📜 القصيدة: ما بيك غير العافيه
🎤 أداء: مسلم الوائلي
🖋 كلمات: حسن الترابي
~~~~~~~~~~~~~~~~
تعبان خويه شلونك يلما مغمض عيونك
ما بيك غير العافيه ما بيك غير العافيه
~~~~~~~~~~~~~~~~
بالخيمه يا خويه ورجف گلبي وطلعت اركض
عالتل وگفت مدوهنه گوه الگلب ينبض
ما اريدك تشوف اختك بنص الغرب غمض
لزينب يبو سكينه شكثر جانت زلم تعرض

لحگي اعله اخوج ولونه
جم خطوه ويذبحونه
ما بيك غير العافيه ما بيك غير العافيه
~~~~~~~~~~~~~~~~
شفتك تلوج اعله الرمل شيبك سبح بالدم
من كل كتر تنزف جنت بس انته ما مهتم
ضايع جمالك بالسحگ ومفطر المبسم
الف وتسعمية جرح يبن امي ما تنشم

عالرمله صاير نومك
ومطشرات ارسومك
ما بيك غير العافيه ما بيك غير العافيه
~~~~~~~~~~~~~~~~
من بعيد اشوفك تومي الي ونص طولك مطشر
كلما تهم روحك تريد اتگوم الي وتعثر
ادري الرمل يجوي الگلب وادري بيك امعور
معذور ظل بنومتك لا تلجم اكثر

هونك يخويه بروحك
كلش جبيره جروحك
ما بيك غير العافيه ما بيك غير العافيه
~~~~~~~~~~~~~~~~
طشرنه عاشور وبعد باگ العشگ غفله
عفت الرباب ويه المهد تبجي اعله عبدالله
من طولك الثوب انسلب حافر عليه صله
اسم الله اعله گلبك والعطش ما يعرف اسم الله

عطشان تجري دموعك
ومطشرات ضلوعك
ما بيك غير العافيه ما بيك غير العافيه
~~~~~~~~~~~~~~~~
بالخيمه شفتك من طحت عالغبره من مهرك
عيونك عليه وملتهي حافرهم بصدرك
وداعت عشگنه وخوتك وداعت علي وصبرك
اتمنيته نحري الينگطع ولا ينگطع نحرك

خاطر تضوگ غيابك
وتتغرب ويه ثيابك
ما بيك غير العافيه ما بيك غير العافيه
~~~~~~~~~~~~~~~~
كل البنات من الخيم يم نحرك ألتمن
ليك بدربهن من بگاياك شكثر لمن
شبگن عليك من الهظم وجروحك ألجمن
وفي دارن عليك وبجن عن الشمس وگفن

لا خيمه ولهه انشيلك
ما عدنه بس نبجيلك
ما بيك غير العافيه ما بيك غير العافيه
°°°°°°°°°°°°°°°°°°°°°°°°°°°°°°°°°°°°°

📜 القصيدة: هذا لطمنه كل سنة
🎤 أداء: مسلم الوائلي وعلي الوائلي
~~~~~~~~~~~~~~~~
هذا لطمنه كل سنه
... عله حسين وولاده
عالظل غريب بكربله
... عله حسين وولاده
ومحد فزعله وغسله
... عله حسين وولاده
حيهم تصيح السادة
... عله حسين وولاده

وهذا لطمنه كل سنه عله حسين وولاده
~~~~~~~~~~~~~~~~
عالصاحت الحگ يا علي
... عله حسين وولاده
ما ضلي واحد من هلي
... عله حسين وولاده
ضليت تالي بلا ولي
... عله حسين وولاده
راح اليگلي ادللي
... عله حسين وولاده
لا من هلي ولا محملي
... عله حسين وولاده
شيردهم الهداده
... عله حسين وولاده

وهذا لطمنه كل سنه عله حسين وولاده
~~~~~~~~~~~~~~~~
وهنانه كسران الظهر
... عله حسين وولاده
عالراد يمشي وما گدر
... عله حسين وولاده
وباب المخيم عثر
... عله حسين وولاده
من ركضته الصوب النهر
... عله حسين وولاده

