ሰላም ለኢትዮጵያ ጥምረት የምርጫ ማኒፌስቶውን ይፋ አደረገ

እሁድ፣ መጋቢት 27 ቀን 2018 ዓ.ም(#አዲስ_ማለዳ)

ሰላም ለኢትዮጵያ ጥምረት ለምርጫ የሚወዳደርበትን ማኒፌስቶ በዛሬው ዕለት ባዘጋጀው መርሀግብር ይፋ ማድረጉን አስታወቀ።

“ሰላምና ብሔራዊ እርቅ እንፈጠር ማድረግ፤ የዲሞክራሲና የህግ የበላይነት እንዲረጋገጥ መስራት፤ ዜጎችን የማህበራዊ ጥበቃና ደህንነት እንዲያገኙ ማስቻል፤ ሁሉን አቀፍ የኢኮኖሚ እድገት ማምጣት፣ ተጠያቂነት እና ግልጽነትን ማስፈን የጥምረቱ ዋና ዓላማዎች” መሆናቸውን በማኒፌስቶው አመላክቷል።

የምርጫ መወዳደሪያ ምልክቱ የቡና ተክል የሆነው ጥምረቱ በሀገሪቱ ይስተዋላሉ ያላቸውን ችግሮች ለመፍታት እንዳቀደም ገልጿል።

“አለመረጋጋቶችንና ግጭቶች፣ የዲሞክራሲ
ተቋማት መዳከም፣ የኢኮኖሚ አለመረጋጋት፣  ማህበራዊ ቀውስ፣ ጥራቱን የትምህርትና የጤና ሥርዓት አለመኖር፣ የሙስና መንሰራፋትና የመልካም አስተዳደር እጦት፣ የፌደራል ሥርአቱ አተገባበር ላይ አሉ” ያላቸውን ችግሮች ጨምሮ ሌሎች በሀገሪቷ ይታያሉ ሲል የዘረዘራቸውን ተግዳሮቶች መሰረት በማድረግ ማኒፌስቶውን እንዳዘጋጀም ተመላክቷል።

ጥምረቱ ያዘጋጀው ማኒፌስቶ፣ የሰላምና ደህንነት ፣ የሲቪል ሰርቪስ፣  የውጪ ጉዳይ፣ የኢኮኖሚ፣ የንግድ፣ የሥራ እድል ፈጠራና የመሬት ፖሊሲዎች በዋናነት በሰነዱ ተጠቅሰዋል።

“ተመጣጣኝ ህብረ ብሔራዊ የፌደራል ሥርአት” ለመከተል ያቀደው ጥምረቱ “የዞን የአስተዳደር ሥርአትን እንደሚያስቀር” ተናግሯል።

ጥምረቱ ከፍተኛ ዕጩዎችን በማስመዝገብ ረገድ ከብልጽግና፣ ኤዜማ፣ ከትብብር፣ ነእፓ፣ ቀጥሎ እንደተቀመጠ የምርጫ ቦርድ መረጃ ያመላክታል።

ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA

#አዲስ_ማለዳ_በሳምንቱ

እሁድ፣ መጋቢት 27 ቀን 2018 ዓ.ም

#ከሀገር_ውስጥ

1] የኢትዮጵያ አየር መንገድ “የነዳጅ እጥረት አልገጠመኝም” አለ

አየር መንገዱ በጦርነቱ ሳቢያ “በረራዎችን አካሂዶ የሚያስፈልገውን ነዳጅ ለማግኘት አስቸጋሪ” ቢሆንበትም “ከተለያዩ” ካላቸው አማራጮች ነዳጅ እያገኘ መሆኑን አስታውቋል፡፡ 

አየር መንገዱ ይህን ያስታወቀው ማክሰኞ ዕለት በአህጉሪቱ የአውሮፕላን እድሳትና ጥገና የማካሄድ  (ኤም.አር.ኦ.)  ያለው አቅም ዝቅተኛ በመሆኑ የዘርፉን አቅም መገንባት  በሚያስችሉ ጉዳዮች ላይ ለመወያየት ከተካሄደው ስብሰባ በኋላ ዋና ስራ አስፈጻሚው መስፍን ጣሰው በሰጡት መግለጫ ነው፡፡

2] የንግድና ቀጣናዊ ትስስር ሚኒስቴር ህገወጥ የነዳጅ ግብይትን መቆጣጠር አሁንም ድረስ “እጅግ አዳጋች” መሆኑን ተናገረ

ለመቆጣጠር አዳጋች እያደረገ ያለውም “የመንግስት አካላት እና የማደያ ባለቤቶች ተሳትፎ” መሆኑ ተጠቁሟል።

በቁጥጥር ስር ከዋሉት አብዛኞቹ ህጋዊ ሽፋንን በመጠቀም ሲንቀሳቀሱ የነበሩ መሆናቸውን የሚኒስቴሩ መረጃ ያመለክታል። ሚኒስቴሩ ጥቅማችን ተነክቶብናል ካሉ ተቋማት ጋር መተናነቁን የገለጸ ሲሆን ይህም ቢሊዮን ብሮችን የሚመለከት ስለሆነ ነው ብሏል።

ሚኒስቴሩ ረቡዕ ዕለት ለንግድ እና ቱሪዝም ጉዳዮች ቋሚ ኮሚቴ የስምንት ወራት ሪፖርቱን ባቀረበበት ወቅት ህገወጥ የነዳጅ ግብይት ላይ የሚወሰደው እርምጃ ተጠናክሮ ቀጥሏል ያለ ሲሆን 658 ሰዎች በቁጥጥር ስር መዋላቸውን ገልጧል፡፡

3] ምልዓተ ጉባኤው ሳይሟላ ስብሰባውን ያካሄደው ፓርላማው ለ60 ዓመታት የዘለቀውን የወንጀል ህግ ሥርዓት አሻሽሎ አጸደቀ

የህዝብ ተወካዮች ምክር ቤት የወንጀል ሕግ ሥነ-ስርአት እና የማስረጃ ሕግ ረቂቅን ባለፈው ሐሙስ ዕለት ምልዓተ ጉባኤውን ባይሟላም አጸድቋል።  

የጸደቀው ህግ 195 ማሻሻያዎች ተደርጎለታል የተባለ ሲሆን ከዚህ ቀደም  በፍትህ ሥርዓቱ ላይ ሲነሱ የቆዩ ጉዳዮችን መልስ የሚሰጥ ነው ተብሎለታል።

4] ምርጫ ቦርድ የመራጮች የምዝገባ ቀነ ገደብን አራዘመ

የኢትዮጵያ ብሔራዊ ምርጫ ቦርድ የ7ኛው ጠቅላላ ምርጫ የመራጮች ምዝገባ እስከ ሚያዝያ 14 ቀን 2018 ዓ.ም. ማራዘሙን በትናንትናው ዕለት ባወጣው መግለጫ አስታውቋል።

