را شئ په خیر راشئ مهاجر وروڼو
قدم را اخلئ ورو شیندو درته ګلونه
را شئ په خیر راشئ مهاجر وروڼو

زما مهـاجـر سـکـني وروڼو
د یـوه بــاغ د بــڼ ګلـــونو
په خیر راشئ زموږ تر زړونو
د خپل وطن غـیږې ته راوړئ تشریفونه
را شئ په خیر راشئ مهاجر وروڼو

راځئ په ګډه یې یو کور کړو
دا وران وطن به ښه سمسور کړو
زخمونه ټول به یې ټکور کړو
په مینه ورکړئ یو او بل لره لاسونه
را شئ په خیر راشئ مهاجر وروڼو

د بل وطــــن څـه زنـدګي وه
غربت کې ورکه مو ځواني وه
درد کـــــړاونــه د مـــرګي وه
ښکل کړی د خپل خواږه هیواد خاورې ډاګونه
را شئ په خیر راشئ مهاجر وروڼو

الـهام مي واخلئ له خبرو
په بـل وطن کي مســافرو
شئ راستانه نور شملورو
موږ غوړولي دي لیمې او درته زړونه
را شئ په خیر راشئ مهاجر وروڼو

وطن په مثل د جنت دی
زړه ته سکون د ژوند راحت دی
په بل وطن کې څه عزت دی
نن ایوبي الهام کوم درته سوالونه
را شئ په خیر راشئ مهاجر وروڼو

ایوبي الهام

نعت شریف

که ښائست ته دیوسف ګوتـــې قلم وي
بیا به هم دګران حبیب ښکلا ته کم وي

وجمال ته به یي خــود بــــــدر ماتیږي
چي درب له نـــوره جوړ مخ دصنم وي

لکه څاڅـــکــــي دباران، زرې رېګــــونه
دومـــره درود دي پــر آقا نبي اکرم وي

که قربان دي کــړم دیار له توروسترګو
خدایه دا به دي پر ما لطف او کرم وي

مرتبه به یــې درب په نــزد وي څومره
دحــــوا مهر چـــي درود پر محترم وي

هغه ورځ به یم سعید احمد الیاس ډیر
چـــي دیار دروضې خواته مي قدم وي

احمد الیاس

د پلار نیکه وطنه
ــــــــــــــــــــــــــ

پوره مو کړه کنه تاسره کړې هره ژمنه
د پلار نیکه وطنه
موږ څومره په عزت خلاص کړې له هر مکار دښمنه
د پلار نیکه وطنه

موږ ستا په پت او نوم باندې قربان کړل خپل ځانونه
پرې ورمو کړل سرونه
ساتلي مو ژوندي دي ستا د برم تاریخونه
پرې ورمو کړل سرونه
یو تیر ده ستا دفاع ته له خپل ماله او له تنه
د پلار نیکه وطنه

ټاټوبی د ابدال یې د محمود او میرویس کور یې
زموږ د سترګو تور یې
د دین په مقابل کې دښمنانو ته سور اور یې
زموږ د سترګو تور یې
تا کړې ده مدام ده دې امت له حق ساتنه
د پلار نیکه وطنه

په هر میدان کې هر وخت ګړندی پر مخ روان یې
برلاسی په جهان یې
له ظلم له زیاتي او ظالمانو سره وران یې
برلاسی په جهان یې
خپلواک یې خپل پلوی یې ویاړمنه قدرمنه
د پلار نیکه وطنه

ستا خاوره ده شهیده ده ستا کاڼي اتلان دي
او غرونه د غازیان دي
روزلي د په غیږ کې جهادونو ته ځوانان دي
او غرونه د غازیان دي
ستا حق ده په مخبت وردګ د خپل تاریخ ستاینه
د پلار نیکه وطنه

مخبت وردګ

کږه پګړۍ وهلې!

