هيه هاي الچانت امي اتريدها
يصير خادم للحسين اوليدها
…………

يمه ردتك خادم وانته جنين
حته اگولن ابني خادم للحسين
هواي مْتأثره امي ابـ أم البنين

الخدمه نعمه وتندعي الله يزيدها
………..

بالزغر امي فلا ناغتلي ابد
بياحسين اتهزلي چانت بالمهد
تنخه ربها يصير خادم هالولد

كل مسيه لربها ترفع ايدها

…………

الاخو ينراد لو مسك خطر
لچن مايكفي الاخو بهذا الدهر
الماله خدمه ابدنيته ماله ضهر

الخدمه فرصه والزمن ميعيدها
………….

من توزع ماي بارد ضل حذر
بداخلك لحسين لايبرد جمر
الينچوي بحبه تگلي امن الزغر

فرگته اويه حسين لا ميريدها
…………

الماخدم لحسين گالت مو شهم
وينعبر لو صار تعداد الزلم
اتلگلي يبني ابخدمته شد العزم

الخدامه تعلي اوين اشديدها

…………

امي گالتلي يبعد امك تره
خدمتك لحسين ذخر الأخره
الما يعبره حسين ياهو ايعبره

امن السراط ومن هوال ارعيدها
………….

بالشعائر ما تحب تسمع عذر
تطبخ وتخدم او تلطم عالصدر
اعز من اولادها عدها الجدر

ويوم طبخ اثوابه يصبح عيدها

…………
#عباس_هابيل_الزينبي

عزيزة الحسين بس الزمن قاسي وضلمني
عزيزة الحسين. من والدي الغالي حرمني
ويلاه رقيه طفله وسبيه.
عزيزة الحسين. عزيزة الحسين
………………

بابا اگعدلي مشتاقتلك ياضي عيني
اول تالي ينزل دمعي ومترضيني

بويه الجمر بجفوفي طابع
ويسيل دم من الاصابع
كونك يبويه الصوت سامع
فز ياضواهن

جف التكوده امگيدينه
وضب بحبلهم ضابينه
من غمضت وليه انولينه
فز ياضواهن

اتگله بختصار. حر الشمس نشف لهاتي
اتگله بختصار. امشي وتطيحني عباتي
شفت المنيه. طفله وسبيه
………

بسوك الشام الوادم غربه لا موناسي
شمرو ماي الحار اعلينه وچوو راسي

حسبالي ماي ايشربوني
ما حسبت بي يحرگوني
من ابچي بويه يشتموني
كلش هضيمه

واحد يصيح خارجيات
واحد يصيح رافضيات
محد يصيح هاشميات
كلش هضيمه

ما اصدك اليصير. ياماي عيني حمره عيني
ما اصدك اليصير. يابويه اصيح وما تجيني
بنتيك سبيه طفله وسبيه.
………….
هم تتذكر من نتلاگه وحيل تشمني
من اسياط الگوم ادخيلك افزع ضمني

ازرگ متن بتك يبوها
بچعب الرماح ايدفعوها
تبچي بسياط يسكتوها
ويلاه يربي

وينك يبو زين المحاچي
مو راح اموت امن البواچي
جر اذني من جر التراجي
ويلاه يربي

عزيزة الحسين. يم الحسين ايسلبوها
عزيزة الحسين. تتعثر ابشلاء ابوها

وشهل اذيه. طفله وسبيه.
…………….


بابا الخيمه اعليه احترگت واني ازغيره
لاتتعذر رمح براسك صعبه اتديره

ركضت هذاك المنطلب ثار
اركض يبويه والرمال حار
وبذيال ثوبي مچلبه النار
وبگلبي جمره

اركض واطيح وعمتي ام عون
تغطيني من عين اليشمتون
كدامي مي بارد يشربون
وبگلبي جمره

نايم يبويه وين. دليني يعيوني بمچانك
نايم يبويه وين. دليني مشتاگه الحنانك

جتني اعوجيه. طفله وسبيه.
…………….

اسال زينب نامت گلها لو بس ابچي
الـ رمحك اركض مشتاقتلك وياه احجي

فوك اعله رمحك ياهو خلاك
معلمني اشبكك واحجي وياك
چا وينه صدرك وين يمناك
حاجيني بويه

بالدنيه مامش منك اثنين
حرموني منك ياضوه العين
وجابوك الي بس راس يحسين
حاجيني بويه

شمسوي يالحنين ونحرك خناجرهم تكطعه
شمسوي يالحنين. وجسمك حوفرهم تبضعه

راسك بديه. طفله وسبيه.


