"‏انا في اقصى مراحل احتياجي للعمرة
الله يرزقنا بغير حول منا ولا قوة "

ممكن نتقابل حاجات واجد في دنيا
إلا مسألة أنه انسان يسخر من انسان ويستقل منه على خاطر أنه الله خلقه بشكل مختلف عليه.

من ألطف ما حصل لي هذا العام أن اثنين من صديقات كتب الله لهن زياة بيته وذكرنني بدعائهن هناك. ♥️
والباقي منهن يذكرنني في قيام لياليهن فاللهم صديقاتي دُنيا وآخره. 🥹♥️

إنا لله وإنا إليه راجعون

أقوى فلاش باك صار 💔
يارب احفظ بلدنا يارب ماترجع هذك الأيام!

يا وطن ساد ما جاك .. ويابلاد سادك قهاير
يا وطن سالن أدمالك .. يا وطن غير ويش صاير

يا وطن كملوا ضناك .. يا وطن ذقت المراير
ما بين صاحبك وأعداك .. لنقنك اليوم حاير

اللي هذا يقول نفداك .. بالدم والدم فاير
ويَا وطن غالي غلاك .. على كل نازل وساير

ويَا وطن الله يرعاك .. من كل ظالم وجاير
ويَا وطن ما وطن يسواك .. ولا وطن غيرك أمداير

اللهم احفظ بلدنا ليبيا وبلد المسلمين 🇱🇾

شعر ليبي في الصميم - أمير

الف مبارك لطلبة الشهادة الثانوية ♥️

قررت قرار

ويارب مانندم عليه!

انا اكثر انسانه تكره تمسح ذكرياتها حتى لو شينه

بس فكرت واجد وأعتقد هكي خير

لي فترة طويلة نفكر بيني وبين نفسي: هل ندير الخطوة هذي ولا لا؟
القناة هذي فتحتها من شهر 7 سنة 2020... وكانت بالنسبة ليا أكثر من مجرد قناة؛ تعرفت فيها على ناس ينحبوا ويخشوا للقلب زي رحمة، وويه، ووتيني، وخولة، وحنان، ومريم، وغيرهن واجد ناس غاليين ❤️.

ومن القناة هذي أعلنت ونشرت مجموعة الوقورة لأول مرة، ومنها كانت البداية. القناة هذي كانت شهادة على كل شيء عشته على مدار 6 سنين لليوم؛ شهدت على أفراحي، أحزاني، وكيف كبرت وتغيرت. وصح في ذكريات ما نبيش نذكرهن، بس برضوا كانت شهادة على حاجات واجد حلوة.
بس الفترة الأخيرة حسيت في حاجة تغيرت... معش فيها روحها الأولى، ومعش قعدت نكتب فيها براحتي ولا نزّل فيها اللي نحبه. قعدت نحس فيها زي الشيء اللي واجب عليا بدون فائدة، وشيء صار مرهق ليا.
فكرت واجد شن ندير فيها:
نصكرها؟ حنلقى نفسي كل شوية نرجع ونبرم فيها.
نبيعها؟ تجيبلي رقم كويس لأنها قناة قديمة، بس خفت اللي ياخذها يحط فيها شيء حرام.
نحذفها؟ فكرت فيها واجد وحاسة إن هذا هو أحسن قرار نديره، وتمهيد لشيء حنديره قريب بإذن الله. (والحقيقة لولا الوقورة راه حذفت التليجرام بالكامل :) )
عموماً، كل اللي في القناة من منشورات غير خاصة تقدروا تاخذوه واستفيدوا منه ♥️.

استروا ما شفتوا مني، ونستسمحكم عذر لو أخطأت في حق حد، واذكروني ديمة في دعائكم.
بعد أسبوع بإذن الله حنحذف القناة.

مَنْ لزمَ الصلاة على النبي ﷺ نَال مُناه، وكُفي همّه، وغُفر ذَنبه🤍.

قال رسول الله ﷺ :
"كَلِمَتَانِ خَفِيفَتَانِ عَلَىٰ الِّلسان
ثَقِيلَتَانِ فِي الْمِيزَانِ،
حَبِيبَتَانِ إِلَىٰ الرّحْمٰنِ،
"سبحان الله وبحمده سبحان الله العظيم "