📜 القصيدة: سيف المهدي
🎤 أداء: مسلم الوائلي
🖋 كلمات: محمود الموسوي
~~~~
شلون هاشم تندفع بيبانها
وهيه ما تتگابل بميدانها
~~~
هاشم اتخوف الزلم بفنونها
والملاحم طالعه من عيونها
خيبر انشال اعله طاري امتونها
علي وسبع الگنطره وفرسانها
~~~~
هاشم وسيفك يمهدي وثارها
خلي يركض عالرگب فقارها
شلون طبوا للزجيه الدارها
وصار محسن والضلع نيشانها
~~~~
هاشم وسيفك ثگيل هوايه
وانته ابو الثارات يابو الرايه
دفعوا الباب اعله المغشايه
ضلوع ثارك ما طفت نيرانها
~~~~
يا أسد والحومه عندك صيده
يا هله بصگر الحرب والبيده
انته ثار والله ثاره يريده
گوم وشلع بابها وحيطانها
~~~~
گربت والساعه واصل يومها
وانته سيدها وتجيب علومها
الزلم ما تلحگ تذب هدومها
ادخيل هاشم من يطگ بركانها
~~~
يابو صالح ثارك وانته الولي
ياهو اليگابل فقارك يبتلي
علي انته ومحد يگدره العلي
وانته مهديها وگمر عدنانها
~~~~
الرايه بيدك وانته سيد ناسها
وثار هاشم جيبه وارفع راسها
العركه طبها وحشم بعباسها
الزلم تلبس عبي مو نسوانها
°°°°°°°°°°°°°°°°°°°°°°°°°°°°°

سيف المهدي اداء - مسلم الوائلي - كلمات - السيد محمود الموسوي - كرب...
https://youtube.com/watch?v=dyow6efmUyI&feature=share

📜 القصيدة: العراق اصلاً عراقك
🎤 أداء: مسلم الوائلي
🖋 كلمات: سعد عواد الهدابي
~
الليله حضرنه المشاعل بنتظار القافله
امنيه انوصلك سلامه وما تموتك كربله

يا هلا بهذا اشتياقك
العراق اصلاً عراقك
سيدي انحبك تره احنه وما يهمك حرمله
~~
راسم خطواتك من بيتك
وين اتموت وين اتنام
راسم ورده بخطة حربك
المفروض اتخلي اسهام
كلمن كاتب مقتل روحه
ملخصين الطف بأقلام
ومأشر كلشي يحبونه
وشاخط عالماي وعالشام

واضع الكلشي علامه
وفارش الصحره ابتسامه
ماكو زلمه املاگي موته
مثلك بعزه وشهامه

انته باديلك بدايه جنها باء البسمله
الليله حضرنه المشاعل بنتظار القافله
~
تارس كل اجفوفك حنطه
اتحسب للگاع وللطير
كل ديره اتمر بيها بدربك
گالوا مر علينه الخير
يا شجره الذابل موسمها
وي جفيتك خضره تصير
حته شموس الضوت دربك
خجلانه تحس بتقصير

بفضاء هاي العشيره
الشمس كلش زغيره
مجرات وكواكب
تسير ويه المسيره

ذوله كلمن وحده آيه للطف الله منزله
الليله حضرنه المشاعل بنتظار القافله
~~
احله شي فكرة قدومك
بس نهايتها بألمها
سفره كون بليه عاشر
بيدك اخيامك تلمها
ترجع بخير المحامل
بزلمك ونفسه علمها
صعبه كل هاي البراءه
ياخذ الشاطي حلمها

