📜 القصيدة: عالعراق ادنت أطهر قافله
🎤 أداء: مسلم الوائلي
🖋 كلمات: قاسم رضا
~~~
يا جواد أهل الكرم والمرجله
عالعراق ادنت أطهر قافله
كون هالمره الضعن نستقبله
يا هله ونسبي النهر لعياله
~~~~
كون هاي السنه العاشر يختلف
تصعد السبعين عالسبعين الف
والخيم ما بيها نيران ونزف
وغير هاشم ما تظل خياله
~~
كون انادي اگبالهم لمن يجون
هذا وكتك يالتريد تصير جون
يوم لا ينفع مال ولا بنون
تعبر بدمعاتك الهماله
~
انا عاشوري وربيت من الصغر
عندي وي جدر الطبخ عشرة عمر
من جريت دموعي ما راحن هدر
بيها يروي الحسين اطفاله
~
كون ما يخطف عله عيوني الوسن
وابقه فص تراب بدروب الضعن
ما اكف من الحزن طول الزمن
للذبيح الفاطمه تنعاله
~~~
هالسنه النيران ما تحرگ خيم
مو طفل عبد الله ويذبحه السهم
يكبر وعباس ينطيه العلم
وما يعطشون الضعينه بجاله
~~~
كون ما يبقه الوضع نفس الوضع
شمس ابو السجاد عالوادم تشع
بفرح يتبدل الهم والدمع
لو محرم هل علينه هلاله
~~~
يا جواد اليمه بيك أرد استعين
حلمي اصيرن مثل ولد أم البنين
وانطي كلشي الخاطر عيون الحسين
الزلمه غير يبين من افعاله
°°°°°°°°°°°°°°°°°°°°°°

📜 القصيدة: وين الضعن هاليله
🎤 أداء: مسلم الوائلي
🖋 كلمات: ابو حميده الشويلي
~
حسين آه ... حسين آه
~~~~
يا گلب .. انعه الحسين وحاله
يا گلب .. للغربه شد ارحاله
بس غصب .. من گاعه شال

بالضعن .. عباس اخوه وولاده
بالضعن .. بيرغ يرف للساده
من الوطن .. يمشي الدلال

ونين ... ليلة ونين
طلع ... ضعن الحسين
مشه ... ضعنه جروح

نزح ... من البلاد
گصد ... لأرض السواد
وترك ... طفله تنوح

عاف العليله بظهره تناهد
تومي بديها ويعله ونين
يا بويه وين بضعنك رايد
ارجع دخيلك بويه حسين

رفعت اديها وصيحت
نيتها وين ضعونك
والناس لا حظ لا بخت
خافنهم يذبحونك
~~~~
يا حسين .. وين الضعن هاليله
يا حسين .. متوكل ارد امشيله
وأرد اصيح .. اهلاً حسين

الديره جاي .. ما بيها يتلگونك
الديره جاي .. كل همهم يذبحونك
للسلب .. متحضرين

أبد ... ما تلگه أبد
نصير ... بهالبلد
ولا ... گطرة ماي

غيور ... ماكو غيور
تدور ... دنيه تدور
عليك ... يا مولاي

محد يرحمك وانته رحمه
وياهو الخواتك من اطيح
اگبالك يركضن كلهن حشمه
وادركنه خويه كلها تصيح

بهالديره لو تعطش
ولا واحد يرف دلاله
ولمن تطيح بكربله
تركضلك الخياله
~~~
يا ضعن .. هسه شحلات اللمه
يا ضعن .. عطر الكفاله يشمه
برايته .. يحوم الكفيل

والخيام .. ماظن يظلن باجر
والخيام .. حدهن صباح العاشر
والنياگ .. يصيرن هزيل

علم ... عالي العلم
وخيم ... عدهم خيم
وأخو ... رايح راد

حرام ... والله حرام
تطيح ... هاي الخيام
تصير ... كلها رماد

عدهم كفيل وعدهم رايه
وفوگ الضعينه يرف الطير
باجر تسلبهم غزايه
وبالهيمه تگعد بت الخير