هوسوا بيها ويحسين العمامه
وهذا لطمنه كل سنه عله حسين وولاده
~~~~~~~~~~~~~~~~
حشمت من فوگ الهزل
... عله حسين وولاده
يحسين ميت لو عدل
... عله حسين وولاده
مشي الغرب ما ينحمل
... عله حسين وولاده
والناگه ما فوگاها ظل
... عله حسين وولاده
شما توگف يجرها النذل
... عله حسين وولاده
وضعنك غريب الگاده
... عله حسين وولاده

وهذا لطمنه كل سنه عله حسين وولاده
~~~~~~~~~~~~~~~~
عالسلبوها بنينوى
... عله حسين وولاده
مختنگه ودور هوه
... عله حسين وولاده
ويه الخيل نتراكض سوه
... عله حسين وولاده
لحگوني المخيم دوه
... عله حسين وولاده
فوگاي طاح ارماده
... عله حسين وولاده

اليعدل الميله يهل عدنان راح
وهذا لطمنه كل سنه عله حسين وولاده
~~~~~~~~~~~~~~~~
المفروض كل يوم الدمع
... عله حسين وولاده
واللطم لازم ينسمع
... عله حسين وولاده
وسحگت الخيل اعله الضلع
... عله حسين وولاده
طايح جبير الساده
... عله حسين وولاده

ادوس خياله فوگ حسين اخونه
وهذا لطمنه كل سنه عله حسين وولاده
~~~~~~~~~~~~~~~~
دارت الخيل اعله الخيم
... عله حسين وولاده
يا ناس والحيل انهدم
... عله حسين وولاده
ويلي اعله عباس بسهم
... عله حسين وولاده
والقتل صاير عاده
... عله حسين وولاده

احترگت خيمت زينب جا وين العباس
وهذا لطمنه كل سنه عله حسين وولاده
~~~~~~~~~~~~~~~~
يا ناس طگ گلبي وعلي
... عله حسين وولاده
وي ظهري مايل محملي
... عله حسين وولاده
يا غربتي بديرة هلي
... عله حسين وولاده
زينب اجت نشاده
... عله حسين وولاده

حرگوا اخيامي وخل يلحگ علينه
وهذا لطمنه كل سنه عله حسين وولاده
~~~~~~~~~~~~~~~~
نلطم اجينه من السبي
... عله حسين وولاده
ونسوان تبجي بموكبي
... عله حسين وولاده
وتراب متروسه العبي
... عله حسين وولاده
وعالهظم عدهم عاده
... عله حسين وولاده

وهذا لطمنه كل سنه عله حسين وولاده
~~~~~~~~~~~~~~~~
سوينه مجلس بالدرب
... عله حسين وولاده
تشتمنه يا ديره النطب
... عله حسين وولاده
وما ينحمل حجي الغرب
... عله حسين وولاده
والحرگ وين اضماده
... عله حسين وولاده

صعدت الناگه تعور ظهر اخيتك
وهذا لطمنه كل سنه عله حسين وولاده
~~~~~~~~~~~~~~~~
نسوان ذني اجمعن
... عله حسين وولاده
وبين الگبور اتوزعن
... عله حسين وولاده
لطمن وكلش جزعن
... عله حسين وولاده
وتراب گبرك ناده
... عله حسين وولاده

وهذا لطمنه كل سنه عله حسين وولاده
°°°°°°°°°°°°°°°°°°°°°°°°°°°°°°°°°°°°

📜 القصيدة: ساعي بريدك
🎤 أداء: مسلم الوائلي
🖋 كلمات: علي أكبر الغرابي
~~~~~~~~~~~~~~~~
يخلص ألم تبدي بألم
ساعي بريدك يا سهم
للعسكري جرحك رسم
دمعات بعيونك دمعات بعيونك
~~~~~~~~~~~~~~~~
يا ابو صالح .. اشايل بگلبك ألم
لو جبل جان انهدم
ليش عينك تبجي دم .. يا ابو صالح

