📜 القصيدة: گوم وياي
🎤 أداء: مسلم الوائلي
🖋 كلمات: عباس طالب السعيدي
~~
يحسين اگعد رد وياي
وهناك اعطش وشرب ماي

خل نرد البيتنه ونلتم سويه
مو حبل يحسين خل ايدك بديه
يا خويه .. يا خويه
~~~
جيت بطلب ليك
بي اقسم عليك
وخر التراب من الگبر ونفض عباتك

والطاحن هواي
گوملهن فياي
ركضن سوه وحتارت الگاع ابناتك

جيناك كل احنه سبايه
نبدل الحصيره بالعبايه
والباقيه من حرگ الخيام
يحسين سويناها رايه

يالمذبوح عليك انميل
كون اترد مثل اسماعيل

هاي اول مره احلفك بالخويه
مو حبل يحسين خل ايدك بديه
يا خويه .. يا خويه
~~~
خل نلتم اخوان
ما بينه عطشان
يا ميت ومايك عدل والله هظيمه

يالثوبك تراب
جبنالك اثياب
يالطشروك من الخيم لآخر يتيمه

الناگه لو بيها محنه
يحسين ودتنه لهلنه
بس هيه هم مثل الخرابه
كلساع بالبر طيحتنه

يحسين اول ما عفناك
مثل ضلوعك طحنه وياك

ونشلع گلبي وي ترجية رقيه
مو حبل يحسين خل ايدك بديه
يا خويه .. يا خويه
~~~
ما تگعد شلون
وانه اختك ام عون
مثل الشمس وجه وگفه مشتعله روحي

الما يگدر ينوح
من گلبه مذبوح
صاحتلي حته المگبره وگالتلي نوحي

يحسين والناس بغربتي
سئلوني جم مره ركضتي
بالغريه اكثر شي هظمني
من ابجي ويگلولي سكتي

يله امشينه لذاك الليل
لا بي نار ولا بي خيل

كون أردن لا غريبه ولا سبيه
مو حبل يحسين خل ايدك بديه
يا خويه .. يا خويه
~~
الخنصر لگيناه
والراس جبناه
بس الضلوع مطشره ولمتها صعبه

وين ابجي ورتاح
والوادم اصياح
ما ميته من كثر العطش ميته انه غربه

گد ما رمل بعيوني الأثنين
ما ظل مجان الدمعة العين
لو تگعد تگابلني مگبل
لو للخرابه ارجع يالحسين

راسك جبناه حته انروح
خل نعتبرك ما مذبوح

اسمي بس تگوله يرجع كلشي بيه
مو حبل يحسين خل ايدك بديه
يا خويه .. يا خويه
~~~~
انته انسه الخيام
وانسالك الشام
ونرد لهلنه بلا سبي والحادي عباس

لا هزل النوگ
لا ندخل بسوگ
ديرتنه ما بيها ركض وتباوع الناس

لو أيد ابو فاضل بدينه
جا والله ما ضحكوا علينه
لو ندري مو ترفه الحصيره
جا جبنه تابوت من اجينه

يل نص جسمك ما مدفون
ومطشر دمعات عيون

ردتك اتگابلني وتسولف عليه
مو حبل يحسين خل ايدك بديه
يا خويه .. يا خويه
°°°°°°°°°°°°°°°°°°°°°°