#عباس_هابيل_الزينبي
#للسيده_رقيه

يزينب يمه لاتبچين ضمي ادموعي الباچر
ضميهن لاخوچ احسين اذا ضل وحده بالعاشر
……………

هودي وصابري الليله يمچ هسه وليانچ
يصبرونچ يبعد امچ اوتبرد جمرة احزانچ
بس اشحالچ او باچر صرعه كلها خوانچ

وحدچ حايره اتضلين
من ابعينچ اتشوفين
الوادم سلبت الحسين

وساعتها الدمع مريود ييمه وكسرة الخاطر
………..

من هليله يازينب المصايب وكتچ اتحضري
انه اعرف صعبه بس اوصيچ يابت حيدره صبري
امن اتسمعين اخوچ ايصيح يعباس انكسر ضهري


بذيچ الساعه ابچي ادموم
عالمن الاخو محروم
يردلچ منكسر مهموم

والله يساعدچ زينب من ايرد اللچ حاير
…………….

صعبه الليله يازينب بس باچر ييمه اصعبُ
امن اتشوفين اخوچ احسين خده ابكربله امتربُ
ابدمعاتج يبعد امج غسلي وجهه المخضبُ

وكتچ ما مايرحمچ راح
من ايشوفچ الذباح
يحط راس السبط برماح

وللمخيم يرد احسين بس من حافر الحافر
…………..

لكني اريد اوصيچ يحره ابطبت الديوان
ما اريدنهم ايحسون بيچ امچتفه الذرعان
اريدنهم يشوفنج حيدر وسطت الميدان

شدي الهمه يالحره
واكتمي ابصدرچ العبره
انتي قائدة ثوره

والقائد رغم جرحه اوكسرته لازم ايكابر
…………

ادخلي ابعسكر الايتام دخلت قاده منتصرين
زينب هايه خيگلون لو طب النه ذو القرنين
وانتي ابكل فخر گولي انه اخت الشهيد احسين

ذو القرنين التهابو
يم عزمي اذا جبتو
اصلاً حته ما تلگو

انه لبوة علي الكرار والتحداني رد خاسر
…………….

هاي الثوره ابد متموت ثورة حق على الباطل
النصر من حصة المقتول والذل حصة القاتل
اليحچي الحق يكرهونه ويعيش ابراحه اليجامل

لحد اخر نفس لازم
نعارض سلطة الحاكم
وابد ما نركع الضالم

واذا ما ساووم المنحور يذل ابدمه الناحر
………..
#عباس_هابيل_الزينبي
#الليالي_الفاطميه
#شوط_كربلائي

بچفوفي اعصر مو ندم حرگه
گدامي وجنت فاطمه زرگه
ميت عساني ولا اثر فرگه
……….

الغرگ بالماي ما شايل خنگتي
مثل غصن الشجر واكثر كسرتي
تچمل البير لو طاحت دمعتي
تخجل النوگ من تطلع عبرتي

المغرب يمرني بالگلب حربه
بنص اهلي بس جاي اشعر بغربه
اشتم هوه الله وعايش بخنگه
…………….

بعد ياهو اليصلي فاطمه وياي
ومنو القبل العطش يسگيني بالماي
يلتطيحين فوگ العله يدواي
خلف الباب صعبه طيحتچ هاي

ماعندي غيرچ يا نفس ريتي
يـ ام بيتي دونچ موحلو بيتي
اخسرتچ مثل واحد خسر حگه

٠٠٠٠٠٠٠٠٠٠٠

رجف چفي ونزل دمع النواضر
وكت خله علي يكسر خواطر
وكفتي بالحرب وگفت مناير
بس تكسرني ياناس المشاعر

انه الشجاع اوكلها هابتتي
بس الزچيه الليله كسرتني
يمها طحت چن طيحت الورگه
………………..