الگضت عمرها مدلله
ومن تحجي توگف كلها
باجر تميل بكربله
ومحد يجي يعدلها
~~~~
كربله .. ما تلگه ناصر بيها
كربله .. بس الهظم تاليها
والحمل .. كله عليك

اعتذر .. ما اگلك ارجع لكن
اعتذر .. هذا البلد مو آمن
لو طحت .. ياهو يجيك

حرگ ... صار الحرگ
وصرت ... جوه السحگ
وتون ... من الخيل

وبجن ... ياهن بجن
بنات ... ام الحسن
الولا ... شافن ويل

طلعهن من الخيمه افراگك
رادن يشوفن حاله شلون
تلاگن خواته شلون ملاگه
ويه الغرب والدنيه عيون

الما طلعن بهذا العمر
من طاح طلعن كلهن
ومن يمه راحن للقصر
ومحد لحگ رجعهن
°°°°°°°°°°°°°°°°°°°°°°°°

📜 القصيدة: يالشايلين من الوطن
🎤 أداء: مسلم الوائلي
🖋 كلمات: علي الأكبر الغرابي
~
ياهو اليطمن گلبي لو صار
.. ينشدني عنكم
ما عندي هدهد حته الأخبار
.. توصلي منكم
~~~
يالشايلين من الوطن وبهاي الضعون
.. وشهل المسيره
غرب ضعنكم وبتعد عن شوف العيون
.. وانوه المصيره
ما وجدت ياهو البگوا من اليروحون
.. حته استشيره
فرفحت روحي ولا وگف لا دار العيون
.. شيخ العشيره

فوگ الهوادج اشوف امجاني خالي
ظليت اباري وعسه يگلي تعالي

وتتبده من عيوني الأعذار
.. لو ردت اگلكم
ما عندي هدهد حته الأخبار
.. توصلي منكم
~
ريض صحتله وما وگف حداي الضعون
.. واشتد رحيله
وياكم اخذوني صحت يولاد عدنان
.. واهل الثجيله
وآه يا ضعنكم من مشه وشماخذ وياه
.. دون العليله
وين الگبل لو سيروا عالگلب خطار
.. يبرد غليله

رفن دليلي وبيارغكم سويه
وهالروحه جنها بعد ما بيها جيه

ها يا هلي العفتوني بالدار
.. ناگص حملكم
ما عندي هدهد حته الأخبار
.. توصلي منكم
~
مو حلوه كلكم يا هلي غفله وتشيلون
.. من المدينه
معقوله كل هذا البجي وما جاس الگلوب
.. شوگ الحنينه
يستانس ابيش الگلب لو ما تردون
.. ويهجع ونينه
ما حاسبه حسابي گبل يهجرني ويروح
.. الأغفه اعله ادينه

وشنهي الرسايل تطمني عنكم
ما تشبع عيوني إلا بنظره منكم

تاخذني وترد بيه الأفكار
.. وابقه ابأملكم
ما عندي هدهد حته الأخبار
.. توصلي منكم
~~~~
مكسور گلبي الما كسر فد يوم الگلوب
.. وعشت انكساري
جا هجي صارت من هلي يبردني مكتوب
.. وانه اعله ناري
تعصرني روحي شما كسر بعيوني الغروب
.. واگعد وباري
ثاري اليفارگ كل هله يگضيها متعوب
.. بالدنيه ثاري

لجمه اعله لجمه ومصيبه بسد مصيبه
وراحوا الجانوا دوه جروح الغريبه

يلي مشيتوا ازغار واكبار
.. مشتاگتلكم
ما عندي هدهد حته الأخبار
.. توصلي منكم
~~~
يولاد هاشم ما بگه منكم ولا حيد
.. والدار خالي
ولسه بسوالفكم طعم وانساهن شلون
.. حلو الليالي
مو بس عله وجهي انرسم لون التجاعيد
.. حته بخيالي
وتشيط كلما سولفت روحي اعله العزاز
.. والعدها غالي

