Ey Dunyo! Boryapman – meni qarshi ol –
Shu buyuk millatning umidiman men!

Jahon beshigini tebratib qo‘ygan,
Ilmu irfon nurin taratib qo‘ygan,
Olamni o‘ziga qaratib qo‘ygan
Shu buyuk millatning umidiman men!

Tomirimda oqar daholar qoni,
Kim bilmas Xorazmiy, Ibn Sinoni!
Tog‘lardan balanddir shavkatu shoni
Shu buyuk millatning umidiman men!

Nomin eshitganda tik turib dunyo,
Beruniy bobomga aytar tasanno,
Ko‘ksimda iftixor, boshimda Humo
Shu buyuk millatning umidiman men!

Ovro‘po eslasa, titraydi hamon,
Temur qilichidan qoldik deb omon,
Yigirma yetti taxt sohibi hoqon –
Shu buyuk millatning umidiman men!

Amerika uchar fazoga sho‘ng‘ib,
Shoh Ulug‘bek yozgan kitobni o‘qib...
Bas, yetar, turmayman bir chetda qo‘rqib,
Shu buyuk millatning umidiman men!

Jadid bobolarim, oydin zotlarim,
Ochilmay yulingan iste’dodlarim,
Bo‘g‘zimni kuydirar ohu dodlarim,
Shu buyuk millatning umidiman men!

O‘tgan kunlar endi tarixdir beshak,
Bu Vatanga yangi daholar kerak,
Meni chorlamoqda nurli kelajak,
Shu buyuk millatning umidiman men!

Menga yordir omad, men bilan iqbol,
Hali yetti iqlim qolar hayron, lol,
Ey Dunyo! Boryapman – meni qarshi ol
Shu buyuk millatning umidiman men!!
 
#millatumidi
#challenge