https://vm.tiktok.com/ZMFJCC8NN/

شوفوا ونطوني رئيكم بصوتي ☝️

📜 القصيدة: تعبت من الركض
🎤 أداء: مسلم الوائلي
🖋 كلمات: حسن الترابي
~~
حسين يا خويه .. حسين يا خويه
~~~~
تعبت من الركض والخوف يحسين
عثر جدمي ونخيتك تگعد النه
الخيم طاحت علينه وجينه حفاي
وحگك جا بالخيام احترگنه
مثل صدرك بناتك ترسن الگاع 
بالف ميت گبل طولك عثرنه
غيور وحته لو مذبوح تنهاب
شكبرها العازه وبمذبوح لذنه

يمتعب اليدگ
لگيتك ما تنشبگ
.. جبيره جروحك حيل

مذبوح النحر
واثر صاعد فوگ اثر
.. حوافر هاي للخيل

ضيم ما عايز وجملك بس اجيتك
ترضه ما ترضاها شتموني بثنيتك
~~~~
عبي التمينه يمك وانته مذبوح
نگعدك گوه بس ما بيك گعده
لجمنه جروحك اعله البلكت اتگوم
هظمناك وگلت مابيه هده
الزلم وصلتنه يمك واحنه نسوان
عليك تلملمن وحده اعله وحده
تگابلنه ونريد انگعدك اردود
عبرنه الماهن وصدرك تبده

گاضي من السحگ
ضمه وبالدم مختنگ
.. رمح بجروحك طاح

من ذاك العصر
اجت خيل اعله الصدر
.. وشفت يمك ذباح

حز رگبتك بيده وتباوع بناتك
شال راسك بيده ونشگت عباتك
~~~
شكثر تيهنه بالطف من اجينه
انعم الله اعله العطر دلانه من هاض
لگيناك وگعدنه اعتاب وياك
الصدر ماهوه والدم بالنحر فاض
ذبيح ومنسلب والحيل مو حيل
بعدها الخيل تطلب صدرك اركاض
ندنيك ونفر وتطشرك الخيل
واحسك من نرد علينه مختاض

تطشر وألم
ارد من بين الزلم
.. ادور الضاع يحسين

ما تلتم صعب
تعب يا ذبح الگلب
.. حرت بوداعه منين

من العصر لليل گلبي وياك حاير
عفيه صدره المارضه يعبرله حافر
~~
بعد ما منها لازم عنك انروح
وادري مقصره بس ما اريد تزعل
شكثر لمينه بس ما تگضي يحسين
ادواره من الشريعه عليك للتل
گلت هلبت الاگي الخنصر الراح
واردنه بمجانه وعنك ارحل
ادور موتي بين جروحك وضاع
گلت بلكي الله اموت وكلشي ينحل

بكثر من جرح
ردت وياك انذبح
.. وضوگ الموت وضماك

يا غبشة صبح
ردت وي راسك رمح
.. يروح براسي وياك

كون مذبوحه ولا اروحن سبيه
ولا يطب للسوگ طاري الهاشميه
°°°°°°°°°°°°°°°°°°°°°°°°°°°°°°°°°°°

📜 القصيدة: فاتحة الحسين
🎤 أداء: مسلم الوائلي
🖋 كلمات: حيدر سامي السعدي
~~~~
ما عدنه موعد للدمع ولا راحه للعين
كل ساعه كل جرة نفس مذبوح الحسين
ما يگضي حزن القافله
وما بيها موسم كربله
مذبوح الحسين      مذبوح الحسين
~~~
مو اي واحد يگدر يلزم
جمرة خيمة زينب بيده
ولا اي عين ادور دمعه
والبيت اليلجمها تعيده

وفه ...
من تعيش جروح العاشر وتحس بيهن دين
وفه ...
الناسين حسين يشوفوك ويتذكرون حسين

وفه .. من يكثر دمعك
وفه .. ودموعك ربعك
وفه .. من يلفي الليل  وتدعي اعله الخيل

كل خل اذا خله انلجم ينلجم وياه
جا يمته يلجمنه الغفه والخيل فوگاه
ما يگضي حزن القافله
ما بيها موسم كربله
مذبوح الحسين       مذبوح الحسين
~~~
هنياله الما فل حزامه
وما يحسب خلصت ما خلصت
مو ركض الأيام الأصعب
الأصعب زينب لمن ركضت

الوكت ...
تعلم يركض حين الرادت زينب ساعه وداع
الوكت ...
خله الما يتعوض گلبه مذبوح اعله الگاع

