((( خريف الإنتظار )))

وي النهـر... يالـمنتـظر... مرسال إلك وديت
يمته ترد...عفت الورد...مچفي عله باب البيت
              يا يوم لملگاك الدافي
        حافي أركض چن بِشر الحافي
________________________________

يم كل ضفة أشعلّك شمعه
گعدة ثكله أكعدلك وأنعه
كلما مرني غروب الجمعه
         أشوغ
أرحم غرگان ومد چفّه
ولخاطر ملگاك تحفّه
طير ومكسور عله الضفه
          أشوغ
يمته أخلع حزني وأركضلك هيام
يمته أطير من الفرح مثل الحمام
ركضة طويريج إلك بحساسي ضام

في نينوى... أم ذي طِوىٰ... أين أستقر ذكراك
كونك تمر... شمحله العمر... من يگضي بس وياك
            هنا يمفزز گلبي الغافي
       حافي أركض چن بشر الحافي
_________________________________

بشر ابيوم المر محبوبه
غارگ چان أبحر اذنوبه
فز وتعثر جدمه بثوبه
         خشوع
من شم ريحة موسى الكاظم
فز يبچي ومخنوگ ونادم
يركض حافي گبال الوادم
          خشوع
أنت بس مر وآنه حافي أتعنه ليك
يا أبو صالح والله أبوس ثنين أديك
أدري مذنب لچن طگ گلبي عليك

أشرق شمس... للمنحبس... بزنزانة التقصير
عگبك طلع... شيب الوجع... من كثرة التفكير
         حملي ثگيل وميته أچتافي
       حافي أركض چن بشر الحافي
_________________________________

بشاطي دموعي منگع رمشي
ولأجل عيونك عايف كلشي
خلفك حافي تمنيت أمشي
            جنون
بِشر ابيوم الحس بذنبه
حب الكاظم فزز گلبه
يركض حافي وتيه دربه
           جنون
ليت شعري لون أدري بيا مدار
چا گصدتك لو چنت بأقصى الديار
الورده يكتلها خريف الإنتظار

جف الگلب... وآنه بدرب... مابي أثر رجليك
وأتلفتت... وحدي وگلت... يالمهدي وحشه عليك
            جنني غيابك مو كافي
        حافي أركض چن بشر الحافي
_________________________________

هذا آنه المتعوب وضايع
وعليك أفتر شارع شارع
يالمهدي أنظر خدي الناگع
             دموع
فاتحلك شباچ ذراعي
ورد أحمر فارشلك گاعي
صايرلك رادود وناعي
             دموع
يا اميتم ضحكتي بعز الشباب
آنه ذاك الياكل بچبده الغياب
قاب قوسين إنتظارك گلبي ذاب

طير بقفص... شابع غصص... وريح الهجر حرّاك
طفّه الشمع... وظل الدمع... مرجوحة المشتاگ
          مذبوحه البسمه عله شفافي
         حافي أركض چن بشر الحافي
_________________________________

أمنيتي تمر من يم بيتي
يالهجرك سالب عافيتي
حابس عطر السهله بريتي
             هيام
هم يتحقق حلمي الوردي
ويگلولي تعده المهدي
يم رجليك أرد أفرش خدي
             هيام
هل إليكَ يابنَ أحمد من سبيل
بلا طبيب العلّة تقوه عله العليل
وليل المعلعل يابو صالح طويل

هجرك مرض..بگلبي انفرض..ولسه الگلب ما طاب
مـن أختنَـگ...... شـدة علگ....... شديته بالـسرداب
            وبسرداب الغيبة الدافي
        حافي أركض چن بشر الحافي
_________________________________

✍ خادم خدام الحسين(ع)
      عباس فاضل الكندي

((( الراية الحسينية )))

للزهره حين التمشي مشايه
يالمهدي وين تسوي القرايه
يالشايل الرايه الحسينيه
وحشه الطريق بلا حسينيه
يالمهدي وين تسوي القرايه
@@@@@@@@@@@@@@@@@@

من أقصه الديار بشوگ رايح لأمك بلهفه
بلا موكب ولا تكيات مولاي الدرب كلفه
بِنَفسي أنتَ مِن معشوق جرحك ما وگف نزفه
يأبو دموع الحمر يا يوم تنشف عينك وتشفه

ريح الهجر لو طشر دموعك
عالزهرة چفك يلطم ضلوعك
وحشه الدرب لو ماكو لطميه
وحشه الطريق بلا حسينيه
يالمهدي وين تسوي القرايه
@@@@@@@@@@@@@@@@@@