تا د مغرور جهان غړۍ وهلې
د رب ج په مرسته دي نړۍ وهلې

ښکلوم ځکه دي په ټنډه باندي
تا د سر مستو ککرۍ وهلې

هغو نن راوسته دَ تن په وینو
چا چې نعرې د خپلواکۍ وهلې

طالبه تاته باید درکړو مډال
ځکه خو تا سپینه ماڼۍ وهلې

ای دَ هیواد په ننګ شهیده یاره
ځواني مي ستا د غم سیلۍ وهلې

څومره ښه ښکاري نن ارشَد تکله
یار چې پر سر ګږه پګړۍ وهلې

ارشد تکل

روان دی مخ په وړاندی ټول کارونه د وطن
کــــرار کـــرار جوړیگـــی کــانالونـــه د وطن

تولیــد مـــو د هـــیواد اینجینران مــــو د هیواد
اړتــــیا نــه لـــرو چــاته استـــاذان مــو د هیواد
یــو مــوټـــی یو قـــوت مــو اولسونــه د وطن

کــانال د قوشتیـــپې زریـــن مثال د پرمختگ
همدا دی د طالــب زلمـــی کــــمال د پرمختگ
له شـــر فســــاد په امـــــن کی ښـــارونه د وطن

ساتی یی له هر شره جوړیدو ته یی دﻱ ژمن
هیـــواد بــه کــړې اباد طالب ملا پکـــی واکمن
الله دې دې راته ساتــــی دا ځواکونه د وطن

د امن فرښـــتی راغلی گــران افغانستان ته
حیرانه اوس نړۍ شوله جانان افغانستان ته
پــــه امـــن او امــــان مو ســـرحدونه د وطن

واخان حیثــــیت لــرﻱ زمــونږ لپاره لکه سر
وینا د مــلا یعقــوب ده کلک ولاړ د ی په ډگر
الله دې راتـــــه ساتـــی دا ســــرونـــه د وطــــن

دا خـــــاوره غیرتـــی د نومیـــالیو زلمو کـــــور
عبدالجــلیل جهادیــاره پـــردیـــو ته دی گــــور
غـــیرت کـــی ســـاری نـــه لرﻱ قومونه د وطن

عبدالجلیل جهادیار

ښایستي سترګي🥰

ستا خوږې خوږي سترګي
ښڪلي ښایستې سترګي

سم پر زړه وشتـــل کوې
خاص لکه نېزې سترګي

ستا غزل غزل ځواني
تورې قافــــــیې سترګي

زه طالب طالـــب یمه
ستا دګل بشرې سترګې

زه دي راتلو څار ڪړم
راوړه مېلمنې سترګي

دنګ یوسفــــي ځواني
ستا د زلیخې سترګي

ستا یم یې نصرت آغا
خپل په ترانې سترګي

*نصرت آغا طالب*

عمل په دین

څوګ چې کړﻱ عمل په دین په نیغه لار سیده به شی
ژوند کې به کامیابه شی او ښه یې خاتِمه به شی

دومــره کـمـالات دې د الله او رســول میـنه کـې
ستر نعمـت عامِـل ته ددې مینې په حِصه به شی

ای انسانه زړه که دې د خدای په ذکر کړې عادت
ورکـه بـه گنـاه دې شـی صـفا دې عقیـده به شی

ټول عرب عجم که یې ملاتړ وکړﻱ خبر شی ترې
خـلاصـه د یهـودو لـه جنـجال پـاکه غـزه به شی

څوګ چې لګوﻱ خپلې منګوَلې حبـلُ الله بانـدې
ورکه یې له زړه نه د شیطان ها وسوسه به شی

عبــدالجـلیل جِـهادیـاره څوګ چـې یـادوﻱ الله
زړه به یې سکون شی او په ذکر یې اخته به شی

عبدالجلیل جهادیار

غزل/سهیل

1 پیدا کیږي نه په مفته لکه دُرْ
قرباني غواړي په مثل دمنصور

2 دجنت اغزنه لاره د مؤ مینه
ښه عمل وکړه چې تیرشي په سرور

3 نه رسیږي تر منزله ورته ګوره
څوک چې و لري یوه زره غرور

4 نکړي چاته هم یوه خبره بده
دنیکانو خلګو دغه دی منشور

درود سلام چې همیشه وایې سهیله
شفاعت به ورنصیب شي دحضور

سهیل

په لار دتصــؤف کي یو ښهْ پـــیر ځان تهْ پیـــدا کهْ
خالي لاس ترې رانسې سپین ضمـیر ځان ته پیداکهْ

د کلکې عقـیدې خـاوند له ځانه څـــخه جـــوړ کـهْ
په تورو ترږمو کې روڼ مـسـیر ځان ته پیـــدا کـهْ