رقيه لو تكتب نهايه
تنطي ترجيه وهدايه
همها الاول انته سالم
حته لو راحن سبايه

الدنيه بيها حسين واحد ماكو ثاني المشكله
الليله حضرنه المشاعل بنتظار القافله
~~~
شابگ جف الكافل بيدك
تمشي گدام المسيره
ماكو احله من رفگتك
لكن الدنيه گصيره
تعصر بجفه وتگله
هذا ابو اللجمه الجبيره
والله امنيتي اعله ايدك
سدت عيوني الأخيره

هذا حلمي الما اناله
وخسر ايمينه وشماله
يا سهم يتركلي عينه
وياخذ عيوني ابداله

الخوه اذا كسروا ضلعها الثاني وحده يطيح اله
الليله حضرنه المشاعل بنتظار القافله
~
شنهي احساس التحسه
من يمر طاري العليله
يوگف الحادي بمكانه
وتبقه بس راسك تميله
نحلم انرجعك عليها
واحنه نعرف مستحيله
كل سنه اتموت بأرضنه
تبقه لجمتنه طويله

المره هايه نريده يسلم
واحنه نحرسله المخيم
انته بس تأشر ايدك
من خدمتك ماكو اعظم

نحلم انحمل جربنه ونفتر اعله العايله
الليله حضرنه المشاعل بنتظار القافله
°°°°°°°°°°°°°°°°°°°°°°°°°°°°°

مشاهدة "العراق اصلاً عراقك | الرادود مسلم الوائلي | استقبال شهر محرم الحرام 1445 هجرية" على YouTube
https://youtu.be/oGKOOyQO1P0

📜 القصيدة: شال الشهيد حسين
🎤 أداء: مسلم الوائلي
🖋 كلمات: المرحوم ملا عطيه الجمري
وعلي أكبر الغرابي
~
شال الشهيد حسين بخوته وشبانه
وخله المدينه اتموج من حمل اضعانه
~
ظلمه منازلهم والترب سافيها
غراب المدينه ينوح بعد الأهل بيها
عگب السبط ملزوم تخرب معانيها
وبيت المجد والجود تتهدم اركانه
~
طوح الحادي وشال بضعون اهاليها
وظلت منازلهم بس الدمع بيها
سفره ومسيرة نوگ وحسين راعيها
وعيون ابو السجاد بدموعه ذبلانه
~~~
ابن الحنيفه يحوم بدموع مذروفه
يدور بنواحي الدار ويگلب جفوفه
يصيح العزيز حسين عيني عسه تشوفه
سافر وخلاني من جملت اخوانه
~
مشرعب جفوفه وصاح يا خويه وياكم
ما تستجن وتهيد روحي بلياكم
شيصبره يالمجفين گلبي اعله فرگاكم
محمد عليكم ظال بدموعه وحزانه
~
ولن المنادي يصيح بحر الكرم وينه
وفاد ابو السجاد لزيارته جينه
سبط النبي في وين اهله وشياهينه
محمد جذب ونه وزادت احزانه
~~~~
الينشد محمد وين خوانك الليله
يهبط الراس وصاح شالوا فرد شيله
غرب حسين وراح بضعونه والعيله
وفارغ مجان الجان ما يفرغ مجانه
~~
شيخ العشيره حسين شال وغلق داره
ما خلف إلا وحيد مشغول بفكاره
لو ضايعه وتنوح بالدار محتاره
بنته اوجعت گلبي تنعاه وجعانه
~
مسرع مشه ولا دار عينه عله دياره
وخله دليلي يلوب من فرگته بناره
راح الگبل وياي ما يگطع اخباره
وآخ الهجر للحين تجويني نيرانه
°°°°°°°°°°°°°°°°°°°°°°°°°°°°°°°

📜 القصيدة: آه يمحمد
🎤 أداء: مسلم الوائلي
🖋 كلمات: عباس طالب السعيدي
~~~
حايره الليله بأمان ضعونها
.. آه يمحمد
وزينب ام اخوانها يسمونها
.. آه يمحمد 
~
زينب صاحت التمن خل نحسب مصايبنه
وصاحن بأول الحسبات يحسين بضمايرنه
احنه أهل الضوه المولود من كعبة مشارگنه
ردينه الشمس لليل جي باگت ملامحنه
احنه اهل المحنه وخير هاي الناس من عدنه
والنوگ الحنينه اتگول من زينب محنتنه

جم سمه مدنگه اعله باب امتونها
.. آه يمحمد
وزينب ام اخوانها يسمونها
.. آه يمحمد
~
هله يالراجب مطهر جثر بالحديث وياي
يلما ينشبع منك عطشانه ولگيتك ماي
ما بيه الحمل فرگاك يا بعد اختك ورجواي
يالواگف وراي هواي راح اركض وراك هواي
يموجف الضلوع هلال ومسوي الخواته افياي
هاك عيوني عن لا اشوف فوگك خيل رايح جاي