صعب بنت النبوه گبالك اتلوع
ومن تشهگ هوه الله تصل الضلوع
الوجن مجروح ويحرگنه الدموع
ذابت فاطمه عيناً كالشموع

بس غمض او اتخيل المنظر
واحد يجر انفاسه ما يگدر
وشده اعله ريته صارت الشهگه
٠٠٠٠٠٠٠٠٠٠

يبعد عيوني بعدچ تعمه العيون
واضل دمعه ابوسط وادم يشمتون
جبل فكدج يزهره او فوگ المتون
يعوني ولو دفنتچ ما يضل عون

اكسرتيني والله بروحتچ هايه
الحد شيبي ردتچ فاطمه ويايه
عفتيني ليش وخربت الرفگه
٠٠٠٠٠٠٠٠٠٠٠
#عباس_هابيل_الزينبي
#الليالي_الفاطميه

حره ومسطورة جفن
مهمومه واحچي ابحزن
من صاحب كلمة وأن
………..

بس سمعاً وطاعه اسيادك اتگلهم
الـ وأن لامثالك امثالي تدَنگ الهم
انه اهلي بالكتاب الله يمجدهم
وبوادي صَقر اهلك توعدهم

منبوذ ومالك فخر
تاليهاابوادي صقر
ابحفرة نارك تندفن
………….

شمسويه وعليه التمت الاعراب
انطي البيعه لو بابي تحرگه اجناب
عقد نفسيه عنده واملك الاسباب
لان ماكو خليفه يخلي عقله اباب

ما ابايع فاقد عقل
والباع الذمه ونذل
اتيقن لا مو تضن
…………
اعرفك زين اعرفنك يچتالي
بتاريخ المراجل دفترك خالي
تتساوه تريد اويانه من تالي
رگبته تنكسر اليّعاّيين العالي

رجال اتلملم الحطبُ
اشجابك لاسياد العربُ
تاريخك شامة وَجن
………….
تحرگ داري وتگلي اعتذرلچ جاي
اليبدي الماي صعبه ايرد يلم الماي
تكسر ضلعي والنوبه تدور ارضاي
اعتذارك ما ينفعك لا تجربه اوياي

صلحك لو يصبح دوه
العتلي ما نرجع سوه
وللموت ارد ابقى اون
………….

انه ام المؤمنين او ام جمل امُك
انه بنت النبي وانته النبي خصمُك
انه اسمي فاطمه يالتستحي امن اسمُك
تره التّاريخ باچرّ والله ميرحمُك

تاريخك كله انعرف
مو ثوبك ثوب الشرف
امن تسمعه اتسد الأذن
……

ماتنفع صلاته الـ عالحق ايجامل
وبس الباطل اليسكت عله الباطل
على كرسي الحكم من يگعد الجاهل
يّتْحَمل عظمّ هالمشكله العاقل

ما ابايع ضالم وعد
خاطر ما اصيرن سَنَد
لدموع التچوي الوجن
……….
نهبتوني امن اگولن اضعف الايمان
مَتورث النبوه يگول شيخ افلان
احسن شي اروح ابنيلي بيت احزان
ابچي اعله النبي وادعي عله الشيخان

يالغاصب حقي بفدك
اسمع هاي الكلمه الك
ما دايم حكمك وَهّن
………
#عباس_هابيل_الزينبي
#الليالي_الفاطميه

لعنة اللهِ على اهل السقيفه
………
صاح صوت اهل الارض واهل السمه
لعن الله قاتليكِ فاطمه
ربي العن هالعصابه المجرمه
ردو المرضيه ليّك امخذمه

عالوجن سطرو مره حره وعفيفه
………..

نبقى نلعن بالجهر لاخر زمن
لعن الله قاتلچ يـ ام الحسن
الكرسي همهم ناس عبادة وثن
والله هذا الحكم وهنً في وهَن

خالفو عهد الله واحكام الصحيفه
…………

ناس ماتعرف شنوه المستحه
دارو اعله الزهره چَن دور الرحه
دخلو الاسلام دخلت مصلحه
چانو ايشوفونه صفقه واربحه

ذوله ما بيهم ولا نطفه نظيفه
………….

ياخليفه النصبك مثلك زنيم
لان خالف امر قرأن الكريم
البسقيفه امنصبه شيطان الرجيم
والي نصب علي رحمان الرحيم

ترضى ماترضه علي هوه الخليفه
…………

حته هاي احفادهم مدري شتريد
شكد نعلم لچن بيهم ما يفيد
تعترف بحسين مذبوح وشهيد
اوترد تترضى على القاتل يزيد

اوهند يعتبروها انسانه وشريفه

…………..
#عباس_هابيل_الزينبي
#الليالي_الفاطميه

بيا مسيه بيا زمان يعله صوت المنتضر
يالثارت الضلوع يالثارات النحر
………..

