📜 القصيدة: سبط النبي سافر
🎤 أداء: مسلم الوائلي
🖋 كلمات: المرحوم ملا عطيه الجمري وعلي الأكبر الغرابي
~~~
سبط النبي سافر وعاف اوطانه
.. نور المدينه
بيت المجد متضعضعات اركانه
.. نور المدينه
~~
ودع گبر جده وطلع برجاله
.. واغلق دياره
گاصد لأرض مكه بجميع اعياله
.. ودمعه ايتجاره
وعباس شد محمل الحره وشاله
.. وشعت انواره
وگلها يزينب شد اخوج اضعانه
.. نور المدينه
~
ضلن خوالي ديار اهل بيت النبوه
.. لمن جفوها
وجبوا عله النوگ ومشوا بس العليله
.. ما صعدوها
مره اعله زينب تلتفت ويهل دمعها
.. مره اعله ابوها
ومدري شرسم فوگ الوجن بفراگ اهلها
.. دمع الحنينه
~~
صاح ولزم بيده الشفيه افاده
.. والطم الهامه
الله يعوده واخوته وأولاده
.. وفال السلامه
بيت المجد ما تنگطع وفاده
.. وملجأ ايامه
متحير وموحش عليه مجانه
.. نور المدينه
~~
محمد بگت عينه ترف واشتد دمعها
.. ويلهب دليله
ساعه اعله ديوان السبط مشدوده عينه
.. ساعه الرحيله
من شافهم كلهم مشوا ومودعينه
.. ما بيده حيله
طلعوا ليوث الغانمه وربات هاشم
.. ومحاوطينه
°°°°°°°°°°°°°°°°°°°°°°

📜 القصيدة: شهر حسين
🎤 أداء: مسلم الوائلي
🖋 كلمات: كرار حسين الكربلائي
~
يا شهر حسين ..
انته بكل عام تبجيني
يا شهر حسين ..
رديت وما رد حسيني

هاي امنية دنياي
اشوفه يشرب ماي
حبيبي .. حبيبي
~
يا شهر الأخذت حسين
اجيت بيا وجه للناس
هلالك بالسمه عالي
يسولف عن رمح بي راس
فوگ الگاع كون تطيح
مثل عمامة العباس
يالمبجي الحجر والطين
والما يبجي ماله احساس

يمبجي الماي ..
علما شارب ماي وميت
يمبجي الماي ..
يا عين من تشوفك تسكت

گلي شوكت مولاي
اشوفه يشرب ماي
حبيبي .. حبيبي
~~~
محرم ترجع بكل عام
وهلالك تشوفه العين
وانته بكل سنه انشوفك
لكن ما نشوف حسين
هلالك ما تلوحه الخيل
وحسين انسحگ مرتين
هلالك يوم عاشر ضاع
واحنه خنصر مضيعين

الخنصر مگطوع ..
وانته تشوفه وعينك صلفه
الخنصر مگطوع ..
لو منك جا صرت بجفه

بالطف حلم عيناي
اشوفه يشرب ماي
حبيبي .. حبيبي
~~~
تكمل يا هلال النوح
ونشوفك گمر كامل
انته وكل ضواك البيك
فدوه تروح للكافل
حسين بطيحت العباس
رد اعله الخيم مايل
وتخوصر وصاح بصوت
يزينب راح ابو فاضل

راح العباس ..
وشفت بعينك سهم بعينه
راح العباس ..
ومثل هلالك محني حسينه

امنيتي جانت هاي
اشوفه يشرب ماي
حبيبي .. حبيبي
~
هلالك لو طلع باليل
اذكر ليل هاظمني
حرمه بنص زلم وتصيح
الحگني يخال ابني
وكتي من رحت يحسين
بعيون الغرب ذبني
الما عاثر جدمها بگاع
عثرت والظهر محني

هاي اخت حسين ..
تشوف حسين يدوسه الحافر
هاي اخت حسين ..
ما شربت ماي من العاشر

صاحت اريده وياي
اشوفه يشرب ماي
حبيبي .. حبيبي
~~~~
هلالك عيد عند الشام
يالغربة صفر منك
زينب وگفت بديوان
ما عندك علم جنك
اخوها بلا صدر بس راس
تگله شلون اشبگنك
آخر محنه بهلاله
رقيه تموت من حزنك