جنها صوت وفنهم يشوفونها
.. آه يمحمد
وزينب ام اخوانها يسمونها
.. آه يمحمد
~
يحسين العمر فانوس وعيون الفجر شبحه
يبره من ضواك الليل اول ما يطر صبحه
فطرس والجنح شاهد من شافك دوه الجرحه
يالبگماطك وفطرس بيدك عدلت جنحه
جمل سنين عبد الله بس لا للضمه اتلوحه
تره حته الهوه جذاب ينگل سهم اليذبحه

لا توخر طولك من عيونها
.. آه يمحمد
وزينب ام اخوانها يسمونها
آه يمحمد
~~
يلمعودني اذب الماي وراك شما گلت رايح
ما گتلي شذب يحسين لو شفتك عطش طايح
طولك جمله القرآن ترتيل ونحو كادح
سورة والفجر وليال عشره والشفع واضح
ميمونك طلع بعجاز عله غيض الغده طافح
مثل ما من صخر طلعت ناگه للنبي صالح

الدمعه غيمه ولوحت بجفونها
.. آه يمحمد
وزينب ام اخوانها يسمونها
.. آه يمحمد
~~
باجر من اضيعكم وتجف گصة النخوه
دوارة ماي لسماعيل ادور الصفا والمروه
خوتكم نفس يحنان وانه اتنفس الخوه
مو بالگوه روحتكم خلوها بالمروه
من حسين للعباس اركض ودري مو حلوه
بس الطير اليفرفح جي مذبوح بالگوه

ذبحة طيور السمه يذبحونها
.. آه يمحمد
وزينب ام اخوانها يسمونها
.. آه يمحمد
°°°°°°°°°°°°°°°°°°°°°°°°°°°°°°

📜 القصيدة: وداعت عيون الرضيع
🎤 أداء: مسلم الوائلي
🖋 كلمات: علي الأكبر الغرابي
~
وداعت عيون الرضيع
انه لو ما انته اضيع

لو ما ثوب الخدمه ولونك
محد حته يگلي شلونك
انه لو ما انته اضيع
~~
لو ما نظرت عيونك
ياهو اليسئل شلونك
يحسين اعترف ما انعرف لو ما وجودك

ضمني بعالم الخدمه
حته اشعر صرت زلمه
وبين الخدم شايل علم وابجي علمودك

روحي ..
بس اسمك من يمر يبجيها
روحي ..
ما لايگ غيرك يحسين عليها
روحي ..
ذبت كلشي وحزنك گاعد بيها

الجرحك بروحه يبات
ما تهزه المغريات

لو ما دمعاتي اعله اضعونك
محد حته يگلي شلونك
انه لو ما انته اضيع
~~~
هنياله اليحب مثلك
هنياله الصبح خلك
يا اول بشر بس بالصور شفته وهويته

بس الشافك بگلبه
هذا المن صدگ حبه
وسبعينك امس صاروا درس للحب قريته

نادم ..
انه اليوميه دموعه بمكتوبه
نادم ..
انه العنك دارت وجهه ذنوبه
نادم ..
گلبي الما رايد غيرك محبوبه

الينقبل عندك يصير
خادم بهيئة أمير

بس لو ما فاهم مضمونك
محد حته يگلي شلونك
انه لو ما انته اضيع
~
يالساترني بثيابك
لا تطردني من بابك
انه الما اله بس كربله وشمت حضرتك

احسبني ابابك امجدي
وغير الدمعه ما عندي
ما رايد اجر رايد عمر يكفي الخدمتك

عاشگ ..
والعاشگ كلما سهم الحب جاسه
عاشگ ..
يهجر بيته وربعه ويهجر ناسه
عاشگ ..
يحسين الحب بس يمك مقياسه

انه غيرك ما اريد
يل صرت للحب نشيد

لو طايح مره من عيونك
محد حته يگلي شلونك
انه لو ما انته اضيع
~
من عيونك النحرك
حد الخيل البصدرك
من اول سهم لآخر سهم جان اعلمودي

ما نستاهل جروحك
ليش اطشر بروحك
من ذاك الوكت رايد جنت تثبت وجودي

عينك ..
مره الزينب مره الصوب اخيامك
عينك ..
مدري شتكتب لمن طاح احزامك
عينك ..
ترسم للأجيال المثلي احلامك

حته ما ادگ غير باب
انطيت عبد الله ثواب

لو عايش كل عمري بدونك
محد حته يگلي شلونك
انه لو ما انته اضيع
~~~
من طبع اليحب يخجل
دوم بدمعته امبلل
بقانون العشگ لأهل العشگ ما تلگه راحه