شباقي من ايامك وذيج امنياتك
حته اگلك سيدي الباقي بحياتك
عايش اعله الله وسوالف ذكرياتك
وجم جرح ضميته يالمهدي بعباتك

من عادت اليفگد ابو
بحساسه ما تلگه دفو
يل من حنانك وين اكو
عالآه خيعونك دمعات بعيونك
~~~~~~~~~~~~~~~~
والله دنيه .. الفاگد اعزازه يحس
ميته بعيونه الشمس
الباگت احلامك امس .. والله دنيه

وحگ جرحك والسنين الهاجرتهن
يمك جروحي فشل لو سولفتهن
شگد عزيزه دموع عيني وما بعتهن
غاليات ويم دمعتك رخصتهن

يا قل هو الله أحد
دلالك شيحمل بعد
من الدمع ما ضلي خد
كلما يذكرونك دمعات بعيونك
~~~~~~~~~~~~~~~~
يا امامي .. يا اخر اسهام الزمن
لمن فارگت الحسن
جنك مفارگ وطن .. يا امامي

ليش يا يوسف زماني الغربه دارك
وعين جم يعقوب عاميهه انتظارك
تدري مو عاشگ الما جاويته نارك
الدنيه ليل بعيني وتأمل نهارك

يا سيدي بهذا الوضع
صوت المواجع ينسمع
يكفيها عينك يا دمع
والشيب بجفونك دمعات بعيونك
~~~~~~~~~~~~~~~~
من عرفتك .. ليل ما يعرف صبح
جرح ما يشبه جرح
باب وخيام ورمح .. من عرفتك

مدري دمعة عينك الضلع الزجيه
مدري تبدي جروحك من الغاضريه
شلونه حالك عالمشت بالطف سبيه
يعينها الله جروحك بكل مغربيه

بحساسك تشوف العبي
واليحدي بالناگه اجنبي
يالمهدي جنك بالسبي
ودمعات بعيونك دمعات بعيونك
~~~~~~~~~~~~~~~~
والله حيره .. يا مصيبه بصفنتك
الها تنزل دمعتك
فاطمه لو عمتك .. والله حيره

تستراح من البواجي شما تحاول
تعرض ابالك النوگ بلا محامل
وبين زينب والشمر راس ابو فاضل
وتعاتبوا بدموعهم مو بالرسايل

ما تستراح من الدمع
عمرك مثل نار وشمع
وتنوح مدري اليا ضلع
لو گتلك شلونك دمعات بعيونك
°°°°°°°°°°°°°°°°°°°°°°°°°°°°°°°°°°°

📜 القصيدة: حلم زماني
🎤 أداء: مسلم الوائلي
~~~~~~~~~~~~~~~~
حبيبي حسين حبيبي حسين
~~~~~~~~~~~~~~~~
يمر خيالي بالضعن
وشوفه خالي للوطن .. يروح
وتجينه زينب يا حزن
گلبها يلهب والمتن .. ينوح

شگلها يا گلب واجتنه من يسر
بنات ابو الحسن سباهن الشمر
هظيمه يا علي تفرهد الخدر

ميت حبيبي وضعنه يروح
بين جروح غربه ودمع
متعمده يمه تروح الخيل
وترد حيل فوگ الضلع
~~~~~~~~~~~~~~~~
حلم زماني ما رحت
يا وادم انه اتأخرت .. عليه
دليلي ذايب والعمر
حبيبي غايب ينتظر .. يجيه

من اجاني بالحلم دليلي ما حمل
اتاني جيته وعيشن بأمل
نساني لو بعد يجينه لو رحل

ليله اعله ليله الشوگ ايزيد
گلبي يريد لو بس نفس
ليله اعله ليله يذوب الحيل
وسهر ليل حاجيني بس
~~~~~~~~~~~~~~~~
حزن سباني لو احب
يوادم انه انسلب .. هواي
المصيبه هيه هالدهر
حمل عليه ونكسر .. گفاي