📜 القصيدة: يساره الشام
🎤 أداء: مسلم الوائلي
🖋 كلمات: المرحوم عبد الأمير الفتلاوي والحي علي أكبر الغرابي
~~~~
اجيناكم يساره الشام ومن الشام اجيناكم
يخوتي لو بدينه الموت يهنه الموت وياكم
~~~~
انه وياكم وشفت الصار واگول يجون اخوتي يجون
عزمي الجابني يحسين الضعن الحرم تتلگون
لاجن فوگ غيبة موت هذا الگبر بي مدفون
لاهي جروح اداويكم ولا غياب ورجاكم
~~~~
يالحدر الترب غافين ياهو البيكم امتاني
هاي انه العزيزه ام عون المذبوحه عله خواني
لا واحد فزعلي وگام منكم لا تلگاني
رديتلكم من الشام واشرح ضيم بلواكم
~~~
حط الراس جدامه ونشد عن النسه وعني
زينب هاي وسكينه ورباب اتشوفهن ذني
طاب العيش دگ العود يالمغني ولك غني
يهاشم روسكم ذني وسبي اعيال زدناكم
~~~~
فرحانه وتدگ طبول اهل الشام ومعيدين
كلها تصيح جا عباس وينه وين اخوج حسين
وانه الروسكم ضليت كلساعه وادير العين
وزينب خارجيه تصير بعد ما جانت وياكم
~~
زدناكم بسبي اعيال واخذنه العين والعينه
وگلب راس اخوي حسين يضحك والتفت لينه
يگلها يا رباب الراس هذا ألمن تعرفينه
تگله الراس لحمانه ويگلها گوض حماكم
~~~
يضرب راس اخوي حسين گام بعصته الظالم
وما صحلي بهذاك الحال واحد من بني هاشم
جا ترضون طول ام عون فرجه يصير للوادم
وانه الظلي ما ينشاف لمن جنت بحماكم
°°°°°°°°°°°°°°°°°°°°°°°°

📜 القصيدة: اللهم عجل لوليك الفرج
🎤 أداء: مسلم الوائلي
🖋 كلمات: قاسم رضا
~~
اللهم عجل لوليك الفرج
اللهم عجل لوليك الفرج
~~~~
گوم يبن الزهره شد احزامك
فزعه منتظرين كل خدامك
اعزل الصمصام عن اگرابه
وبدمه العادوك طفي خيامك
~~~
يله يا خيالها وراعيها
هيه هاي الطلعه المتانيها
امك بدارك تناطر فزعه
گوم واخذ الثار يا حاميها
~
يبن هاشم صولتك معروفه
گوم يالخليت بيهم خوفه
بس يحين الثار يا مهدينه
نركض من بيوتنه اعله الكوفه
~
خادم يحط ايده بيد الخادم
ونصيح يا مية هله بالقائم
والشعار اليعله بين الشيعه
يالثارات الحسين وفاطم
~
يله يا حماي هد بالثايه
وشيل بيدك يبو صالح رايه
وصيح بيهم مو غريبه ونادي
لا عقيلة بني هاشم هايه
°°°°°°°°°°°°°°°°°°°°°°°°°°

📜 القصيدة: بيدك يا علي الراية
🎤 أداء: مسلم الوائلي
🖋 كلمات: علي الأكبر الغرابي
~~~~
رسالة وهالنزل وحي السمه بيها
هاي الأمة باجر انت راعيها

وصية من السمه هايه
بيدك يا علي الراية
انت راعيها .. انت راعيها
~~
باجر بالغدير انصب
بسمك يا علي منبر
وكلها البيعتك تهتف
بخٍ بخٍ يا حيدر

الله يريدك الأول
يل بأولها تتصدر
لو ما سيفك الباشط
جا دين الله ما خضر

لو ما جفك وفقاره
الدينك ما شفت مناره
سيفك للنصر شعاره
.. يا ابو اتراب

الله الخصك بكتابه
ورادك للإمامه بابه
رادك سيد الصحابه
.. يا ابو اتراب

لو ما سيفك الباشط يبو الحمله
ما جان انبنه الأسلام من أصله

وانت بكل وكت ثايه
بيدك يا علي الراية
انت راعيها .. انت راعيها
~~~~
ياهو الغيرك بسيفه
باشط بالحرب وابشط
أول واحد بكلهن
شفتك يا علي تنحط

بسيفك منجسم مرحب
ميزانك ولا يغلط
وغيرك بالحرب شفته
بسدك لابد ويفحط

يامه ويامه ذو الفقارك
رافع راية انتصارك
يا من بالحرب شعارك
.. انه الموت

لسه بأسمك المناقب
وترجف منك الحرايب
وانت الذاكه بعده كاتب
.. انه الموت

يا كرار مو فرار بالحومه
يالشاطر بسيفك مرحب وگومه

يالبسمك مسمايه
بيدك يا علي الراية
انت راعيها .. انت راعيها
~~
اليقره بمحتوى الآيه
لازم يفهم شيقره
الله أختارك ورادك
أول واحد اتنصره