اليذبل حگه من يذبل
لو وجه اليحب ما هل
وبريته النفس يدفع نفس من النياحه

وانه ..
ذاكه المحد يسئل عنه شلونه
وانه ..
ذاكه المتبدي المغرب بعيونه
وانه ..
اليمك بس اترد عافيته ولونه

شفتك وماهو خيال
سيد الحب والجمال

لو ما بالحب مو مجنونك
محد حته يگلي شلونك
انه لو ما انته اضيع
°°°°°°°°°°°°°°°°°°°°°°°°°°°°°

📜 القصيدة: يلما ينشبع منك
🎤 أداء: مسلم الوائلي
🖋 كلمات: عبد الأمير السهلاني
~~~
يلما ينشبع منك
آخر مره اشوفنك 
ناوي اعله الهجر جنك .. يغالي

شما گام الضعن يبعد
انه بروحي اظل انشد
هلبت ناسي شي وترد .. يغالي
~
ما نمت ليلي وناطر والضعون الحيرني
عيني ظلت عالمحامل خاف انام ويمشي عني
هدومي بيدي امتانيتهم فاتن النوگ وجزني
والله ما اثگل عليهن مو ثگيله وما خذني

وياهم امشي وهذا ضني
من حملوا محد حسبني

من رد الضعن يمشي
للطف حملوا كلشي
وظلت دمعتي برمشي  .. يغالي
~
الضعن مر وجزاني وانه نار بروحي تلهب
خاف اصيحن وعرضلهم والحسين بدربه يتعب
احسب النوگ التمرني وشوفي من عافوني حدب
عمري ذبيته بدربهم ماكو اعز من عنده ينذب

راحوا وانه راحت بسمتي
من الجمر تنزل دمعتي

كلشي بهالسفر يوحي
ابقه الحزني والنوحي
فراگك يسحن بروحي .. يغالي
~~~~
كون ميته ولا سمعتك عن رحيلك من گلتلي
ودعتني وداع ميت ماكو عين الما بجتلي
مو عليله اركض وراكم النوگ گامت تلتفتلي
وانته بعيونك سوالف راحت وما سولفتلي

يالجنت لحلامي خيمه
اليوم راح اصبح يتيمه

واضح كلشي بعيونك
كلساع انخطف لونك
المن راسي ميمونك .. يغالي
~
اظلم البيت اعله فگدك وجهك بكل لحظه اعطشه
بيت منه حسين شايل وانته قيس شلون وحشه
بويه روحي اتحوم گامت جنها طير وضاع عشه
والتشيل اعزاز گلبه الدنيه يتخيلها نعشه

كلشي بعدكم عندي معدم
بويه بصفنتي يعيش مآتم

ما ظل شي بعد يسوه
لا موقف ولا خوه
يخلص عمري بالگوه .. يغالي
~~~
ماكو شي يشبه وجودك منفرد حته برحيلك
ظلت اعله شفافي كلمه بويه لا ترحل دخيلك
لو امر كل الكواكب ما يصح واحد بديلك
وزعت كلشي بثوابك والعمر راح بسبيلك

تدري خذت كلشي برحيلك
بغيابي بله شلونه ليلك

ما ظل للجفن حيله
ويمر بالسهر ليله
ياهو الباقي وشكيله .. يغالي
°°°°°°°°°°°°°°°°°°°°°°°°°°°°°°°°

📜 القصيدة: كون انسميها العلويه
🎤 أداء: مسلم الوائلي
🖋 كلمات: علي الأكبر الغرابي
~~~~
هيه من باب التواضع خادمه
لو تمعنه بسمها فاطمه

مو بدويه مو بدويه
كون انسميها العلويه
لو تمعنه بسمها فاطمه
~~
هيه مو حي الله وحده
حته نحسبها مره
يا بداوه البيها نحجي
والله خصها الحيدره
مختصر كل الحجيته
الينقره وما ينقره
هيه علويه من اصلها
العدها سبع الگنطره

مو علويه شلون احسبها البيها حسين انگر عينه
الطالع منها احزام الخوه البي شد ظهره حسينه

