📜 القصيدة: يرضاها الله
🎤 أداء: مسلم الوائلي
🖋 كلمات: عباس طالب السعيدي
~~~~
يرضاها الله الشيخ ايبات بالهيمه
لا خوان وياه لا ناس لا خيمه

لأخر گاع ام عون اتلمه
وحسين ولا خلص جسمه
يرضاها الله الشيخ ايبات بالهيمه
~~~~
من غمض عيونه ركضوا يذبحونه
طاح وعليه ركضت زلم ياهو اليجي يذبحه
واحد كسر ضلعه والميت يسمعه
واحد اجه شايل رمح وبگلبه حط رمحه

عاده عند اليذبحون مره الينذبح مره
جا شو بس ابو السجاد مذبوح اثنعش مره
وحگ جدي انه عطشان حجاها وحافر بصدره

طلعت من الخيمه ابنيته
وهدوا كلهم عالترجيه
صاحت ترضاها شلون انته
غربه يشتمون العلويه

بين الخيمه وبين حسين شافوها
مو بس همه عليها الخيل هدوها

گاع الله انترست من دمه
وحسين ولا خلص جسمه
يرضاها الله الشيخ ايبات بالهيمه
~~~
شافوا ابو سكينه حرك رمش عينه
گالوا بعد عوزه ذبح جي من ضوه المنحر
محبس لگوا بيده وكلمن اله يريده
بالخنصر مجلبه الزلم وتگطع من الجر

رجع يتأكد الذباح عدل لو ميت يشوفه
والاصعب من اجه لحسين عثر بالگطعوا اجفوفه
ذاك الحته من اينام ما ينعبرن اطيوفه

زينب تمشي المن محتاره
وحدها وهمه هواي اخوتها
عثرت حته بعون وگامت
يم حسين تضم طيحتها

وصلت يمه وجانت حيل مهمومه
من شافت ناس يسلبون بهدومه

شافت حته الصوت يلجمه
وحسين ولا خلص جسمه
يرضاها الله الشيخ ايبات بالهيمه
~~~
گالتله حاجيني وعليك دليني
هو انته طايح عالگفه لو عالوجه روحك
گد ما نزف دمك ما اندل بجسمك
ما دورت بيدي خفت لا الجم جروحك

ادور بيك عن حسين وينك يالمگابلني
اول مره هاي تصير اجي وما ترضه تشبگي
جا المن خذاك الموت غير وياك ياخذني

گالت هاك ايدي وگومني
هاي اول مره اترجع ايدي
شيب افراگك لاح اخيالي
شمعطلك يا خال اوليدي

من گد ما دورت عليك يالغالي
مو بالراس الشيب الگاه بخيالي

دورت الطف لأخر نجمه
وحسين ولا خلص جسمه
يرضاها الله الشيخ ايبات بالهيمه
~~~
شو من گمت عنك شايفني ما جنك
لا گتلي ضلي هنا بعد لا جلبت بيه
اختك مصيبتها كلها بعبايتها
اسحگ عباتي بالمشي يعين الله رجليه

گلت بلكت تگوم وياي مثل كل مره متعوده
گتلك گوم بس الناس گالوا راس ما عنده
وسكت بلكت الله الموت منا للخيم حده

من عفتك ما كضيت ايدي
ولا زتيت اختك للخيمه
يحسين النار برجليه
ويردون اركض بالهيمه

انه الدللني العباس تاليها
تركض بالبر مجويات رجليها

خلص عمري بضيم ولجمه
وحسين ولا خلص جسمه
يرضاها الله الشيخ ايبات بالهيمه
°°°°°°°°°°°°°°°°°°°°°°°°°°°°°°°°°°

مشاهدة "يرضاها الله الشيخ يبات بالهيمه | ملا مسلم الوائلي" على YouTube
https://youtu.be/btHFLy1Rrs0

📜 القصيدة: بحب علي وصاني
🎤 أداء مسلم الوائلي
🖋 كلمات: علي أكبر الغرابي
~~
انه ابوي اعله العشگ رباني
بحب علي وعترة علي وصاني
~~~~
انه اول يوم شفت الدنيه بي
وصاح ابوي استمع يبني المطلبي
لا تحب غير النبي وآل النبي
ولا تحب كل ناصبي وسفياني
~~~
هاي دنيه وبيها شفت المستحيل
أرد اذب من العتب حملي الثجيل
يبني احلفك رايد بحامي الدخيل
غير حيدر بالك اتحب ثاني
~~~
يبني لو همك تريده ينجلي
هناك يم شباجه وصرخ يا علي
انه گبلك بويه بالهم مبتلي
لجن حيدر أبد ما ينساني
~~~
يبني اريدك بالعشگ گلبك جبير
لا تساوم عالحقيقه ولا تحير
گلهم اول حيدر ويبقه امير
وهاي مو من عندي من قرآني
~~~~
يبني اريدك كون واضح موقفك
لا تخلي الناصبي يستنزفك
حته لو كافر بحبهم صنفك
گله الله يريدني وسواني
°°°°°°°°°°°°°°°°°°°°°°°°°°°°°°°°°