سباني هالدهر جرح يلم جرح
الفگدته من امس اجاني عالرمح
حسافه يا گلب حبيبي منذبح

شيخ الهواشم ظل اهناك
ومتاناك مابي نفع
راح اليحس بزينب راح
فوگ ارماح آ يا فجع
~~~~~~~~~~~~~~~~
عله السبيه والخدر
حراره بيه تستعر .. لهيب
اجو خذوها بالدرب
صريع اخوها بالحرب .. غريب

كتبلي بالهوه جبيره هظمتي
احشم بغرب ونادي يخوتي
ولا بشر فزع سبتني محنتي

ما لاگت ولا راح اتلوگ
فوگ النوگ ضعنه انوله
هيه المصيبه الماله اخوان
ماكو انسان يتحمله
°°°°°°°°°°°°°°°°°°°°°°°°°°°°°°°°°°°°

📜 القصيدة: راح الحسن
🎤 أداء: مسلم الوائلي
🖋 كلمات: محمود الموسوي
~~~~~~~~~~~~~~~~
يبن الحسن راح الحسن راح
وجادر حسينك بعده ما طاح
عالناگه زينب رايحه
ما مر ضعن بالفاتحه
روس الهواشم فوگ الرماح
~~~~~~~~~~~~~~~~
الله يعينك سيدي الفاگد
وحدك گاعد .. راح ابوك من ايدك
يالمهدي توجع طيحت الوالد
ما الك واحد .. والمصيبه اتريدك

راح ابوك وظلت عيونك غريبه
من مصيبه اتگوم وتطيح بمصيبه
عله مصاب حسين عينك بيها شيبه

بالفاتحه وما مرتك ناس
ما مر ضعن بي راس عباس
بدموع عينك شابحه
ما مر ضعن بالفاتحه
روس الهواشم فوگ الرماح
~~~~~~~~~~~~~~~~
راح الحسن وتبدن عيونك
تعبن امتونك .. طول ابوك اجنازه
ظهرك بهجره انكسر حيله
گلبك الليله .. مفارگينه اعزازه

الماله بالدنيه ابو عيونه يتيمه
وطيحت الوالد تره من ايطيح خيمه
البيت اذا مابي اهل معناها هيمه

امك دمعها محني كل باب
بس الحسين الظال عالتراب
گلبك حسين الجارحه
ما مر ضعن بالفاتحه
روس الهواشم فوگ الرماح
~~~~~~~~~~~~~~~~
يالمهدي عينك دمع ما بيها
فراگ اهاليها .. هو شيب عينك
فگد الحسن يالمهدي هد حيلك
خلصت ليلك .. تنحب اعله حسينك

الفاتحه بگلبك تره كلش جبيره
مثل ابوك حسين ظل بلا عشيره
لاجن حسينك تره انشال بحصيره

جرحك شكبره بذيج الايام
حسينك مطشر يم الخيام
وبضعنه يمشي الذابحه
ما مر ضعن بالفاتحه
روس الهواشم فوگ الرماح
~~~~~~~~~~~~~~~~
شلت الجنازه وشابت جروحك
يا حزن روحك .. هذا ابوك الغالي
اليدفن ابو يدفن وطن بيده
وعمته اتريده .. زينب بلا والي

الله يعينك عالهجر والغربه هايه
هلبت يمرك ضعن جايب سبايه
هاي زينب عمتك ما عدهه رايه