الوكت .. دار وما حسب
الوكت .. مايل وي زينب
الوكت .. خلاها اتبات      بديرة شمات

اهون اذا ريجك عطش ولا تعطش اخوان
عطشت اخو وعدها اخو مذبوح عطشان
ما يگضي حزن القافله
ما بيها موسم كربله
مذبوح الحسين       مذبوح الحسين
~~~~
مو شهرين الخادم يخدم
ومن يگضن يتغير حاله
اليتململ من تعب الخدمه
خادم ثاني يصير ابداله

تعب ...
ما يستاهل واحد غير حسين انموت عليه
تعب ...
جا ياهو المنطينه اخيامه واحدنه شمنطي

تعب .. نيشان العاشگ
تعب .. لحسين مفارگ
تعب .. المن ترتاح      وراسه اعله ارماح

ياهو بوسادة رمل ظل نايم ايام
مشيول بس شايل تعب نسوانه للشام
ما يگضي حزن القافله
ما بيها موسم كربله
مذبوح الحسين       مذبوح الحسين
~~~~
الخادم من يطيح جادر
يبني الجادر كون بگلبه
ولو رد لهله يجدد حزنه
كون يعيش بيته الغربه

العطش ...
مو سهله تعيشه ويه حسين وبيك برودة ماي
العطش ...
كون انصيح ونرسم كافل شايل جربه وجاي

العطش .. نخوه الراعيها
العطش .. الكافل گاضيها
العطش .. بالحب وفاي    مو مثل الماي

الله يا جرح العطش شخلاله نيشان
العطشان يحلف من كثر ما جان عطشان
ما يگضي حزن القافله
ما بيها موسم كربله
مذبوح الحسين       مذبوح الحسين
~~~~
ليليه ام حسين اتدور
مجلس بي تنعه اعله الضاعن
كونك شايل جرح العاشر
سوي المجلس وتلگاهن

العشگ ...
من يدور گلبك حزنك ودمعك دمع العين
العشگ ...
من تطيح الدمعه بسرعه بس تگول حسين

العشگ .. مو فتره ويگضي
العشگ .. يريد المتوضي
العشگ .. بدموع العين    ويصلي حسين

الله امتحنه بكربله وبدمعة العين
منا لحد الآخره فاتحة الحسين
ما يگضي حزن القافله
ما بيها موسم كربله
مذبوح الحسين       مذبوح الحسين
°°°°°°°°°°°°°°°°°°°°°°°°°°°°°°°°°°

📜 القصيدة: خويه عنك رايحه
🎤 أداء: مسلم الوائلي
🖋 كلمات: رائد الناشي
~~~~
حسين ياهو اليسويلك فاتحه
وباجر انه الصبح عنك رايحه

الخيمه محترگه وگعدنه اعله التراب
حته ما نگدر نسويلك ثواب
وباجر انه الصبح عنك رايحه
~~
وحدك باجر نخليك ونروح
نايم بذاري التراب بلا غسل
ولا يشيلونك ولا يرضون اجيك
حته اغسلك من دمع عيني اليهل
الحادي ما ينطينه مهله نمر عليك
خاطر نودعك گبل لا نرتحل
وگال محد تنزل تودع عزيز
العدهه غالي تودعه من فوگ الهزل

باجر المشتاگه تكتم شوگها
والهزل ذباح اهلنه يسوگها

وتمشي عن عبد الله مجبوره الرباب
حته ما نگدر نسويلك ثواب
وباجر انه الصبح عنك رايحه
~
ياهو ينصبلك عزه حسين من اروح
ويجري دمعه الحالك الما ينوصف
ولا الك ام لا اخت تلطم عليك
بهيمه نايم لا رفيج ولا عرف
هو بيش يبين الميت عزيز
بالوجوه التحزن عليه ينعرف
لطم المعزيات مو مثل أم مصاب
لطمت المذبوح اخوهن تختلف