احا يالشام ..
زينب مجتوفه يشوفوها
احا يالشام ..
بحجار ونار يشمروها

انطيني حل وراي
اشوفه يشرب ماي
حبيبي .. حبيبي
°°°°°°°°°°°°°°°°°°°°°°°°

📜 القصيدة: حياك
🎤 أداء: مسلم الوائلي
🖋 كلمات: علي أكبر الغرابي
~~
هله بالجايني وتبرك بنوره
حياك .. حياك
هله يالراد بيه يصير عاشوره
حياك .. حياك

وكون بحجيك الحار
تحسبني من الأنصار
حياك .. حياك
~~~~
بيك اتشرفت گاعي
وهذا الشرف بس بيه
صار سنين يا مولاي
عطشانه اعله هالجيه
لبسني الخيم يحسين
لجل العفه بوشيه
التسحگها العقيله اتصير
هاي الگاع علويه

البيه من الشرف ما صاير اثنين
نصب خيمته اعله اترابي الحسين
هله يالبيك حگ من تكشخ العين

هاي ولايتك ونصب خيم بيها
حياك .. حياك
غير بدم رضيعك انته شاريها
حياك .. حياك

وانته بكيفك اختار
تحسبني من الأنصار
حياك .. حياك
~~~
يكفي من الفخر يحسين
گاعي اليوم شايلتك
وهنياله التراب الصار
حدر اجدام عايلتك
حط بيه اعله گد الشوف
گد الهله الواصلتك
وانه وكلشي يا مولاي
شويه اگبال منزلتك

موش تراب جدمك دوه الخطار
تراب الدايساته الخيل ينزار
جايب خوش ناس وياك وانصار

يمشرف الگاع بربعك وناسك
حياك .. حياك
تحله التنسحگ بجدام عباسك
حياك .. حياك

موسم للشرف صار
تحسبني من الأنصار
حياك .. حياك
~~
يالخطار ما محسوب
نازل سيدي بدارك
انه وكل شبر بالگاع
محسوبين خطارك
لا تحتار يا مولاي
انه البير لأسرارك
هو الله اعلمودك غير
سواني لزوارك

انه وكل شبر بالگاع والماي
فدوه الخيط من اخيامكم هاي
يا راي اليعيش بشحت الراي

هله بالجايني وحط النزل بيه
حياك .. حياك
صار سنين وانه امتانيه الجيه
حياك .. حياك

وبركان الدمع ثار
تحسبني من الأنصار
حياك .. حياك
~
يا مية هله وحياك
يالگاصدني بضعونك
ما تسواش صم اتراب
هاي الگاع من دونك
من يا باب ارحب بيك
واقره شضام بعيونك
تنصب خيم لو تاريخ
باجر لليريدونك

يمكحل العيون بجيتك هاي
باجر يكتب التاريخ مولاي
حي باقي الحسين وميت الماي

كلما ردت اگلك سيدي شلونك
حياك .. حياك
ياخذني الجمال التارس عيونك
حياك .. حياك

وارجع يمك احتار
تحسبني من الأنصار
حياك .. حياك
~~
هاي امنيتي يا مولاي
وربك حقق امنيتي
كون ادوسني الخدام
ونطاني اعله گد نيتي
وكلما تكثر الزوار
تكثر بيه عافيتي
ولو ما صيتكم يحسين
ما جان انعرف صيتي

احلم يا عزيز الزهره كل عام
تندگ فوگ گاعي احبال الخيام
حد ما الله حقق هاي الأحلام

هله يالبيك اسولف جنت واتمنه
حياك .. حياك
باجر كربلائك للعشگ جنه
حياك .. حياك

وأخر حلم يندار
تحسبني من الأنصار
حياك .. حياك
°°°°°°°°°°°°°°°°°°°°°°°°°

📜 القصيدة: انتظر منكم جواب
🎤 أداء: مسلم الوائلي
🖋 كلمات: أحمد سعد
~~
خلصت حروف العتاب
وانتظر منكم جواب

وحدي عفتوني عليله
رحتوا والغيبه طويله
وانتظر منكم جواب
وانتظر منكم جواب
~
ليش عفتوني ومشيتوا
عفتوا دمعاتي تسيل
وين گوطرتوا بضعنكم
وين شديتوا الرحيل
هدمت حيلي المصيبه
بعد ما ظل عندي حيل
مستحيل عيوني تغمض
من بعدكم مستحيل

ناطرت ليل ونهار
صحت طال الأنتظار

بعد ما عندي وسيله
رحتوا والغيبه طويله
وانتظر منكم جواب
وانتظر منكم جواب
~~
يا هلي سهرت الليالي
وعيني ذوبها السهر
يوم يوم وساعه ساعه
احسب ايام السفر
شاخصه عيوني الدربكم
وانتظر منكم خبر
صابره وروحي اعله جمره
احسب اليوم بشهر