هجر الابو يتعبها المتون
ما بيك تتلگاها الضعون
من الناگه زينب طايحه
ما مر ضعن بالفاتحه
روس الهواشم فوگ الرماح
~~~~~~~~~~~~~~~~
الله يعينه الابو ما عنده
ومحد يفگده .. واليتم بعيونه
اليشتاگ لهله وغربته بعينه
تنزف سنينه .. وحزنه تارس لونه

الماله والد يختنگ كل مغربيه
شلون بالماتوا هله بالغاضريه
تمشي زينب عمته بناگه وسبيه

يالمختنگ لجماتك هواي
بالشمس زينب رايده افياي
شيبات راسك واضحه
ما مر ضعن بالفاتحه
روس الهواشم فوگ الرماح
°°°°°°°°°°°°°°°°°°°°°°°°°°°°°°°°°°°°

📜 القصيدة: يا گلبي جذاب السهر
🎤 أداء: مسلم الوائلي
🖋 كلمات: حمزة الحسناوي
~~~~~~~~~~~~~~~~
جنهم يعوفوني وتتباوع عيوني
بلكت يصيحوني والضعن سار
~~~~~~~~~~~~~~~~
عالفرگه وبعيد الدرب گوه الله حيلي وحيلكم
تانيتكم حد ما گمت ما بيه حيل ابجيلكم
حسبالي نترافگ سوه ولميت كل جروحي
دوروا الرسايل لو اجت تلگون بيهن روحي

هذا الهوه الجاي كلساع اسئله
هم لاگتك ناس من عندك احله
لو يغفه دمعي بليل اگعده
خل تطلع الروح عندي انتم اغله

ما بيه عالفرگه وبعازت الشبگه
ليليه محترگه وشتعل نار
~~~~~~~~~~~~~~~~
يا گلبي جذاب السهر ما جاب غير احلامك
هم انعم الله اعله الحلم جي جابهم گدامك
المن بعد هاي الشمس تطلع هلي وعافوني
جان بعلي الأكبر گبل يبدي الصبح بعيوني

ظلمه الصبح صار لا شافت العين
من جانوا وياي ذاك الصبح وين
لمتنه ونشوف ضحكات الزغار
ومصابح الخير من حلگ الحسين

ما فارگوا بالي كل الضعن غالي
لو امشي هنيالي وي الزغار
~~~~~~~~~~~~~~~~
شتسوي بيكم كربله يحسين اشوفك حاير
وداير عيونك عالعبي لا سامح الله شصاير
كلما اگلك كربله تشبگ خواتي شبيهن
محد مسولف عالعطش وتگلي ماي انطيهن

حاجوني شيصير بيكم ترجيت
عالهودج هواي باوعتوا عالبيت
صحت اخر اوداع بس ما طلع صوت
من سدوا الباب بالجلمه غصيت

خل تخلص ايامي ذوله اهلي گدامي
من عثرت اجدامي بيكم اشصار
~~~~~~~~~~~~~~~~
يا عيني شيفيد الدمع ما دامهم عافونه
من گتله ترجع شو مشوا ودنگ وغطه عيونه
مو مالت انعاف وعلي گلبي اعله گد جروحه
ثاري اليموت من البعد مو اله تطلع روحه

وي دمعي بليل شديت الحزام
من رحتوا والبيت ما ينحمل گام
اخذوني لو طاح مذبوح الحسين
وي عمتي انشيل من جسمه السهام

اخذوني اتجيله من ينهدم حيله
نتگابل انشيله ويمه نندار
~~~~~~~~~~~~~~~~
انه ادري شيصير وعلي هذا السفر اذاني
بزاني گلبي من شفت واحد يودع الثاني
وصيت عمي اعله الحرم بس لا تمرهن خوفه
بس گتله عينك عالعلم دنگ وكض جفوفه

هذا الضعن راح وانه ادري مكتوب
مو نفس الوجوه من يرجع النوب
ادعولي بالموت كلما تصلون
جا ليش الفراگ من عمري محسوب

هذا البعد موتي والفرگه تابوتي
ما ينسمع صوتي هاي الأخبار
°°°°°°°°°°°°°°°°°°°°°°°°°°°°°°°°°°°°

📜 القصيدة: يا حيل زينب
🎤 أداء: مسلم الوائلي
🖋 كلمات: علي مالك الموسوي
~~~~~~~~~~~~~~~~
فتح عيونك لا تغمض
شما ردت احبك خيل تعرض
جا بعد عدمن ناس تفرض
يا حيل زينب خلص يا شوف بالعين
شلعان گلبي ابتده من غمض حسين

