📜 القصيدة: سمه أحلامي
🎤 أداء: مسلم الوائلي
🖋 كلمات: أحمد الهلباوي
~~~
حسين حبيبي حسين
~~
سمه احلامي .. وضوه ايامي
وعشگ روحي .. واغله امنياتي

جرح عشته .. ودواي انته
وعزائي .. الحد مماتي

كل بشر ينعرف سيدي من السانه
ينكشف معدنه بالحجي وعنوانه
وانه ما تجري بلساني غير حروفك
هذا البصدري بسمك يدگ شريانه

كلمن طريقه وحده .. وحياته عنده
بنفاهه تگضي وتفوت
وانه نصيبي دمعه .. الحبيبي وانعه
بغرامه حد ما اموت
~~
ضوه عيوني .. وشمس لوني
ودمع شوگي .. وموطن غرامي

عشگ روحي .. ونعي جروحي
ولحن نوحي .. وصمتي وكلامي

يا حبيب الزجيه انته ربح سنيني
من اصيحن دخيل ادري ما تنطيني
گالوا اهل الكهف ما نسوا ثامنهم
وصرخت حاشه ينساني المربيني

هذا يقيني واقره .. بدليلي عبره
البواجي حصني الحصين
عندي العشگ عقيده .. وهواك اريده
وخيامك الگلبي دين
~~~
احن وانعه .. واهل دمعه
بسمه الخدمه .. طاير دليلي

صرت مجبر .. اجي واحضر
لعد بابك ..  وصرخ يويلي

ويلي عالطايح وحيله رايح منه
يسمع اصياح بنات النبي ايندبنه
ويلي عالماله بالناس اخو يتجيله
ويلي عاللي سگه الخيل اليدوسنه

ماكو بخيامه رايه .. ومصيبه هايه
وخواته المن تروح
نار المصيبه تدمي .. وجمرها يعمي
العقيله طلعت تنوح
~~
عشگ خدمه .. ورزق نعمه
وحلاة اسمه .. بگلبي هدايه

احن لجله .. فلا مثله
أله ولهله .. الحب والعطايه

هيجي من الله احبه واحب تعزيته
الدنيه تاخذني والگاني بحسينيته
الله خالقني ونطاني الج يا زهراء
حته اواسيج واواسي علي بذريته

درب العشگ يعتني .. ورفيجي حزني
وطريجي كلش طويل
وانحب عله السبيه .. بالغاضريه
وضعنها مابي كفيل
°°°°°°°°°°°°°°°°°°°°°°°°°°°°°°°°

مشاهدة "سمه احلامي | مسلم الوائلي - سيد مهدي البكاء | الفاطمية 1444" على YouTube
https://youtu.be/lxbwSbCcKDE

📜 القصيدة: الليلة جمعة
🎤 أداء: مسلم الوائلي
🖋 كلمات: حسن الترابي
~~~
الثار الثار ابو صالح .. الثار الثار
~~~~
الليله جمعة ونقره ندبه الليله
وندعي للمهدي الفرج تعجيله
يجي للحره وحملها يشيله
يعاون السجاد ويتجيله
تره ثگل النايبه هد حيله
~~~~
يرجع العبد الله جايب مايه
وفوگ گاع الطف يمد افيايه
يوگف بنص كربله يدگ ثايه
وتلتم العيله ويسوي قرايه
ويطبر الهامه ويطيب الدايه
~~~
الله ربه مخلي كلشي بأيده
يرجع وطف المنايه يعيده
يروح لحسين ويغسل وريده
وسهم البصدره يطلعه بهيده
ويلحگ النوگ بعبايه الزينب
فوگ عرش الله يحطها وينحب
يگلها يا عمه اجيت بمطلب
طول اغيابي العذر يا زينب
~~~~
شما بعد يوسف يجي اليعگوبه
يمسح اثار النهار غروبه
المهدي ثار الطف يجي مطلوبه
يلطم اعله حسين ويشگ ثوبه
وترجع اهدومه الأمس مسلوبه
~~~~
يجي بصينيه وشمع لأم جاسم
يسوي حنه وبيها تحضر هاشم
وتعله هلهولة عرس للقاسم
يحضر العباس بيده الصارم
يهوس ويتلاگه ويه القائم
~~~~
يروح لزهره بعلم عباسه
يگلها يا يمه ويفيض احساسه
الكسر ضلعج إلا اكسر راسه
والحرگ بابج إلا احرگ ساسه
°°°°°°°°°°°°°°°°°°°°°°°°°°°°°°°°°

📜 القصيدة: سيد الحب
🎤 أداء: مسلم الوائلي وموسى البولاني
🖋 كلمات: مؤمل مزهر
~~
سيد الحب ابا الفضل
~~~~
شفتك گمر وسط البشر سريت
آيه جمال وعالأرض مشيت
من روحتك خويه شكثر بجيت