انتظر طارش يعود
دمعي يحفر بالخدود

دمعي ما ينشف مسيله
رحتوا والغيبه طويله
وانتظر منكم جواب
وانتظر منكم جواب
~~
نزلت استار المنايه
لاحت اشباح الأجل
لا خبر منكم اجاني
لا ابشاره يالأهل
ايست ونگطع ضني
ونگطع حبل الأمل
صرت مركز لنوايب
والمصايب والعلل

شنهو يهل الشيم صار
خاليه و وحشه الديار

خلت من كل القبيله
رحتوا والغيبه طويله
وانتظر منكم جواب
وانتظر منكم جواب
~
من بعد ذيج السعاده
ومن بعد ذاك الحنان
لني ما بين المصايب
وبين صفوات الزمان
الدنيه معروفه بطبعها
دنيا ما بيها أمان
وين اتوجه عگبكم
وين اروح اليا مكان

الحزن ما خلالي روح
تحيرت لاوين أروح

المن اگعد وشتكيله
رحتوا والغيبه طويله
وانتظر منكم جواب
وانتظر منكم جواب
~~~
طفله من اول حياتي
صافحت جفي المشيب
زرعت الونه بدليلي
وحصدت هموم ونحيب
بالعلل مصيوبه روحي
والجبد ينثر لهيب
اعتب وهالعتب ادري
لا يودي ولا يجيب

فكري عايش بالخيال
وذكر ايام الدلال

احسبلكم ليله ليله
رحتوا والغيبه طويله
وانتظر منكم جواب
وانتظر منكم جواب
~
هالدهر فرق شملنه
بالگلب حزني انجمع
رحتوا روحه بلايه رجعه
ولا خبر منكم رجع
منهو شايف مثلي طفله
مدوهنه ومنهو سمع
بالصخر لو جان همي
الصخر جا مل وجزع

هذي جمرات الونين
ذوبت گلبي الحنين

گلبي ما يبرد غليله
رحتوا والغيبه طويله
وانتظر منكم جواب
وانتظر منكم جواب
~~~
بعد داري ما تلمني
وجزعت من الحياة
هذي دار الأهل جانت
صفت دار النايبات
ريت نسمه لا تمرني
ريت يلفيني الممات
عصفت بوجهي المصايب
والمحن والموحشات

عمري اكدار وهموم
ريته يفنه ولا يدوم

جف الهموم الثگيله
رحتوا والغيبه طويله
وانتظر منكم جواب
وانتظر منكم جواب
°°°°°°°°°°°°°°°°°°°°°°°

📜 القصيدة: ابجي اعله حالي
🎤 أداء: مسلم الوائلي
🖋 كلمات: سعد شميل
~~~
ابجي اعله حالي
محد بجالي
يا روحي اطلعي
صاحولي ارجعي

وظل بيتي خالي
وظل بيتي خالي
~~~
توادعنه وبجينه وگتله فدوه حسين
اريد وياك اسولف والله ما أخرك
اذا هسه وعليله بدونك بيا حال
موش انته التعوف ابنيتك بظهرك
انه اتمنيت بويه محبسك ناسي
اعوفك تروح بدون ما اذكرك
اخذني وياك فدوه هناك صلفه الخيل
حته انه انسحگ يحسين مو صدرك

دموع بلحيته
من ودعيته
وغرب دلالي
وظل بيتي خالي
~~~
انه معوده كل ليله گبل النوم
ابوس جفوف ابوي واغفه بحضانه
أمس يهل الرحم من كلش شتاگيت
طلعت القميص وبسته بردانه
انه اكبر من رقيه بس عباها اليوم
تكفيني بكثر ما صرت نحلانه
شلت الماي بيدي وطاح مني الماي
بس لا من خواتي وحده عطشانه

يدرون اخوتي
سبگلي موتي
بهاي الليالي
وظل بيتي خالي
~~~
اليروحلها واحد ساعه ما ترتاح
وما تنشف عليه سنين دمعتها
حاجوني يهلنه المثل حالي شلون
تشيل بساعه وحده كل عشيرتها
جا هيه البنيه بمرض من اطيح
اول ما ادير العين لخوتها
انه الما عدها ابو يسكتها من تنوح
ولا يمها اخت عالضيم واستها