عيني بدمعها والأخره اتباري بيكم
مشتاگتلكم هلي المالح حجيكم

المن ادير عيوني واندار
.. عفتوني كلكم
ما عندي هدهد حته الأخبار
.. توصلي منكم
~~~~
فارغ مجاني بمحملي دون المحاميل
.. وتنخه بيكم
وياكم اخذوني انجتف وانطگ بالسياط
.. وامشي بسبيكم
من هسه اشوف مراكض الما عدها الحسين
.. فزعت عليكم
من هسه اشوف بكربله كلكم مجاتيل
.. ومسلبيكم

من هسه اشوف الخيم محروگه كلها
من هسه زينب ترد بلايه اهلها

ومن هسه اشوف مراكض النار
.. بخيام اختكم
ما عندي هدهد حته الأخبار
.. توصلي منكم 
°°°°°°°°°°°°°°°°°°°°°°°°

📜 القصيدة: عاشور گرب يا ناس
🎤 أداء: مسلم الوائلي
🖋 كلمات: محمود الموسوي
~~~~
خدام الك يابن علي وعله العهد وفايه
راية محرم تعتلي واحنه النعلگ الرايه
~~~~
عاشور اجانه
وگرب عزانه
حبنه وهوانه
يحسين مجلس فاطمة

حسين شحلاته
يلمنه بعباته
ترهب صفاته
تسمي السمه بحروفه

شوگ اللطم مشتاگين
صيحوا يخدام حسين
... حياهم

عاشور گرب يا ناس
والليله راية عباس
... فوگاهم

خدامك وعشرة عمر ويه المجالس هايه
راية محرم تعتلي واحنه النعلگ الرايه
~~~
حسين اغله غالي
ودوم اعله بالي
خدمه وصالي
حسين عاشگ مجلسه

الخادم اريده
خل يرفع ايده
بهاي القصيده
حبه وهواه يتنفسه

عيش العشگ لو حبيت
والخدمه بس لاهل البيت
... مضمونه

حسين العشگ ما عفناه
لو بالطف انموت وياه
... لعيونه

عشنه بهواك من الزغر يحسين وانته الغايه
راية محرم تعتلي واحنه النعلگ الرايه
~
الخادم شعاره
تبقه الزياره
الشاف المناره
عاش الغرام بگبته

العاشگ اميره
قمر العشيره
البعيونه غيره
هو النلوذ برايته

يا ناس صيحوا وياي
بس ابو فاضل وفاي
... لحسينه

بس هو للحب شراي
لحسين ذب اعله الماي
... جفينه

تعلمنه من زود الگمر بالوفه ننطي حجايه
راية محرم تعتلي واحنه النعلگ الرايه
~
ضعنه ولگينه
حسين السفينه
عشنه بحنينه
ربانه الحسين ونعم

كل احنه عابس
نحضر مجالس
خدمتنه واهس
وحسين طلعنه زلم

حي الله زلم الحسين
وفايه بالخدمه سنين
... نتباها

كل خادم عگال الراس
والرايه بسم العباس
... شلناها

من سنه انتانيها السنه بس توصل المشايه
راية محرم تعتلي واحنه النعلگ الرايه
~
تدعي اديه
بداعة رقيه
الخدمه هويه
وانه اخدم وياك العمر

حبك خذاني
وما عندي ثاني
حسين الگاني
امنيتي لطمه اعله الصدر

يحسين يا سر الكون
خيمه انته لليخدمون
... تحمينه

يا هيبه يبن الكرار
يالخدمتك كلها أسرار
... تنطينه

يحسين انته اول عشگ وأسرار دربه هوايه
راية محرم تعتلي واحنه النعلگ الرايه
°°°°°°°°°°°°°°°°°°°°°°°°°°