مشاهدة "بحب علي وصاني - مسلم الوائلي - الليالي الفاطمية 1443" على YouTube
https://youtu.be/z4L0t4xaXLA

📜 القصيدة: يا هيبة الكافل
🎤 أداء: مسلم الوائلي
🖋 كلمات: محمود الموسوي
~~~
يا هيبة الكافل ... غيره وزعل شايل
يبو فاضل .. يبو فاضل .. يبو فاضل
~~~~
بعيونه شارة حيدره وبتاره بيمينه
تتراكض اگباله الزلم شردهم بعينه
عباس مالح بالحرب تشهدله جفينه
بجفوفه شال المشرعه وجاباها لسكينه

ذل النهر بيده ... هاي الحرب عيده
يبو فاضل .. يبو فاضل .. يبو فاضل
~~~
مشكوره جي جابت گمر حيل امه مشكوره
من عدهه وتخاف الزلم ريشاته بالصوره
واگف وصلي الگبته واسجد اذا ازوره
وابياتي بس الضحكة العباس منذوره

يا مالك احساسي ... يا تاج البراسي
يبو فاضل .. يبو فاضل .. يبو فاضل
~~~
من زغره شال الگنطره وخوفها بحجايه
مالك رجف من خزرته وظل خايف هوايه
عباس احله من السمه ودگ بالعرش رايه
شمر جفوفه وخضرت من عدهه مشايه

شمرها ذرعانه ... ومشايه سوانه
يبو فاضل .. يبو فاضل .. يبو فاضل
~~
عباس احله من العشگ وانه اعشگ ابياته
آدم سجد لمن اجن عباس ريشاته
موسى اندهش من هيبته وكسرها عصاته
مشه السفينه جي سجد نوح الكراماته

فاهي الگمر لونه ... يم نظرة عيونه
يبو فاضل .. يبو فاضل .. يبو فاضل
~~~
راهب على ظهر الشگر ويخوف اخياله
من يرفع ايده اعله النهر ما تبقه خياله
تتراكض شيوخ العرب خلاها بدلاله
والموت من شافه رجع خزراته جتاله

موتهم بكيفه ... ما ينگدر سيفه
يبو فاضل .. يبو فاضل .. يبو فاضل
~~~~
بدويه امه وخلفت زلمه وكفو اصياره
ريشاته معناها النصر تشبه الفقاره
عباس آيات الضوه وبيده الفلك داره
يگدر يرجع كربله ويتونس بثاره

خيل اعله خياله ... من حيدر افعاله
يبو فاضل .. يبو فاضل .. يبو فاضل
°°°°°°°°°°°°°°°°°°°°°°°°°°°°°°°°