አስቀድሞ የተያዘው የመራጮች የምዝገባ የጊዜ ሰሌዳ የተያዘለት እስከ መጋቢት 28 ቀን 2018 ዓ.ም ድረስ ነበር።

5] በኢትዮጵያና ደቡብ ሱዳን የስደተኛ መጠለያዎች የጎርፍ አደጋ ስጋት እያየለ መሆኑ ተገለጸ

በምስራቅ አፍሪካ የስደተኛ ካምፖችና ጊዜያዊ ማቆያ ማዕከላት ውስጥ የጎርፍ አደጋ እያደገ የመጣና ቀጣይነት ያለው ተግዳሮት መሆኑን ዓለምአቀፍ ተቋማት አስታወቁ። ተቋማቱ ይህ ሁኔታ ካልተቀለበሰ እና በዚሁ የሚቀጥል ከሆነ በመጠለያ ጣቢያዎች ውስጥ ለሚኖሩት ሁሉም ተጓዳኝ ችግር ይዞ በመምጣት ለህይወታቸውም አደጋ የሚጥል ነው ሲሉ አስጠንቅቀዋል።

እ.አ.አ. በ2025 በኢትዮጵያም ሆነ ሱዳን ባለው ጣቢያ ከፍተኛ የጎርፍ አደጋ የተከሰተባቸው ነው የተባለው የዴልታሬስ  እና የዩ.ኤን.ኤች.ሲ.አር. አዲስ ጥናት ላይ ነው።

#ከውጭ

1] እስራኤል በፍልስጤማውያን እስረኞች ላይ የሞት ቅጣት የሚደነግገውን አወዛጋቢ ሕግ አጸደቀች

የእስራኤል ፓርላማ “በሽብርተኝነት” የተከሰሱ የፍልስጤም እስረኞች በሞት እንዲቀጡ የሚፈቅደውን አዲስና አወዛጋቢ ሕግ ባለፈው ሰኞ  በ62 ድምጽ ድጋፍና በ48 ተቃውሞ አጽድቆታል።

እንደ ሮይተርስ ዘገባ ከሆነ የሕጉ ዋና ዋና ነጥቦች በቀኝ ዘመሙ የብሔራዊ ደኅንነት ሚኒስትር ኢታማር ቤን-ጊቪር ፓርቲ የቀረበውና በጠቅላይ ሚኒስትር ቤንያሚን ኔታንያሁ ድጋፍ የተቸረው ይህ ሕግ ከአስገዳጅ የሞት ቅጣት እስከ ስቅላት የሚደርስ ነው።

2] ባቤል መንደብ እንደ ሆርሙዝ ሁሉ “የመዘጋት ዕጣ ፈንታ እንደተጋረጠበት”  ተሰማ

የዓለም የነዳጅ ማስተላለፊያ መስመር የሆነው የሆርሙዝ ስርጥ የመከፈት ተስፋ እየመነመነ ባለበት በዚህ ወቅት፣ ሌላኛው ወሳኝ መተላለፊያ ባብል መንደብ የመዘጋት አደጋ ተጋርጦበታል።

የየመኑ ሁቲ ወደ እስራኤል ሁለት ባልስቲክ ሚሳኤሎችን መተኮሳቸውን ተከትሎ፣ ቀይ ባህርን ከኤደን ባህረ ሰላጤ ጋር የሚያገናኘው፣ እስያና አውሮፓን በስዊዝ ካናል በኩል የሚያስተሳስረው የባቤል መንደብ መስመር ከፍተኛ የደህንነት ስጋት ተደግኖበታል።

እነዚህ ዘገባዎች ባለፈው ሳምንት በአዲስ ማለዳ የፌስቡክ፣ ቴሌግራም፣ ሊንክዲንና ዩቱብ ገጾች ከተጋሩት መካከል ዋና ዋናዎቹ ናቸው።

የተዘረዘሩትን ጨምሮ ሌሎች ልዩ ልዩ ትንታኔዎች፣ ጥንቅሮችንና ቃለመጠይቆችን ደግሞ በይፋዊ የዩቱብ አድራሻችን ተጋርተዋል። አዲስ ማለዳን ሰብስክራይብ፣ ላይክና ሼር እንድታደርጉ በትህትና እንጋብዛለን።

ዜናን ከምንጩ!

የአዲስ ማለዳ ዩቱብን በዚህ ማስፈንጠሪያ ያገኙታል፦
t.ly/vSgS

ኢራን የአሜሪካ አየር ኃይል አባልን ለማዳን አደረግሁት ያላችው ዘመቻ “ዩራኒየምን ለመስረቅ” የተደረገ ሽፋን ሊሆን ይችላል አለች

ሰኞ፣ መጋቢት 28 ቀን 2018 ዓ.ም (#አዲስ_ማለዳ)

የኢራን የውጭ ጉዳይ ሚኒስቴር፤ የወደቀውን የአየር ኃይል አባል ለማዳን የተካሄደው የአሜሪካ ዘመቻ ከአገሪቱ “የበለጸገ ዩራኒየምን ለመስረቅ” የተደረገ ሽፋን ሊሆን ይችላል ሲል አስታወቀ።

ትናንት እሁድ የዩናይትድ ስቴትስ ፕሬዝዳንት ዶናልድ ትራምፕ አሜሪካ ዓርብ ዕለት በኢራን ላይ የወደቀውን የኤፍ-15- ኢ(F-15E) ተዋጊ አውሮፕላን ሁለተኛውን የበረራ አባል “ደፋር” ባሉት የፍለጋ እና የማዳን ዘመቻ ማግኘት መቻሏን ተናግረዋል። የኢራን ጦር በበኩሉ ድርጊቱን “የማታለል እና የማምለጥ ተልዕኮ” በማለት የጠራው ሲሆን፣ ተልዕኮውም “መክሸፉን” ገልጿል።

ሰኞ ዕለት የኢራን የውጭ ጉዳይ ሚኒስቴር ቃል አቀባይ እስማኤል ባቃይ ስለ ዘመቻው “ብዙ ጥያቄዎች እና ጥርጣሬዎች” እንዳሉ ተናግረዋል።

አክለውም፣ “የአሜሪካው ፓይለት ይገኝበታል የተባለው በኮጊሉየህ እና ቦየር-አህመድ ግዛት ውስጥ ያለው ቦታ፣ ኃይሎቻቸውን ለማሳረፍ ከሞከሩበት ወይም ለማሳረፍ ካሰቡበት በመካከለኛው ኢራን ከሚገኘው ቀጠና በጣም ርቆ የሚገኝ ነው” ብለዋል።

“ይህ የበለጸገ ዩራኒየምን ለመስረቅ የተደረገ የማታለል ዘመቻ ሊሆን የሚችለውን ዕድል በፍጹም ችላ ሊባል አይገባም” ብለዋል። እንደ ሮይተርስ ዘገባ ቃል አቀባዩ ዘመቻው ለአሜሪካ “ውርደት” መሆኑን ገልጸዋል።

ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA

ህወሓት በሀገራዊ ምክክር ኮሚሽን ሂደት ላይ ያለውን ተቃውሞ ገለጸ፤ “የትግራይ ጉዳይ የሚወሰነው በትግራይ ህዝብ ብቻ ነው” ሲልም አስታወቀ

ሰኞ፣ መጋቢት 28 ቀን 2018 ዓ.ም (#አዲስ_ማለዳ)

የሕዝባዊ ወያነ ሓርነት ትግራይ (ህወሓት) ባወጣው ሳምንታዊ መግለጫ፣ የኢትዮጵያ ሀገራዊ ምክክር ኮሚሽን በትግራይ ስም እያካሄደ ያለውን ሂደት እንደማይቀበልና በሂደቱ የሚተላለፉ ውሳኔዎችም በትግራይ ህዝብ ላይ ተፈጻሚነት እንደማይኖራቸው አስታወቀ። ድርጅቱ በመግለጫው የትግራይ ህዝብ ጉዳይ በትግራይ ምድርና በራሱ በህዝቡ ብቻ ሊወሰን እንደሚገባ በአጽንኦት ገልጿል።