بس شفت البعض بيهم
جهز للسقيفه امره
باجر من يشيل ايدك
ووجوه الزلم صفره

الله اختارك الخليفه
الهاي الوادم العفيفه
بس ما رادت السقيفه
.. انت تصير

باجر يا حبيبي باجر
تكظم غيضك وتكابر
باجر ديره للخناجر
.. انت تصير

على ألسان الوحي هالآيه مصدرها
أول واحد انت وانت آخرها

واضح محتوى الآيه
بيدك يا علي الراية
انت راعيها .. انت راعيها
~~~~
إسمك وشحلات إسمك
بلسان الوحي ترتل
من كنت انا مولاه
مولاه حيدر تحول

وذيج الوادم تريدك
رابع ما تصير أول
وإسمك من گبل آدم
أول واحد مسجل

كلمن ضايع بسؤاله
وراد يفسرك بخياله
شافك معدن الرساله
.. يا ابو حسين

بيت العصمه والإمامه
منك يبتدي نظامه
وجفك باجر العلامه
.. يا ابو حسين

إلك ما لاگت الغيرك بعد طه
هاي الأمه باجر انت مولاها

وجانت آخر احجايه
بيدك يا علي الراية
انت راعيها .. انت راعيها
~
شذكر من بطولاتك
ما تحصه ولا تنعد
جم مره الوحي بصوتك
بسمك يا علي انشد

غيرك لا فتى شفته
وحد سيفك ولا كل حد
يامه ويامه تفديني
وتصير المحمد سد

عندك للحرب هوايه
وسيفك للمعاجز آيه
بيدك جانت احله رايه
.. من تصول

غيرك ماكو واحد ألها
ولا ضرباتك بمثلها
بهاي الدنيه تدري كلها
.. من تصول

علي ولا فتى غيرك الله گايلها
وشاهد جان سيفك عالرگب كلها

وجانت واضحه هوايه
بيدك يا علي الراية
انت راعيها .. انت راعيها
°°°°°°°°°°°°°°°°°°°°°°

📜 القصيدة: زوارج الخاطر يكسرونه
🎤 أداء: مسلم الوائلي
🖋 كلمات: علي مالك الموسوي
~~
ويلاه يا زينب .. ويلاه يا زينب
~~
هاي الأيام عيوني محتاره
بس لا تصير ومامش زياره

گلبي سالفته عجيبه
عجيبه .. عجيبه

روحه صارت بالغريبه
غريبه .. غريبه

عني گطعوا الدنيا كلها واعيش بسلامه

يمي بس خلوا الحبيبه
الحبيبه .. الحبيبه


بس لا صدگ دربج يگطعونه
يعني اليحبج تنعمي عيونه
~~~~
جربها مره وكشف جروحك
شوف التحبه يعذب بروحك

وانه مرتاح بعذابي
عذابي .. عذابي

منهم وليهم مصابي
مصابي .. مصابي

حته من اگعد وتاني لضعنهم يجيني

اشتل عيوني اعله بابي
اعله بابي .. اعله بابي

امده عيوني الما توديني
لو اوصلج لو تنعمي عيني
~
تاكل بگلبي وتهظم هوايه
السنه وين انسوي القرايه

والله متعوده يروحي
يروحي .. يروحي

بصحنج يطيبن جروحي
جروحي .. جروحي

بويه تخنگني المشاهد وحير بدمعتي

يله گابلني اعله نوحي
اعله نوحي .. اعله نوحي

هاي المصيبه الدولبت حالي
هم رد ضريحج بت علي خالي
~
زوارج الخاطر يكسرونه
كلمن عليج يصبن عيونه

واحد يصيح ابتلينه
ابتلينه .. ابتلينه

ردت الغربه علينه
علينه .. علينه

واحنه سيرنه اعله اخوتج نسولف هظمنه

يم ابو فاضل بجينه
بجينه .. بجينه

ما اشوفها اتفض هاي بدموعي
يردن طعن يضلوعج ضلوعي
~~
اي واحد اباله يبجيني
خيگول زينب لا يحاجيني