عادة اليتعب بممشاه بالموكب يگعدونه
ذاك اليغسل برجليه وهذا اليمسح متونه
أنت أول بشر مشاي محد يعرف شلونه
مو ضلع أمه چن مكسور ضلعه ورضّوا امتونه

دمّك حبيبي بصدرك اتبده
گلبك نزف بس ياهو اليضمده
وضلوعك من الحرگه مچويه
وحشه الطريق بلا حسينيه
يالمهدي وين تسوي القرايه
@@@@@@@@@@@@@@@@@@

لا خادم يصبلك ماي ولا تكيه التطب بيها
وحمره عيونك من النوح ما لاگي اليداويها
ولا صح الطبيب الگال رجلك سيدي شبيها
يمكن ركضة طويريج لسه مأثّره عليها

ضلعك أرحمه بذيچ الترابه
من تقره آ يحسين ومصابه
خايف تكسره وتلچم الريه
وحشه الطريق بلا حسينيه
يالمهدي وين تسوي القرايه
@@@@@@@@@@@@@@@@@@

يالگاصد گبرها بالليل موحش والطرق ضلمه
من كثر التعب مولاي أحس أجدامك مورمه
رغم هذا وأحس تگول أنه أتحمل لأن زلمه
شحال الحرمه بالصحراء من تلگه الأخو مدمه

لأجل العقيله الظلت بحيره
كل ساعه تعصر گلبك الغيره
ضامي وتنوح عليها يوميه
وحشه الطريق بلا حسينيه
يالمهدي وين تسوي القرايه
@@@@@@@@@@@@@@@@@@

بتراب الصحاري تنام وتچوي بنحرك التربه
تريد اتگول أبوي حسين ذبحت منحره الغربه
مو بالتربه يا مولاي بالحافر چووا گلبه
ما تنعد جروح حسين بس نحره اثنعش ضربه

هاي اثنعش من غير الحجاره
وفوگ الطشت ظل ثغره يتجاره
ضامي ولهسه شفافه مدميه
وحشه الطريق بلا حسينيه
يالمهدي وين تسوي القرايه
@@@@@@@@@@@@@@@@@@

لا ناعي اليبچي الناس ولا رادود إلك يقره
وشو ماكو هله بزوار گبر الطاهره الزهره
والأصعب لو وصلت هناك تلگه أمك بلا حضره
بلا گبه وبلا شباچ يمكن عالگبر صخره

لا تلگه وادم يمها مجموعه
ولا رايه فوگ الگبه مرفوعه
ولا خيمه تصبح عالگبر فيّه
وحشه الطريق بلا حسينيه
يالمهدي وين تسوي القرايه
@@@@@@@@@@@@@@@@@@

✍ خادم خدام الحسين(ع)
       عباس فاضل الكندي

((( دموع الخجل )))

يوميه أبَچّيك بذنب... يوميه أخلف وعدي
گالولي من گد ما بچه... ذبلن عيونه المهدي
آنه أدري شالع گلبك... بس والله گلبي يحبك
بتراب رجلك سيدي... أمنيتي أمسح خدي
_________

بعصابة دموع الخجل عصبت خدي وثوبي
الحب حلاته المستحه خجلني يا محبوبي
ياما چنت أكتب وأچز يشهد علي مكتوبي
مره أكتبت (مشتاگ إلك) بس فشلتني ذنوبي

ذوبني من المستحه... لو ردت أذنب وحدي
خليني أگول بداخلي... فشله من امامي المهدي
ما چنت أقدر تعبك... بس والله گلبي يحبك
بتراب رجلك سيدي... أمنيتي أمسح خدي
_________

هَب لي گلب يعشگ صدگ العندي أبد مو صافي
هيچ ويجنني العشگ وأطلع أدورك حافي
كون عله شاطي المستحه يلمنه النسيم الدافي
وأكتب أحبك عالرمل والبسمه تملي شفافي

عجل يمصباح الدُجىٰ... شوفتك حسره بنفسي
من وره هدومك منتظر... يشرق الطيف الشمسي
بتقصيري أدري معذبك... بس والله گلبي يحبك
بتراب رجلك سيدي... أمنيتي أمسح خدي
_________

گول وفعل هو العشگ كون اليحب معشوگه
لو فارگه يغص بالهوه وينشف الدم بعروگه
شحال اليحب مثلك بشر ينصهر كون بشوگه
كون اليحبك سيدي روحه بخيم محروگه

الحب مواساة وتعب... واحد يحس بواحد
وحبك يريد المحترگ... مو أبو الگلب البارد
من ذنوبي كلش مُربك... بس والله گلبي يحبك
بتراب رجلك سيدي... أمنيتي أمسح خدي
________