የኢትዮጵያ መንግስት በትግራይ ህዝብ ላይ የጀመረውን የህልውና አደጋ አጠናክሮ ቀጥሏል ሲል የከሰሰው ህወሓት፣ ይህንን ድርጊት ለመሸፈንና ለማደናገርም የትግራይ ህዝብ ሙሉ በሙሉ በተገለለበት ሁኔታ በተለያዩ ተቋማት አማካይነት የህዝቡን ሉዓላዊነት የሚጋፉ ውሳኔዎች እየተላለፉ መሆኑን ገልጿል። በተለይም ከሰሞኑ በምክክር ኮሚሽኑ የተከናወነው ተግባር የትግራይ ህዝብ ተሳትፎና እውቅና የሌለው በመሆኑ ዛሬም ሆነ ነገ ተቀባይነት እንደማይኖረው ድርጅቱ አስገንዝቧል።

በተጨማሪም በመግለጫው ላይ እንደተመለከተው፣ ምክክር ኮሚሽኑ በትግራይ ስም ያካሄደው መድረክ ጥቂት “ለጊዜያዊ ጥቅም የተታለሉ” ግለሰቦችን የሰበሰበና የመንግስትን የፖለቲካ ፍላጎት ለማስፈጸም ያለመ ነው ብሎታል።

ትግራይ በምክክር ሂደቱ ላይ የማትሳተፍባቸው ምክንያቶች ለኮሚሽኑ ቀደም ብለው በግልጽ መነገራቸውን ያስታወሰው ህወሓት፣ ህዝቡ በአሁኑ ወቅት በረሃብና በበሽታ እየረገፈ ባለበት፣ መሬቱ በኃይል ተወሮ በሚገኝበትና የህልውና አደጋ ተጋርጦበት ባለበት ወቅት እንዲህ አይነት አጀንዳዎች ትርጉም የለሽ ናቸው ብሏል።

መንግስት የትግራይን ህዝብ ግልጽ ጥያቄዎች ወደ ጎን በመተው “ትግራይ በምክክር ሂደቱ መክራለች” የሚል የፕሮፓጋንዳ ስራ እየሰራ መሆኑን የጠቀሰው መግለጫው፣ ማንኛውም ወዳጅም ሆነ ጠላት የትግራይ ህዝብ ያልመከረባቸውና ያልተወከለባቸው ውሳኔዎች በምድር ላይ ተግባራዊ እንደማይሆኑ ሊያውቀው ይገባል ብሏል።
በመጨረሻም፣ የትግራይ ህዝብ ከመሰረታዊ የህልውና ጥያቄው ትኩረቱን የሚከፋፍሉ እንዲህ ያሉ “ተንኮሎችን” በመገንዘብ፣ ሉዓላዊነቱን ለማረጋገጥና ህልውናውን ለማስጠበቅ ከመቼውም ጊዜ በላይ ተደራጅቶ ትግሉን እንዲቀጥል ህወሓት ጥሪ አቅርቧል።

ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA

ሰሜን ኮሪያ ከኢራን ጋር ያላትን ግንኙነት እየቀነሰች መሆኑ ተገለጸ

ማክሰኞ፣ መጋቢት 29 ቀን 2018 ዓ.ም(#አዲስ_ማለዳ)

የደቡብ ኮሪያ ብሔራዊ መረጃ አገልግሎት ለሀገሪቱ ህግ አውጪዎች ባቀረበው ሪፖርት መሠረት ሰሜን ኮሪያ ለረዥም ዘመናት የቆየውን የቅርብ ወዳጅነቷን ከኢራን ጋር ሆነ ብላ ርቀቷን በመጠበቅ ላይ ነች ብሏል።

ምንም እንኳን በሁለቱ ሀገራት መካከል በታሪካዊ ሁኔታ በወታደራዊና በዲፕሎማሲያዊ ረገድ ጥብቅ ግንኙነት ያላቸው ቢሆንም ፒዮንግያንግ አሁን ላይ በመካከለኛው ምስራቅ ካለው ቀውስ ጋር በተያያዘ ያላትን ተሳትፎ በከፍተኛ ሁኔታ ገድባለች ስትል ሴዑል በስለላ ድርጅቷ በኩል ማስታወቋን አሶሼትድ ፕሬስ ዘግቧል።

እርምጃው ሰሜን ኮሪያ ወደፊት ከአሜሪካ ጋር ሊኖራት ለሚችለው ዲፕሎማሲያዊ ንግግር በር ከፋች ለማድረግ ካላት ፍላጎት የመነጨ እንደሆነ የተነገረ ሲሆን በሌላ በኩል ደግሞ በሩቅ ሁና ሂሳቧን እያሰላች ነው ተብሏል። ኪም ጆንግ ኡን ጦርነቱ እንደተጀመረ በምን እንደሚቀላቀሉ ተቸገረዋል፤ ምክንያት አጥተዋል በሚል በሰፊው የተዘገበ ሲሆን በመጨረሻም አንድ የሃገራቸው ዜጋ ኢራን ውስጥ አደጋ ከደረሰበት እርምጃ እንደሚወስዱ መዛታቸው አይዘነጋም።

የስላለ መረጃው እንደሚያመላክተው ከሆነ በኢራን እና በእስራኤል መካከል ከፍተኛ ወታደራዊ ግጭት ከተቀሰቀሰበት ካለፈው የካቲት ወር ጀምሮ ሰሜን ኮሪያ ለኢራን ምንም ዓይነት የጦር መሣሪያም ሆነ ወታደራዊ አቅርቦቶችን አልላከችም ያለችው ተቀናቃኟ ደቡብ ኮሪያ ናት።

በተለይም የኢራኑ ጠቅላይ መሪ አያቶላ አሊ ኻሜኒ በአየር ጥቃት በመገደላቸውም ሆነ ልጃቸው አዲሱ መሪ ሆነው ሲመረጡ ፒዮንግያንግ የተለመደውን እንኳን ደስ አላቸሁም ሆነ የሐዘን መግለጫ ከመስጠት ተቆጥባለች። ይህም ሰሜን ኮሪያ በአካባቢው ካለው ጦርነት እጇን በማውጣት ዓለም አቀፋዊ ገጽታዋን ለማስተካከልና ከዋሽንግተን ጋር አዲስ ምዕራፍ ለመጀመር ስልታዊ ጥንቃቄ እያደረገች መሆኑን ያሳያል ተብላል።

የሰሜን ኮሪያ የውጭ ጉዳይ ሚኒስቴር በመካከለኛው ምስራቅ ያለውን ሁኔታ አስመልክቶ የሰጣቸው መግለጫዎች እጅግ አነስተኛ እና የቀዘቀዙ መሆናቸው ተስተውሏል ያለው ዘገባው ሀገሪቱ በተለይም የአሜሪካውን ፕሬዝዳንት ዶናልድ ትራምፕ በቀጥታ ከመንቀፍ እየተቆጠበች ሲሆን በሁለቱ ሀገራት መካከል የነበረውን ውጥረት ለማርገብ እንደ አንድ ምልክት የተወሰደ ነው ተብሏል።

