كاسرت عمري اعله عمرك
كطعت ليش . . وحِـركتك
جويه مني وجويه منّك
ونتشيت . . استاهلك . . شهكة عوافي
وخيّبت ظني . . وصدك ويّاي ظنك
ماكلت عنك . . عرك جفّك ابجفّي
ولا كلت جاسك زعل . .
واشتعل دمي ابنار دمّك
أصعر . . وتستسهل . . اتشاغل خيالي
وياخذك غيّك . . خرز خلخال . . تِـطّــشّـر وألمّك
ومدري ليش . . أتمايزك وردة اكرنفل
اِتّيه روحي ابريحتك . .
واحتار من ياصفحه اشمّك
أختلي ابحسنك . . وافج كلبي واطلعك
تلعب ابعمري . . وخاف الغير يندلّـك وأضمّك
خاف تاخذني . . اعله بستانك فرحِتي . .
وخاف تكبر حيرتي . .
وحسنك يغرّك
خاف تِطشّر ولك . . وشلون المّك ! ؟
كالو : ايحبك ! !
كلت من شاف كلبه ؟
وجبّست دمعي . .
وسكن نبض الكلب . .
عن لا يذمّك
تِرسْ جفّي . . اسوالفك وحده اعله وحده
وعرك جيدك زمزمي . .
وخجلان تتعذّر !
واكلّك : لايهمّك
من تجِسني اشفايفك
تاخذني غيبه !
ومن تِرِشْني ابمزنِتَك . . ولهان افز . .
لن روحي يمّك ؟
اختلي ابحسنك . . وأفج كلبي واطلعك
تلعب ابعمري . . وخاف الغير يندلّك وأضمّك
وخاف تطّشّر خرز . .
وشلون المّك ؟
اشجان ضرّك . .
تختصر بعدك عليه ؟
وكلّي شكرات وحمد
للمختصر . . حسنك ابخصرك
تشرب معافي . . حناني ولهفتي
وتسكر ابدمي . .
وتنتشي ابغيّ الشذى . .
وتتعزّل اعزال من اجرّك
من جمعني وياك ؟
من شدني . . ويه طولك . .
طعّمك بيّه
وصرت حلوك ومرّك
لنها ما بالغبشه . . غبشه . . ابغير عينك
خاف اترزبيك .. حد كطع النفس
وازهك واضرك !
خاف تطشر خرز ..
وشلون المك ؟
ومن كبل .. كل شوكه عمري من الطوارف
حسبت مثل الوداد .. الفات ودك
من كبل .. وآنه الورع كحل اجفوني
وجنت اظن :
وكت التهد بيه روحي اهدك ..
لني كلما فززن صبري الليالي ..
وخان وكتي
اتوسلك .. هدوة كت خليني عندك
اوعاذرك .. لو هدل عودك ..
من كدر يحمل حسن مثلك وكدك ؟
غاذرك تغلط ابحكي ..
وتبخل ابظلك على النايم ابسدك
عاذرك تغتاض ..
بس من غير شاره ..
وشارتك هالبينت
ودخيل جدك
عاذرك .. عن لايهم كلبك ابهمي
وتنترس عينك دمع
وتنترس عينك دمع

#عريان_سيد_خلف

ويالاصابيعج جكاير (كنت)
من تومي بزعل يتطّشر الباكيت كلّه
****
انتي روحي وراحتي
وآخر نده الـ عالورد ينزل
انتي ليلي ولالتي وتفاحتي الجمعت حلاة الشمس والظل
يلّي رمشج يجمع خيوط الفجر
بتّ ويه بتّ وبيها يغزل
يلّي صوتج غفوة الغبشة
وخمر تينة نده وبيّن فعلها براس بلبل
يلّي بعيونج عزم مهرة عرب
من تشم ريح الطيب تصهل
يالحلاتج سومري يفوّح بخور وطيب
وشفافج توجّ بالبوس فلفل
ياغصــــن مضـــــنـــوك
ماشايف غصن هاكثر يحمل
كل كتر مني اشتـــــــعـل
والكل يريد يذوب بالكل
وكل كتر منج نبض فحطان
ومكهرب وبس ينجاس ينتل
ياحبيباتي العذر لـ لله
الحلاوة البيها تكتل
توعد وتوفي وتوج شمس بشمس ما يوم تنكل
خوفوهة محبتي ودكت رجل لليكره ولليحسد وللراد يعذل
وشتت ومطرت فرح وأمتلت روحي البور سنبل

#عريان_سيد_خلف

ضُل وياي
أريدَك والـ بَُقن چَم يوم
وهالچَم يوم صارن حّدك
وحّدي ،
خليني أرد اشوفَك گمت
أحِسك طيف
يا عين التگض الطيف الـ يّعدي !
اخُذني وياك أريدَك ما أريد
الـ غير
وكون بسّدك أكعد واكعُد بـ سدي
لتخليني وحدي ،منين
أعرف الناس
لا أكدر اعاشر ، لا خلگ عُندي
أحِب شلون غيرَك من
أود شِلون ! وآنه وياك
گلش خلصِت ودي أخذني
وياك مني
شعندي باقي ويايّ
گلي ويَاك أخذني وكلشِي لتودي .