📜 القصيدة: رايحين
🎤 أداء: مسلم الوائلي
🖋 كلمات: حسن الترابي
~~~
رايحين ورايح وياي برمح راس الحنين
رايحين عين ليه ولليتامه التمشي عين

يجوي رمحك يا قهر
خوفي لا يگضي النحر
رايحين .. رايحين
~~~
امشي وعيونك خذني وتيهت جدمي وعثر
انسه السياط اعله متني شما شفت راسك عبر
كلشي بيك يگلي ضامي ورمحك يعت بالنحر
هذا كله وتبتسملي اتصبر اختك عالقهر

ودي يحسين ابتسملك بس كسر گلبي البجي
تعبوا راسك حبيبي وعله رمحك منتجي

شلون أذا طال السفر
خوفي لا يگضي النحر
رايحين .. رايحين
~~~~
الحادي هز رمحك شماته وركضت اختك للرمح
خويه خفت ايطيح راسك وتلجم الگاع الجرح
شويه للشم الرگبتك ليش ما خله الذبح
منين تشتمك بناتك والزعل جاز الصلح

امتانه اتاني الليل خاطر يمي تنزل تستراح
ماي طول الليل اشربك والصبح تشرب رماح

عالرمح جرحك كبر
خوفي لا يگضي النحر
رايحين .. رايحين
~~
صار الغروب وگعدنه وجابوا الراس الهله
التمن عليه كل بناتي وشبگن عيونك هله
رادن يجبرن عذابه من التعب گالن حله
ودرنه بالماي اعله رمحك خاف يجوي انبلله

ندري سن الرمح حار ويجوي يحسين الصبح
حته لا يلجم رگبتك خويه بللنه الرمح

درنه الك فوگاه نهر
خوفي لا يگضي النحر
رايحين .. رايحين
~~
حيره تاخذني اعله حيره عيوني الك لو للبنات
بالعبايه امجلبه كلها شلون اصبر مدللات
نزلوا راسك حضنته وگتلي زينب كلشي مات
خلي راسي الليله يمج باجر بتنور ابات

هواي تنزف من جبينك منين اجيبلك ضماد
گتلي خويه يهون جرحي باجر يضمده الرماد

ظهري يحسين انكسر
خوفي لا يگضي النحر
رايحين .. رايحين
~~~
روحي حنتلك يفيها وشمتك نسمة عشگ
وانه بين عيوني شفتك باوعت گبل السحگ
الخيل كلش عطشنك تحجي كلمه وتختنگ
حيروني بذبحك اكثر بالرمح ما تنشبگ

حسين كون العايش انته وزينب الماتت عطش
ولا ألم بجفوفي صدرك ولا ادورلك نعش

ولا سبي وحنيت ظهر
خوفي لا يگضي النحر
رايحين .. رايحين
°°°°°°°°°°°°°°°°°°°°°°°°°°°°°°°

مشاهدة "رايحين | ملا مسلم الوائلي ليلة الثانية عشر من محرم الحرام 1444 هـ" على YouTube
https://youtu.be/DeCpEc8MS44

📜 القصيدة: اتزاحموا يم بابي
🎤 أداء: مسلم الوائلي
🖋 كلمات: أحمد الهلباوي
~~~
ويلاه مولاتي .. يا ضيم مولاتي
~~
تجيلي ضلعي انصاب تجيلي
يا فضه والبسمار هد حيلي
ما بيه اشيل الطاح بجفوفي
والمحسن اعله الگاع يوميلي

اتزاحموا يم بابي
وحترگ جلبابي
ماكو غيري بت نبي
بس رخصوا مگداري

راح ابوي وتالي
عگبه شلوا حالي
من يمته صار الأجنبي
يدخل عليه بداري

رد گتله النذل ما رد
ظل واگف عله اعتابي
انه ام الحسن وحسين
لا تدفع علي بابي
طحت من عصرته والنار
تسري بطارف اثيابي
~~~
يكرهون ابوي وحيف سووها
وضموها الي من مات ضموها
هجموا عليه بليل يا ويلي
وجابوا حطب والدار حرگوها