የደቡብ ኮሪያ የደህንነት ተንታኞች እንደሚሉት ኪም ጆንግ ኡን የቀጣናው ጦርነት እስኪረግብ ድረስ ሆን ብለው ድምጻቸውን በማጥፋት ከአሜሪካ ጋር ለሚደረግ ድርድር ራሳቸውን እያዘጋጁ ነው። ትራምፕ ከሰሜን ኮሪያው መሪ ጋር ወዳጅ ነን ብለው መናገራቸው የሚታወስ ሲሆን በመጀመሪያው የስልጣን ዘመናቸውም መገናኘታቸው ይታወሳል።

በሌላ በኩል፣ ሰሜን ኮሪያ በመካከለኛው ምስራቅ ባለው ጦርነት ምክንያት ለከፍተኛ የኢኮኖሚ ጫና መጋለጧም ተጠቁሟል። በጦርነቱ ሳቢያ የኢንዱስትሪ ግብዓቶችን ለማግኘት የተቸገረችው ፒዮንግያንግ የሸቀጦች ዋጋ መጨመር እና የውጭ ምንዛሬ ተመን መናር በሀገሪቱ ላይ ተፅዕኖ እንዳሳረፈ ተዘግቧል።

ይህንን ችግር ለመቅረፍ እና የነዳጅ ፍላጎቷን ለማሟላት ፒዮንግያንግ ከሩሲያ ጋር ያላትን ግንኙነት ይበልጥ እያጠናከረች ሲሆን የክሬሚሊንን ድጋፍ በማግኘት የኢኮኖሚ ጫናውን ለመቋቋም ጥረት እያደረገች መሆኑ ተገልጿል።
ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA

የኢራን ጦርነት ስድስተኛ ሳምንቱ ይዟል፤ በየአፍታውም አዳዲስ ጉዳዮች እየተሰሙበት ቀጥሏል

ይሁንና በዚህ ጦርነት ስር ብዙ መመርመር የሚገባቸው ጉዳዮች አሉ፡፡ ከዕለታዊ የውግያ ዜናዎች ባሻገር እነዚህን ልዩ ምልከታ የሚያስፈልጋቸውን ጉዳዮች በተመለከተ አዲስ ማለዳ የአፍሪካ ቀንድና መካከለኛው ምስራቅ ተንታኝ የሆኑትን አብዱራሕማን ሰይድን ከብሪታንያ፣ ለንደን አነጋግራ ሰፊ ቆይታ አድርጋለች፡፡

በዚህ ወቅት አስርሺዎች እየተመለከቱት የሚገኘውን ጥልቅ ትንታኔ እንድትከታተሉት ጋብዝናችኋል

https://www.youtube.com/watch?v=a71w1i1DuBc&t=4685s

ኢሕአፓ ከአንድ ወር በኋላ የሚካሄድ የተቃውሞ ሰላማዊ ሰልፍ ጠራ

ረቡዕ፣ መጋቢት 30 ቀን 2018 ዓ.ም (#አዲስ_ማለዳ)

ኢሕአፓ አስቻይ ሁኔታዎች ባልተሟሉበት የሚካሄድ ምርጫ “አምባገነንነትን እንደሚያጠናክር” በመግለጽ ለሚያዝያ 30 የተቃውሞ ሰልፍ ጠራ፡፡

የኢትዮጵያ ሕዝባዊ አብዮታዊ ፓርቲ (ኢሕአፓ) ዛሬ ባወጣው መግለጫ በአገሪቱ በአሁኑ ወቅት ያለው ነባራዊ ሁኔታ “ነፃ፣ ፍትሐዊና ተዓማኒነት ያለው ምርጫ ለማካሄድ የሚያስችል አይደለም” ሲል አስታውቋል።

ፓርቲው የሥልጣን ሽግግር በሕዝብ ፈቃድና በነፃ ምርጫ መከናወን እንዳለበት በጽኑ ቢያምንም፣ አሁን ያለው ሁኔታ ግን የገዥው ብልጽግና ፓርቲ “የሥልጣን ዕድሜውን ለማራዘም የሚጠቀምበት የመሸወጃ ትርዒት” እንጂ እውነተኛ ዴሞክራሲያዊ ሂደት አይደለም ሲል ወቅሷል።

ምርጫ “በአንድ ጀምበር ድምፅ በመስጠት ብቻ የሚጠናቀቅ ሳይሆን ዜጎች ሃሳባቸውን በነፃነት የሚገልጹበት፣ የፖለቲካ ኃይሎች አማራጭ ሃሳብ የሚያቀርቡበት ሰፊ ምኅዳርና ነፃ የምርጫ አስፈጻሚ አካል የሚጠይቅ ሂደት መሆኑን” ኢሕአፓ በመግለጫው አመልክቷል።

በአሁኑ ወቅት በመላ አገሪቱ ሰላምና መረጋጋት በጠፋበት፣ ንጹሐን ዜጎች በድሮንና በከባድ መሣሪያዎች ጥቃት ሰለባ እየሆኑ ባለበት እንዲሁም በሚሊዮኖች የሚቆጠሩ ዜጎች በረሃብና በድህነት እየማቀቁ በሚገኙበት ሁኔታ ምርጫ ማካሄድ አደገኛ መሆኑን ፓርቲው አስገንዝቧል።

በተለይም በትግራይ፣ በአማራና በኦሮሚያ ክልሎች ያለው የጦርነት ወላፈንና የዜጎች መፈናቀል ሳይቆም የሚደረግ ምርጫ “የአገር አንድነትን ከመሠረቱ የሚንድና አምባገነንነትን የሚያነግሥ እንደሆነም” አክሎ ገልጿል። በተጨማሪም ጋዜጠኞች፣ ፖለቲከኞችና የሰብዓዊ መብት ተሟጋቾች በማንነታቸውና በፖለቲካ አመለካከታቸው ታስረው በሚገኙበት እንዲሁም የዴሞክራሲ ተቋማትና ሚዲያዎች በመንግሥት ጫና ሥር በወደቁበት ወቅት የምርጫው ተዓማኒነት ጥያቄ ውስጥ እንደሚወድቅ ፓርቲው አስታውቋል።
ኢሕአፓ ከዚህ ቀደም ትክክለኛ ምርጫ ሊካሄድ ይችል ዘንድ ያቀረባቸው ቅድመ ሁኔታዎች አለመሟላታቸውን የገለጸ ሲሆን፣ ያለ ዓለም አቀፍ ታዛቢዎችና ያለ እውነተኛ ብሔራዊ ድርድር የሚካሄድ ሂደት “ለሕዝብ ስቃይ መቀጠል ምክንያት” እንደሚሆን ገልጿል።

በመሆኑም “የንጹሐን ጭፍጨፋና አፈና በአስቸኳይ እንዲቆም፣ የፖለቲካ እስረኞች ያለምንም ቅድመ ሁኔታ እንዲፈቱና የኑሮ ውድነትን የሚገቱ እርምጃዎች እንዲወሰዱ” ፓርቲው ጠይቋል።

እነዚህን ጥያቄዎች ለማስተጋባትና አምባገነንነትን ለመቃወም በሚልም፣ ኢሕአፓ ልክ ለዛሬ ወር ዓርብ ሚያዝያ 30 ቀን 2018 ዓ.ም በአዲስ አበባ፣ በመቀሌ፣ በባሕር ዳር፣ በጎንደር፣ በሐዋሳ፣ በአሶሳ፣ በአዳማ፣ በአምቦ፣ በድሬዳዋና በሐረር ከተሞች ታላቅ ሰላማዊ የተቃውሞ ሰልፍ መጥራቱን በማሳወቅ መላው የኢትዮጵያ ሕዝብ ከጎኑ እንዲቆም ጥሪውን አስተላልፏል።

ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA

እንግሊዝ በባህር ስር ባሉ መሠረተ ልማቶቿ ላይ ጥቃት ሊሰነዝሩ የነበሩ የሩሲያ ሰርጓጅ መርከቦችን አደጋ ማክሸፏን ገለፀች

ሐሙስ፣ ሚያዚያ 01 ቀን 2018 ዓ.ም (#አዲስ_ማለዳ)

የእንግሊዝ መከላከያ ሚኒስቴር የሀገሪቱ ወታደራዊ ኃይሎች በሰሜን አትላንቲክ ውቅያኖስ ውስጥ የሚገኙ የኢንተርኔት ገመዶችን እና የነዳጅ ማስተላለፊያ ቱቦዎችን አደጋ ላይ ሊጥሉ የነበሩ የሩሲያ ሰርጓጅ መርከቦችን ለሳምንታት በመከታተል አደጋ እንዳያደርሱ አደርጊያለሁ አለ።

ሚኒስትሩ ጆን ሂሊ በለንደን በሰጡት ጋዜጣዊ መግለጫ ሩሲያ የዓለም ትኩረት በመካከለኛው ምስራቅ ውጥረት ላይ ባረፈበት ወቅት ይህንን ድብቅ ኦፕሬሽን ለማካሄድ መሞከሯን የተናገሩ ሲሆን ይህም አደገኛ እንደነበር ገልጸዋል። እንደ ሮይተርስ ዘገባ ሚኒስትሩ በዛሬው ዕለት በሰጡት መግለጫ የሩሲያ አካሄድ አደገኛ እንደነበር አመልክተዋል።

በዚህ ወታደራዊ ክትትል አንድ የሩሲያ ጥቃት አድራሽ ሰርጓጅ መርከብ እና ሁለት ልዩ የሆኑ የስለላ ሰርጓጅ መርከቦች ተለይተው ታውቀዋል ብሏል። የእንግሊዝ ባህር ኃይል መርከቦች እና የጦር አውሮፕላኖች ከኖርዌይ እና ከሌሎች የኔቶ አጋሮች ጋር በመተባበር የሩሲያ መርከቦችን ለ24 ሰዓታት ሲከታተሉ መቆየታቸው ተገልጿል።

መከላከያ ሚኒስትሩ ለሩሲያው ፕሬዝዳንት ቭላድሚር ፑቲን መልዕክት ያስተላለፉ ሲሆን ፣ “እያየናችሁ ነው፤ በኬብሎቻችን እና በቱቦዎቻችን ላይ የምታደርጉትን እንቅስቃሴ ሁሉ እናውቃለን” በማለት በእነዚህ መሠረተ ልማቶች ላይ የሚሰነዘር ማንኛውም ጥቃት እንደማይታገሱና አስከፊ መዘዝ እንደሚኖረው አስጠንቅቀዋል። ከዚህ ቀደም የሩሲያ የንዳድጅ ማስተላለፊያ መስመር የዩክሬን ጦር ጋር በተያያዘ በኔቶ አባሎች እንደተቆረጠባት መናገሯ ይታወሳል።

ለወራት ክትትል ሲደርግባቸው ነበር የተባሉት የሩሲያ ሰርጓጅ መርከቦች ክትትል እየተደረገባቸው መሆኑን ካወቁ በኋላ አካባቢውን ለቅቀው ወደ ሰሜን ተመልሰዋል ተብሏል። እስካሁንም በባህር ስር መሠረተ ልማቶች ላይ የደረሰ ጉዳት አለመኖሩን ሚኒስትሩ አረጋግጠዋል።
ሩሲያ ቀደም ሲል በባህር ስር ኬብሎች ላይ ከሚደርሱ አደጋዎች ጋር በተያያዘ የሚቀርቡባትን ክሶች ውድቅ ስታደርግ የቆየች ሲሆን ለዛሬው የእንግሊዝ መግለጫ እስካሁን በይፋ የሰጠችው ምላሽ የለም።

በዚሁ ሳምንት የእንግሊዝ ስም በሩሲያ የተነሳ ሲሆን ይህም ዩክሬን በእንግሊዝ የተሰሩ የድሮን ቴክኖሎጂዎችን በመጠቀም በሩሲያ ወታደራዊ ይዞታዎች ላይ ጥቃት መፈጸሟ ተገልፆ ነበር። በተለይም ማሎይ ቲ 150 የተሰኙ የጭነትና የጥቃት ድሮኖችን በመጠቀም በደቡባዊ ዩክሬን ለሩሲያ ጦር አቅርቦት ወሳኝ የነበረን ድልድይ ማውደሟ ተዘግቧል። ይህም ክስተት በዘመናዊ የጦርነት ታሪክ ዉስጥ ድሮኖችን በመጠቀም ድልድይን የመሰለ ግዙፍ ግንባታ በማፍረስ ረገድ የመጀመሪያው ስኬታማ ኦፕሬሽን ተብሎ የተገለፀለት እንደነበር ሮይተርስ ዘግቧል።

በሌላ በኩል በዛሬ ዕለት በወጣው መረጃ መሠረት ሩሲያ በጦርነቱ የተገደሉ የአንድ ሺህ ዩክሬናውያን ወታደሮችን አስከሬን ያስረከበች ሲሆን በምትኩ የአርባ አንድ ሩሲያውያን አስከሬን ለሀገራቸው ተመልሷል። ይህ ልውውጥ የተከናወነው በዓለም አቀፍ ቀይ መስቀል ኮሚቴ አስተባባሪነት በሁለቱ ሀገራት ድንበር ላይ መሆኑ ተገልጿል።

ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA

መላው የክርስትና እምነት ተከታዮች በሙሉ እንኳን ለብርሃነ ትንሳኤው አደረሳችሁ፤ አዲስ ማለዳ መልካም በዓል እንዲሆንላችሁ ትመኛለች

#አዲስ_ማለዳ_በሳምንቱ

እሁድ፣ ሚያዝያ 04 ቀን 2018 ዓ.ም

#ከሀገር_ውስጥ

1] ህወሓት በሀገራዊ ምክክር ኮሚሽን ሂደት ላይ ያለውን ተቃውሞ ገለጸ፤ “የትግራይ ጉዳይ የሚወሰነው በትግራይ ህዝብ ብቻ ነው” ሲልም አስታወቀ

የሕዝባዊ ወያነ ሓርነት ትግራይ (ህወሓት) ባለፈው ሰኞ ባወጣው መግለጫ፣ የኢትዮጵያ ሀገራዊ ምክክር ኮሚሽን በትግራይ ስም እያካሄደ ያለውን ሂደት እንደማይቀበልና በሂደቱ የሚተላለፉ ውሳኔዎችም በትግራይ ህዝብ ላይ ተፈጻሚነት እንደማይኖራቸው አስታወቀ።

ድርጅቱ በመግለጫው የትግራይ ህዝብ ጉዳይ በትግራይ ምድርና በራሱ በህዝቡ ብቻ ሊወሰን እንደሚገባ በአጽንኦት ገልጿል።

2] ኢሕአፓ ሚያዝያ 30 የሚካሄድ የተቃውሞ ሰላማዊ ሰልፍ ጠራ

ኢሕአፓ አስቻይ ሁኔታዎች ባልተሟሉበት የሚካሄድ ምርጫ “አምባገነንነትን እንደሚያጠናክር” በመግለጽ ለሚያዝያ 30 የተቃውሞ ሰልፍ ጠራ፡፡