هالأسم هذا كتلني
كتلني .. كتلني

دوم احبنه ويحبني
يحبني .. يحبني

ما اريد اسمع غريبه اعله زينب نسولف

هالحجي هوايه يغثني
يغثني .. يغثني

اصفن وغمض گول مسبيه
وتصور شگد ركضت رقيه
°°°°°°°°°°°°°°°°°°°°°°°°°°°

زوارچ الخاطر يكسرونه | مسلم الوائلي | 1446هـ
https://youtube.com/watch?v=00tCFNIH3W8&si=UVWnCfYdKX-Hgbev

📜 القصيدة: ضيم الشام
🎤 أداء: مسلم الوائلي
🖋 كلمات: موسى حميد المحمداوي
~~
يا غريبه .. يا غريبه .. يا غريبه
~~
حزن شوگ الضريحج بيه ينشاف
حزن للغربه حدر عيوني راكد
عين ابجيج غربه وعين لشوگ
وانه ابينهن مولاتي گاعد
اخذيني ارد اعيش الضيم الهناك
ضيم الشام ما تحجي قصايد
نذر ما اخلي ماي يظل بالعيون
واخلي الثوب من دموعي بايد
~~~
انه المشتاگ انه الرايد يزورج
شكثر لدموعي يم بابج مواعد
هم يرتاح گلبج من نجي انزورج
والبالغربه اعرف من اهله رايد
عرف ويه اهلج احنه ارتاحي ماطول
بعدهي ابابج اتنوح الفواگد
عليج انسوي مثل انهار عاشور
نجفي دلالنه ونطفي المواگد
~~~~
غريبه اليا وكت تبقين بالشام
جا ما سد غربتج بينه واحد
الله يساعدج مدفونه بالشام
وألج بالشام ما تلگن فاگد
كون ابين اخوتج گبرج يصير
جا هسه ابو فاضل گلبه بارد
عافولج مكان ابينهم غاد
وتصير بكربله اتلث مراقد
~~
بس هنانه ألج ذكره ويه الأيتام
ألهم صرتي أم وصرتي والد
هنانه شگد ركضتي يخت الحسين
للمحروگ گلبج لو لشارد
هنانه دموع ضعنج لاحن الگاع
وبيهن يا غريبه شگد مشاهد
من الشام اهون كلشي شفتي
لهسه الشام يا مولاتي حاقد
°°°°°°°°°°°°°°°°°°°°°°°°°°°°

📜 القصيدة: ميته اختكم
🎤 أداء: مسلم الوائلي
🖋 كلمات: عباس طالب السعيدي
~~
وين الما يتحمل گلبه
زينب ميته بنص الغربه
سهله يموت ابنادم سهله
بس تابوته من يظل صعبه
~~~
شگد صحتكم .. ميته اختكم
ساعه وحده گابلوني وهاي هيه
زينب تصيح .. تگوم وتطيح
شيب گبل الدم طلع بجروح اديه

بنياتكم يم راسي گعدن
ويسولفن جم مره ركضن
من سولفن بركاضي يمي
ميته وأحس رجليه تعبن

يحسين اختك يا غربتها
مثلك مطروحه جنازتها
ألوان الدنيا المو حلوه
كلها متون اختك لمتها
~~
جرح الأيام .. الهيمه والشام
والله كل شلعان گلبي من وراهن
موتي بهداي .. من وره الماي
مثل گلبي جفوف ابو فاضل خذاهن

تدرون لو لا بالمصيبه
زينب لحد هسه غريبه
لا يمي وتزوروني مره
لا انه من عدكم جريبه

مو تدرون شصاير بيه
ميته ومتعوبه العلويه
ترضون ام عون الوحدها
مسبيه وماتت مسبيه
~~
اصعب احساس .. من تجي الناس
تسأل السجاد هايه فاتحتمن
تنحجي شلون .. الماتت ام عون
لا اخو لا من بنات عليها يبجن

عفتوني بالغربه وصحتكم
تحبوني ادري وانه احبكم
كون انه ما اگدر اجيكم
جا ما تجون انتم لختكم

من گدما جنت ابجي وانحب
ظهر عيوني عليكم حدب
زينب رادتكم جنازه
ياهو العطلكم عن زينب
~~~
ضيم حالي .. گبري خالي
الگبر ما ينهاب اذا فارغ مكانه
خويه عباس .. منعوا الناس
جا بعد ويامن ابجي عليكم انه

