Afsuski buni ichida bizning shaxsiy malumotlar bo’lishi mumkin

Erondagi urush bizning kompaniyamizga ham ta’sir qildi.

Buni birinchi eshitishda odam biroz hayron bo‘lishi mumkin. Axir biz O‘zbekistondamiz, alhamdulillah, yurtimiz tinch. Lekin bugungi raqamli dunyoda bir davlatdagi voqea boshqa bir davlatdagi biznesga ham bevosita ta’sir qilishi mumkin ekan.

Taxminan bir yil oldin qurilish kompaniyasi uchun korporativ veb-sayt tayyorlagan edik. Hammasi yaxshi ishlayotgan edi. Bir necha kun oldin mijozimiz bog‘lanib qoldi:
“Ulug‘bek, negadir sayt ishlamayapti, ichidagi ma’lumotlar ham yo‘q”, dedi.

Avvaliga rostini aytsam, sababini tushunmadik. Keyin tekshirishni boshlaganimizda bitta muhim xatomizni bildik: loyiha vaqtida ma’lumotlarni local serverga emas, MongoDB Cluster’da saqlagan ekanmiz.

Shundan keyin ma’lum bo‘ldiki, 1-aprel kuni Eron Amazon’ning Bahrayndagi data center’iga hujum qilgan ekan. Afsuski, o‘sha data center’da bizning loyihaga tegishli ma’lumotlar ham bo‘lgan.

Vaziyatni mijozimizga ochiq va to‘g‘ri tushuntirdik. Ular ham hayron bo‘lib:
“Urush bizga ham ta’sir qiladi deb hech o‘ylamagan edim”, dedilar.

Yaxshiyamki, bu korporativ sayt edi va ma’lumotlar unchalik katta hajmda emas edi — asosan yangiliklar va loyihalar bo‘limi. Shunga qaramay, bu holat biz uchun juda katta dars bo‘ldi.

Bir narsani yana bir bor his qildik:
infratuzilma, backup va data masalasi — bu shunchaki texnik detal emas. Bu biznesning barqarorligi degani.