اول كفيل بلا زند
يا ضامي وبصفك نهر
مو من عطش ميت تره
عاف الشمس مات الگمر
~~~
متكبر عليك الرمح يجور
وراسه حطه براسك ويدور
والدم طلع من هامتك يفور

عيونك البيهن حرت
معقوله انته من البشر
يشما اوصفك قصرت
هنيالي انه اخت الگمر
~
جن رايك الما يختلف ثبات
هيجي سهم عينك يظل يبات
شاف السهم بعينك الحياة

رمشك مثل خيط الشمس
وحاجبك بيض الهند
يالمنولد للواقعه
شلون الورد جاب الورد
~~~
انته الوتد وعله الأرض بقيت
طولك جبل يا ابو الفضل عليت
بان انكساري من شفت هويت

لمن مشه براسك رمح
مثل الخشب من ينكسر
يالواگف بريجك رمح
بعباتي ظل واگف جمر
~
يا سيد الحب والعشگ حلال
يلما شفت منك فقط دلال
راسك اجاني من صحت تعال

يا كتله من العاطفه
وكتلة غضب بالمعركه
عنصر كفر وعله النهر
بسيفك تجي وتفككه
°°°°°°°°°°°°°°°°°°°°°°°°°°°°°°°

مشاهدة "سيد الحب | الرادود مسلم الوائلي والرادود موسى البولاني" على YouTube
https://youtu.be/Hs-lNp8Vg-o

📜 القصيدة: حي الله جاسم
🎤 أداء: مسلم الوائلي
🖋 كلمات: حمزة الحسناوي
~
حي الله جاسم .. حي الله جاسم
~~~~
برموشك ملثم جاي مثل الحجي الما طالع
تگطفهم وگالوا بيك جاسم فزع لو راجع
جا گلنه ميت عباس لو متت يوم السابع

يحجاية الله التنگال
بس اليحبكم رجال
~
صيتك عبرهم من جان ديوان ابوكم عامر
ما لايح الضيف الگاع ويگله زادك صاير
يبن الهله المن تنگال ينزل الطير الطاير

زاد اهلك الجان يصير
من گبل الله بالخير
~~~~
يبن اليلاگون الجيش ما رضوا مهره بمهره
مو واحد من اتكتلون تبدون من العشره
انتم تدگول العال ما بيكم الدگ صدره

يزغير بس عدكم جان
مو بالعمر بالميدان
~~~~
جاسم طلع مثل الريح تشهد عليهم ناسك
واحد نشد واحد غاد راسي انگطع لو راسك
ضلوا يحاجون الروس ما شفت واحد جاسك

موته وحجيهم مسموع
من يمته راسك مگطوع
~~~~
جاسم طلع باس حسين للحرب صلى وسمه
ما گالوا عليك ازغير هذا ابو فاضل عمه
بعده اليجيك من بعيد واصل بصفك دمه

تربيتك اتخوف الناس
من الحسن والعباس
°°°°°°°°°°°°°°°°°°°°°°°°°°°°°°°

📜 القصيدة: يا ضامن الروح
🎤 أداء: مسلم الوائلي و علي الوائلي
🖋 كلمات: سعد عواد الهدابي
~~~~
دخيلك يمولاي يا ضامن الروح
~~~~
بعدت روحك علينه حته تختار اليجونك
وانه اسولف وي غزالك يخيعونك يخيعونك
ماكو بالدنيه ضمان ولا امان المثل امانك
ما يشوفه الله بدعائه الما تشوفه انت بعيونك