وتشهد بهاي المواقف كربله 
وبلسان الطف شفتها البسمله

وام العباس المرضيه
كون انسميها العلويه
~
من طلع ضعن الهواشم
والمسيره الكربله
ركضت المالح لبنها
وصوت المناشغ عله
حلفتهم زلمه زلمه
الراحوا ويه القافله
مدلله تروح العقيله
ومن ترد مدلله

الهيبه وياكم راحت للطف كون ترد نفس الهيبه
ما اريد اسمع باجر عالتل رمش الراحت بي شيبه

وترسم بوجه المشوا ذاك الأمل
حته زينب ما يمر بيها الزعل

والتحلم راحت مسبيه
كون انسميها العلويه
~~~
الخاطر اعگال العشيره
ضحت بأربع ولد
ترست الطف يا ابو فاضل
جربه وعيون وزند
الينذبح بالطف اشوفه
يعني باجر ينولد
واليرد راسه برگبته
گالتلهم لا يرد

الما مذبوح بيوم العاشر والما صلى السيف بنحره
لا يترجه عيوني اتشوفه شيسولف ما اقبل عذره

الما يرد مرفوع راسه اعله الرمح
لا يحاول يعقد ويه امه صلح

التبجي اعله العاشر يوميه
كون انسميها العلويه
~~
بالمواقف شحجي عنها
وشرد اسولف يا صور
وهيه يكفي من الشجاعه
عدها عباس الگمر
حنت الگاع بولدها
من أول الأخر نحر
كربله اتسمت بسمها
من المخيم للنهر

واليقراها اتيه افكاره كلما حاول يوصل ليها
الطالع من عدها العباس بهذا الموقف شتسميها

بعالم الطف بالوفه متصدره
والدليل بهايه سبع الگنطره

حاولت اقراها شما بيه
كون انسميها العلويه
~~
ركضت اعله الكافل اخته
وعگدت بجفها العلم
يمه اريد بفي أمانك
باجر اتغطي الخيم
ما اعذرك يا ابو فاضل
إلا بعيونك سهم
وإلا ابن حذلم يگلي
راسك برمحه انرسم

دون حسينك باجر بالطف كون برمحه يهل راسك
كون بصدرك موش بصدره كون الحافر من داسك

كون ابن حذلم يبشرني الخبر
دون الحسين انگطع راس الگمر

والعاشت عله هاي النيه
كون انسميها العلويه
°°°°°°°°°°°°°°°°°°°°°°°°°°°°°°

📜 القصيدة: هدهد الحسين
🎤 أداء: مسلم الوائلي
🖋 كلمات: علي البو حمد الموسوي
~
الليله عن مسلم بحثنه
كافي نحجي بعاطفتنه
باب للحاجه وتهمش
والقصور بمعرفتنه
~~
اولاً كلشي بخصوصه وبي دليل انحققه
وبالنكات المعرفيه هالكلام انوثقه
ابو حسين مربي مسلم عالخصال المشرقه
يعني اخو حسين وخليله قبل موضوع الثقه

الحيدر مغذي علم ويشربه غيره
يضيع الكوفه وأزقتها الزغيره
الحسين اختاره هدهد للرساله
اذا مو گد الثقه يخلي سفيره

يستحق ثوب الزعامه
المكتسب علم الأمامه
وجان الحسين اعله مسلم
لو حجه يسمي ثقتنه
~
ابن طاووس بحديثه بمنزلة مسلم كتب
القائد الفارس يذكره ويذكر اسمه بكل ادب
المشكله بأهل المصادر ما ينصفون الذهب
والمثل حامض يوصفه العاجز يلوح العنب

بالفتوح يگول ابن اعثم عباره
من سمع صوت الحوافر بنتظاره
سيفه عصة موسى تلقف كل سحرهم
همه جيش واعلن عليهم حصاره

اقنع يطيح بحفيره
ومسلم يعادل عشيره
من اسولف عالقداسه
لازم انغير لغتنه
~~~~
اليگول الكوفه خانت كلشي ما يفهم تره
من زمان الكوفه سارت وي علي اعله المسطره
العسكر الشامي الدخلها وكلشي عامر دمره
وللرجال الحيدريه الكوفه صارت مگبره

بالروايات النقلها الأصفهاني
الكوفه جانت تحسب المسلم ثواني
لا تصدگ باليگول الكوفه خانت
انظر بعقلك تشوف الكوفه هاني