برجولها بنيتك حريجه
وام عون لجمتها غميجه
وعبد الله ما صادفني ريجه
مذبوح طير السعد ما شاف جيله
و حسين دم الولد تارس شليله
~~~~~~~~~~~~~~~~
شيال راسك موش كواك
شما باوعتنه گبل فراك
ما يدري بيه معلگه وياك
برماح شالوا عزيزي حسين عمداً
والشوگ من راس ابو الأكبر تبده

جا مالهم وياك ذوله
يا حلو يلما بيك لوله
بيه بجي مشتهيه اگوله
يا كون كل الحجي البگلوبنه يهون
يحسين موش الدمع خلصنه العيون
~~~~~~~~~~~~~~~~
يذبل الميت كون راوي
ذبحوك بس ضليت ضاوي
تندارلك فدوه العلاوي
يا فدوه كل الخلگ تندارلك هاي
يا ماي زينب وسف جتالنه الماي

مشطت بدموعي لحيتك
بس راس وتحبني لگيتك
من الله يحسين اشتريتك
بس راس خويه ولگيتك فاگد ام عون
وشلون ضليت اصيح عليك بشلون
~~~~~~~~~~~~~~~~
سعرك بگد عباس واغله
وانته اليحدد سعرك الله
صليت والله عليك صله
عباس غالي وغلاتك هاي منه
يخوان گلبي ويشريان المحنه

تعبان يخرب بيتي اعوفك
شما افتح القرآن اشوفك
مقدرين يا نشمي ظروفك
تعبان متعيني خويه عليك مهظوم
حسين گام اعله ضيمه يطيح ويگوم
~~~~~~~~~~~~~~~~
وعلينه دگ الباب سايل
گتله عزيز البيت شايل
يا خويه توجعني الرسايل
شايل عزيز الگلب والضال محتام
وشلون نبدي الشبگ وبصدرك اسهام

من ظلم الليل اعتنيتك
مذبوح يبن امي دريتك
طايح جبير الساده يا ناس
وحسين ظل بعازه عباس
°°°°°°°°°°°°°°°°°°°°°°°°°°°°°°°°°°°°

📜 القصيدة: نركض بين الخيل
🎤 أداء: مسلم الوائلي
🖋 كلمات: حسن الترابي
~~~~~~~~~~~~~~~~
نركض بين الخيل ونعثر
وين حسين اندور بالبر
گالوا مذبوح ونريد انروح
يمه ونعثر يمه ونعثر
~~~~~~~~~~~~~~~~
نمشي خطوة وخطوة نوگف
تهنه بين حسين والطف
... ياهو اليدلينه بيه
خلي ايدج بيدي عمه
لا نضيع الدنيه ظلمه
... وحرنه ننشدمن عليه

نمشي ما ندري الدرب ماخذنه وين
يا ذبيح انشبگه يطلع مو حسين
وي الهوه من كل كتر نسمع ونين
ضعنه مثل الشيب بالدم والتعب ضيعنه اكثر
گالوا مطشر عشگنه ولا كتر من المطشر

تعبنه النوح گالوا مذبوح
ونريد انروح يمه ونعثر .. يمه ونعثر
~~~~~~~~~~~~~~~~
نركض ادواره اعله ملگه
هلبت الله تلمنه شبگه
... واليلم اللهفه غاب
ما وصلنه وصرنه نذبل
ولا وحي من بعيد الي التل
... بلكي عد التل جواب

عمه ذاك التل شفت زينب عليه
شافت حسين ولگت خوتها بيه
اشرت والخيل فوگه وشال اديه
عمه خل نصعد سويه بلكي نندل وين طايح
الظلمه ما تحجبنه عن حسين من الشيب واضح

ديره من جروح گالوا مذبوح
ونريد انروح يمه ونعثر .. يمه ونعثر
~~~~~~~~~~~~~~~~
بالهوه اندور اعله عطره
بلكي ياخذنه اعله صدره
... ويمه نگعد نستراح
الدنيه دم فوگانه تمطر
وبالترب لاگانه خنصر
... يمكن من اجفوفه طاح

عمتي لزمت گلبها وخفنه حيل
يلمع الدم عالرمل والدنيه ليل
ضلوع هاي اعله الثره مطشرتها خيل
مو غريب الدم علينه وهذا دم حسين جنه
راح يمكن بالحوافر وكلشي ماظل النه منه