የኢትዮጵያ ሕዝባዊ አብዮታዊ ፓርቲ (ኢሕአፓ) ረቡዕ ዕለት ባወጣውና ለአዲስ ማለዳ በላከላት መግለጫ በአገሪቱ በአሁኑ ወቅት ያለው ነባራዊ ሁኔታ “ነፃ፣ ፍትሐዊና ተዓማኒነት ያለው ምርጫ ለማካሄድ የሚያስችል አይደለም” ሲል አስታውቋል።

3] መቀጮው ካለው ኢኮኖሚ አንፃር አነስተኛ በመሆኑ  ኮንትሮባንድ የያዘ ተሽከርካሪን መውረስ አግባብ ነው ተባለ

የጉምሩክ አዋጅን ለማሻሻል የወጣው ረቂቅ አዋጅ ኮንትሮባንድ የጫኑ ተሽከርካሪዎችን ለመውረስ የሚፈቅድ እና ይህ የተወረሰው ገንዘብ ደግሞ ለተቋሙ ገቢ የሚሆንበት ሁኔታ አግባብነት አለው ሲል የጉምሩክ ኮሚሽን ገልጿል።

ተሽከርካሪዎች በኮንትሮባንድ ተሳትፈው ሲገኙ አንድ መቶ ሺህ ብር ቅጣት አሁን ካለው የኢኮኖሚ አንፃር በጣም አነስተኛ በመሆኑ መወረሱ አግባነት አለው ነው የተባለው። ይህም ማለት ተሽከርካሪዎችን ማደን ሳይሆን ኮንትሮባንድን ለመቀነስ እጅጉን ይረዳል ሲል የገንዘብ ሚንስቴርም ተናግሯል። 

4] ሲ.ፒ.ጄ. በእስር ላይ የሚገኙ ጋዜጠኞች ያለምንም ቅድመ ሁኔታ እንዲፈቱ ጠየቀ

ዓለምአቀፉ የጋዜጠኞች መብቶች ተሟጋች ድርጅት (ሲፒጄ) ጋዜጠኛ ገነት አስማማው የታሰረችበትን ሦስተኛ ዓመት አስመልክቶ ባወጣው መግለጫ ነው ይህን ጥሪውን ያቀረበው፡፡

ከሦስት ዓመታት በፊት፤ መጋቢት 28  ጋዜጠኛ ገነት አስማማው በአማራ ክልል ስለተከሰተው ግጭት በመዘገቧ ምክንያት በሽብርተኝነት ወንጀል ክስ ቀርቦባት መታሰሯን ድርጅቱ አስታውሷል፡፡

ድርጅቱ አድርጌዋለሁ ባለው ቆጠራ እ.አ.አ. በ2025 የታሰሩ አምስት ጋዜጠኞች በተመሳሳይ በአማራ ክልል ስለተነሳው ግጭት በመዘገባቸው በሽብርተኝነት ወንጀል ተከሰው መታሰራቸውን አመልክቷል፡፡

#ከውጭ

1] ሰሜን ኮሪያ ከኢራን ጋር ያላትን ግንኙነት እየቀነሰች መሆኑ ተገለጸ

የደቡብ ኮሪያ ብሔራዊ መረጃ አገልግሎት ለሀገሪቱ ህግ አውጪዎች ባቀረበው ሪፖርት መሠረት ሰሜን ኮሪያ ለረዥም ዘመናት የቆየውን የቅርብ ወዳጅነቷን ከኢራን ጋር ሆነ ብላ ርቀቷን በመጠበቅ ላይ ነች ብሏል።

ምንም እንኳን በሁለቱ ሀገራት መካከል በታሪካዊ ሁኔታ በወታደራዊና በዲፕሎማሲያዊ ረገድ ጥብቅ ግንኙነት  ያላቸው ቢሆንም ፒዮንግያንግ አሁን ላይ በመካከለኛው ምስራቅ ካለው ቀውስ ጋር በተያያዘ ያላትን ተሳትፎ በከፍተኛ ሁኔታ ገድባለች ስትል ሴዑል በስለላ ድርጅቷ በኩል ማስታወቋን አሶሼትድ ፕሬስ ዘግቧል።

2] እንግሊዝ በባህር ስር ባሉ መሠረተ ልማቶቿ ላይ ጥቃት ሊሰነዘሩ የነበሩ የሩሲያ ሰርጓጅ መርከቦችን አደጋ ማክሸፏን ገለጸች

የእንግሊዝ መከላከያ ሚኒስቴር የሀገሪቱ ወታደራዊ ኃይሎች በሰሜን አትላንቲክ ውቅያኖስ ውስጥ የሚገኙ የኢንተርኔት ገመዶችን እና የነዳጅ ማስተላለፊያ ቱቦዎችን አደጋ ላይ ሊጥሉ የነበሩ የሩሲያ ሰርጓጅ መርከቦችን ለሳምንታት በመከታተል አደጋ እንዳያደርሱ አደርጊያለሁ አለ።

ሚኒስትሩ ጆን ሂሊ በለንደን በሰጡት ጋዜጣዊ መግለጫ ሩሲያ የዓለም ትኩረት በመካከለኛው ምስራቅ ውጥረት ላይ ባረፈበት ወቅት ይህንን ድብቅ ኦፕሬሽን ለማካሄድ መሞከሯን  የተናገሩ ሲሆን ይህም አደገኛ እንደነበር ገልጸዋል።

እነዚህ ዘገባዎች ባለፈው ሳምንት በአዲስ ማለዳ የፌስቡክ፣ ቴሌግራም፣ ሊንክዲንና ዩቱብ ገጾች ከተጋሩት መካከል ዋና ዋናዎቹ ናቸው።

የተዘረዘሩትን ጨምሮ ሌሎች ልዩ ልዩ ትንታኔዎች፣ ጥንቅሮችንና ቃለመጠይቆችን ደግሞ በይፋዊ የዩቱብ አድራሻችን ተጋርተዋል። አዲስ ማለዳን ሰብስክራይብ፣ ላይክና ሼር እንድታደርጉ በትህትና እንጋብዛለን።

ዜናን ከምንጩ!