الكوفه ما نقضت حجيها
وهيه ثقل الشيعه بيها
واليگول الكوفه خانت
قصده يهتك منزلتنه
~
استمع هاي الروايه بالأضواء ارد استدل
المثل ابو فاضل مقامه يشبهه لازم بالفعل
زينب شيوصفها مسلم سمعوا يصحاب العقل
انه مسلم زوج اختها وعمري ما شفتلها ظل

هنا محل الشاهد بهاي الروايه
مسلم يسولفها جانت عنده غايه
بالرغم من قربه من بيت الرساله
وضحلنه الحب جواباً عن درايه

اليحب فعلاً أمامه
ما يقلل من مقامه
واليريد الطاعه لازم
ما يخالف مدرستنه
~
عن عشگ مسلم نسولف للحسين ونفتهم
من خلاله القصده يخدم عالأقل خل يلتزم
حب نعم ما راح امنعك بس يريد الحب زلم
حب الحسين بعقيده يرفعك اعله من النجم

يالخدم جاي احجي واني بگلبي لوعه
الحب حسب لونه وكماله وحته نوعه
الفاني من يحبله باقي الفاني يغله
طاست الماي استفادت منها طوعه

العنده غيره اعله الخدامه
مسلم يخلي علامه
ضحه لحسين بحياته
منه ناخذ فائدتنه
°°°°°°°°°°°°°°°°°°°°°°°°°°°°°°°°°

📜 القصيدة: سلام
🎤 أداء: مسلم الوائلي
🖋 كلمات: علي الأكبر الغرابي
~
سلام .. من گلب بيكم متيم
سلام .. عالأميره البل مخيم

خل تگر باجر عينها
لو طحنه گبل حسينها
سلام .. عالأميره البل مخيم
~~~~
حسين اخذ مكتوبنه
عن لسان گلوبنه
.. للأميره الخايفه وما مطمئنه

وحگ ذيج الشوغه
الموت اجمل صوغه
.. ومن سمار عيونه تفيض المحنه

ونخضر من جديد شما
يترس دمنه حضن الگاع
سفره الحرب راح تصير
والدم بينه خوش امتاع

سلام .. من حبيب ابن مظاهر
سلام .. اموقع بدم المناحر

خل تندعي السبعينها
لو طحنه گبل حسينها
سلام .. عالأميره البل مخيم
~
باجر بسبعينك
خلها تكشخ عينك
.. يبو عيون الما نعرف شضام بيها

نظره منك كافيه
الموت يمك عافيه
.. بعت روحي وياهو غيرك يشتريها

امان الله عله اخيامك
مادام النفس موجود
اذا سبعين الف يحسين
باب الغيره ما مسدود

سلام .. يا حبيب الله وجماله
سلام .. الزينبك هاي الرساله

من الدمه اموقعينها
لو طحنه گبل حسينها
سلام .. عالأميره البل مخيم
~
الدنيه وشما بيها
انته المحليها
.. وانته وحدك ساكن بعالم خيالي

وحگ لون عيونك
ما نعيش بدونك
.. كلشي يرخص وانته كلما جاي غالي

شفتك بس شفت يحسين
بعيونك حلم مذبوح
وبس المنجرح بالشوگ
يعرف دمعة المجروح

سلام .. من يرف باجر علمنه
سلام .. ننذبح دونك حلمنه

والرايه المعلينها
لو طحنه گبل حسينها
سلام .. عالأميره البل مخيم
~
يا ربيع ايامنه
واكبر من أحلامنه
.. وانته عفه وعافيه بعين اليريدك

ضمنه للطف باجر
حته يوم العاشر
.. انطيح گبل السيف لا يوصل وريدك

وطشرنه اعله باب الموت
وخلينه بهواك انذوب
الما جاسه العطش وياك
بالطف عمره ما محسوب

سلام .. ما يردنه الموت عنك
سلام .. انته منه واحنه منك

جلمة شرف حاجينها
لو طحنه گبل حسينها
سلام .. عالأميره البل مخيم
~
احنه ذوله بكيفك
بالمواقف سيفك
.. وهيه فرصه لليموت اگبال عينك

تدري طبع العاشگ
بالمشاعر صادگ
.. ومثل عابس كلنه بالطف عاشگينك

لملمنه بقايه جروح
وشد حزامك بعاشور
خاطر عالنهر يحسين
ظهرك ما يظل مكسور

سلام .. لا يظل بالك علينه
سلام .. باجر الدم يحجي بينه

نوفي المشاعر دينها
لو طحنه گبل حسينها
سلام .. عالأميره البل مخيم
°°°°°°°°°°°°°°°°°°°°°°°°°°°°°°°

📜 القصيدة: عباس اگعد لتعبني
🎤 أداء: مسلم الوائلي
🖋 كلمات: حيدر سامي السعدي
~~
شال جفوفه من التربان
وراح عليه يركض لهفان

عباس اگعد لتعبني
هاي جفوفك يله اشبگني
وراح عليه يركض لهفان
~~
بهاي شيباتي اركضتلك حيلي خلصان
هيه ساعه فراگ بس هواي كبران
... شيبتني

ردتك اتلاگيني مثل وداعنه الحار
صحتك وما بيك الي عباس تندار
... تعبتني

شما گلت راح اوصل يبعدونك الناس
وانه اجيك وشابگ جفوفك عله الراس
الخيل بيك ايجرن وتبعد يعباس

عليك الحگ ردت بس حيلي مو حيل
وصلتك گوه من عافنك الخيل

گلبي يريدك بيش ارضي
وماكو مجان اشتمك بي

انجانك يا عباس اتحبني
هاي جفوفك يله اشبگني
وراح عليه يركض لهفان
~
گعدت ام گاعدلك اعله الترب ونعاك
ورايد ابجيلك لحد ما اموت فوگاك
... خلص صبري

يا وحيد الخوه جيتك ظهري عطشان
وانته بس جفك يعادل عشرة اخوان
... وخالي ظهري

منيلك عين واشوفك ضحك العيون
شلون جاي اتغيض بيه الوادم شلون
انه عاميني البجي وهمه يهوسون

جانت وين الي عباس هايه
يمك گاعد واسمع احجايه

شوف شگالت هاي الناس
اتموت وما يگعد عباس

اكسر هاي الجلمه ولمني
هاي جفوفك يله اشبگني
وراح عليه يركض لهفان
~~~~
ارد احط اذني اعله گلبك واسمع شگال
وگلبي ما ينطيني منك سهم ينشال
... شلون بلوه