الف واربع ميت عام الصيحه ننطرها بدمع
يا لثارات الحسين اويالثارت الضلع
تحت راية طلب ثارك امنيتنه ننجمع
ابكل مسه اللهم عَجل صوت عالي يرتفع

الف واربع ميت ننتضر منك خبر
……….
تصلب الجبتين يمتى الشجره خضر عودها
احنه والزهره نتاني العجل يا موعودها
سر گلب فاطم يمهدي وخلها تحچي بزودها
يوم تصلبهم تزيحه الورم من اخدودها

چفه تكسر يمها كون ذاك التعده وسطر
……….
يا ابو صالح گوم صول بصولة المعروفه
صولة العباس ذيچ البيها ذب چفوفه
اعداك من لحظه ضهورك بيها رجفه وخوفه
اضهر وسل سيف جدك ذاكه ليث الكوفه

سيف اليطبره يروح بطبرته لوادي صقر
…………

كل گلب شيعي يناطر سيدي وبحرووه
يشاهد ابچفك ترفرف راية المنشوره
الطريق اضلم نناطر وجهك ايشع نوره
وتجي اتدلينه اعله گبر الزهره حته انزوره

يمتى يالمهدي تعود والله موتنه القهر
………..

من بعد ثارك يمهدي الحضره انته ابنيها
واليالي الفاطميه بالصحن نحييها
وسوي مجلس يا ابو صالح واحنه نلطم بيها
ركعتين ابصحن فاطم بالعمر نشريها

ركعتين اتحس بامان وما يمر بيك الخطر
…………

يلا يا يوسف الزهره گوم شد احزامك
الرافضيه تموت كلها سيدي گدامك
تدوس عالشيخين ردنه سيدي بجدامك
لحظه لحظه ننتضرها يالحبيب ايامك

وتعبر اجثثهم نريد فارس ويعبر نهر

#عباس_هابيل_الزينبي
#الليالي_الفاطميه

جروح بينه مثل فاطم بس نكابر
لا تحاوول ما نساووم عالشعائر
…………..

لا تحاول گبلُك اشْگدّ حاولو
مثل شبچه بريح شيّ ما حلصو
هالشعائر تنمحي اشگدْ هددو
الشعائر ضلت او همه انتهو

يفنه كلشي وتبقى موجوده المنابر
………
لو تسلمنه مُلك ارض وسمه
مانبدله ابطرف مجلس فاطمه
امقصر الما يبچي عالزهره دمه
هل مجالس هيه حُسن الخاتمه

الشيعي من غير المجالس يبقه حاير
……….

لاتفكر فوگنه عالي تصير
احنه شيعه واعله حته امن اليطير
لاتهددني بوضع دامي وخطير
غير حيدر مايصح واحد امير

والله مانهتم كلامك هذا عابر
…………

عيش طيب يا اخي كافي خبث
عالشعائر حارث الدنيا حرث
تتعب الهذا الحچي ما نكترث
وباچر الأولادنه يصيرن ورث

نبقى نلطم ما نخاف اعله المناحر
………..

خلي طوفانك يجن ما خايفين
بالسفينه الواسعه مستنجدين
هل سفينه اشراعها اسمه الحُسين
وقائد الرحله امير المؤمنين

بسبحة الزهراء نعديها المخاطر
………

اليفكر يوصل الحد كربله
اچفوفه بالرگبه نحطها اگلاده اله
اليجي برجله امحمل انرده الهله
واليجي زاير هله ومية هله

توازي غيمات السمه اتضل المناير
………
#عباس_هابيل_الزينبي
#الليالي_الفاطميه

لعن السقيفه بكل يوم
سادس فرض نعتبره
…………..

ماننسه ثار ام الحسن لو لحظه
يموت الگلب من ينسه دگت نبضه
المو برائي ما نريده انرفضه

ابمجلس عزاء الزهراء اتعلمنه هاي الفطره
………….

