له‌سه‌رده‌می زۆربووندا مرۆڤ پێویستیی به‌ خۆدۆزینه‌وه‌ هه‌یه
بۆیه‌ با یه‌كێك له‌نزاكانمان ئه‌مه‌ بێت : خودایه‌ بمدۆزه‌ره‌وه‌
بۆ ئه‌وه‌ی ئه‌و كاره‌ ئه‌نجام بده‌م كه‌ له‌پێناویدا منت هێنایه‌ بوون

مناڵییه‌كی جوان له‌ناخی هه‌ندێك له‌گه‌وره‌كاندا هه‌ر ده‌مێنێت
پاراستنی ئه‌و جۆره‌ له‌مناڵیی ، پاراستنی راستگۆیی و پاكییه‌ له‌ناخیاندا

جاران خه‌ڵك له‌كه‌سی درۆزن زیز ده‌بوون
بۆیه‌ درۆزن ناچار ده‌بوو له‌داهاتوودا راستگۆ بێت
به‌ڵام ئێستا كه‌ خه‌ڵك له‌كه‌سانی راستگۆ زیز ده‌بن
كه‌سی راستگۆ ناچار ده‌كه‌ن له‌راستگۆیی سارد بێته‌وه‌
بۆ ئه‌وه‌ی ئێمه‌ وانه‌بین ، با رێز له‌كه‌سانی راستگۆ بگرین

ئارامییت له‌ئاست قسه‌ی بێمانادا
مانای وانییه‌ وه‌ڵامی شیاوت پێ نییه‌
به‌ڵكو پێت باشتره‌ به‌تێپه‌ڕبوونی كات
رۆژگار وه‌ڵامی پێویستیی بداته‌وه

زۆرن ئه‌وانه‌ی له‌بیرت ده‌كه‌ن ، كه‌من ئه‌وانه‌ی بیرت ده‌كه‌ن
بۆیه‌ ئه‌گه‌ر مرۆڤ بزانێت ، خه‌ڵك چه‌ند به‌خێرایی له‌بیری ده‌كه‌ن
ئه‌و كات له‌ خه‌می رازییكردنی هیچ كه‌سێكی دیكه‌دا نابێت
ته‌نها له‌خه‌می رازییكردنی خودا ده‌بێت

خه‌ڵك مافیان نییه‌ له‌باره‌ی رێگاو هه‌نگاوی تۆوه‌ ئاگادار بن
بۆیه‌ ئه‌گه‌ر كارێكت ئه‌نجام دا ، روونكردنه‌وه‌ی له‌باره‌وه‌ مه‌ده‌
نه‌بادا خه‌ڵك وا فێر بكه‌یت كه‌ ئه‌ركی تۆیه‌و مافی ئه‌وانه‌
له‌باره‌ی هه‌ر هه‌نگاوێكته‌وه‌ روونكردنه‌وه‌یان پێ بده‌ی

ژیانی هه‌ر كه‌سێك چیرۆكێكه‌ شتێكی له‌باره‌وه‌ ده‌زانیت
به‌ڵام ئه‌وه‌ش بزانه‌ له‌پشت هه‌ر یه‌ك له‌و چیرۆكه‌ زانراوانه‌
چیرۆكێكی دیكه‌ی نه‌زانراو هه‌یه‌ ، خودا نه‌بێت كه‌س نایزانێت
بۆیه‌ خێرا بڕیار له‌سه‌ر كه‌سایه‌تیی و ژیانی كه‌س مه‌ده

مرۆڤ ئه‌و ساته‌ ئاسووده‌ ده‌بێت
كه‌ زووتر ده‌ست به‌رداری ئه‌و شتانه‌ ده‌بێت
كه‌ زیان و ئازاری پێ ده‌به‌خشن نه‌ك سوودو ئارامیی

له‌كات و شوێنی خۆیدا ، شتی بچووك گه‌وره‌و كاریگه‌ره‌
یه‌ك ره‌فتاری جوان بۆته‌ هۆی هاوڕێیه‌تییه‌كی درێژخایه‌ن
یه‌ك وشه‌ی خێر ، بۆته‌ مایه‌ی كوژانه‌وه‌ی ئاگری شه‌ڕێك
یه‌ك كه‌سی چاك ، ژیانی سه‌دان كه‌سی خراپی گۆڕیوه‌
ره‌فتاری ناشیرین و وشه‌ی شه‌ڕو كه‌سی خراپیش به‌پێچه‌وانه‌وه

مه‌رج نییه‌ ئه‌وه‌ی له‌ڕووكه‌شدا ده‌بینرێت باشتر بێت
ئه‌وه‌ی به‌دوای مروارییه‌وه‌ بێت ته‌ماشای قوڵایی ده‌كات
با دوا بڕیارت ته‌نها له‌سه‌ر روخسار نه‌بێت

هه‌ندێك له‌و پاڵه‌په‌ستۆیانه‌ی ئه‌مڕۆ ده‌یخه‌یته‌ سه‌ر مێشكت
رۆژه‌كه‌ت لێ تاڵ ده‌كه‌ن و ، له‌وانه‌شه‌ گرفتی سبه‌ی چاره‌سه‌ر نه‌كه‌ن
وه‌ك ئه‌و ئامێره‌ ئه‌لكتڕۆنییه‌ی ئه‌و كاته‌ كاری قورس ده‌بێت
كه‌ له‌یه‌ك كاتدا زیاتر له‌یه‌ك سایت و په‌یجێكی تێدا ده‌كه‌یته‌وه
یان زیاد له‌توانای خۆی دۆسیه‌و به‌رنامه‌ی تێدا هه‌ڵده‌گریت