የአዲስ ማለዳ ዩቱብን በዚህ ማስፈንጠሪያ ያገኙታል፦

t.ly/vSgS

ቻይና፣ አሜሪካ በሆርሙዝ ወሽመጥ ላይ ያሳየችው አቋም ለዓለም አቀፍ ቀውስ እና ለሌሎች ጦርነቶች በር ከፋች ነው ስትል ኮነነች

ማክሰኞ፣ ሚያዝያ 06 ቀን 2018 ዓ.ም (#አዲስ_ማለዳ)
 
አሜሪካ የኢራንን ወደቦች እንቅስቃሴ እገታለሁ ባለችበት ወቅት ቻይና በወሽመጡ አካባቢ የሚደረግ የእንቅስቃሴእቀባ የቻይናንም ሆነ ዓለምአቀፍ ፍላጎትን የሚጎዳ ነው በማለት ተቃውሞዋን አሰምታለች። ቻይና ይህ አካሄድ ወደ ሌሎች ግጭቶች የሚያመራ ነው ያለች ሲሆን በአስቸኳይ ወደስምምነት እንዲመጡ ማሳሰቧንም ሮይተርስ ዘግቧል።

የአሜሪካ ባህር ኃይል በኢራን የወደብ ግዛቶች ላይ የጣለውን የባህር ላይ እገዳ በይፋ መጀመሩን ተከትሎ በመካከለኛው ምስራቅ ያለው ወታደራዊ እና ፖለቲካዊ ውጥረት ወደ አዲስ ምዕራፍ ተሸጋግሯል። ፕሬዝዳንት ዶናልድ ትራምፕ ይህ እርምጃ ኢራን ወደ ኒውክሌር ድርድር ጠረጴዛ እንድትመጣ ለማስገደድ ያለመ መሆኑን የገለጸ ሲሆን የቴህራን ባለሥልጣናት በበኩላቸው ግን ድርጊቱን “የባህር ላይ ወንብድና” በማለት ኮንነውታል።

በፓኪስታን የተካሄደው ድርድር ፍሬ አልባ በመሆኑ እና ለሁለት ሳምንት የተደረገው የትኩስ አቁም ስምምነት እስራኤል ስምምነቱ ሊባኖስን አያካትትም በማለት ጥቃቷን በመቀጠሏ ኢራን ስምምነቱ አደጋ ላይ ነው ብላ ነበር። ይህ በእንዲህ እንዳለ በሊባኖስ እና በእስራኤል መካከል ያለው ግጭት ተጨምሮ የቀጣናውን ስጋት ይበልጥ አባብሶታል። 

የሄዝቦላህ መሪ ናይም ቃሲም የሊባኖስ መንግስት  በዋሽንግተን ከእስራኤል ጋር ሊያደርገው የነበረውን የሰላም ንግግር እንዲያቋርጥ ጥሪ ማቅረቡን አልጀዚራ ዘግቧል። ይህ ጥሪ የቀረበው እስራኤል በደቡባዊ ሊባኖስ የምታደርገውን ወታደራዊ ጥቃት ባጠናከረችበት ወቅት ሲሆን ሁኔታው ቀደም ሲል ተስፋ ተጥሎበት የነበረውን የዲፕሎማሲ ጥረት ጥያቄ ውስጥ ጥሎታል።

የየመኑ ሁቲ በበኩሉ የኢራን አሜሪካ በሆርሙዝ አካባቢ እየወሰደች ያለው አካሄድ ካልቀየረች ከኢራን ጋር በመቀናጀት በቀይ ባህር ላይ አደገኛ ኦፕሬሽን እንደሚጀመርም አስታውቋል።

በአሁኑ ወቅት በሆርሙዝ ወሽመጥ አካባቢ የተፈጠረው አለመረጋጋት በዓለም አቀፍ የነዳጅ ገበያ ላይ ከፍተኛ መናወጥ እያስከተለ ነው።  በወሽመጡ በኩል የሚደረገው የንግድ መርከቦች እንቅስቃሴ በመስተጓጎሉ ምክንያት የነዳጅ ዋጋ በከፍተኛ ሁኔታ እየጨመረ ሲሆን፣ ይህም በዓለም ዙሪያ የኑሮ ውድነት ስጋትን መደገኑ እየተዘገበ ነው። 

የተባበሩት መንግሥታትም ሁኔታው ወደ ቀጥተኛ ጦርነት እንዳያመራ ስጋቱን ገልጾ  ሁሉም ወገኖች ዓለም አቀፍ የባህር ሕግጋትን እንዲያከብሩ ጥሪ በማቅረብ ላይ ነው።

አሜሪካ ወደ ኢራን ወደቦች የሚገቡና የሚወጡ ማናቸውንም ነገሮች በማገድ ኢራን ከዓለም አቀፍ ገበያ ጋር ያላትን ግንኙነት ለመቁረጥና የኢነርጂ ዘርፏን ለማዳከም እየሰራች ትገኛለች። አሜሪካ በዚህ እርምጃዋ ቻይናን ጨምሮ በዋና ዋና የኢራን የንግድ አጋሮች በኩል በሀገሪቱ ላይ ጫና እንዲፈጠር የምትፈልግ ሲሆን ቤጂንግ በበኩሏ በሆርሙዝ ወሽመጥ ላይ የሚደረግ ማናቸውም እገዳ አግባብነት የለውም ብላለች። 

ቻይና ለአገር ውስጥ ፍጆታ የሚውለውን የነዳጅ ዘይት ሲሶ ያህሉን ከቴህራን የምታስመጣ ሲሆን ይህንንም በጦርነቱ ጊዜ ሁሉ ስታደርግ ቆይታለች። አሁን ግን ቻይና የኢራንን ነዳጅ ማግኘት ካልቻለች ለከፍተኛ ችግር ትጋለጣለች። 

​አሜሪካ በኢራን ወደቦች ላይ የባህር ላይ ትራፊክ እገዳ እንደምትጀምር ማስታወቋን ተከትሎ ማስጠንቀቂያ ያወጣችው ቤጂንግ ከኢራን ጋር ያላትን ጠንካራ የንግድና የኢነርጂ ትብብር ለማስቀጠል ቁርጠኛ መሆኗን ገልፃለች።  ​ይህ ውጥረት የነገሰው በኢስላማባድ የተደረገው ድርድር ያለ ውጤት መጠናቀቁን ተከትሎ ሲሆን፣ ቻይና የኢራን የነዳጅ ምርት ዋነኛ ገዢ እንደመሆኗ ጉዳዩን በቅርበት እየተከታተለችው መሆኑን ገልጻለች።

አሜሪካ በቻይና ላይ የምታሳድረው ተጽዕኖ ቤጂንግ ቴሄራን ላይ ጫና እንድታደርግና ኢራንን ወደ ድርድር ጠረጴዛ እንድትመለስ ያስገድዳታል የሚል ተስፋ አላት የሚለው የአልጀዚራ ዘገባ የተኩስ አቁም ስምምነቱ ሊያበቃ ቀናት ብቻ የቀሩት በመሆኑ ዶናልድ ትራምፕም ቻይናውያን በቴህራን ላይ የሚያሳድሩት ጫና ሳይዘገይ በቅርቡ ተግባራዊ ይሆናል ብለው ያምናሉ ሲል አትቷል።

ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦ 

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA

ኢሕአፓ ለሚያዝያ 30 የጠራውን ሰልፍ ለማካሄድ አሁንም ቁርጠኛ መሆኑን ገለጸ

ረቡዕ፣ ሚያዝያ 07 ቀን 2018 ዓ.ም (#አዲስ_ማለዳ)

የኢትዮጵያ ሕዝባዊ አብዮታዊ ፓርቲ(ኢሕአፓ)፤ ከአንድ ወር በኃላ ሊያካሂድ ላቀደው ሰላማዊ የተቃውሞ ሰልፍ ዝግጅት እያደረገ መሆኑን በመግለጽ በሀገሪቱ ውስጥ ጦርነትና ሞት እስካልቆመ ድረስ ሰልፉን እንደሚያካሂድ አስታውቋል፡፡

ኢሕአፓ ይህንን ያለው በትናንትናው ዕለት በበይነ መረብ በሰጠው ጋዜጣዊ መግለጫ ሲሆን ከትብብሩ ጋር ያለው ግንኙነት አሁንም እንደተጠበቀ መሆኑን ገልጧል፡፡ የጠራውን ሰላማዊ ሰልፍ ትብብሩም ሆነ ሌሎች ፍትሃዊ ምርጫ መካሄድ አለበት ብለው የሚያምኑ ፓርቲዎች መቀላቀል እንደሚችሉም አሳዉቋል፡፡