اهل السقيفه والتنصب بيها
ابشسع الزچيه كلها ما نشريها
مابيها خير لو شهم ندريها

لابارك الله ابهالناس. موبؤه هاي الزُمره
…………..
منجامل او نترضى ابد عالجاني
ياربي العن كل دقيقه الثاني
والاول الخله الزچيه اتعاني

والثالث الساكت چان ابيوم اهجمو عالحره
………….
يزعل جنابه لو لعنه ارجاسه
ويتأذه حيل او ينجرح احساسه
الما يرضه حايط يمه يضرب راسه

احساسه شو ما أذاه بيوم الضلع والعصره
…………
لا تعترض كل ما لعنه الاعداء
لاخر نفس ماننسه ثار الزهراء
بس تحچي زايد نلعن او بالاسماء

لو ما نخاف اعله الدين اسمنه ابضوح انجهره
………………..
اخر نفس لو خيرونه اشتمه
لو العن الباع الشرف والذمه
الينقظ وضوئي لو نطقت ابأسمه

ماشمه والله العن بيه كلمن يأذي الزهره
…………
نتوضه للثار ابدمه المنحر كوون
واليعترض نفگس اله اثنين عيون
لجل الزچيه ارواحنا كلها اتهون

والرافضي للزهراء ما يبخل ابدم نحره
……….
#عباس_هابيل_الزينبي
#الليالي_الفاطميه
#ميمر

صعبه الشايلك بالعين بنعشه تشيله بالتالي
والغالي تره امن ايموت ابفگده يكسر الغالي

اعينوني اعينوني ابحمل فاطم اعينوني
………..

انه الضحاك اذا تشتد المعارك چن افوت الها
وروس القاده سابع گاع چنت ابسيفي انزلها
بس الزهره تكسرني هاي الما حسبتلها

اولو وكتي يرد اردود هم متمر على بالي

اعينوني اعينوني ابحمل فاطم اعينوني
……….

يسلمان انكسر ضهري يسلمان النعش چتال
ولا چن فاطمه بوسطه العاشت يمي چنها اخيال
ردت احمل لچن شفته نعشها ماتحمله اجبال

الصارت كالخيال اليوم ابفگدها شيب اخيالي

اعينوني اعينوني ابحمل فاطم اعينوني
…………

لتتفاجئ ابد مقداد نعم ياخويه ما اگدر
نعش فاطم كسر ضهري وانه الي اقلعت خيبر
غير الزهره يا مقداد محد يكسره الحيدر

ومو عجبه لمن تسمع نحيبي اوونيّ العالي

اعينوني اعينوني ابحمل فاطم اعينوني
…………
يبو ذر حيلي ذر التراب صار ابروحت الزهره
الكاسر خيبر ابچفه هاليوم انكسر ضهره
راحت فاطمه امن ايدي وخلت بالصدر عبره

بس هم وكدْر بالبيت راحت بسمَة اعيالي

اعينوني اعينوني ابحمل فاطم اعينوني
…………

ولتسألوني عن الحيل غرب عني وابعد وين
يتامه اگبالي اشوفنهم زينب والحسن وحسين
حگهن يعمن اعيوني وانه دافنلي گرة عين

عشرت عمري دافنها ابفكدها مرمرت حالي

اعينوني اعينوني ابحمل فاطم اعينوني
…………
صدگ يعني بعد مامش فاطم ليه تفتح باب
صدگ يعني وجه فاطم اضمه اليله جوه تراب
اويلاه او الف ويلاه امن انادي وما ترد اجواب

وانه اذكرها قبل ما صيح الزهره اتعنالي

اعينوني اعينوني ابحمل فاطم اعينوني
…………

#عباس_هابيل_الزينبي
#الليالي_الفاطميه

كَلميني. راح اموت امن القهر
كَلميني يمه مو ضهري انكسر
…………..
سكتچ يمه هاي اهواي تاذيني
لعد وين الهلا البيها تلاگيني
كلمة يمه اخر مره سمْعيّني
اموت وياچ وحدي لا تخليني

يالحنينه. سكتتچ گطعت نحر
……….
بعد اللمه ذيچ الحلوه والگعده
يمه الدار صارت دخلته شده
حنان الام يتَعب كلمن ايفگده
اقل نسمة هوه لو هبت اتبرده