- لَـَ جبار رشيد .

الدنيا مو دنية عشك يبن الحلال
لا تخلينه بمحبتك ننجبر
أنت أبن العافيه وأبن الدلال
وأحنه ولد الموت ربانه الفقر
وبينه وبينك فرق كلش جبير
ومانكول أسباب كل هذاالفرق
مانكمل السالفه لحد الأخير
من الأساس وياك مسدوده الطرق
ويانه ما ترهم ومانرهم محال
وياك مانكدر ندوم و نستمر
و ياهو كلك بالسهل درب الوصال
وأنت تدري دروبنه مورثه جمر
منين أجيت وبالعشك عندك يقين
منين أجيت و ياهو سوالك درب
أنطيني مهله خل أشوفن وضعي زين
وخل أشوف أنوب هم أكدر أحب
قلبي تيهته وشرد ما أدري وين
وأنا صار سنين ماعندي قلب
وخالي قلبك وأنت بعيونك جمال
كل جمال الكون يمك يعتذر
نبع شفتك يعني كلماتك زلال
والعطش بالروح تارك جم فطر
الدنيا مودنية عشك يبن الحلال
لا تخلينه بمحبتك ننجبر
منين أجيبنلك خلك يرهم عليك
وأنت آية من الحسن وأحلا الدلع
وأنا يافرحه الأحطها بين أديك
وأنا بجفوفي عمر شلت الوجع
وحتى ما عندي إبتسامة من أرد أجيك
ليش تشلع قلبك بقلب انشلع
وليش تطلع خاسر مشلول حال
وتترك الضحكه وعليمن تنقهر
راجع أفكارك بعد عندك مجال
ليش بيه تريد قلبك ينكسر
الدنيا مو دنية عشك يبن الحلال
ولا تخلينه بمحبتك ننجبر
أدري بيك تحبني ماداعي الكلام
وأدري بدموعك صدك تبجيلي
من تجيني لا تكلمني بغرام
وعفيه عوف الشوك لا تحجيلي
أنا ليلي بلايه واهس ما أنام
شلون لوصرت أنت واهس ليلي
وشلون لو حبيت شكلك والخصال
وشلون لو باجر تروح تعتذر . . !
هم ترد لمن أكللك تعال
وتنتظر لمن أكلك أنتظر
الدنيا مودنية عشك يبن الحلال
لا تخلينه بمحبتك ننجبر
أحنه ما عدنه الحب يعني الحب عذاب
ولازم من انحب نذب بالحب فلك
لازم نحب باب بيتك والتراب
و نحب كلشي العايد وراجع ألك
و نحب ناسك كلها شيب وي الشباب
ولازم نحب كل عمامك وي هلك
لازم نحبك نحب الخال خال
وكل هذن شويه لتكول شكثر
أحنه ماعدنه العشك صفنه وخيال
أحنه من انحب نطك و ننفجر
نخاف من حبك لأن حبك جديد
ذهب جنه و ياهو ليشوف أنعجب
والمشاعر فقره معضدها حديد
وأنت يم الفقره لتطلع الذهب
وياك ما نصقل بعد لامانعيد
عوفنه ولتكول بنيولي السبب
أحنه ماعدنه جواب لأي سؤال
لأن من شفناك تيهنه الفكره
هم شفت فد يوم كالوا للدلال
شلون متحمل حضن نار الحطب
الدنيا مودنية عشك يبن الحلال
لاتخلينه بمحبتك ننجبر

- لـ جبار رشيد .

يا وردة بنفسج والكَمر نعسان
وعيونك كَمر للصبح كَماري
يا رفة نبض هنيال من حباك
وأندكَلك نذر للصوت ..للطاري
للبسمه التشع بالروح خمس سطوح
تتناثر شعر ..ما توصله أشعاري
لعيونك ..عيونك حيرتي بدنياي
جلت من حورهن قدرة الباري
وكبالي أكعدك عاشك ومعشوك
وأحجيلك بحالي أشصار وأشجاري
وأكاسرلك حناني بطعم خمرة دير
ونسكر الزمن وتلاعب أوتاري
و أغنيلك غنه بهداي

ذكرى استشهاد الشاعر الگبير
عَلي رشّم 2014/11/6
الهُوى يلتمّ عليه منين مٌا ذكروك .

جرب غيري تلگه هواي
بس مثلي سبع بالعشرة ما تلگه
ولك انه علمودك فرطت بالناس ،
و تركت حروف اسمك بالصدر دگه
تقارنّي ببشر ما مشتريك بــروح
و تشيط عيوني تصعد للسما الزرگه
الك يومين مُهلة لهسة باقي الباب
ورا اليومين لو ترجع نبي نطبگـه
ما تعرفني بعدك لو دخلت عناد
اعاند بالهوه ولو اموت ما اشهگه
و هداياك الجبتهن وگفَلِي بالبلعوم
نص انطيتهن و البقـن محترگة
أناشغ و الدموع جنازة امي تگول
واحسها رصاص بيه من اسمع الصفگه