بس عطره يفوح گالوا مذبوح
ونريد انروح يمه ونعثر .. يمه ونعثر
~~~~~~~~~~~~~~~~
شفنه طوله بلايه طارف
گاضي دمه وگلبه ناشف
... ولا كتر مابي جرح
صدره وي ثيابه ضايع
حته ما لحگ ينازع
... مهله ما خله الذبح

الخيل مو بس مره داست عالحنين
الخيل فوگاه ركضت اركاض السنين
موش حافر واحد بصدره اربعين
كلشي ماهوه بمجانه لا ضلع لا رگبه ضلت
الملامح مو ملامح الدنيه فوگ حسين ركضت

ما ظلت روح گالوا مذبوح
ونريد انروح يمه ونعثر .. يمه ونعثر
°°°°°°°°°°°°°°°°°°°°°°°°°°°°°°°°°°

📜 القصيدة: يالرضا اشتاگيت
🎤 أداء: مسلم الوائلي و علي الوائلي
🖋 كلمات: محمود الموسوي
~~~~~~~~~~~~~~~~
يا علي ابن موسى الرضا يا مولاي
~~~~~~~~~~~~~~~~
ليلك واهس بجي وشوگ وزياره
يالرضا اشتاگيت اشوفك بيه حسره
حسرة الاعمه الفتح عينه بمناره
وحسرة الما زارك وما شاف حضره

يمر كل يوم ازورك وانه بالبيت
الضريحك يالرضا والزهره حنيت
بالمبجيني دوم بمجلس حسين
الحمام يزور گبرك وانه ما اجيت

مشتاگه روحي هواي
شوگ العطش للماي
ذابحني هجرك حيل
وحسبني يمك جاي
~~~~~~~~~~~~~~~~
تهظم الوحدك يبو الغربه الطويله
ماكو يم گبرك عمام وديره غربه
حته معصومه اخيتك هم غريبه
والأخت من دون أخو مولاي صعبه

يمن گبرك غريب وساكن بعيد
اجيتك والدمع يرسم تجاعيد
انه الضايع ودور عنك هواي
اليشوفك يالرضا بالدنيه شيريد

ابجي اعله طاري اجفاك
خليني اموت وياك
مشهد و عيشك طيف
تاخذني روحي هناك
~~~~~~~~~~~~~~~~
يالرضا سنيني اعله بابك بيها عازه
عمتك زينب بعدهي بناگه هزله
يمته اشوفك هجرك متعبلي روحي
گبرك الفارگته گالوا صاير احله

اسافر محترگ وبجيلك عيون
واطيح اعله الگبر گبل اليطيحون
اكض شباجك واسمع حجي السوگ
اكو ناس برقيتكم يشتمون

يهظمني حجي الناس
وانه اكتب العباس
سلب رساله الماي
ولحسيني سالب راس
~~~~~~~~~~~~~~~~
انه ما باجي اعله غير حسين مره
لغير زينب الله لا ينطيني دمعه
الطم بگد ما خذت صدره الحوافر
حسين ليش بكربله مطشرين ضلعه

الصدگ هذا الهظمني وتعب الحيل
أثر للجثه ماكو ويه المجاتيل
لگو أثار جسمه بصف الخيام
شكثر بحسينكم جا سحگت الخيل