شلعان گلبي ودمعة العين
من گالوا العباس جا وين
متعوده وي كلمن يجيني
نتگابل ونبجي اعله الحسين

وحشه بلياكم ليليه
والوادم تتشمت بيه
محد منكم غمض عيني
ومحد سائل عني شبيه
~~~
هدت الحيل .. وحشة الليل
حته التنام بگبرها تريد اهلها
بيه دمعه .. ويمكم انعه
روحي بيها صياح بس كضها خجلها

يهلي الگبر هم يشبه الدار
مو حلوه اذا ما بيها خطار
زوروني لو بالسنه مره
ما أريد گبري بلايه زوار

ما شفت الراحه بعمري
خل اتدلل وانه بگبري
مثل ضلوع الزهره الراحن
مكسور من الوادم ظهري
°°°°°°°°°°°°°°°°°°°°°°°

📜 القصيدة: ويلي على المسموم
🎤 أداء: مسلم الوائلي
🖋 كلمات: رعد الجريخي
~~~
ويلي على المسموم
ويلي على المسموم
~~
وين اليروح ويگطع البيد
يطوي الفيافي ودرب البعيد
يحشم هله وگومه الأجاويد
يگلهم طريح الكاظم وحيد
~
بلجن فرد فزعه يفزعون
ويمه الأهل كلهم يحضرون
هذا العليه اتهل العيون
وذاك اليشيله فوگ المتون
~~~
اليمه عويل النعش ينهاب
عازتها عازه دموع الأحباب
ننصب عزانه بهذا المصاب
لمن يجي للثار طلاب
~
ليش الجنازه محد الها
بس اربعه تولوا حملها
تنظر عليها الناس كلها
فوگ الجسر محد وصلها
~
عند العرب والگوم عاده
توگف على الميت أولاده
وكل السلف يعلن حداده
وتحضر هله بهمه وأراده
~
ضجه تصير العربان لمه
كبار العشيره تنوح يمه
وتهتف عمامه المات بأسمه
الشيل الجنازه تصير همه
°°°°°°°°°°°°°°°°°°°°°°°°°°°

📜 القصيدة: باجر ناس يالعباس
🎤 أداء: مسلم الوائلي
🖋 كلمات: ملا مسلم الوائلي
~~~~
لحگوا علينه لحگوا علينه
~~~~
باجر ناس يالعباس
راح يحرگون الخيمه علينه
جبت ضعون لتنامون
لتنامون يشتمون سكينه
شفت الگوم يهوسون
اگعد لحگ يا والينه

شفت انه الخيل داستك حيل
~~~~
لتصدگون تبقى عيون
لو ما يرجعلي الجاباني
خل يگوم جتنه الگوم
ما اگدر احجي ولا اتاني
گوم وشوف ظل بطفوف
الجيش خلافك شافاني

گوموا يسباع تجوي الگاع
~~~~
علويات وين اتبات
يالجبتونه وخليتونه
اگعد شوف ها يحسين
عباس مطفين عيونه
وفوگ الظيم جابوا خيل
ويريد يسحگون متونه

صحت عباس جتك الناس
~~~~
وخر گوم يا مظلوم
لا تلجم صدرك خياله
شفت حسين گام وطاح
من هجمت گوم اعله اعياله
گام يصيح يا الله
لا تسحگ هالخيل اطفاله

ليه من گام بلايه هندام
~~~~
شلون يصير رحتوا بساع
فكروا بحالي وانه يتيمه
راح حسين وانته وياه
وما عاتب لو طر الهيمه
شفت حسين يزحف غاد
وينحب علما عدهن خيمه

شفته منحور وظهره مكسور
~~~~
شفت الگوم جوك اركاض
ويريدون يهوسون بنحرك
من بعيد اسمع صوت
خيل اعداك تريد تعورك
بس يا حيف من ادنيت
الحافر ماكل من صدرك

شما صحت گوم تركض الگوم
~~~~
ما ترضون ندخل سوگ
وتتفرج خلگ الله الحالي
شلون يصير يالكفال
تنمد غير ايدك لخيالي
فشله بسوگ ملتمين
يبيعون بكاروك الغالي

بلايه وليان وسفه يخوان
°°°°°°°°°°°°°°°°°°°°°°°°°°°°°°°°°°°°