አሁን ላይ ሰልጣን ላይ በሚገኘው የመንግስት ዘመናት የተቃውሞ ሰላማዊ ሰልፍ ተደርጎ እንደማያውቅ የጠቀሰው ፓርቲው ከዚህ ቀደም ሰልፍ ለማከናወን ተሞክሮ መጨረሻዉ አዋሽ አርባ እንደነበር አስታዉሷል፡፡
“ከዚህ ቀደም ሰላማዊ ሰልፍ ጠርተን አዋሽ አርባ ነበር ፍፃሜያችን፤ ብዙ እንግልትደርሶብናል፤ አሁንም ያንን ፈርተን አናቆምም” ያሉት የፓርቲው ፕሬዝዳንት አብርሃም ኃይማኖት፤ ፓርቲው ያስቀመጣቸው ቅድመ ሁኔታዎች ካልተሟሉ ግን ሰልፉን ላያካሂድ እንደሚችል ተናግረዋል፡፡

ከሰላማዊ ሰልፉ ባሻገር በዚህ አጭር ጊዜ የሽግግር መንግስት ይመሰረታል ብሎ እንደማይጠብቅ የገለጸዉ ፓርቲው መንግስት ቢያንስ እስረኞችን መፍታትና ግድያን ማቆም እንዳለበት ግን አጽዕኖት ሰጥቷል፡፡

በተለያዩ የምርጫ ክልሎች ገዢው ብልጽግና ፓርቲ ዕጩዎችን ያለማቅረብና እና የምርጫ ድምፅን መልቀቅን እንቅሰስቃሴ እያሳየ ነው ያለው ፓርቲው “ስልጣን ከህዝብ ድምፅ እንደሚያገኝና ከገዥው ፓርቲ እንደማይፈልግ” አመላክቷል፡፡

አብዛኛውን ጊዜ ብልጽግና ፓርቲ ላይ ትችትና ወቀሳ ስለሚያበዛበት ምክንያት የተጠየቀው ፓርቲው ምላሽ ሲሰጥ “ኃላፊነትን እየሸሹ ጥቅማ ጥቅምን መውሰድ አያስፈልግም” መንግስት፣ መንግስት እስከሆነ ድረስ የዜጎችን በስላም የመውጣትም ሆነ የመግባት መብትን የማስከበር ግዴታ እንዳለበት አስገንዝቧል፡፡
የሰላም እጦት በሚስተዋልበት ሀገር ፍትሐዊ ምርጫ ሊካሄድ አይችልም የሚለው ፓርቲው አሁንም አዳዲስ የጦርነት ቀጣናዎችን ለመክፈት ዝግጅቶች መኖራቸውን፣ ጦርነትም የሚጀመረው በፕሮፖጋንዳ. ከንግግር ነው ብሏል፡፡
“በትግራይ ምርጫ አይካሄድም፤ የጦርነት ድምፆች ከከፍተኛ ባለስልጣናት በኩል እየተሰማ ነው፤ አማራ ክልል አሁን ጦርነት ላይ ነው፤ እንዲሁም ፖለቲከኞች እየታፈሱና እየታሰሩ በመሆኑ” ሊቀረረፍ ይገባል ሲልም አሳስቧል፡፡

ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA

ቅንጅቱ በከያኒ ቴዎድሮስ ካሳሁን(ቴዲ አፍሮ) ላይ የተጣለውን “የጋዜጣዊ መግለጫ ዕገዳ” አወገዘ

ረቡዕ፣ ሚያዝያ 07 ቀን 2018 ዓ.ም (#አዲስ_ማለዳ)

ትብብር ለኢትዮጵያ አንድነት የተሰኘው የአራት የፖለቲካ ፓርቲዎች ቅንጅት፣ ታዋቂው ድምጻዊ ቴዎድሮስ ካሳሁን (ቴዲ አፍሮ) አዲስ በሚያወጣው የሙዚቃ ሥራ ዙሪያ ሊሰጠው የነበረው “ጋዜጣዊ መግለጫ መደናቀፉን” በጽኑ እንደሚያወግዝ ገለጸ።

ድርጅቱ ዛሬ ባወጣውና ለአዲስ ማለዳ በላከላት ይፋዊ መግለጫ እንዳመለከተው፣ ሐሳብን በነጻነት መግለጽ ከማንም የሚሰጥ ችሮታ ሳይሆን የማይገሰስ የሰው ልጆች ተፈጥሯዊ መብት መሆኑን አስታውቋል።

በኢፌዴሪ ሕገ-መንግሥት አንቀጽ 10 ላይ የሰው ልጅ መብቶች የማይገሰሱ መሆናቸው መካተቱን የጠቀሰው ቅንጅቱ፣ ማንኛውም ሰው ያለማንም ጣልቃ ገብነት ሐሳቡን የመግለጽ ነጻነት እንዳለው የሚደነግገውን አንቀጽ 29ንም ለአብነት አንስቷል። ይሁን እንጂ በሀገሪቱ ያሉ ሥርዓቶች ራሳቸው ለጻፉት ሕግ ለመገዛት ሲቸገሩና ከሕግ በላይ ሲሆኑ ይታያሉ ሲል ወቅሷል።

ድምጻዊ ቴዎድሮስ ካሳሁን ሊሰጠው የነበረው መግለጫ ስለመታገዱ በይፋዊ ደብዳቤ የተገለጸ ነገር ባይኖርም፣ “የሥርዓቱ ባለሥልጣናት የሚያሳዩት የቃላት ጥቃትና ዘለፋ በእጅ አዙር የተፈጸመ ዕገዳ” መኖሩን እንደሚያመለክት መግለጫው ያስረዳል።

አክሎም፣ አርቲስቱ “ኢትዮጵያዊነትንና ታሪክን መዘከር ነውር በነበረበት ወቅት ወጣቱን በሥነ-ልቦና በመገንባት ላደረገው በጎ አስተዋጽዖ እውቅና ሊሰጠው ሲገባ፣ እንዲህ ያለው መሳደድ አግባብ እንዳልሆነ” ገልጿል።

ትብብሩ ይህን መሰል “ቀጥተኛና ቀጥተኛ ያልኾኑ አፈናዎች ለሌላ ቀውስ በር ከፋችና ገፊ ምክንያቶች ናቸው ብሎ እንደሚወስድ” ገለጿል፡፡

በመሆኑም መንግሥት ክልከላውን በጓዳ ከመፈጸም ይልቅ አርቲስቱ የተደናቀፈበትን መግለጫ እንዲሰጥ ሁኔታዎችን እንዲያመቻች ወይም ከአደናቃፊነት ራሱን እንዲያቅብ ጥሪ አቅርቧል። በተጨማሪም የዜጎች የመናገር ነጻነት እንዲከበርና ፍትሕ በግለሰቦችና በካድሬዎች እጅ እንዳይወድቅ በጥብቅ አሳስቧል።

ተጨማሪ ዜናዎችንና አዳዲስ መረጃዎችን ለማግኘት የማሕበራዊ ሚዲያ ገጾቻችን ይጎብኙ፦

YouTube ➲ t.ly/vSgS
Telegram ➲ t.ly/SOXU
Facebook ➲ t.ly/flx8
Twitter ➲ t.ly/mxA