ناحله ومالومه
انحب ومهظومه
بعده اخضر اتراب الرسول
الگوم حرگوا داره

ونگطع سباحي
والوجع بصفاحي
يصرخ وإن بيها البتول
وگام وجر ناره

گتله ارجع يوجه ابليس
لا تحرگ عليه الدار
ولا تصرخ وإن عالباب
تهظم حيدر الكرار
زينب يمي ودريها
ترجف من تشوف النار
~~~
يا فضه وين الباب دليني
جف النذل بصوابه سد عيني
لحد فزعلي وگال هذا انه
ما عندي ناس وياي تحميني

حيدر يطلبونه
راحوا يذبحونه
راح اطلع اصرخ يا علي
ونار الجذع بذيالي 

رد عليه الثاني
وعالوجه صاباني
يا فضه صارت تنولي
الما عدهه ابوي ولا والي

حين اتناوشتني النار
صحت يم الخدر رجعي
يم الخدر شتشوفين
تذبح حالتي ووضعي
هذا الدم عله الحيطان
يمظلومه انكسر ضلعي
~~~
شيلوح طفلي الطاح شيلوحه
يا فضه وادري بنار مجروحه
بين الجذع ظليت والحايط
مثل الحمامه اصفيت مذبوحه

سوطهم بجاني
ورموا ذرعاني
وعالثره طايح جنيني
بحضني ما خليته

هدموا عافيتي
راح صاحب بيتي
مجتفينه اگبال عيني
وعذبته اوصيته

محسن من وگع مذبوح
بدمه انصبغت الغبره
مدري ذبحته الرجلين
مدري انذبح بالعصره
منعني الكافر اوصل ليه
ودفعني اعله الثره بسطره
°°°°°°°°°°°°°°°°°°°°°°°°°°°°°°°°°

📜 القصيدة: امشي دفان
🎤 أداء: مسلم الوائلي
🖋 كلمات: مازن الشطري
~~
امشي دفان .. بهلي الحنان
اهل تربان .. اعله منحر والدي
~
ما حاسب شگد اعثرت بس حاسب الطعناتك
عديتهن وتحيرت منهي اكثر مأذياتك

وسدت بتراب الگبر نحرك
ومكسر ضلوع السحگ صدرك
يحسين رايي بلا راي
يا بويه گبري اتمنه مو گبرك

اذرف دموع .. فوگ الضلوع
نحره مگطوع .. ودفنه الوحدي
~~
يا رية الكون الفلك فاگد عبير انفاسك
حيرني وضعك بالدفن شلون ادفن بلا راسك

مستغرب عيوني فلا تعمه
وجسمك اوصال بكربله انلمه
لو احط رگبتك عله التربان
خافن الگاع النحرك اتلجمه

امگطع اوداج .. نوره وهاج
انه محتاج .. اموت وياه تره
~~
يا بويه لحضات الدفن كل وحده تكسر ظهري
صوتك اسمعه يا علي وسد رضيعي الصدري

طبگ الجفن نحر بنحر اطبگ
نار الضمه لسه الجبد تحرگ
عبد الله كلما ينلجم نحره
يذكر النبله ورگبتي يشبگ