يا طعم شباجك وذيج الزياره
جاره ماكو عشگك مسويلي جاره
خاف اموتن گبل لا اشوف المناره

انت ... انت ... انت
انت علمت الحمام اعله السلام

انت ... انت ... انت
انت يا حكمت نبي وغربة امام
~~~
يا غريب الدنيه اجته وبعده يتسمه غريب
هالشعور هواي يجرح لا تلجمون الحبيب
عيونك الكربله وجدك يابو الجروح الوسيعه
كون ما طايب حبيبك انت ما ودك تطيب

يا ارض طوس شبعد وتسافرين
اهلج يريدون بين الحرمين
قربي شباج الرضا يم الحسين

انت ... انت ... انت
انت رجوانه وسراط المستقيم

انت ... انت ... انت
انت خير ان شاء الله  والله كريم
~~
دربك العلمني معنه اليعشگ ويوصل يريد
وتتعب الخاطر حبيبك حته لو دربك بعيد
شنهي سرك توني اتعب وانت تنطي جدامي حيل
الماتوا العام اعله دربك هسه اجولك من جديد

حسبينه احسابهم ضمينه رايه
البجوا يم ابن شبيب اعله الروايه
ثاري اليموت اعله دربك مو نهايه

انت ... انت ... انت
انت فرصه الثانيه وكل الفرص

انت ... انت ... انت
انت مجرى النهر ما جف وخلص
~~~
يا انيس الهنفوس ويا غطاها ويا دواها
روحي اجتك گبلي تركض وانه اجيت اركض وراها
الينفضح شوگك بگلبه ما تكفيه الصحاري
وين ما تندار عينه يلمح الگبه وضواها

يذوب عالحضره الثلج وحنه نذوب
دربك الدللني من دون الدروب
انت باب التوبه للرايد يتوب

انت ... انت ... انت
انت دليت الحنان اعله الحنان

انت ... انت ... انت
انت ودلك تجينه من زمان
°°°°°°°°°°°°°°°°°°°°°°°°°°°°°°°°

📜 القصيدة: ولستُ ادري
🎤 أداء: مسلم الوائلي
🖋 كلمات: المرحوم آية الله العظمى
الشيخ محمد حسين الاصفهاني قدس سره
~~~
يا زهراء .. يا فاطمة  
~
ولستُ ادري خبر المسمارِ
سل صدرها خزانة الأسرارِ

لكنها لاذت وراء البابِ
رعايتاً لستري والحجابِ

ومذ رأوها عصروها عصره
كادت بنفسي ان تموت حسره

واسقطت بنت الهدى وا حزنا
جنينها ذاك المسمى محسنا

نادت أيا فضةُ سنديني
فقد وربي اسقطوا جنيني

والأثر الباقي كمثل الدُملجِ
في عضد الزهراء خير الحججِ

ومن سواد متنها أسود الفضا
يا ساعد الله الإمام المرتضى
°°°°°°°°°°°°°°°°°°°°°°°°°°°°°°°

مشاهدة "لست ادري | الرادود مسلم الوائلي" على YouTube
https://youtu.be/j14oNlqILyI

📜 القصيدة: من المدينة للعراق
🎤 أداء: مسلم الوائلي
🖋 كلمات: محمود الموسوي
~~
يا هله بحسين وبزود الهواشم
~~~
طالع من أرض المدينة للعراق برايته
وابو فاضل جان احله من الگمر بعمامته
ضعن شايل هيبة الله وغيره كلهم ساده
والهواشم هوسوا بسم الحسين وصايته