ليله يخلص. بالمدامع والسهر

………….
خساير شوفتني اهوايه دنْياتي
يمه وانتي اعظم كل خساراتي
لون ما فرگتچ من يسمع اهاتي
لون ما كسرتچ سهله انكساراتي

والله يمه. احني ابجفاچ الضهر
…………
متعلم اطب الدار احب راسج
خلصت العمر كله بدفو انفاسچ
اخاف ويحتويني ابعطفهْ احساسچ
اثر طيب تركتي يمه عد ناسچ

من دفنتچ. ما رحم بيه الدهر

………….
حظورچ يمه باللطف ردته كون وياي
اروه ابشوفتج لو شح عليه الماي
بضهر عاشر لونهم خضبوني اعداي
تسويلي ابعباتج يالحنينه افياي

بالصحاري. جسمي يايمه انصهر

………….
حسين انه حبيبچ يمه يالزهره
حبيبچ يمه انه الينگطع نحره
العلى صدرچ دموعه تنذرف حمره
باچر الاعوجيه تسحگ ابصدره

يالحبيبه. امن السحگ صدري انحفر
………….
#عباس_هابيل_الزينبي
#الليالي_الفاطميه

والتصعب اعله الدكتور
ام البنين اتحلها
………….
غِيمة مَحنه او تمطر ابحنيه
يمها الحوائج تسهل او مگضيه
ذريه تنطي الما اله ذريه

ابذريه تخدم الحسين اعيونك اتكحلها
………….

عالعله توگع مرهم ايطيب اگلوب
بالشده لو ناخيها ساعتها ايوب
امن العافيه ابچفها تفصله الثوب

من علته ايطيب ايوب لو فاتحه قاري الها
…………..

العنده مرض يصعب عليه اعلاجه
والبالسجن ويدور اعله افراجه
بالفاتحه اليقراها تگضي الحاجه

لاتشكي بالعله البيك ام الگمر تندلها
…………

حملك لوّن ما گدرت اعليه امتون
ذب حملك اعله ام الگمر يالمديون
قبل الدعاء تلگاها مدتلك عوون

ام الكرم وام الجود ماردت اليسألها
………..

الدنيا لو بچتلك العين ادموم
وبكل نفس تشهگ تخليك اهموم
حلف الوفيه بالحسين المظلوم

شما مالت الدنيا اوياك تنخاها الك تعدلها
………….

سبحانه رب المن كرم سواها
وباب الحوائج للخلگ خلاها
مثل الگمر ام الگمر علاها

حاشاها مابيها قصور رب العرش كملها
………….
هاي المره من عدها ما صار اثنين
عگب الزچيه يُمه صاح الها حسين
كل هذا لكن يمه مارفعت عين

امربيته لاكن مولاي اتگله لو صاحلها
……..،
……..،
#عباس_هابيل_الزينبي
#ليالي_ام_البنين

من سنه ونص انتضر.
موتتي بفارغ صبر
……….

من سنه ونص ماشفت كل راحه
حايره وعالراحه اصفك راحه
الفرج بس موتتي مفتاحه
من بعد هم وصبر وانياحه

تفْرِج ابلحد الگبر
……..
الغربه تكسر وانتم اعرف بيه 
انه متعلمه على الحنيه
الشام لهل الشام موّحش ضيه
اشحالت الماعدها اخو ومسبيه

ابكل مسيه انكسر
………

ليش وحدي بموتتي عفتوني
يا هلي وبس الغرب شيعوني
ليش چفكم ما يسد اعيوني
بگبري ردت اخواني الينزلوني

حسره ضلت بالصدر
……..

چانت امنيتي ابگطع انفاسي
جفن عيني ايغمضه الي عباسي
والحسين بچفه يمسح راسي
لان هاي الناس ابد مو ناسي

ما يراعوون الكُبر
…………

يا بعيدين البعد اذاني
كون اموتن وبوسط خواني
اليله اخر ليله ويه احزاني
لو بعد عندك حزن يَزّماني

بعد ما اقبل عذر
………

من الطفوله للگبر مهضمومه
ميته عدله يا هلي ومضلومه
الفرحه من عدها عشت محرومه
چنت حته امن ابتسم مالومه

بس تعب عشت العمر
#عباس_هابيل_الزينبي
#الليالي_الزينبيه

ادعي ابدمع العيون
وبحسرة المسجون
يالخلصت ذا النون
خلصني من هارون.
…………

يمخلص الجنين امن المشيمه انه
كل ما ادير عيني ابصفي سجانه
جفوني امشيبه وعيوني ذبلانه
صعب حاله تره المتگيده ذرعانه

مو صعبه يامنان
تحرر الي الذرعان
العصه اصبحت ثعبان
وبيها اهْلكتْ فرعون

………..