طحتوا ما ناحت عليكم نايحه
ياهي تنعاكم واختكم رايحه

والله يابو سكينه راسي وگلبي شاب
حته ما نگدر نسويلك ثواب
وباجر انه الصبح عنك رايحه
~~~
گلبي ما ينطيني اخليك واروح
حسين خويه فراگك تكرهه النفس
ماي ما شارب لهسه بهالسموم
عميه عيني وگتلي عطشان من امس
انمرد گلبي وردت اسويلك افياي
بالعبايه وما يخلوني الرجس
حسين خويه الميت يدفنونه غير
شلون ترهم ميت يظل بالشمس

الماي متعيني من امس ما ضايگه
وخيلهم خويه اعله الصدر هم ساحگه

وگلبك من الحر يبعد عيوني ذاب
حته ما نگدر نسويلك ثواب
وباجر انه الصبح عنك رايحه
~~
طحت وحنه تراكضينه من الخيام
وگام ياهو الشافنه يسب ويطگ
الفاگد يعزونه بدموع ونحيب
ما شفت فاگد يعزونه بحرگ
الميت يشيعونه شيل اعله الجتاف
ليش بس انته يشيعونك سحگ
وليش بضلوعك حوافرهم تدوس
وليش ظهرك عله ضلوعك ينطبگ

بالحوافر شيعوك شمالهم
شنهي خاف ترد عدل حسبالهم

ما اشوف اكثر بعد من هالعذاب
حته ما نگدر نسويلك ثواب
وباجر انه الصبح عنك رايحه
~~
هاي هيه تفارگينه وما تجون
وصدگ ما يلتم بعد ذاك الشمل
خويه ثاريه الوجع مو لليموت
الوجع للفارگ عزيز وظل عدل
خويه والما تنحمل موش السياط
حسين ثاري فراگك الما ينحمل
الما مجتف بالحبل ويودع اخوه
هذا حگه يگول الموادع سهل

الما مجتفينه وعزيز مفارگه
هذا الوداع الصدگ ما ضايگه

الما مصوب لا يسولف بالصواب
حته ما نگدر نسويلك ثواب
وباجر انه الصبح عنك رايحه
~~
العذر لله وليك يبن امي وابوي
فراش بالخيمه وعلي ما ينوجد
وماي ما يحصل ووزعلك ثواب
بلكت اليشرب يرويلك جبد
فراش سويت العبايه وگمت انوح
وسلميت عليك يا بعد الولد
انه اول وحده نصبتلك عزاء
وانه اول وحده ازورك من بعد

خويه بس زينب عليكم لاطمه
موذرين انتم واختكم سالمه

خويه لا تعتب تره يهدني العتاب
حته ما نگدر نسويلك ثواب
وباجر انه الصبح عنك رايحه
~
جمعونه بخيمه وحده ودنيه ليل
من التعب توهن بناتك هودن
بهيده اونن وحدي وما ابجي حيل
خاف افززهن وهن توهن غفن
وهنه من ذاك العصر يمشن وراي
اسكت يسكتن واذا ابجي بجن
تعبن يساعدهن الله من الركاض
وموش وحده اعله الجمر كلهن مشن

عيالك اتدوس الجمر بجدامها
وين ما تشرد شمر جدامها

حشمن بيكم ولا سمعن جواب
حته ما نگدر نسويلك ثواب
باجر انه الصبح عنك رايحه
°°°°°°°°°°°°°°°°°°°°°°°°°°°°°°

📜 القصيدة: واويلاه واويلاه
🎤 أداء: مسلم الوائلي
🖋 كلمات: عباس طالب السعيدي
~
بله هنا يالمعزيات
واويلاه .. واويلاه
ورباط السوالف مات
واويلاه .. واويلاه
هو اعله التراب اينام
واويلاه .. واويلاه
واحنه بالخرابه انبات
واويلاه .. واويلاه

گبل لا يصعد الدخان والنار ومصيبتها
كل وحده ابنات حسين خل تضم عبايتها

خاف تدوي اخيامه .. ويرحن عبينه 
~~~
حسين الفارگ الخوان
واويلاه .. واويلاه
طاح وشالته النسوان
واويلاه .. واويلاه
تحرگنه الشمس كلساع
واويلاه .. واويلاه
جا شمسويه بالعريان
واويلاه .. واويلاه

من گالوا ذبحنه حسين رحت اندهله عباسه
لاگونه الزلم صوبين ويهوسون يم راسه

ومات شيخ الطايفه .. وفاتحته سكته
~~~
تتعارك اشوف الناس
واويلاه .. واويلاه
ياهو اليوصل العباس
واويلاه .. واويلاه
ما يرضه الرمح يندار
واويلاه .. واويلاه
جي ريشاته مو عالراس
واويلاه .. واويلاه

گمر من لاگته الزهره گالتله ابني جا وينه
ذب جفوفه يمها وگال بيهن لمي ابو سكينه

الراكضه عليه الخيل .. يعين الله گلبه
~~~
الحملي ما لگيت اجتاف
واويلاه .. واويلاه
لا وادم عليه اتخاف
واويلاه .. واويلاه
عطشانه وكبرت هواي
واويلاه .. واويلاه
ما ادري العطش ينشاف
واويلاه .. واويلاه