📜 القصيدة: سبط النبي سافر
🎤 أداء: مسلم الوائلي
🖋 كلمات: المرحوم ملا عطيه الجمري وعلي الأكبر الغرابي
~~~
سبط النبي سافر وعاف اوطانه
.. نور المدينه
بيت المجد متضعضعات اركانه
.. نور المدينه
~~
ودع گبر جده وطلع برجاله
.. واغلق دياره
گاصد لأرض مكه بجميع اعياله
.. ودمعه ايتجاره
وعباس شد محمل الحره وشاله
.. وشعت انواره
وگلها يزينب شد اخوج اضعانه
.. نور المدينه
~
ضلن خوالي ديار اهل بيت النبوه
.. لمن جفوها
وجبوا عله النوگ ومشوا بس العليله
.. ما صعدوها
مره اعله زينب تلتفت ويهل دمعها
.. مره اعله ابوها
ومدري شرسم فوگ الوجن بفراگ اهلها
.. دمع الحنينه
~~
صاح ولزم بيده الشفيه افاده
.. والطم الهامه
الله يعوده واخوته وأولاده
.. وفال السلامه
بيت المجد ما تنگطع وفاده
.. وملجأ ايامه
متحير وموحش عليه مجانه
.. نور المدينه
~~
محمد بگت عينه ترف واشتد دمعها
.. ويلهب دليله
ساعه اعله ديوان السبط مشدوده عينه
.. ساعه الرحيله
من شافهم كلهم مشوا ومودعينه
.. ما بيده حيله
طلعوا ليوث الغانمه وربات هاشم
.. ومحاوطينه
°°°°°°°°°°°°°°°°°°°°°°

📜 القصيدة: شهر حسين
🎤 أداء: مسلم الوائلي
🖋 كلمات: كرار حسين الكربلائي
~
يا شهر حسين ..
انته بكل عام تبجيني
يا شهر حسين ..
رديت وما رد حسيني

هاي امنية دنياي
اشوفه يشرب ماي
حبيبي .. حبيبي
~
يا شهر الأخذت حسين
اجيت بيا وجه للناس
هلالك بالسمه عالي
يسولف عن رمح بي راس
فوگ الگاع كون تطيح
مثل عمامة العباس
يالمبجي الحجر والطين
والما يبجي ماله احساس

يمبجي الماي ..
علما شارب ماي وميت
يمبجي الماي ..
يا عين من تشوفك تسكت

گلي شوكت مولاي
اشوفه يشرب ماي
حبيبي .. حبيبي
~~~
محرم ترجع بكل عام
وهلالك تشوفه العين
وانته بكل سنه انشوفك
لكن ما نشوف حسين
هلالك ما تلوحه الخيل
وحسين انسحگ مرتين
هلالك يوم عاشر ضاع
واحنه خنصر مضيعين

الخنصر مگطوع ..
وانته تشوفه وعينك صلفه
الخنصر مگطوع ..
لو منك جا صرت بجفه

بالطف حلم عيناي
اشوفه يشرب ماي
حبيبي .. حبيبي
~~~
تكمل يا هلال النوح
ونشوفك گمر كامل
انته وكل ضواك البيك
فدوه تروح للكافل
حسين بطيحت العباس
رد اعله الخيم مايل
وتخوصر وصاح بصوت
يزينب راح ابو فاضل

راح العباس ..
وشفت بعينك سهم بعينه
راح العباس ..
ومثل هلالك محني حسينه

امنيتي جانت هاي
اشوفه يشرب ماي
حبيبي .. حبيبي
~
هلالك لو طلع باليل
اذكر ليل هاظمني
حرمه بنص زلم وتصيح
الحگني يخال ابني
وكتي من رحت يحسين
بعيون الغرب ذبني
الما عاثر جدمها بگاع
عثرت والظهر محني

هاي اخت حسين ..
تشوف حسين يدوسه الحافر
هاي اخت حسين ..
ما شربت ماي من العاشر

صاحت اريده وياي
اشوفه يشرب ماي
حبيبي .. حبيبي
~~~~
هلالك عيد عند الشام
يالغربة صفر منك
زينب وگفت بديوان
ما عندك علم جنك
اخوها بلا صدر بس راس
تگله شلون اشبگنك
آخر محنه بهلاله
رقيه تموت من حزنك

احا يالشام ..
زينب مجتوفه يشوفوها
احا يالشام ..
بحجار ونار يشمروها

انطيني حل وراي
اشوفه يشرب ماي
حبيبي .. حبيبي
°°°°°°°°°°°°°°°°°°°°°°°°

📜 القصيدة: حياك
🎤 أداء: مسلم الوائلي
🖋 كلمات: علي أكبر الغرابي
~~
هله بالجايني وتبرك بنوره
حياك .. حياك
هله يالراد بيه يصير عاشوره
حياك .. حياك