د زړه زنـــګ په ډبـــرو او چــــــړو نه لرې کیــــــږي
له حمد او ذکره جوړ یو پاک نظیر ځان ته پیــدا کــهْ

لمبې د زړو پري مړې که له انګارکړه واوره جـــوړه
په خپل تقوأ اخلاص باندې تاثیر ځان ته پیـدا کهْ

چـې سترګي د جانان درته په ښه تفصیل بیان کـړي
سـهـیل ملا یو داسې خوږ تفسیر ځان ته پیدا کــهْ

سهیل درمل

غزل/سهیل درمل

سوی کاغذ یم تش اِیــرې پاتـې یم
ما ته ښیښه یو څو ټو ټې پاتې یم

کډه یې کړې نیمه شـــپه کې تللــي
زه د جانان له قافیــــــلې پاتې یم

له رب مې جارکړِڅنګه حسن یې دی
ورته حیران یم پر سجدې پاتې یم

د محبــت اظـــهار یې نــه دی کـړی
خو یم په تمه څو شیـــبې پاتې یم

که ښکلۍ نه یم سهیل بد هم نه یم
نو و لې دا سې له هـــغې پا تې یم

سهیل درمل

زمونږ : اتحاد/يووالى

په ننګ غيرت مو د تاريخ زرين بابونه ډېر دي
زموږ د اتحاد او د يووالي مثالونه ډېر دي

دلته پر ټول اولس د شيخ صاحب رڼا خپره ده
ولاړ په څنګ کې يې تيارو ته مشالونه ډېر دي

که خليفه سراج الدين که متقي صاحب دى
و هيواد والو ته يې کړي خدمتونه ډېر دي

د لوى ملا صاحب بچي دفاع ته ملا تړلې
رب دې يې نه اخلي د ده مسٶليتونه ډېر دي

په ابادۍ باندې مين حاجي ملا ورور دې نه مري
په هره برخه کې يې پيل پرمختګونه ډېر دي

که وزيران، که رٸيسان دي، که واليان صاحبان
په ترحم او همدردۍ يې وړي زړونه ډېر دي

په مال او سر به يې ملاتړ کوو نبيل شبابه!
پر مونږه ټولو د دې پاک نظام پورونه ډېر دي

مولوي نبيل شباب

جَزَی اللَّهُ عَنَّامُحَمَّدًا مَاهُوَ اَهْلُهُ
نعت شریف
شاعر
#محمدنسیم
عرفاني

بله ستـــــا دعِشق ډیوه ده
له آدمــــــــــــــــــه تر ابده
حســــــن دار دزړونو پیــره
ګران رســوله محـــمده(ص)

په لَوْلاک بانـــــــدي موصوفـه
ای دمینــي فیلــســـــوفـــــــه
جما ل تابانـــدي تـــمـــام دی
هرځای ســتا دیاد قیـصه ده 

له شیرینو نه شیـــــــرین یې
ته له شمس قمر حســین یې
څــه نادره دي مـقــــــام دی 
چي ستایـلــۍ یې صـمــده

تا رونـق دغــــه دنـیـــــاکړه
تادجــهل شــپه ســــــبا کړه
سـتا له خوږ راتګــه وروسته
دتیـارو نړ ۍ چـــــــــــپه ده

داخلاقــــــو یوســتـرکــانـه
دقرآن خــــوږ تـرجــمانـــــه
ســتا خــــبري ملغلـــــــــري
راته ګــــراني دي بـې حــده

بل څه نــــــلرم عاصي یــــم
شکر ستاچي امـتــــــــي یم
عرفاني ته لـــــــــــــږ راګوره
ستا نظـر یې تلوســــــــه ده