وين الگه اليوخر الناس عن هدوم ابو سكينه
اريد اشلع سهم عباس حته انه اگعد بعينه

وين حادي ضعونه .. اتعطل علينه
~
خل نركض صحت ونروح
واويلاه .. واويلاه
بس شيركض المذبوح
واويلاه .. واويلاه
كل ساعه السهام اتفوت
واويلاه .. واويلاه
جي باب الجرح مفتوح
واويلاه .. واويلاه

تعبنه من الركض والخوف من ردت اوصل حسيني
ساعه اجيبه ليه الخيل ساعه اتبعده عن عيني

والخيل ماخذ راحته .. وتعبان اخونه
~~~
حيهم وين اهلنه هنا
واويلاه .. واويلاه
نركض والزلم منا
واويلاه .. واويلاه
مامش بالفزع نغار
واويلاه .. واويلاه
والصاحن يگلهن ها
واويلاه .. واويلاه

حيهم صحنه لأخر گاع غير الخوه ما ردنه
الدمعه من البجي اعله حسين صارت وحده من عدنه

شضاعلج ويه الخيل .. محد نشدني
°°°°°°°°°°°°°°°°°°°°°°°°°°°°°°°°°°

📜 القصيدة: انه يالنايم رقيه
🎤 أداء: مسلم الوائلي
🖋 كلمات: حسن الترابي
~~
جابتني روحي وتعثرت بيك
كل ضني نوحي يگعدك ولاگيك

اشبگني الك مديت اديه يا حسين
انه يالنايم رقيه يا حسين
وتعثرت بيك .. وتعثرت بيك
~~~
ظلام وتيهت خطواتي يحسين
خطوات الغريبه اتعب الگاع
مو بعيوني دورتك بالجفوف
وكت الظلمه شوف العين ينباع
يم كل منذبح اگعد وهز بي
بس موش انته تطلع واركض ابساع

عطشانه واركض من الغروب
جندوب ادور عليك جندوب
وين الله اگولن موش الحسين
كلما شفت جدامي مگلوب

ملهوفه اجيتك بالخير امسيك
جابتني روحي وتعثرت بيك

اشبگني الك مديت اديه يا حسين
انه يالنايم رقيه يا حسين
وتعثرت بيك .. وتعثرت بيك
~~
ثگل جدمي وبديت اتعثر هواي
ولاگه الخنصر جفوفي وشبگته
ونينك دله روحي وگلبي عليك
وطولك من وصلتك ما عرفته
ادري بيك عطشت هواي يحسين
الماي من النهر بثيابي جبته

فوگك عصرت هدومي بهداي
من كل كتر ظل يطلع الماي
شمخليه بيك الخيل يحسين
وشويه صاير وانته الهواي

ما كفه ثوبي لو ردت اغطيك
جابتني روحي وتعثرت بيك

اشبگني الك مديت اديه يا حسين
انه يالنايم رقيه يا حسين
وتعثرت بيك .. وتعثرت بيك
~~~
گوم اتلگه بتك طرت الليل
فك حضنك تعبت من الركض حيل
من شافوا سواده التمت عليك
گمت اتلبد بسد المجاتيل
انه الدللتها وحنت اليوم
لم روحك الي من حوافر الخيل

كل ضني اتضمني بعباتك
ثاري الحوافر ساحگاتك
يل جنت ليه وهسه للگاع
منك ولا ظل شي البناتك

ساكت وحاجيك وازعل وراضيك
جابتني روحي وتعثرت بيك

اشبگني الك مديت اديه يا حسين
انه يالنايم رقيه يا حسين
وتعثرت بيك .. وتعثرت بيك
~~~
يالمنطيني كلشي انطيته للخيل
منك كلشي ما خلن اليه
ما خليت الي من حضنك اگدار
طول وگلت اضمنه الرقيه
العزيزه التشبه امك انه يحسين
من اتصيح الي اتصيح الزجيه

خليني اموت وياك بالخيل
من الليل اتاني الثاني الليل
يا بويه اشبگك من تجي عليك
وبظهري تبدي وانسحگ حيل