وكون بحجيك الحار
تحسبني من الأنصار
حياك .. حياك
~~~~
بيك اتشرفت گاعي
وهذا الشرف بس بيه
صار سنين يا مولاي
عطشانه اعله هالجيه
لبسني الخيم يحسين
لجل العفه بوشيه
التسحگها العقيله اتصير
هاي الگاع علويه

البيه من الشرف ما صاير اثنين
نصب خيمته اعله اترابي الحسين
هله يالبيك حگ من تكشخ العين

هاي ولايتك ونصب خيم بيها
حياك .. حياك
غير بدم رضيعك انته شاريها
حياك .. حياك

وانته بكيفك اختار
تحسبني من الأنصار
حياك .. حياك
~~~
يكفي من الفخر يحسين
گاعي اليوم شايلتك
وهنياله التراب الصار
حدر اجدام عايلتك
حط بيه اعله گد الشوف
گد الهله الواصلتك
وانه وكلشي يا مولاي
شويه اگبال منزلتك

موش تراب جدمك دوه الخطار
تراب الدايساته الخيل ينزار
جايب خوش ناس وياك وانصار

يمشرف الگاع بربعك وناسك
حياك .. حياك
تحله التنسحگ بجدام عباسك
حياك .. حياك

موسم للشرف صار
تحسبني من الأنصار
حياك .. حياك
~~
يالخطار ما محسوب
نازل سيدي بدارك
انه وكل شبر بالگاع
محسوبين خطارك
لا تحتار يا مولاي
انه البير لأسرارك
هو الله اعلمودك غير
سواني لزوارك

انه وكل شبر بالگاع والماي
فدوه الخيط من اخيامكم هاي
يا راي اليعيش بشحت الراي

هله بالجايني وحط النزل بيه
حياك .. حياك
صار سنين وانه امتانيه الجيه
حياك .. حياك

وبركان الدمع ثار
تحسبني من الأنصار
حياك .. حياك
~
يا مية هله وحياك
يالگاصدني بضعونك
ما تسواش صم اتراب
هاي الگاع من دونك
من يا باب ارحب بيك
واقره شضام بعيونك
تنصب خيم لو تاريخ
باجر لليريدونك

يمكحل العيون بجيتك هاي
باجر يكتب التاريخ مولاي
حي باقي الحسين وميت الماي

كلما ردت اگلك سيدي شلونك
حياك .. حياك
ياخذني الجمال التارس عيونك
حياك .. حياك

وارجع يمك احتار
تحسبني من الأنصار
حياك .. حياك
~~
هاي امنيتي يا مولاي
وربك حقق امنيتي
كون ادوسني الخدام
ونطاني اعله گد نيتي
وكلما تكثر الزوار
تكثر بيه عافيتي
ولو ما صيتكم يحسين
ما جان انعرف صيتي

احلم يا عزيز الزهره كل عام
تندگ فوگ گاعي احبال الخيام
حد ما الله حقق هاي الأحلام

هله يالبيك اسولف جنت واتمنه
حياك .. حياك
باجر كربلائك للعشگ جنه
حياك .. حياك

وأخر حلم يندار
تحسبني من الأنصار
حياك .. حياك
°°°°°°°°°°°°°°°°°°°°°°°°°

📜 القصيدة: انتظر منكم جواب
🎤 أداء: مسلم الوائلي
🖋 كلمات: أحمد سعد
~~
خلصت حروف العتاب
وانتظر منكم جواب

وحدي عفتوني عليله
رحتوا والغيبه طويله
وانتظر منكم جواب
وانتظر منكم جواب
~
ليش عفتوني ومشيتوا
عفتوا دمعاتي تسيل
وين گوطرتوا بضعنكم
وين شديتوا الرحيل
هدمت حيلي المصيبه
بعد ما ظل عندي حيل
مستحيل عيوني تغمض
من بعدكم مستحيل

ناطرت ليل ونهار
صحت طال الأنتظار

بعد ما عندي وسيله
رحتوا والغيبه طويله
وانتظر منكم جواب
وانتظر منكم جواب
~~
يا هلي سهرت الليالي
وعيني ذوبها السهر
يوم يوم وساعه ساعه
احسب ايام السفر
شاخصه عيوني الدربكم
وانتظر منكم خبر
صابره وروحي اعله جمره
احسب اليوم بشهر