طلعوا كلهم فرسان
بيهم هيبة عدنان
محله غيرتهم ويا محله العمايم
~~~~
هيبة حسين وجماله طلعت بذاك الضعن
وجه الأكبر جنه جاسم يا هله بولد الحسن
راية الساده ثگيله وعلي شال الرايه
وراية العباس رفت والبيارغ هوسن

صاحوا عمنه العباس
شد الريشه اعله الراس
والرماح تريد ملگه ويه الصوارم
~~
سولف حسين اعله هاشم سالفه اتريح الگلب
گالهم هاشم ثگيله وانتم اسباع الحرب
باجر اتطيح الرگاب شما يرف بيكم علم
باجر امسابگ يصير اعله العرك ياهو اليطب

باجر گدام حسين
كل هاشم منتصرين
وابو فاضل باجر ايهز الملاحم
~~~~
الدرب جان تراب لكن ابو فاضل ما يلي
لو مشه اتصيح الهواشم مطر ماي ومايه الي
هو ابن حيدر وحيدر خلف الزلمه الكلف
مالت الدنيه واجتله اتگله عدل مايلي

ومن عدلها العباس
طگاهم راس براس
ما طلع من سيفه واحد عود سالم
°°°°°°°°°°°°°°°°°°°°°°°°°°°°°°°°

📜 القصيدة: خلوا علي دفاني
🎤 أداء: مسلم الوائلي
🖋 كلمات: عباس طالب السعيدي
~~~
الليله اخر ليله  
يطفه الگمر وسهيله
فاتحتي باجر تبدي 
كل واحد يشد حيله

اموت ابين ايديكم
سلام الله عليكم
الليله اخر ليله .. الليله اخر ليله
~~~~
يبن آدم اصعب شي تره ويخلي فكرك سارح
من يگعد اگبالك محب وتعرفه باجر رايح
ما تگدر اتسويله شي وتشوفه بالدم سابح
لا بيدك اتعطل الوكت لا دوه وبيدك طايح

الگابل عزيزه امگابل احباب
شيقنعه باجر جوه التراب
وتعطلوا حيل اليشيعون
جي واگف الهم وگفه بالباب

لمتهم بليلتها
جان الوحي بدمعتها
گاللهم الله يعينه
اليتكفل اجنازتها

جزه الشاطي بجيكم
سلام الله عليكم
الليله اخر ليله .. الليله اخر ليله
~~~
نزلوني بهداي الگبر ما بيه حيل احزاني
وضلوعي عن لا تلجم خلوا علي دفاني
يا زينب اتگوي بعلي وحسين خل ايتاني
باجر وراكم كربله لحد يتعب الثاني

گابلها الحسين وحضنها
ويريد يشبع شوف منها
والموت ما يتدنه ليها
إلا الحسين يگوم عنها

هذا اليجلب بيها     
وذاك اليحب رجليها
يوگف گلب واحدهم   
شما نزلت ايديها

تگول اسمع حجيكم
سلام الله عليكم
الليله اخر ليله .. الليله اخر ليله
~~~~
لو غمضت عيني وطفت مو ميته يمكن سهله
بس انه من گد الضرب حسبالكم مو عدله
لو شفتوا دم اسود نزل وستغربت من شكله
هذا الزراگ البجفن گامت عيوني اتوشله

محسن يطيح شلون حيره
لو شاف اخيته بسوگ اسيره
ينشال گوه مثل الحسين
وجمع دللوله بحصيره

لو راسي ما حركته    
يعني الولد طيحته
خل واحد يلوليله      
لا تنگطع سالفته

اخوكم جيته ليكم
سلام الله عليكم
الليله اخر ليله .. الليله اخر ليله 
~~~
وي زينب شما اختنگ بالشبگه خل تشبگني
گطع النفس مو لضلع ليل اهدعش خانگني
شفت بعبايتها الركض وتصيح خويه الحگني
وتگلي مو بس بالگلب يا يمه شلعوا متني

توني ارد اروحن وي بناتي
والموت حط روحه بحياتي
شلون اطلع من البيت للباب
وما طالعه انه من عباتي

ويه البجي وشموعي  
يختلط دم ضلوعي
وثنينهن بيديه     
ما اعرف ياهي دموعي

اغمض وامشي ليكم
سلام الله عليكم
الليله اخر ليله .. الليله اخر ليله
~~~~
يوليدي غطوا الشيب اذا سئلوكم اعله الفرگه
ما ترهم ادري البضرب عين امه صارت زرگه
ضموا الدمع مثل الكسر والمات ميت حگه
باجر وراكم فاتحه والفاتحه اتحب ملگه