تسحگني گبلك من تسحگ عليك
جابتني روحي وتعثرت بيك

اشبگني الك مديت اديه يا حسين
انه يالنايم رقيه يا حسين
وتعثرت بيك .. وتعثرت بيك
~~~~
العمر ما يسوه كون عيونك اتغيب
وگلبي اتعود اعله عيونك هواي
من ذاك العصر يحسين اتانيك
طاحت خيمتي وشو انته ما جاي
ولحگتني الرباب وطاحت عليك
فوگك طحنه مثل برودت الماي

ولحگتنه زينب تالي يحسين
عليها النعي وعلينه الونين
نتناوب اعله افراگك انوح
وكل وحده ذبت عالنحر عين

التمينه يمك نبجي ونبجيك
جابتني روحي وتعثرت بيك

اشبگني الك مديت اديه يا حسين
انه يالنايم رقيه يا حسين
وتعثرت بيك .. وتعثرت بيك
°°°°°°°°°°°°°°°°°°°°°°°°°°°°°°°°°°

مشاهدة "زوارنا علي وياكم _ الرادود مسلم الوائلي _ هيئة نور الزهراء ع 2022" على YouTube
https://youtu.be/yxnSolXicI0

مشاهدة "زوارنا علي وياكم _ الرادود مسلم الوائلي _ هيئة نور الزهراء ع 2022" على YouTube
https://youtu.be/yxnSolXicI0

رد ملا مسلم الوائلي على كل من تهجم على قصيدته لو ما عيون العباس
https://vm.tiktok.com/ZMFdKLksN/

ثاني رد من ملا مسلم الوائلي
https://vm.tiktok.com/ZMFdKUVbf/

📜 القصيدة: رفع الشبهات
🎤 أداء: مسلم الوائلي
🖋 كلمات: علي البو حمد الموسوي
~~
بعد ما نجامل واحنه اهل الشجاعه
بعقائد نقابل كل حجي الجماعه
مو بغضاً بأحد      بس هذا معتقد
ولازم نخلي حد    برفع الشبهات
~~~~
الليله خل ننفي الكلام الماله داعي
والمربيته المجالس هذا واعي
هاشمي وسيد زمانه وجده تاجر
ياهو اليصدگ محمد جان راعي

راعينه دارت .. ونظرنه صارت
معناها معقول
ما الها داعي .. ولو گلنه راعي
انفسرها مسؤول

من كلمة يهجر للغيبه استقراء
جم حاقد يعصر بضلوع الزهراء

خديجه بزمنها لازم التجاره
ودخلها وضمنها واعلن انتصاره
نذكرها عن عمد     بس هذا معتقد
ولازم نخلي حد     برفع الشبهات
~~~
ثاني شبهه من المؤرخ ودعائه
امي ما يعرف كتابه ولا قراءه
يعني من ام القرى منبع محمد
والله خلاه حاكم بأرضه وسمائه

شبهة منافق .. تنفي الحقائق
صاحبها ننفيها
وحي الله شاهد .. گال اقره رايد
شرعيه ينطيها

من باب الذكرى هاك اخذ البرهان
الما يعرف يقره معجزته القرآن

محمد رساله ياهو ينسه فضله
صفاته وكماله بيها يحجي الله
ام القرى قصد      بس هذا معتقد
ولازم نخلي حد    برفع الشبهات
~~~
خل نسولف عن حليمه بكل شجاعه
وبالمصادر ننفي موضوع الرضاعه
اسلمت من اعلن الهادي النبوه
يعني ظل عد امنه وهايه قناعه

واضح قصدهم .. نكشف حقدهم
للقصه مضمون
الناقل تعمد .. رايد محمد
مو طاهر يكون

شگد نكروا فضله وطعنوا بالتنزيل
رادوا نور الله ينظم بالغربيل

الكتاب اعله موسى حرم المراضع
ومحمد دروسه عنها ما ندافع
ما تنعقل ابد         بس هذا معتقد
ولازم نخلي حد    برفع الشبهات
~~~~
المصيبه الكبرى نكران الوصيه
رجعوا بدين النبي اعله الجاهليه
الله گلهم افأن مات انقلبتم
ونقلبتم صارت اباب الزجيه

هتكوا حرمته .. وخانوا عترته
وندفعت الباب
هاي الصحيفه .. وتبقه السقيفه
اتسميهم اصحاب

والهادي اختصه الخالق بالتعيين
بحيدر من وصه گال اكمال الدين

شكثر ما تزايد زمرة الضلاله
بعلي الباري رايد تكمل الرساله
ما نستمع بعد       بس هذا معتقد
ولازم نخلي حد    برفع الشبهات
~~~
كافي نسكت واحنه وادم جعفريه
والله منطينه الحسين اعظم هديه
بوجهه كون الظالم اتگله انته ظالم
حته ما يسحگ عله ضلوع الزجيه