أمنية شائق صرت إلي غص گلبي لأجلك وينك
أمنيتي أحظه بمعطفك ذاك الينشف عينك
هنيال شذرة محبسك چيه نامت بچفينك
تدري شكثر مشتاگ إلك؟ خليها بيني وبينك

يا مهجة الحب لشوكت... هجرك يحز بالمهجه
كاتب عله أوراق الشجر... أمنيتي أشوف الحجه
يجوز بذنوبي مغيبك... بس والله گلبي يحبك
بتراب رجلك سيدي... أمنيتي أمسح خدي
________

خُذني إلك يا سيدي من كل ذنب تعبني
آنه أدري حنيتك وطن وأكثر من أمي تحبني
مولاي لو ذبني الوكت يالمهدي حاشه تذبني
لا مظهري ولا كشختي حبك تره مرتبني

مَن للمقصر؟ يا تُرى... لو درت وجهك عنّه
زعلك جهنم سيدي... وشوفة عيونك جنه
أدري بذنوبي مشيبك... بس والله گلبي يحبك
بتراب رجلك سيدي... أمنيتي أمسح خدي
________

✍ خادم خدام الحسين(ع)
       عباس فاضل الكندي

((( نسمة موت )))

نسمة موت... هَبت من صحراء الهجر
نسمة موت... وإستاحش قرآن الفجر
نسمة موت... راسك لو گلبي المنطبر
                 نسمة موت
__________

يالعايفني بنص نار... براسك يا بويه شصار
شو غبار الوحشه تارس كل زوايا البيت
من هب ريح الهجران... گمت أقرالك قرآن
وبقبائك ذاك الأصفر يا علي تغطيت

يخبرني ناقوس الخطر وآنه أستمع
وبوجهي بيَّن بويه شريان الدمع
رايح حبيبي المنه أبد ما ينشبع

بيرغ شوگ... شد گلبي بشباچ الألم
بيرغ شوگ... بي دم راسك من أنهشم
بيرغ شوگ... يخنگ بأنفاس أم الخدر
                نسمة موت
__________

من شفت بإيد حسين... عمامه نگسمت  نصين
بويه أحس رجليه ماتن ساعة الجابوك
ملتمه الناس عليك... والدم واصل رجليك
بويه داروا گلبي أحس عالقبله من داروك

من شفته يم راسك گعد يبچي الحسن
شاغ الگلب وعيوني بالدم دمعن
المثلك وطن معقوله ينحط بچفن

نبضة خوف... يمها توقف كل الحچي
نبضة خوف... وسوالفنه انگلبت بچي
نبضة خوف... تچوي بگلبي شلون الجمر
                 نسمة موت
___________

مو ماي بنص رمضان... آنه العطشانه إنسان
يم أريج هدومك اتفرفح يبويه الروح
عطشانه عليك هواي... أكثر حته من الماي
ترضه زينب يا أبو زينب بالفطور تنوح

هنا يالفطورك بويه بس خبزه وملح
منتظره أشوف بشيبتك خيط الصبح
تاليها شفت بهامتك خيط الجرح

شو مخطوف... لون الگاع ولون السمه
شو مخطوف... وجهك وملطخ بالدمه
شو مخطوف... ومن الدم ثيابك حمر
                نسمة موت
___________

ذواقه الدنيه جروح... تاخذ وين المملوح
التغفه يم چتفه الحمامه براسه غافي الموت
ما يگدر حته ايگوم... چا جرحه شگد مسموم؟
التنتظر جيته المعارك ينتظر تابوت

مطبور أبوي وچفه ما هد سبحته
التارسنه عز متروسه دم اعمامته
الما واگع بعركه وگع يم تربته

حامي الجار... والسمو قتّال العرب
حامي الجار... بنص جيرانه وأهله نضرب
حامي الجار... طاح مدمه بسيف الغدر
                 نسمة موت
___________

باچر لو گلبك مات... زينب تشبع لچمات
لو وگع عالمغتسل دم راسك المطبور
گلي شلون يغسلوك... بجرحك خاف يلچموك
ويبقه راسك يجري دم لو صبّوا الكافور

آنه أدري بالصايم يحز گلبه العطش
بس ما شفت صايم يحز گلبه النعش
يا ريته يم لحدك علي لحدي انفرش

سيف الموت... يا ريته اعله بنيتك وگع
سيف الموت... وجعة راسي ولا هالوجع
سيف الموت... هواي أهون من سيف الهجر
                  نسمة موت
__________

✍ خادم خدام الحسين(ع)
      عباس فاضل الكندي

رابط قناة الشاعر الشاب علي محمد الساعدي

https://t.me/alialimohammad1998