جزء مو قليل من كلفة السوفت وير هي للإدامة، الصيانة، وحل المشاكل الي تطلع أول بأول، مو مجرد تطلع اول نسخة يعني هاهية كلشي انتهى

من تبلش البزنس مالتك vibe coding انت دتوفر شوي فلوس هسة بس راح تدفع اضعافها بعد فترة من تلگة روحك بطريق مسدودة ومضطر تتعامل وي مبرمج لان البزنس مالتك معتمد على السوفت وير الي سويته بالـ ai بشكل چبير

اكو سبب ترة حتى شركة مثل Anthropic (الي مسوية claude code) لحد اليوم تنشر وظائف للمبرمجين 😁

قبل فترة چنت اشتغل على مشروع ولگيت claude opus 4.8 مفلتر الـ api response بالفرونت

احتاجيت اشرحله شي يتعلموه المبرمجين بأول عشر دقايق الهم بالمجال

لو ما قاري الكود وراه چان صارت مصيبة

بنفس الوكت اذا احتياجك بسيط وما يتعامل وي بيانات حساسة مثلاً تريد تسوي landing page للبزنس مالتك تحچي بيها عن خدماتك وتخلي طرق التواصل وياك بدزاين مو كلش معقد فـ اكيد تگدر تسويه vibe coding ماكو مشكلة

الـ ai ممكن يسويلك كلشي تحتاجه او ممكن يكفي كـ بداية وراها من يكبر البزنس مالتك تتعامل وي مبرمج او شركة حتى تسوي التغييرات الي تحتاجها

كل شغل الـ landing pages الي اجاني اخر كم شهر ما اشتغلته ونصحت اصحابه يستعملون وحدة من هاي التولز:

Google AI Studio
Claude Design
Stitch

هذا الكلام بشكل عام، يُفضل تستشير مبرمج قبل ما تاخذ هيچ قرار وتبني الـ infrastructure مالتك بالـ ai، اشرحله شنو طبيعة شغلك وشنو تريد تسوي وخليه يساعدك بالقرار

- الرساله ؛ برأيك هندسة برمجيات بالجامعة الأميركية السليمانية احسن لو هندسة حاسوب بالتكنو

اني برأيي الواحد ما يروح جامعة اساساً

مو انوب يروح للتكنو برضاته

لا اشاقة، معلوماتي عن الجامعات والاقسام بيها مو كلش قوية فـ والله ما افيدكم من تسألوني اسئلة تخص الدراسة اكيد اكو ناس افهم مني يجاوبون

اني اعرف شي واحد بس

FAQ بمناسبة اعلان نتائج السادس

- لا تجي هندسة حاسبات بجامعة بغداد، روح للتكنو او النهرين، بجامعة بغداد القسم تعبان كلش من ناحية البناية والمُختبرات والفعاليات والدكاترة

- مُعدل القسم بحدود الـ ٩٥ يصعد او ينزل شوي حسب السنة

- كلية الهندسة بجامعة بغداد ما بيها مسائي

- اختار اقرب جامعة على بيتك راح تكسب اجر بروحك

- لا تجي هندسة حاسبات بجامعة بغداد

- كونك تتخرج كـ مهندس حاسبات ما يخليك احسن من خريج العلوم لان بالوكت الي انت چنت تدرس بيه ٨٠٪؜ مواد هاردوير ما الها علاقة بالبرمجة هو چان يدرس مواد ١٠٠٪؜ سوفتوير ومتقدم عليك بمراحل، تخلي بالك من البداية تشد حيلك وتاخذ كورسات حتى تگدر تنافس وتحصل شغل

- ما انصح بهندسة الحاسبات بشكل عام، روح علوم حاسبات اذا متأكد ١٠٠٪؜ تريد تشتغل مبرمج او روح هندسة اتصالات اذا تريد حل وسط بين الشغل بالبرمجة او الهندسة، شغل الاتصالات بالعراق جيد ويطلبون بيه دائماً مهندس اتصالات، واذا تخرجت كـ مهندس اتصالات وبعدك تحب البرمجة فـ انت بعدك مهندس و قسم tech وفرصتك بالبرمجة كلش زينة

- اني مو احسن شخص يحچي عن الدراسة فـ من تسألوني على مصادر وملازم مو كلش افيدكم، بس اذا تحتاجون شي يخص الشغل فـ عدكم هاي القناة واساعدكم بـ الي اعرفه ان شاء الله

- لا تجي هندسة حاسبات بجامعة بغداد

هاي احسن نصيحة ممكن اقدمها لأي احد