گلبي بالآه .. كل التمناه
دفنتي وياه .. ولا اوسده بگبر
~~~
هاظمني جسمك بالدفن لميته قطعه بقطعه
واذتني دفنة خنصرك غاسلته عيني بدمعه

حال الذي بگبر الأبو يحفر
امشي وعله اجدامي الدمع ينثر
يا بويه حالة صدرك أذتني
ما ظل ضلع للخيل بي تكسر

بصدرك الخيل .. هوسن حيل
يهدم الحيل .. عليلك بالدفن
~
توجهت صوب المشرعه وبيه الحزن متعادل
ولاگتني اكبر فاجعه من عاينت للكافل

بالباريه عمي وذر شلته
والهظمه مو السيوف كاتلته
دنگت محني الراس لجفوفه
وجف الكفيل بروحي قبلته

فاگد الشوف .. الراعي الجفوف
لازم انطوف .. وفاء الغيرته
°°°°°°°°°°°°°°°°°°°°°°°°°°°°°°°°°

📜 : نعي
🎤 أداء: مسلم الوائلي
~~
البارحه عيون الخلگ شبعانه نوم
وزينب اعله اعيالكم بالبر تحوم
حسين هسه الگومتك ما بلزوم
خويه هسه امبارك تحاجيني
~
خويه ما تدرون لو عدكم علم
شافوا طولها الما عدهه اسم
شلون ممشاها المره ويه الزلم
يلوگلك هذا الحجي يحسيني
~~~
خويه ما تدرون لو عدكم اخبار
من بعد طيحتكم بزينب اشصار
مطلوبين ثار الهم بثار
وهسه ذكروا يالحسين بحيني
~~
حيل تمشي النوگ وانه بلايه حيل
لا نهار اگعد تره ولا ليلي ليل
حافيه اركض وراه والدم يسيل
الحادي ما يرضه برها يتانينه
~~
خويه شفت آهات وألآم شكثر
ويه كل خطوه من اگومن وانهطر
خويه العافيه البيه بكتر وانه بكتر
وساعه طاري النوم ما مر عيني
~~~
يا عون
يجعفر يا صبي العين يا عون
يبعد امكم مته الغافين يوعون
جزه وكت المعاون بعد يا عون
انه بصفكم وأمر بيكم سبيه
~~~
اللجمه من الغربه هينه وصعبه من اختك تجيك
شلون ما جان افزع النه حسين لم روحك بديك
الخيل وانه وكلشي يوجع كلهن التمن عليك
خويه گلي انه ياهي كون بعدك تذكر اختك
خاف زعلان اعله زينب ونايم بگد ما ندهتك

يا عزيز وكلشي يرخص يم غلاتك حته بزري
عون لاگاني وعبرته وجيت يمك وانته تدري
زينب انه الدللتني الضيعتني التعبتني

گوم حگ الخوه وارجع لا يضحكون الشماته
لا يضحكون ويگولون حسين ما گام الخواته

فگدتك يا جبير الضيم
حسبالي جرح ويروح
يوگفلك وحاجي الروح
ما يتعاتب المذبوح
°°°°°°°°°°°°°°°°°°°°°°°°°°°°°°°°°°°°

مشاهدة "آهات | نعي حزين بحق السيدة زينب ع | الرادود مسلم الوائلي" على YouTube
https://youtu.be/8DiuZ2P3PPg

📜 القصيدة: مشتاگتلكم يا هلي
🎤 أداء: مسلم الوائلي
🖋 كلمات: عباس طالب
~~~
             هلي يهلي يهل زينب
~~~~
رديت مشتاگتلكم يا هلي
ميتين محد يگلي تدللي
تدرون انه الجبيره بالعمر
والشام ما يرحم الشيب وعلي

گلت من اجي تركضون ليه
وخروا الحبل فدوه من اديه
عنكم مشيت وجلبت نار
وانتم ولا جلبتوا بيه

طيحني يمكم حادي الهزل
يطيح اعله وجهه البيده الحبل
وبسوطه اگعد ونوب اگوم
واني ادري بيكم محد عدل
~~~~
رديت عطشانه بس المشكله
بالماي شفت الگبور امبلله
عدلين حسبالي الاگيكم صدگ
حلوين بس خربتكم كربله

جي طشرتكم خيل يسباع
دفانكم ما لمكم ابساع
جي طشروكم وين ما جان
دفانكم ظل يدفن الگاع

جيت أرد اگلكم ردوا الخيم
وعباس اريده يشيل السهم
وحسين اوخر عنه التراب
ونوب المه بالشبگه لم
~~~
رديت بس والله ما عندي گلب
ما اشوف بعيوني من گد الضرب
يخوان بشروني ما طاب الذبح
يا ماي واحدكم وما ينگلب

شلونك يمذبوح اعله مرتين
ما اريدك اتگلي انه مو زين
اكثر گبر حارگته الشموس
معناها هذا گبر الحسين