بالماي خلوا البيت غرگان
عن لا ينام حسين عطشان
وفراش افرشوا حدر اخوكم
باجر شمس وينام عريان

جنه انگطع ملگاكم   
بس عمري ما انساكم
خلصت الليله بسرعه  
يا يمه الله وياكم

بعد للطف اجيكم 
سلام الله عليكم
الليله اخر ليله .. الليله اخر ليله
°°°°°°°°°°°°°°°°°°°°°°°°°°°°°°°°

📜 القصيدة: بالله انشدك يا موت
🎤 أداء: مسلم الوائلي
🖋 كلمات: علي الصالحي
~~~~
يمه احس بروحي طلعت
شيلتج بدموعي نگعت

بالله ارد انشدك يا موت
من امي شيريد التابوت
راحت امي .. راحت امي
~
يا يمه ارجاج .. فكيها عيناج
شوفي يتاماج .. يمج يلوعون
من هسه تردين .. اتيتمين الحسين
معقوله ترحين .. وتحملج امتون

وسط الثنيه ويمه ناديت
بس الصده يجاوبني ياريت
يأول سؤال بطبت الدار
ميته گبل موتج تمنيت

تعمه التدليني دربي
عليج يا دگات گلبي

معقوله ما نسمع صوت
من امي شيريد التابوت
راحت امي .. راحت امي
~~~~
ما ظل بعد حيل .. يا نجمة الليل
يا ريحة الهيل .. يا سلوة الروح
يا خيمه يا سور .. من بعدج اتدور
منها اشوه الگبور .. مبجاها مفضوح

اتناسه فگدج وانه اذكره
وعليج ادور حجره حجره
بسمج يريد يصيح الحسين
بأول حرف وتخنگه عبره

تبجي حيطان بصخرها
موش ثوب ضلوع طرها

صعبه اعله حجرتها انفوت
من امي شيريد التابوت
راحت امي .. راحت امي
~~~~
احسب سنه بيوم .. وفراگج يحوم
ما نذكر النوم .. بس ذكرياتج
يا زهرة الكون .. لو عسعس اللون
وشتاگت ام عون .. تلبس عباتج

ما مر عله ابنادم يهظمي
نحلان من الفرگه عظمي
كل الحياة بسبة الماي
بس انه حي من ريحة امي

سر حياتي اليوم راحت
وبنعشها وياي ناحت

ذا النون وفراگج حوت
من امي شيريد التابوت
راحت امي .. راحت امي
~~~
يمه ارد اسئلج .. بالفرگه شلج
وبحالي اگلج .. حيل انه متعوب
اخذيني يمج .. مشتاگ اضمج
مشتاگ اشمج .. يا ريع الگلوب

يلماله حق بعمرج البين
انترس دمع وجنات الحسين
شميلي صدري گبل الطفوف
گبل الحوافر والسجاجين

يمه گبل الطف تعالي
للتظل من غير والي

بعيوني رسمج منحوت
من امي شيريد التابوت
راحت امي .. راحت امي
~
يا يمه معروف .. تحضرين الطفوف
وعيونج اتشوف .. ميته وتموتين
من اغدي منحور .. بمصباح عاشور
ضلعج المكسور .. يمنعج تلطمين

كل بالي يمج يمه باجر
جدامج اترضني الحوافر
ما ادري بيش ايطلبن حسين
تتسابگ سيوف العساكر

سيوفهم لو بيه حزن
اهون من افراگج اهون

بالطف اصيحن بسكوت
من امي شيريد التابوت
راحت امي .. راحت امي
°°°°°°°°°°°°°°°°°°°°°°°°°°°°°°°°