هيه المصيبه
ابيتي وغريبه
ياهو البقالي
ظل بيتي خالي
~~~
حاجيني برقيه شلونها بيا حال
طاحت لو بعدها من عله الناگه
حاجيني الرضيع هناك ضاگ الماي
لو لمعت رگبته والسهم ضاگه
جم يا خويه صحت بطيحت العباس
اضن حسين ظهره انكسر بفراگه
تخيلت الحنين بشيبه دم وتراب
تخيلت المهر من ياخذه بساگه

تخيلته وحده
تبعده وترده
الخيل اعله بالي
ظل بيتي خالي
~~~
عليه ام البنين اتسير بكل يوم
وتصبرني ساعه وساعه اصبرها
وتسميني يا بت العزيز حسين
تجبر خاطري المكسور خاطرها
وين الله الحسين يرد علينه اتگول
فدوه الأربعه من ازغرها لكبرها
ما جابتلي طاري الكل عمامي هناك
سيرة والدي كل ساع تذكرها

اولادي فدوه
للعينه تسوه
شگد عدها غالي
ظل بيتي خالي
°°°°°°°°°°°°°°°°°°°°°°

📜 القصيدة: جفين وعين
🎤 أداء: مسلم الوائلي
🖋 كلمات: علي أكبر الغرابي
~
لو ما اربعتهم فدوه لزهره
ما جان انعرف صيت الوفه وقدره

ونطيتي حسين .. جفين وعين
فدوه اربعتهم .. فدوه اربعتهم
~~~~
مقياس ابنادم بالموقف
مو طول الشارب مقياس
صح ما جنتي وياهم بالطف
بس الطف كله ام عباس
وعندي اثبات اعله السولفته
ما اسولف من جيب الناس
الهاي الساعه جفوف وليدج
تنطي مراد شما تنباس

صوره من الوفه ومحد صل يمها
جان بريشته العباس راسمها

صارت نهرين .. جفين وعين
فدوه اربعتهم .. فدوه اربعتهم
~
رف اسمج والبيرغ بالطف
يم عباس اگبال حسين
وتوضوا ولدج بالغيره
وصلولج عين وجفين
وبيوم الحيهم والفزعه
ما صاروا ما بين وبين
واحد لازم ظهر الخوه
وفيِ اعله حسين الباقين

الهدوا بالحرب واللبوا النخوه
ذوله البس عليهم لاگت الخوه

ما گالوا وين .. جفين وعين
فدوه اربعتهم .. فدوه اربعتهم
~
ندري الماي اليحيي الميت
بس بالطف ما صارت هاي
شال الماي وذبه الكافل
من عدهه وشو مات الماي
يمكن مر طيفج بعيونه
ورد عباس النفس الرآي
شلون اشرب ماي واتهنه
وامي الوصتني بمولاي

ذب جفوف ادينه الخاطر العشره
باجر بيها تطلع فاطمه الزهره

مو بس جفين .. جفين وعين
فدوه اربعتهم .. فدوه اربعتهم
~~~~
جم موقف بالطف سجلتي
والشاهد اربع آيات
رفعوا راسج يم حسينج
نفس الروس المرفوعات
صح بالطف ما جنتي وياهم
بس خطواتج محسوبات
روس اولادج صارن خيمه
من الكوفه الباب الساعات

مثل آية وفائج ما تصح آيه
يم نهر الفرات ترتل الرايه

ما بين وبين .. جفين وعين
فدوه اربعتهم .. فدوه اربعتهم
~~~
ما رحتي وياهم من راحوا
بس گلبج وياهم راح
وصيتيهم واحد واحد
حد ما دمع عيونج طاح
اليرجع سالم دون حسينه
وما جايس نحره الذباح
لا يرجع ما اقبل عذره
ويزعل گلبي الما مرتاح

قانون الوفه والدمعه والغيره
لايگ بس عليج بكل تفاسيره

وفيتي الدين .. جفين وعين
فدوه اربعتهم .. فدوه اربعتهم
°°°°°°°°°°°°°°°°°°°°°°°°°°°°

📜 القصيدة: يالتناشد عالهويه
🎤 أداء: مسلم الوائلي
🖋 كلمات: علي الموسوي
~
يالتناشد عالهويه
انه خادم لزجيه
~~~~
بالمجالس والعزه
روحي ضلت هايمه
واستمع يالناشدت
انه خادم فاطمه
ذايب بجو اللطم
وحيل ذبت بعالمه
ونذرت گلبي نذر
للحسين ومأتمه