انتظر طارش يعود
دمعي يحفر بالخدود

دمعي ما ينشف مسيله
رحتوا والغيبه طويله
وانتظر منكم جواب
وانتظر منكم جواب
~~
نزلت استار المنايه
لاحت اشباح الأجل
لا خبر منكم اجاني
لا ابشاره يالأهل
ايست ونگطع ضني
ونگطع حبل الأمل
صرت مركز لنوايب
والمصايب والعلل

شنهو يهل الشيم صار
خاليه و وحشه الديار

خلت من كل القبيله
رحتوا والغيبه طويله
وانتظر منكم جواب
وانتظر منكم جواب
~
من بعد ذيج السعاده
ومن بعد ذاك الحنان
لني ما بين المصايب
وبين صفوات الزمان
الدنيه معروفه بطبعها
دنيا ما بيها أمان
وين اتوجه عگبكم
وين اروح اليا مكان

الحزن ما خلالي روح
تحيرت لاوين أروح

المن اگعد وشتكيله
رحتوا والغيبه طويله
وانتظر منكم جواب
وانتظر منكم جواب
~~~
طفله من اول حياتي
صافحت جفي المشيب
زرعت الونه بدليلي
وحصدت هموم ونحيب
بالعلل مصيوبه روحي
والجبد ينثر لهيب
اعتب وهالعتب ادري
لا يودي ولا يجيب

فكري عايش بالخيال
وذكر ايام الدلال

احسبلكم ليله ليله
رحتوا والغيبه طويله
وانتظر منكم جواب
وانتظر منكم جواب
~
هالدهر فرق شملنه
بالگلب حزني انجمع
رحتوا روحه بلايه رجعه
ولا خبر منكم رجع
منهو شايف مثلي طفله
مدوهنه ومنهو سمع
بالصخر لو جان همي
الصخر جا مل وجزع

هذي جمرات الونين
ذوبت گلبي الحنين

گلبي ما يبرد غليله
رحتوا والغيبه طويله
وانتظر منكم جواب
وانتظر منكم جواب
~~~
بعد داري ما تلمني
وجزعت من الحياة
هذي دار الأهل جانت
صفت دار النايبات
ريت نسمه لا تمرني
ريت يلفيني الممات
عصفت بوجهي المصايب
والمحن والموحشات

عمري اكدار وهموم
ريته يفنه ولا يدوم

جف الهموم الثگيله
رحتوا والغيبه طويله
وانتظر منكم جواب
وانتظر منكم جواب
°°°°°°°°°°°°°°°°°°°°°°°

📜 القصيدة: ابجي اعله حالي
🎤 أداء: مسلم الوائلي
🖋 كلمات: سعد شميل
~~~
ابجي اعله حالي
محد بجالي
يا روحي اطلعي
صاحولي ارجعي

وظل بيتي خالي
وظل بيتي خالي
~~~
توادعنه وبجينه وگتله فدوه حسين
اريد وياك اسولف والله ما أخرك
اذا هسه وعليله بدونك بيا حال
موش انته التعوف ابنيتك بظهرك
انه اتمنيت بويه محبسك ناسي
اعوفك تروح بدون ما اذكرك
اخذني وياك فدوه هناك صلفه الخيل
حته انه انسحگ يحسين مو صدرك

دموع بلحيته
من ودعيته
وغرب دلالي
وظل بيتي خالي
~~~
انه معوده كل ليله گبل النوم
ابوس جفوف ابوي واغفه بحضانه
أمس يهل الرحم من كلش شتاگيت
طلعت القميص وبسته بردانه
انه اكبر من رقيه بس عباها اليوم
تكفيني بكثر ما صرت نحلانه
شلت الماي بيدي وطاح مني الماي
بس لا من خواتي وحده عطشانه

يدرون اخوتي
سبگلي موتي
بهاي الليالي
وظل بيتي خالي
~~~
اليروحلها واحد ساعه ما ترتاح
وما تنشف عليه سنين دمعتها
حاجوني يهلنه المثل حالي شلون
تشيل بساعه وحده كل عشيرتها
جا هيه البنيه بمرض من اطيح
اول ما ادير العين لخوتها
انه الما عدها ابو يسكتها من تنوح
ولا يمها اخت عالضيم واستها