الخويه بس مره گلتها وغمضت عين
وانه اتاني الخوه منك صارلي سنين
... احجيها فدوه

جايك عليها وعليِ صاحوا الشمات
سهم من اسهامنه بثغر الگمر فات
واحنه شفنه الخويه راد يعيدها ومات

گضيت العمر محني وما الك صوت
تالي اتگلي خويه مره وتموت

منين اسمعها الخوه منين
راح يموت عليها حسين

لو بس مره اگعد سمعني
هاي جفوفك يله اشبگني
وراح عليه يركض لهفان
~
جنه انه وياك نركض لليطيحون
هسه بس انه وشيلك وحدي شلون
... شلون بيه

ايدي ترجف وانته مثل الماي حساس
منين ما تنشال تتبده يعباس
... من اديه

شاخذ الزينب وگلها رجعتي منين
درب الخيام شيوجده ورايحه العين
يابو فاضل اگعد شسويت بحسين

اخوي وصاحبي وظهري وحبيبي
عين منيلك وتشوف شيبي

هو الفارگ مثلك حيل
خلها اتدوس بصدره الخيل

گبل الخيل الصدرك ضمني
هاي جفوفك يله اشبگني
وراح عليه يركض لهفان
~~
انه رايح يابو فاضل بس احاجيك
ثاني جيه الخيل راح تجيبني عليك
... وانه الأتعب

راح اودعهن واضم عبد الله بالموت
وطلع من بيوتي ويحرگون البيوت
... على زينب

انه وانته بكربله تابوتنه ارماح
وما تصيح علينه اخت غربه من الصياح
هيه ساعه وزينب اتصيح الخدر راح

ساعه وزينب يهظموها بينه
وفوگ ارماحنه تعاين علينه

عباس اقره ايام ايام
وزينب راح اطب الشام

انته وزينب اول حزني
هاي جفوفك يله اشبگني
وراح عليه يركض لهفان
°°°°°°°°°°°°°°°°°°°°°°°°°