تشهد جروحي عليه
انه خادم لزجيه
~~~
من جوابي وضحت
غايتي يالناشدت
فكري بالخدمه انشغل
وابد ما عندي وكت
خدمتي اكبر شرف
وانه بيها اتفاخرت
اي وحگ رب السمه
احله منها ما شفت

فضل من رب البريه
انه خادم لزجيه
~~~
بالصلاة وبالذكر
ارتجي وارفع ادي
وادعي يا رب السمه
ديم هالنعمه علي
خدمة حسين وهله
كل وكت صارتلي ضي
من يموت اليخدمه
بين ناسه يبقه حي

وافتخر وكت المنيه
انه خادم لزجيه
~~
بالعزيه ابقه أهم
لو عليها اتأخرت
أسرع وگلبي يدگ
خاف ياخذني الوكت
عاشگ وهذا العشگ
من صرت حد ما درت
بالمآتم واللطم
اگضي عمري قررت

روحي صارت بالعزيه
انه خادم لزجيه
~~~~
حيل قدست العزه
حضره عندي تنجعل
والحوائج تنگضي
بحضرة اصحاب الفضل
يا أهل بيت النبي
اندب ودمعي يهل
ما يخيبوني أبد
كل صعب عدهم سهل

أدعي ويحضرون أليه
انه خادم لزجيه
°°°°°°°°°°°°°°°°°°°°°°°°°

يالتناشد عالهوية | مسلم الوائلي
https://youtube.com/watch?v=3nkQ2P6DcS0&si=leywC9PD5Ykj3YAG

📜 القصيدة: مسلم غريب
🎤 أداء: مسلم الوائلي
🖋 كلمات: هاشم الصالحي
~~
وينه اليهم جدمه ويروح الليله
مسلم غريب وماكو ناس اتشيله
~~~~
وينه اليروح البني هاشم طلاب
گلهم الكوفه تحزمت شيب وشاب
ناس بسيوف وناس ترمي النشاب
محد فزعله ومحد يتجيله
~~~
خلهم يطرون الفيافي بهمه
مو سهله عدهم رايحلهم زلمه
خلهم يجون يطالبون بدمه
ودفنه وتراب المنايه تهيله
~
من فوگ قصر الكوفه شمروا للگاع
صاير وصل وجروح البجسمه وساع
خلهم يجون وخل يحضرونه بساع
خل يحضر حسين برجاله وخيله
~~~
خلهم يسرجون الشگر ويلگدون
عدهم خبر بالصار لو ما يدرون
مسلم عله التربان ظل ما مدفون
جيبوا حميده اتگابله وتبجيله
~~
وين الحيود الما تخاف من الموت
خلهم يجيبون الجفن والتابوت
وين الحضر يونس وجره من الحوت
خل يحضر ويراد شدة حيله
~
يا طارش اخبرهم الكوفه شسوت
وليه اعله مسلم كل زلمها ألتمت
ليش الهواشم بالعجل ما حضرت
خلهم يجون الما غفوا عالعيله
~~~
مسلم وحيد وحاطته جيوش الشر
من فوگ قصر الكوفه طاح موذر
وين الهواشم بالعجل خل تحضر
ولبيك يا مسلم تجي تناديله
~~
وين الهواشم خل ترف رايتها
معروفه عنهم بالحرب فزعتها
گلهم غريب بهل البلد زلمتها
خل تحضر اهله وفاتحه تسويله
°°°°°°°°°°°°°°°°°°°°°°°°°°

📜 القصيدة: مسك الختام
🎤 أداء: مسلم الوائلي
🖋 كلمات: علي الأكبر الغرابي
~~
اختصاراً للكلام
.. غداً مسك الختام
وبداية كل سلام
.. سلام الله عليك 
~
الليل ما ردنا جمل ردنه بطريجك
وألف هنياله اليظل بالطف صديجك
شادين حزامنه براية رفيجك
ننزل بيوم العطش ماي اعله ريجك

وحگ شيبة حبيب
.. فلا غيرك حبيب
يسر الله العجيب
.. سلام الله عليك
~~~
وحگ ماي وجوهنه البي مشترينك
عاشگينك يبو الأكبر عاشگينك
لا اتعب السانك وأشر بيمينك
انطيحلك فدوه اعله فدوه اگبال عينك

