MARKAZIY OSIYO – YEVROPA ITTIFOQI UNIVERSITETLARI KONGRESSI DOIRASIDA MUHIM PANEL SESSIYA O‘TKAZILDI

Markaziy Osiyo – Yevropa Ittifoqi universitetlari kongressi doirasida vazirlar ishtirokida yuqori darajadagi panel sessiya tashkil etildi. Mazkur sessiya oliy ta’lim tizimida xalqaro hamkorlikni yangi bosqichga olib chiqish, innovatsion yondashuvlarni keng joriy etish hamda ta’lim sifatini oshirishga qaratilgan dolzarb masalalarga bag‘ishlandi.

“Yevropa Ittifoqi va Markaziy Osiyo universitetlari o‘rtasida hamkorlikning yangi yo‘nalishlari” mavzusida o‘tkazilgan ushbu muloqot maydonida O‘zbekiston Respublikasi Oliy ta’lim, fan va innovatsiyalar vaziri Qo‘ng‘irotboy Sharipov, Tojikiston Respublikasi ta’lim va fan vaziri Rahim Hamro Saidzoda, Qirg‘iz Respublikasi ta’lim va fan vaziri o‘rinbosari Durus Kozuyev hamda Polsha Respublikasi fan va oliy ta’lim sohasi bosh direktori Marsin Iskra ishtirok etib, o‘z ma’ruzalari bilan qatnashdilar.

Sessiya davomida ta’lim sohasida raqamlashtirish, akademik mobillikni kengaytirish, qo‘shma ta’lim dasturlarini joriy etish, ilmiy tadqiqotlar samaradorligini oshirish hamda universitetlar o‘rtasida barqaror hamkorlik mexanizmlarini shakllantirish masalalari atroflicha muhokama qilindi. Xususan, Yevropa tajribasini Markaziy Osiyo oliy ta’lim tizimiga integratsiya qilish, ilg‘or pedagogik texnologiyalarni joriy etish va innovatsion loyihalarni qo‘llab-quvvatlash ustuvor yo‘nalish sifatida qayd etildi.

Mazkur nufuzli tadbirda Andijon davlat pedagogika instituti rektori Baxtiyor Rasulov ham ishtirok etmoqda. Bu esa institutning xalqaro maydondagi faolligi ortib borayotganini, xorijiy oliy ta’lim muassasalari bilan hamkorlik aloqalari izchil rivojlanayotganini yana bir bor tasdiqlaydi.

Panel sessiya yakunida ishtirokchilar tomonidan oliy ta’lim sohasida o‘zaro tajriba almashish, qo‘shma ilmiy loyihalarni amalga oshirish hamda kadrlar tayyorlash sifatini yanada oshirishga qaratilgan amaliy taklif va tashabbuslar ilgari surildi.

🟦Rasmiy sahifalarimizni kuzatib boring
🟦 Telegram 🟦 Facebook 🟦 Instagram 🟦 YouTube

“Yangi O‘zbekiston talabalari olimpiadasi”: stol tennis va gandbol bahslari davom etmoqda

Andijon davlat pedagogika institutida “Yangi O‘zbekiston talabalari olimpiadasi” doirasida sport musobaqalari qizg‘in pallaga kirdi. Xususan, gandbol va voleybol yo‘nalishlari bo‘yicha bahslar murosasiz kurashlar ostida davom etmoqda.

Mazkur musobaqalarda talaba-yoshlar jamoalari o‘zaro kuch sinashib, jismoniy tayyorgarlik, tezkorlik hamda jamoaviy hamkorlik borasida yuqori natijalarni namoyon etmoqdalar. Har bir uchrashuv sport ruhi, halol raqobat va g‘alabaga intilish kayfiyati bilan ajralib turmoqda.

Gandbol va stol tennis bahslari davomida jamoalar taktik yondashuv, chidamlilik va o‘zaro hamjihatlik orqali muxlislarga qiziqarli o‘yinlar taqdim etib, tomoshabinlarda katta taassurot qoldirmoqda.

🟦Rasmiy sahifalarimizni kuzatib boring
🟦 Telegram 🟦 Facebook 🟦 Instagram 🟦 YouTube

Sog‘lom turmush — barqaror taraqqiyot omili

Shavkat Mirziyoyev raisligida jismoniy tarbiya va sport sohasidagi ustuvor vazifalarga bag‘ishlab o‘tkazilgan videoselektor yig‘ilishida belgilangan topshiriqlar ijrosini ta’minlash maqsadida Andijon davlat pedagogika institutida har haftaning seshanba kuni “Sport kuni” etib belgilandi.

Ushbu kun doirasida professor-o‘qituvchilar hamda ishchi-xodimlar o‘rtasida sog‘lom turmush tarzini keng targ‘ib etish, jamoaviylikni mustahkamlash hamda jismoniy faollikni oshirishga qaratilgan qator tadbirlar tizimli yo‘lga qo‘yilmoqda.

Xususan, bugun erta tongdan institut jamoasi ishtirokida tonggi badantarbiya mashg‘ulotlari yuqori kayfiyatda tashkil etildi. Mazkur mashg‘ulotlar sog‘lom turmush tarzini shakllantirishda muhim ahamiyat kasb etadi.

Mutaxassislar ta’kidlashicha, tonggi badantarbiya inson organizmi uchun bir qator ijobiy ta’sirlarni ta’minlaydi. Jumladan, ertalabki jismoniy mashqlar qon aylanish tizimini faollashtiradi, yurak-qon tomir faoliyatini mustahkamlaydi hamda organizmni kun davomida faol ishlashga tayyorlaydi. Shuningdek, muntazam badantarbiya moddalar almashinuvini tezlashtirib, ortiqcha vaznning oldini olishga xizmat qiladi.

Bundan tashqari, tonggi mashg‘ulotlar asab tizimiga ijobiy ta’sir ko‘rsatib, stress va charchoqni kamaytiradi, kayfiyatni ko‘taradi hamda ish unumdorligini oshiradi. Eng muhimi, bunday mashg‘ulotlar insonda intizom va irodani shakllantirib, sog‘lom turmush tarzini kundalik odatga aylantirishga zamin yaratadi.

🟦Rasmiy sahifalarimizni kuzatib boring
🟦 Telegram 🟦 Facebook 🟦 Instagram 🟦 YouTube