ته رحیم رحمان رب یې
ته ډېر مهربان رب یې
ته خالق رازق مالک
ته روزي رسان رب یې

لا شریک احد یي ته
الله الصمد یې ته
ربه لم یلد یې ته
او ولم یولد یې ته

ته سمیع بصیر الله
ته لطیف خبیر الله
ته هر څه کولی ې
په هر څه قدیر الله


واړه مخلوقات دا ستا
وایي تسبیحات دا ستا
ته یې د ثنا لایق
دی سپېڅلی ذات دا ستا

ځمکه دې فرش کړې ده
غرونه یې مېخونه دي
بې ستنو آسمان ولاړ
لوی دې قدرتونه دي

ستا ثنا صفت کوي
جن دی که بشر ربه
کاڼي دي که بوټي دي
ستا په ذکر سر ربه

تانه معافي غواړم
زه ډېر ګنهګار یمه
ژاړمه عاجزملنګ
تاته توبه ګار یمه

ته مې کړه معاف الله
ستا عاجز بنده یمه
تاته خجالت یمه
تاته شرمنده یمه

عاجزملنګ

پر هغه أقدس ذات باندې درود شريف ووایاست چې د قيامت په سخته ورځ به د مخلوقاتو په مخ کې وايي:
أمتي أمتي يا رب

اللهم صل علی سیدنا محمد النبي الأمي و سلم ❣️

راځه حِس کړو نور لالیه یو د بل درد
زۀ به ستا او تۀ ز ما وګڼه خپل درد

ولې داسې بیلتانۀ کې ژوندون تېر شي
ولې چا سره وي هره شیبه مل درد

خپله سا به مې هم ژر یواځې پرېږدي
کۀ دې داسې راځي یاد سره هر ځل درد

اشغال کړی یې د کوم ساحر د لاسه
لۀ مودو مو دمعصومو زړو محل درد

بیا پۀ زغم باندې څوک ځان ولې اوبۀ کړي
باوجود د دې چې لار لري د حل درد

رحماني وصاله!! کله کله نه وي
کلک تړاو لري لۀ مینې سره تل درد

م رحماني وصال

د نـنګـونـو تاجـدار د همـت وؤ منار
په رښتیا چې عـمر دغیرت وؤ منار

حیران پاتي دنیا وه شاهۍ ته د ده
قـدرتـونـه عـاجـز مـلنـګۍ تـه د ده
ددې عصـر خـالد د عـظـمت وؤ منار

لوی واړه یې ویاړمن د هیواد یاد وي
په دعا کې یې نوم ارواح ښاد یاد وي
د تـاریـخ مُجـدِد دنُهضَـت وؤ منار

لرې زړو کې ځانګړئ ځای دا شخصیت
بنسټـګر د لـښکر او ددې امارت
مُدبّر مفـکّـر د ملــت وؤ منار

روڼ مسـیر یـې تاریـخه عـیانه ساته
دا څهره دې په غیږ کې روښانه ساته
وو امین او مؤمن د وحدت وؤ منار

یو ملـنګ او عابد وؤ ددې زمانې
ایوبي الهام یې اوس لیکم کارنامې
رب بخښلی مرحوم د امت وؤ منار

ایوبي الهام

تاسو دا بي مطلع غزل نن راسره ولولﺉ

پر سر سر مي رقیبه ټکوې خو یاد یې ساته
یوه ورځ به زه له تاسره بیا ګورمه که ژوند ؤ

نه زه یو ګړی خلاص یم نه حالات مېنې ته جوړ دي
نو وروسته له اشناسره بیا ګورمه که ژوند ؤ

کارونه مي دنن باید چي  نن کړمه تر سره
سبابه دسباسره بیا ګورمه که ژوند ؤ

په شپه کي به زړه تش کړم په ژړا د خدای په درکي
سهار به له خندا سره بیا ګورمه که ژوند ؤ

سپین مخ د آېنې په ګردو پټ دی شاکریاره
خپل ځانه بل وخت ستاسره بیا ګورمه که ژوند ؤ

عبدالواسع شاکریار

غزل

قيام درځنې غواړي اوهمت درځنې غواړي
ساتنه د هېواد سپيڅلی نېت درځنې غواړي

لالیه پام یې ساته چې پردي چيرته رانشي
کور کلی ښه بې درېغه حفاظت درځنې غواړي

تګلاره دې سپېڅلې, حوصلې به تاندې ساتې
د غره غوندې محکم استقامت درځنې غواړي

د خپل امير فرمان ته غاړه کېږده مجاهده
اعزاز دی پکې نغښتی اطاعت درځنې غواړي

راپاڅه وخت د کار دی لاس پکارشه که د کار يې
اسحاقه! مټي بډ وهه خدمت درځنې غواړي

اسحاق