اشتاگتلي الشمس من كثر مامسجون
يرب هارون تعبني سجن هارون
الضوه مثل الهوه هم تشوفه عيون
عشت هالحاله انه بزنزانة الملعون

فك قيدي ياربي
والله انشلع گلبي
ما ينوصف تعبي
ما يحملنه امتون
………

من طين ورمل يمخلص الشجره
خلصني دخيلك تخنگ الحفره
مثل الخيمه عبدك منحني ضهره
عطوف ومنتضر من عندك النضره

خلصني ما اگدر
احمل بعد اكثر
عبدك تره تحير
كسر الگلب ميهون
…………
يمخلص اللبن من بين فرث ودم
من طامورة الملعون يمتى اسلم
تخلصني ردت للدنيا ما مهتم
سجاني نذل وبفاطمه شتم

كدامي متبسم
ويتشمت او يشتم
وانه ابدمع يسجم
شيبها الي الجفون

…………
خلص عمري يربي بالسجن محتار
مثل الخايف المطلوب دم اوثار
حديد وحجر منهن يالمخلص النار
خلصني عليك المرتضى الكرار

ياراعي المروه
اشهگ نفس گوه
من خنگتي اتلوه
وانه ابن اليطمنون
………..

خلصني الهي ادعي بضعيف الصوت
خلاصي ادري مماتي وانه اريد الموت
يونس فرجتله من ضلام الحوت
وماتفرج عليه انه اله بالتابوت

التكثر اجراحه
بس دمعته اسلاحه
وما يعرف الراحه
بس يم اليشيعون
………

#عباس_هابيل_الزينبي
#الليالي_الكاظميه

دمك علي بيوم الطاح
بكل قطره خضر قاده
……..
من المشايخ سيدي للرضعان
نسل الهواشم كله قاده وشجعان
العباله نخلص هذا كلش غلطان

ما تنولي الگاع بيوم وحرز الله بيها الساده

……….

لوگابلُونه ياعلي انأذيهم
نكسر أيِديهم احنه مَنلاويهم
من خيبر اليومك ندگ اعليهم

اليتمرجل اعلينه ايريد ذلينه احنه اجداده
………….

ماعدنه واحد بس حَچي وِيهدد
الطاري المعارك نبتسم ونعيد
نفرحله اليرد بالحرب مستشهد

واحدنه قبل التشييع انْمِيل اصبعه امن ازناده
………….

هذا البيان ابكل شموخ انذيعه
المذهب امانة حيدر او منبيعه
صمام امان الدنيا احنه الشيعه

والشيعي لو عاند نار ويچوي الحديد اعناده
…………

مابينه واحد يخضع الچتاله
مدفع عدونه انگابله بالفاله
من المهد حد اللحد خياله

جيش العدو خلينا حاير تره بمشراده
……….

يابو الحسن يابو الحسن والعباس
ماعدنه قائد يوگع امدنگ راس
مثل النخلُ كلهم الگطع الانفاس

نموت ابحرب يابو حسين مامتنه فوگ اوساده
……….

يا بالحسن عندك زلم وفايه
انطو احچايه او همه گد الحچايه
الگاع العدو اتعنو او داگو ثايه

الفكر يذلهم للموت هم ما ينول امراده
…………
#عباس_هابيل_الزينبي
#الليالي_العلويه

شيعتك ماننكسر
لو شهاده لو نصر
……
اخذ يامولاي من عدنه الوعد
مانزل للموت نبقى اعله العهد
نثبت ابسوح الحرب مثل الوتد
انهزلك الحومه مثل هزت المهد

نسطر العايل سطر
……….

احنه عدنه القاده من يستشهدون
من دماهم قاده راح ايخضرون
زلم حيدر لحظه ما يتردوون
ما يهمهم مال ميهمهم بنون

اويانه ما ينفع عذر
………

المذهب الهاي المخاطر مستعد
خيبر امن اتعود حيدر هم يرد
مانرد مثل العمر لمن نهد
ما نخاف اجدام عالساتر نشد

ما نفكر بالعمر
……….