هه‌ر كه‌س سه‌ركه‌وتنی خۆی هه‌یه‌ ، له‌سه‌ركه‌وتنی ئه‌وانی دی ناچێت
خۆت به‌راورد مه‌كه‌ له‌گه‌ڵ ئه‌وانه‌ی ده‌یان (سه‌ركه‌وتن) یان به‌ده‌ست هێناوه‌
له‌وانه‌یه‌ سه‌ركه‌وتنی تۆ ئه‌وه‌ بێت له‌ده‌یان (كه‌وتن)دا هه‌ستابیته‌وه‌
بۆ مانه‌وه‌ له‌ژیانێكی دژواریشدا ، به‌رگه‌ی ده‌یان ناخۆشیت گرتبێت

ژیان به‌رده‌وامه‌و ، مرۆڤ په‌ند له‌رووداوه‌كانی رۆژگار وه‌رناگرێت
وێنه‌یه‌ك پێش 120 ساڵ
له‌گه‌ڵ ته‌واوبوونیدا ساڵی 1902 ئامۆژگاری ساڵی 1903 ده‌كات

ساڵی نوێ له‌روخسارو روواڵه‌تدا نوێبوونه‌وه‌ی ژماره‌یه‌ ، به‌ڵام
ئه‌و ساڵه‌ نوێیه‌ له‌ژیاندا ، كه‌ مرۆڤ بتوانێت خۆی تێدا نوێ بكاته‌وه‌
چونكه‌ ژیان به‌تێگه‌یشتنی نوێی باشتر ، به‌ره‌فتاری به‌رزی چاكتر
به‌رهه‌مێكی باشترو ئه‌نجامێكی چاكتری ده‌بێت له‌ساڵی نوێدا

هه‌ندێك له‌وانه‌ی له‌سه‌ر شتی ساكارو وشه‌یه‌كی ساده‌ لێت زیز ده‌بن
له‌وانه‌یه‌ زووتر به‌نیازی دابڕان بوو بن ، به‌ڵام بیانوویه‌كیان به‌ده‌سته‌وه‌ نه‌بووه‌
ئه‌و شته‌ ساكاره‌و ئه‌و وشه‌ سادانه‌ت ، ئه‌و بیانووه‌ بوون كه ‌ده‌ستیان كه‌وت

رایه‌ك هه‌یه‌ ده‌ڵێت تۆڵه‌ی خۆت بكه‌ره‌وه‌ ، ڕایه‌كیش هه‌یه‌ ده‌ڵێت
باشتر وایه‌ كه‌سی به‌ویژدان بیری لای تۆڵه‌سه‌ندنه‌وه‌ نه‌بێت
با هه‌واڵه‌ی خودای بكات و ، ده‌روونی خۆی ئازار نه‌دات چونكه‌
په‌ندێك هه‌یه‌ ده‌ڵێت: تۆڵه‌ خۆشه‌ ، به‌ڵام پێش سه‌ندنه‌وه‌ی
چونكه‌ نه ‌لێی خۆشبوویت هه‌تا ئارام بێت ، نه‌ده‌شزانێت به‌نیازی چیت

كاتێك له‌نزیكییدا په‌یوه‌ندییه‌كان كاڵ ده‌بنه‌وه‌
دووركه‌وتنه‌وه‌یه‌كى كاتيى وه‌ك چاره‌سه‌ر پێویسته
ماوه‌یه‌كی كه‌م له‌بیریان بكه‌ ، بزانه‌ بیرت ده‌كه‌ن؟

راسته‌ ژیان ماندووه‌ به‌ده‌ست هه‌ستی رق و قینه‌وه‌
راسته‌ ناكرێت چاوه‌ڕێی خۆشویستن بكه‌یت له‌دڵێكی پڕ له‌ڕق
به‌ڵام له‌پێناوی ئارامیی ده‌روون و سه‌لامه‌تی جه‌سته‌ی خۆت
له‌ نزیكی ئه‌وانه‌وه‌ به‌ كه‌ خۆشت ده‌وێن و ، خۆشیان ده‌وێیت
دوور به‌ له‌ژینگه‌ی رق لێبوون و كه‌سانی دڵ پڕ له‌قین

ده‌ڵێن: له‌سه‌ركه‌وتندا زۆربه‌ی خه‌ڵك تۆ ده‌ناسێت
له‌شكستدا تۆ زۆربه‌ی خه‌ڵك باشتر ده‌ناسیت
بۆیه‌ به‌هێزیی هاوڕێیه‌تی گرنگه‌ ، به‌ڵام
له‌خۆشیی و ناخۆشییدا به‌رده‌وامبوونه‌كه‌ی گرنگتره

هه‌ر شتێك له‌ژێر چه‌تری چاوه‌ڕوانییدا بیت بۆی ، دڵنیابه‌ كۆتایی نه‌هاتووه‌
بۆیه‌ ده‌ست به‌كارێك مه‌كه‌ كه‌ ده‌زانیت ناتوانیت كۆتایی پێ بهێنیت

رووداوه‌كانی ژیان گۆڕانكاریی توند به‌سه‌ر په‌یوه‌ندییه‌كاندا ده‌هێنن
وه‌ك ئه‌وه‌ی سه‌رده‌مانێك مرۆڤ كه‌سانێكی هه‌بووه‌
به‌رده‌وام چاوی له‌سه‌ر هه‌موو شوێنێك بووه‌‌ بۆ گه‌یشتن پێیان
به‌ڵام ئێستا كه‌ دێنه‌ سه‌ر رێگای ، خۆی لاده‌دات لێیان