هيه المصيبه
ابيتي وغريبه
ياهو البقالي
ظل بيتي خالي
~~~
حاجيني برقيه شلونها بيا حال
طاحت لو بعدها من عله الناگه
حاجيني الرضيع هناك ضاگ الماي
لو لمعت رگبته والسهم ضاگه
جم يا خويه صحت بطيحت العباس
اضن حسين ظهره انكسر بفراگه
تخيلت الحنين بشيبه دم وتراب
تخيلت المهر من ياخذه بساگه

تخيلته وحده
تبعده وترده
الخيل اعله بالي
ظل بيتي خالي
~~~
عليه ام البنين اتسير بكل يوم
وتصبرني ساعه وساعه اصبرها
وتسميني يا بت العزيز حسين
تجبر خاطري المكسور خاطرها
وين الله الحسين يرد علينه اتگول
فدوه الأربعه من ازغرها لكبرها
ما جابتلي طاري الكل عمامي هناك
سيرة والدي كل ساع تذكرها

اولادي فدوه
للعينه تسوه
شگد عدها غالي
ظل بيتي خالي
°°°°°°°°°°°°°°°°°°°°°°

📜 القصيدة: جفين وعين
🎤 أداء: مسلم الوائلي
🖋 كلمات: علي أكبر الغرابي
~
لو ما اربعتهم فدوه لزهره
ما جان انعرف صيت الوفه وقدره

ونطيتي حسين .. جفين وعين
فدوه اربعتهم .. فدوه اربعتهم
~~~~
مقياس ابنادم بالموقف
مو طول الشارب مقياس
صح ما جنتي وياهم بالطف
بس الطف كله ام عباس
وعندي اثبات اعله السولفته
ما اسولف من جيب الناس
الهاي الساعه جفوف وليدج
تنطي مراد شما تنباس

صوره من الوفه ومحد صل يمها
جان بريشته العباس راسمها

صارت نهرين .. جفين وعين
فدوه اربعتهم .. فدوه اربعتهم
~
رف اسمج والبيرغ بالطف
يم عباس اگبال حسين
وتوضوا ولدج بالغيره
وصلولج عين وجفين
وبيوم الحيهم والفزعه
ما صاروا ما بين وبين
واحد لازم ظهر الخوه
وفيِ اعله حسين الباقين

الهدوا بالحرب واللبوا النخوه
ذوله البس عليهم لاگت الخوه

ما گالوا وين .. جفين وعين
فدوه اربعتهم .. فدوه اربعتهم
~
ندري الماي اليحيي الميت
بس بالطف ما صارت هاي
شال الماي وذبه الكافل
من عدهه وشو مات الماي
يمكن مر طيفج بعيونه
ورد عباس النفس الرآي
شلون اشرب ماي واتهنه
وامي الوصتني بمولاي

ذب جفوف ادينه الخاطر العشره
باجر بيها تطلع فاطمه الزهره

مو بس جفين .. جفين وعين
فدوه اربعتهم .. فدوه اربعتهم
~~~~
جم موقف بالطف سجلتي
والشاهد اربع آيات
رفعوا راسج يم حسينج
نفس الروس المرفوعات
صح بالطف ما جنتي وياهم
بس خطواتج محسوبات
روس اولادج صارن خيمه
من الكوفه الباب الساعات

مثل آية وفائج ما تصح آيه
يم نهر الفرات ترتل الرايه

ما بين وبين .. جفين وعين
فدوه اربعتهم .. فدوه اربعتهم
~~~
ما رحتي وياهم من راحوا
بس گلبج وياهم راح
وصيتيهم واحد واحد
حد ما دمع عيونج طاح
اليرجع سالم دون حسينه
وما جايس نحره الذباح
لا يرجع ما اقبل عذره
ويزعل گلبي الما مرتاح

قانون الوفه والدمعه والغيره
لايگ بس عليج بكل تفاسيره

وفيتي الدين .. جفين وعين
فدوه اربعتهم .. فدوه اربعتهم
°°°°°°°°°°°°°°°°°°°°°°°°°°°°