تربيت عباس اخو الحره الكفو
فرت السبحه نفرلك بالعدو
منهو يگدر لينه ياحيدر منو
احنه اصل الدنيا والعالم لفوو

من نهد نچوي الجمر
……
صعبه نسكت ماتعلمنه السكوت
احنه نحچي وكلها سكته ابلايه صوت
امغمضين اعله المعارك من نفوت
لان مابينه العله اوساده يموت

ابكل كلافه اندگ صدر
…………
#عباس_هابيل_الزينبي
#الليالي_العلويه

من نهج البلاغه ومن علي اتروه
دنيا بدون حيدر كلشي ما تسوه
...............
لتكلي اركع لتكلي اسجد
لتكلي اوفي شما مطلوب
تريد اتطب جنه ابلا حيدر
تدخل من الماي ايروب
كض شباجه وكلي ادخيلك
جيتك ناگه امحمله اذنوب
ياماي الكوثر عطشانك
يا رواي الكل متعوب

ماعندك گلب لو ما علي تهوه
دنيا بدون حيدر كلشي ماتسوه
..........
حيدر يشفع حيدر يرفع
حيدر بيده الجنه ونار
خلي يتمسك بي ويواليي
كلمن رايد عقبى الدار
لتعادي واحذر من عنده
لو سل بجفوفه الفقار
لاتستعجل واسأل خيبر
ختسولفلك عالكرار

منه القوه جانت تاخذ القوه
دنيا بدون حيدر كلشي ماتسوه
................
تتعب لتدور ما تلگه
واحد يشبه داحي الباب
من تراب العالم كلها
وهو اينادو يابو تراب
لا يتقلد لا يتشبه
لا موجود ولا ينجاب
ياهو المثله ومهده الكعبه
وياهو التابوته المحراب

الـ كفواً احد لا شك تره هوه
دنيا بدون حيدر كلشي ماتسوه
...............
رابع قنع روحك بيها
ما اقنع والله اني بهاي
الله وبعده الخاتم حصراً
والثالث حيدر مولاي
مغمض وامشي وكلشي بكيفه
بيده الرايه وبيده الراي
جرحي الكرار وبيه افخر
وما طيبن لو غيره دواي

الاول حيدره قبل ادم وحوه
دنيا بدون حيدر كلشي ماتسوه
................
حيدر من يسحگ عالصخره
تخضر وتورد ريحان
الورگه الصفره امن يعاينها
ايرجعلها بنضره الالوان
مثل الغيمه وخيره مكفي
زايد ومغطي الكيعان
بلعازه الكرار اتشوفه
من تنسد بوجهك ندبه
وتنفكلك كل البيبان

ادخيلك ياعلي من تندبه حلوه
دنيا بدون حيدر كلشي ماتسوه

#عباس_هابيل_الزينبي
#الليالي_العلويه

اللهمَ والي من والاه
اللهمَ عادي من عاداه
……..

الدنيا اذا تغريك وتمنعك تتوب
حُب علي يسوي مناعه امن الذنوب
اتمسك ابحيدر علي وبحبه ذووب
صفي نيتك لاتضل روحك تلوب

يربح تره الصفاها نيته اوياه

………
حُب علي ايسوي مشاعر للجبال
حُب علي وولايته اتسوي رجال
مو اصيل اليبغضه هذا محال
حُب علي حصراً لأولاد الحلال

حُب الصميده والله يا محلاه
………..
علي سر الله وامينه وغضبته
علي عطف الله الرحيم ورحمته
الما تبع حيدر علي بولايته
ماتباهت بيه امه جابته

تضل تستحي والدته من طرواه
………

الماتبع حيدر علي هذا زنيم
او نطفته من ضهر شيطان الرجيم
يعني من اعداء الرحمن الرحيم
وخطوه ما يخطي بسراط المستقيم

مايخطي خطوه الما لزم يمناه
…….

علي ما متنصب ابيوم الغدير
علي امن الذر نصبه الباري امير
انرد على الصرح علي رابع يصير
ابأنكر الاصوت ياصوت الحمير

ما نستحي امن اليبغضه والله
………….

#عباس_هابيل_الزينبي
#الليالي_العلويه