بكل صدگ وبكل صراحة
روحي من لاگتك عاشت مستراحة
حتى بغيابك اغني
ضام صوتك بذني
يابخت حظي شحلاتي
وياحلات اسمي بلهاتي
انت ذاتي
وكل حياتي
كل قصيدة اتسولفك
اكتبها منك
ماتعرفك
كل رسالة اعذره عنك
ماتقدر ظرفك
وكلشي يامحبوبي
يحبيب عداي
مايشرفك
وانه ماگلهم شگلك
واخجل واحبك
انه كل دگة اعيش بگلبك
شرد اگلهم
وشرد اگلك
همه مايهوني
بس اسمعني كلك
انه شكلك
ولو مشيت يصير ضلك
انه احب خوفي عليك
مااحب خوف اهلك
... علي نغيمش

وحدك انت

الاسطورة لوكاس فازكيز اسميته هذا الاسم للسخرية لكنه يثبت العكس أحياناً

من لم يستذوق القصائد ولم تعجبه الموناليزا
ولا يفقه بعزف بتهوفن ولم يسمع سؤال من عباس حمزة
لا يعرف من هو توني كروس
... علي نغيمش