فده اگبالك نطيح
.. ولا ترجع ذبيح
يمن بسمك نصيح
.. سلام الله عليك
~~~~
ذيج وادم للذهب باعت ضماير
واحنه وادم مشترينك بالمناحر
الما يجيس العطش گلبه وياك باجر
هذا ما محسوب من اهل المشاعر

اجيناك ونريد
.. نظل عندك عبيد
تحت هذا النشيد
.. سلام الله عليك
~~~~
مطمئن خليك يا شيخ العشيره
باجر الدم يحجي سالفته الأخيره
وحگ هاي خيامك وذيج الأميره
العنده غيرك يعني ابد ما عنده غيره

لگيناك الأمان
.. دفوا وخيمه وحنان
ويظل طول الزمان
.. سلام الله عليك
~~
بالمواقف تعرف الزلمه وقراره
والدليل الحر رجع حر بنكساره
ذيج وادم مالها بهاي التجاره
يا ربحنه وكلشي من دونك خساره

بضاعه ولن تبور
.. دمه هاي النحور
يظل صوت الغيور
.. سلام الله عليك
°°°°°°°°°°°°°°°°°°°°°°°°°°°

📜 القصيدة: شعجب عافوني
🎤 أداء: مسلم الوائلي
🖋 كلمات: حسن الترابي
~
اتباوعلهم ..
ايدي اعله ظهري وحيلي رايح
من ودعتهم ..
واگف جنت بس كلشي طايح

اتلفت وما عندي بس اخيالي واندار
ما هانت العشره شعجب عافوني محتار
من ودعتهم .. من ودعتهم
~
من فتحت جروحي
تتباوع بروحي
.. يا گلبي غربه

ما بيه اظل واگف
ومن طيحتي خايف
.. يم الخيم صعبه

اوگف عله جروحي اظل بس گلبي جندوب
مو من ثگل طاح المتن من شيلة الثوب
شيصير حيلي وانه كل شويه منهوب
من روحي من ضيمي وعلي من كلشي متعوب

من گلبي منهم ..
ازعل بالضنون واسامح
اتباوعلهم ..
وايدي اعله ظهري وحيلي رايح

من ودعتهم .. من ودعتهم
~
بعيوني ضاگ الطف
گمت انشف وانشف
.. وابجي اعله صحباني

بصدري الهوه اتكسر
خاف امشي خاف اعثر
.. ماتوا وانه متاني

ما بيه حيل وحيلي رايح من الأوداع
صحباني ماتوا كلهم ومحتاج فزاع
كلساع ميت مني واحد ليش كلساع
يا رايح ويا راد تعبت مني الگاع

ما عاتبتهم ..
بس العتب بعيوني واضح
اتباوعلهم ..
ايدي اعله ظهري وحيلي رايح

من ودعتهم .. من ودعتهم
~~~~
اركض رحت هايم
يا طايح وگايم
.. اعثر وارد اعثر

ما ظل نفس بيهم
وانه اعتب عليهم
.. من ضيمي ما اگدر

وياي گوموا وردوا يم الخيمه وياي
ما اريد اردن وحدي ومن عدكم اضماي
تنشدني زينب من ارد ما حاير بهاي
بس انه گلتلها من امس صحباني هواي

گالتلي حبهم ..
گلتلها طالع بالملامح
اتباوعلهم ..
ايدي اعله ظهري وحيلي رايح

من ودعتهم .. من ودعتهم
~~~~
طاحوا مثل حيلي
وردت اليتجيلي
.. ويصبر عليه

ياهو الاگعدنه
ما الگه شي منه
.. والرگبه ماهيه

وازتني بيهم عالشبگ يا گلبي الأسهام
والما مصوب منسحگ ومطشر الهام
ثگلان راسي من التعب وثگلانه الأجدام
ومطشرين هناكه وهنانه ولگدام

شگد حشمتهم ..
وأيس بعد صاحاني صايح
اتباوعلهم ..
ايدي اعله ظهري وحيلي رايح

من ودعتهم .. من ودعتهم
~~~~
صاحولي بالحومه
يحسين مو نومه
.. كلهم ذبحناهم

لو رايد اتشمهم
وبجفك تلمهم
.. بالخيل تلگاهم

صاحولي ساعه وتنذبح مثل التحبهم
ما ظل شي منهم تتعب شما دورتهم
الروس عدنه ولو ردت ودع رگبهم
ما ظل وكت لم حيلك وبالگاع هدهم

تمنيت اشمهم ..
وخفت ألجم ارگبهم وابارح
اتباوعلهم ..
ايدي اعله ظهري وحيلي رايح

من ودعتهم .. من ودعتهم
°°°°°°°°°°°°°°°°°°°°°°°°°