انه الظهرها هواي انكسر
ظلت سماها بلايه گمر
العطشانه اخوها وجفه عزيز
ما ترتوي شما تشرب نهر
~~~
رديت ما عدكم ابشاره صدگ
ما طاب صدر الحسين من السحگ
مخنوگ گلب اليحبكم يا هلي
ياريت عدكم هوى للمختنگ

يهل الجنايز عندي حيره
هم الها تشييع الحصيره
گالوا عليِ من هوست خيل
صارن تره ضلوعه گصيره

خيل اعوجيه فوگ الصدر
وياها صاعد فوگه الشمر
كل هذا وانه بالعين اشوف
جا گلبي حگه شما ينكسر
~~~
رديت گومولي خل نگعد جرح
والروس ركبوها كافي من الرمح
تعبان متني من الفراگ وهدل
والليل بعيوني يبدي من الصبح

وخروا التراب وگوموا ليه
دورولي ترجية رقيه
الگلكم حنينه الناگه جذاب
هزله وطحت منها اعله اديه

جابولي ناگه وطحنه سوه
گطعوا علينه حته الهوه
زينب غريبه الوادم تصيح
ناسيته گلبي بخيمه انجوه
°°°°°°°°°°°°°°°°°°°°°°°°°°°°°°°°°°°°

مشاهدة "مشتاگتلكم ياهلي | مسلم الوائلي | هيئه زوار الحسين (ع) | 1444هـ" على YouTube
https://youtu.be/Fzlund1hcCk

📜 القصيدة: اسباع الهواشم
🎤 أداء: مسلم الوائلي
🖋 كلمات: محمود الموسوي
~~
الهواشم هاي ساعتها
ترف بالحومه رايتها
يبو القاسم .. يبو القاسم
~~~
حيهم اسباع الهواشم رفوا بذاك اللوه
علي والحمزه ومحمد طبوا الحومه سوه
ظلمت ليل المعاره وهاشم توزع ضوه
علي يوگف السبعه بيده والنبي يوگف الهوه

الحومه طباها النبي
بالقتال الطالبي

السباع بسيفه سكتها
الهواشم هاي ساعتها
يبو القاسم .. يبو القاسم
~~
جان ابو القاسم عيونه تفيض نار بخزرته
ضربته تعادل عباته وعلي جان بيمنته
بيضه جانت راية الله بلون وجهه ولحيته
محمد يگابل حسامه الما يثني بطگته

هذا ابو القاسم نزل
لو علي خير العمل

دخيل الله اعله غيرتها
الهواشم هاي ساعتها
يبو القاسم .. يبو القاسم
~
عركه صارت والهواشم وي محمد غايره
علي طب اعله اليمين وحمزه طب عالميسره
ظلت الخياله تركض والرگاب مطشره
صاحوا دخيلك محمد هذا يوم الأخره

لن محمد يبتسم
حيدر مخلص الزلم

طبگ يسره اعله يمنتها
الهواشم هاي ساعتها
يبو القاسم .. يبو القاسم
~~~~
علي جان بگد محمد بالحرب يذبح زلم
والله جان يصيح طه وحيدر بنفس الاسم
وجان يكتب من ضواهم سوره سماها النجم
يعني لو صحت الهواشم صيحوا كلهم والنعم

خلي صوتك يعتلي
ونعم من شارب علي

دخيله الفطر كعبتها
الهواشم هاي ساعتها
يبو القاسم .. يبو القاسم
~
هاشم تحب المراجل همه وجه الله وظهر
من علي وهيبة محمد الله نزلها الصور
عدهه زلمه هواي يرهب كون يوگف عالنهر
شيل جفك لآل هاشم باجر تخلف گمر

دخيل هيبة حاجبه
من محمد شاربه

شحلاته اللبس ريشتها
الهواشم هاي ساعتها
يبو القاسم .. يبو القاسم
°°°°°°°°°°°°°°°°°°°°°°°°°°°°°°°°°°°

مشاهدة "اسباع الهواشم | ملا مسلم الوائلي | 1444 هـ" على YouTube
https://youtu.be/gp2I_uoF9ek