يم گبرك ابجي وانوح
سحگوا عله المذبوح
آه يالرضا المشتاگ
يفهم حجي المجروح
~~~~~~~~~~~~~~~~
سيدي ارزقني اموتن كون يمك
بداعت المحترگه ومن الناگه طاحت
انه يم شباجك معلگ سؤالي
وين زينب گعدت و وين استراحت

حجي الديوان هاظم زينب هواي
كسر ظهري سؤال الغربه مولاي
منو هاي العليها اثار دخان
لأن يدرون زينب بت علي هاي

عالناگه هاي منين
مذبوحه جنها حسين
متغيره بالعباس
واخوتها مذبوحين
°°°°°°°°°°°°°°°°°°°°°°°°°°°°°°°°°°°°

مشاهدة "يالرضا اشتاكيت : ملا علي الوائلي : ملا مسلم الوائلي 1443ه‍" على YouTube
https://youtu.be/oZYmxs_IN7M

📜 القصيدة: گالوا راحت
🎤 أداء: مسلم الوائلي
🖋 كلمات: محمد الزيدي
~~~~~~~~~~~~~~~~
گالوا راحت منك زهره
من عدهه وكضتني الحسره
من عدهه وطاحت سالفتي
مدري انه الميت مدري انتي
گالوا راحت گالوا راحت
~~~~~~~~~~~~~~~~
تيه دليلي افراگج يالزهره وتوازيت
انه الأدلي الوادم گمت انشد اعله البيت
يم الحسن مدري شلفاني
من گالوا ام الحسن راحت
صيحت دلوني اعله بيتي
عيني اعله درب الگاع طاحت

ضاع العمر والشوف بفراگج ضاع
يثمنطعش يالرحتي من عندي ابساع
انه المگوم السبعه جا ليش الناس
يگوموني من الگاع وتردني الگاع

وضيم الفرگه بگلبي اشكبره
من عدهه وكضتني الحسره
من عدهه وطاحت سالفتي
مدري انه الميت مدري انتي
گالوا راحت گالوا راحت
~~~~~~~~~~~~~~~~
يا رايح ويا راجع شو تاه مني الراي
يا گايم ويا طايح آ يا ثگل مگفاي
انه الخذوا من روحه روحه
انه المجويه الشمس ريته
انه المبجي الناس ضيمه
انه اليدلوني اعله بيته

ميت گبل لا اموت وجروحي اكبار
جا علي موش بسيف مات ب بسمار
ضاع العمر من كسروا ضلوع الماي
وبيت النده تخرب معانيه النار

طاح المحسن فوگ الغبره
من عدهه وكضتني الحسره
من عدهه وطاحت سالفتي
مدري انه الميت مدري انتي
گالوا راحت گالوا راحت
~~~~~~~~~~~~~~~~
فاگد يلوذ بفاگد هاضمنه يا طاريج
واحد يصبر واحد والنوب نبجي عليج
زينب تصبرني بونيني
والنوب نتگابل سويه
وحسين ويه الباب يحجي
يالماخذ عيوني من اديه

يم المحنه السالفه تريد جروح
والمثلج شگد لازم عليها انوح
منا وهيج شلون ندخل للبيت
وما نسمع حجاية هله ترد الروح

ويا ضيم الفاگد شيصبره
من عدهه وكضتني الحسره
من عدهه وطاحت سالفتي
مدري انه الميت مدري انتي
گالوا راحت گالوا راحت
~~~~~~~~~~~~~~~~
غسلت بيدي ضلوعج والنفس بالگوات
أثار من دموعج شفته وشفت سطرات
فوگ المغيسل شلت روحي
وغسلت عافيتي بديه
شمسوي بيج الباب ويلي
محدود بسمار المنيه

غسلتج وشفت المصايب والويل
وصافن بقيت وذايبه ارسوم الحيل
الله يعينك يا علي شلون تعيش
اليوم باب وباجر مراكض خيل

ضمتلي الدنيه شجم عثره
من عدهه وكضتني الحسره
من عدهه وطاحت سالفتي
مدري انه الميت مدري انتي
گالوا راحت گالوا راحت
~~~~~~~~~~~~~~~~
يا فرحتي ويا عيدي يا عمري يا ضنواه
ادفن الواهس بيدي ما حسبت ويلاه
ليش التراب يبوگ تعبي
ليش التراب يبوگ عمري
ما اصدگ ادفن بيدي گلبي
ومدري شكبرها جروحي مدري

يم عيني جنتي وخايف شگد عليج
هسه بگبر وحدج يروحي مخليج
يتراب هونك وي ضلعها المكسور
راح امشي بس خاف التراب يأذيج

گتله بهونك وي العصره
من عدهه وكضتني الحسره
من عدهه وطاحت سالفتي
مدري انه الميت مدري انتي
گالوا راحت گالوا راحت
°°°°°°°°°°°°°°°°°°°°°°°°°°°°°°°°°°°°°°