هاي القضيه .. والشقشقيه
اتبين منو الخان
وشفنه الخلافه .. افلان بصلافه
يسلمها لفلان

الحق بهالحاله يضيع وما ينشاف
واليملي اسلاله يبقه اعله الاعراف

وعينه وكشفنه منو صح طريقه
لذالك هدفنه نظهر الحقيقه
وما نخلف الوعد     بس هذا معتقد
ولازم نخلي حد      برفع الشبهات
°°°°°°°°°°°°°°°°°°°°°°°°°°°°°°°°°°°

📜 القصيدة: يرضاها الله
🎤 أداء: مسلم الوائلي
🖋 كلمات: عباس طالب السعيدي
~~~~
يرضاها الله الشيخ ايبات بالهيمه
لا خوان وياه لا ناس لا خيمه

لأخر گاع ام عون اتلمه
وحسين ولا خلص جسمه
يرضاها الله الشيخ ايبات بالهيمه
~~~~
من غمض عيونه ركضوا يذبحونه
طاح وعليه ركضت زلم ياهو اليجي يذبحه
واحد كسر ضلعه والميت يسمعه
واحد اجه شايل رمح وبگلبه حط رمحه

عاده عند اليذبحون مره الينذبح مره
جا شو بس ابو السجاد مذبوح اثنعش مره
وحگ جدي انه عطشان حجاها وحافر بصدره

طلعت من الخيمه ابنيته
وهدوا كلهم عالترجيه
صاحت ترضاها شلون انته
غربه يشتمون العلويه

بين الخيمه وبين حسين شافوها
مو بس همه عليها الخيل هدوها

گاع الله انترست من دمه
وحسين ولا خلص جسمه
يرضاها الله الشيخ ايبات بالهيمه
~~~
شافوا ابو سكينه حرك رمش عينه
گالوا بعد عوزه ذبح جي من ضوه المنحر
محبس لگوا بيده وكلمن اله يريده
بالخنصر مجلبه الزلم وتگطع من الجر

رجع يتأكد الذباح عدل لو ميت يشوفه
والاصعب من اجه لحسين عثر بالگطعوا اجفوفه
ذاك الحته من اينام ما ينعبرن اطيوفه

زينب تمشي المن محتاره
وحدها وهمه هواي اخوتها
عثرت حته بعون وگامت
يم حسين تضم طيحتها

وصلت يمه وجانت حيل مهمومه
من شافت ناس يسلبون بهدومه

شافت حته الصوت يلجمه
وحسين ولا خلص جسمه
يرضاها الله الشيخ ايبات بالهيمه
~~~
گالتله حاجيني وعليك دليني
هو انته طايح عالگفه لو عالوجه روحك
گد ما نزف دمك ما اندل بجسمك
ما دورت بيدي خفت لا الجم جروحك

ادور بيك عن حسين وينك يالمگابلني
اول مره هاي تصير اجي وما ترضه تشبگي
جا المن خذاك الموت غير وياك ياخذني

گالت هاك ايدي وگومني
هاي اول مره اترجع ايدي
شيب افراگك لاح اخيالي
شمعطلك يا خال اوليدي

من گد ما دورت عليك يالغالي
مو بالراس الشيب الگاه بخيالي

دورت الطف لأخر نجمه
وحسين ولا خلص جسمه
يرضاها الله الشيخ ايبات بالهيمه
~~~
شو من گمت عنك شايفني ما جنك
لا گتلي ضلي هنا بعد لا جلبت بيه
اختك مصيبتها كلها بعبايتها
اسحگ عباتي بالمشي يعين الله رجليه

گلت بلكت تگوم وياي مثل كل مره متعوده
گتلك گوم بس الناس گالوا راس ما عنده
وسكت بلكت الله الموت منا للخيم حده

من عفتك ما كضيت ايدي
ولا زتيت اختك للخيمه
يحسين النار برجليه
ويردون اركض بالهيمه

انه الدللني العباس تاليها
تركض بالبر مجويات رجليها

خلص عمري بضيم ولجمه
وحسين ولا خلص جسمه
يرضاها الله الشيخ ايبات بالهيمه
°°°°°°°°°°°°°°°°°°°°°°°°°°°°°°°°°°

مشاهدة "يرضاها الله الشيخ يبات بالهيمه | ملا مسلم الوائلي" على YouTube
https://youtu.be/btHFLy1Rrs0