ايام قذرة
لا ينفع معها تنظيف
ممتلئة بلاشيء
غير شاعرية
خالية من الأحبة
حتى الاغاني بلا طعم ولا رائحة
ربما ايامي السابقة لم تكن افضل
لكنها كانت عظيمة تصارع الحياة
مثل صوت ذكرى محمد
ايام عفن
ايام نتن
وانا اقاوم هذه الايام
بصغار كلبتنا العزيزة
لست وحدي من يعاني بهذه الايام
كثيرون
ايراني: بضيم وهم حافظ الشيرازي:
" ‏كل غيوم الدنيا وكل غمام الليل والنهار يبكي بقلبي "
سوري: بعجز وتقطع نزار قباني:
" قلي ولو كذباً كلاماً ناعماً قد كاد يقتلتي بك التمثال"
عراقي: بنفاذ صبر عريان السيد خلف:
"عيشه ويالشكول الزفرة ماتنعاش"
وانا اقول: ايام لا تساوي براز "حسوني"
... علي نغيمش

صرت مالوم كل انسان
صرت حساس من عندي
حتى الي اشتمني اسنين
بخنگتي وعافني الوحدي
ابو طبع يتغير شوگ
المحنه والجفه يعدي
اويلي اشگد چنت وهمان
اويلي اشگد چنت جدي
چنت حلمان احب الناس
وامن دمعي يم خدي
هسه الطين هد الماي
والتراب يعرف حدي
تعلم ذاك رش الزيت
تعلم هذا ما يبدي
وانا صافن واگول شلون
اعيش بگلبي الوردي
ما اگدر ولا ارتاح
اخلص هل العمر ودي
حرب يا دنيا والايام
خسارته بربح چدي
گلت مومشكله من تروح
راحت والمشت چبدي
حرامات التعب موزين
والراحة بعد تعدي
احسن شي اظل اوياي
انا خصمي وانا ندي
ساعة بيدي اطلع العين
ساعة بعيني احب يدي
... علي نغيمش

عفيه عيني اشگد عنيده
لسه تحلم بالخضار
مغوش بعمري النهار
وكلشي ليل
بكل صفار
تسمر بوجهي گمر
تناغي الشگار
اتريدني اتوچه على نجمة
انا مامحتار
بس خلتني حاير
بين اعوف الصدگ
واتعافة واچذب كل سمار
وبين احدب
وابقى شاعر بأنتظار
وانا ما احب القرارات الخطيرة
المدري شيسمونه يجوز اختيار
انا يومية افز اغسل هويتي
حتى ماحس بحتقار
انا حر نفسي واغانيي على حزني
باچر من اتوفى بس انا اموت
محد يجيس الشرار
... علي نغيمش

" لم أبكِ
كنتُ أدرّب غيمةً صغيرة بعينيّ على الهطول "
... احلام عثمان

ردت اشوفچ
اطلعت من عالمي المجحف
البي عليچ اضلوعي ترجف
ردت اشوف شجاب وشوده خيالي
لا ابالي
هواي بي گوه على بالي
الگيتچ تعيشين غيري
گلت چذابه صفنتي
گلت لا غلطان
ما گال الصدگ وهمان طيري
ارجعت شفتچ بالشعر
حسنچ قصيدة
انت انت
شام مترهي على جيدة
كلهم يگلولچ عوفي الحزين
هذا مامنه نهار
عمرة ماشايف وريدة
وانت اريدة
وانا اذوب انا الوب
ومن محبتچ ما اتوب
انت يوميه تكفرين بشرعهم
وانه احب دينچ واسبهم
خايف تبطلين مني
خايف اعليچ وعلي من سوء ظني
غيبتچ هل مرة طالت
خايف تصيرين چانت
اتلاحگي الايام تركض وانه واگف
خاف اظل بعدچ سوالف
بطرگ حزني
لتدلل لميخالف
كثر ماخليتي بالخاطر مواقف
خاف ماغنيچ ويغادرني شوگچ
خايف تموت الشفايف
وابقى وحدي
بطرگ لحدي
لا جگاره ولا حبيبه
كلها ضدي
وانت وحدچ
انت عندي
بس شسوي الطين ذايه
ردتچ ادليني تايه
... علي نغيمش

شام مترهي

ولا انسى الاغاني والشعر
وانتم من يساعدكم على مضغ الحياة

ها انا من جديد اصاب بغيبوبة الايام
ايام سريعة لا تعرف ماذا تريد
ولشدة ركضها موجعة لديها مخالب
تاخذ ما تاخذ كل يوم
تسحق على وجهي في الصباح والمساء
كم تمنيت ان تأخذني بلا رجعة
ليس لأنها تستحقني
ليس لأنني لا اريد الاستمرار
ولكني لا استطيع العيش كالبهيمة
ها انا من جديد لا اريد الكثير
قلبي الابيض
الذي تحمل ما تحمل ليبقى معي
وسوء فهمي وامي
انا وقلبي وهم واعذارهم
انا ومن يفهمني وهم وفهمهم
لا احد يستحق التبرير
لا احد
انا هنا من جديد مجرد من الشعر
لكني شاعر
انا هنا من جديد مجرد من الحب
لكني عاشق
وهذا ذنبي الوحيد
ولا عيب ان تكتب القصيد
بكل ود ورخاء
وانت تكابر وتشكوا الخ.. راء
... علي نغيمش

...

...

احبك من صباح الله
افك ريجي على ذكرك قربتاً لله
واگلك طيحلي اترجاك
تلگاني دعا وسبحان واسم الله
ضوى ضلمة على حسنك عايش عيوني
هوى خنگه على خلگك خلگي واظنوني
ياما وهست گلبي على كيفك كيف
وياما طعمت مري بحلاتك طيف
شفتك خيزراني التجلد اسماعي
شفتك والنظر ماگلي مامعذور
ما ضم من جمالك زيد اوجاعي
انت المالي ايامي
وانت التغني احلامي
لو ما انت چاانه اكتب حزن للناس
چان انشرب كاس
وانچفيني وهواس
الوادم ملتني اعيوب
الوادم ملتني احزان
بس انت لحگت الروح خضرت العشگ بستان
انت تفز اغاني بكل تعب روحك
تجي من الراحة لجروحك
ليش اتعاتب بشوگك
ويلوموني بضوگك
اسجد شعر لخدودك
ويكفروني لو گلت معبودك
انت الطاش اعثوگك نذر لأسمي
كل شامة منارة تقدسك بجسمي
انت الشاغل بشعرك اصابيعك
انت الثمل من ريعك
شنهو اتقرر انطيعك
الرايح فدوتك
واليجي وبعدين
ليهمك كلام الطين
يا تين العمر سكران
والوادم خذاها العنب جازتلك
تزرع گاعها وتطريك تتوحم بخت شتلك
... علي نغيمش

بخت شتلك