Bilaluna Edris

በረሃማዋ ዱባይ በ75 ዓመት ውስጥ አስተናግዳው አታውቅም የተባለ ዝናብ ባስከተለው ጎርፍ ተጥለቀለቀች።

የተባበሩት ዐረብ ኤምሬቶች መዲና የሆነችው ዱባይ ባለፉት 75 ዓመታት ካስመዘገበችው ከፍተኛ የተባለ የዝናብ መጠን ከሰኞ እኩለ ሌሊት ጀምሮ አስተግዳ በጎርፍ ተጥለቅልቃለች። በዱባይ የተመዘገበው ከፍተኛ የዝናብ መጠን የዐረብ ባህር ገብ መሬቶችንም ጭምር በማካለል ለሰው ነፍስ መቀጠፍና ለንብረት ውድመት ምክንያት ሆኗል።

ከሥፍራው የወጡ መረጃዎች እንደሚያመለክቱት፣ በተለይ ዱባይ ከተማ በጎርፍ መጥለቅለቋን ተከትሎ የእለት ተእለት እንቅስቃሴ ተስተጓጉሎ የአውሮፕላን በረራዎችም እንዲዘገዩ ተደርጓል።

ከሰኞ እኩለ ሌሊት እስከ ትላንት ማክሰኞ አመሻሽ በዱባይ የተመዘገበው የዝናብ መጠን ከዚህ ቀደም ከተማዋ በአንድ ዓመት ከመንፈቅ ጊዜ የምታስተናግደው መሆኑንም የሜትሮሎጂ ባለሞያዎች ገልፀዋል።

በዱባይ ከተማ ዝናብ ያስከተለው ጎርፍ መኖሪያ ቤቶችንና የገበያ ማዕከላትን በማጥለቅለቅ ትምህርት ቤቶችም ዝግ እንዲሆኑ አስገድዷል። በከተማዋ ውስጥ የሚገኙት ታዋቂዎቹ የገበያ ማዕከላት ዱባይ ሞል እና ሞል ኦፍ ኤምሬትስም ከጎርፉ መጥለቅለቅ አልተረፉም። የከተማዋ ማዘጋጃ ቤት የአደጋ ጊዜ ተሽከርካሪዎችን በማሰማራት ጎርፉን ለማስመጠጥ ሙከራ ሲያደርግ፣ የኤምሬቶች ብሔራዊ የሜትሮሎጂ ማዕከል የዱባይ ነዋሪዎችን በቻላችሁት አቅም ሁሉ እራሳችሁን በጎርፉ ከተጥለቀለቁ አካባቢዎች አርቁ የሚል የአደጋ ጊዜ ማስጠንቀቂያ መልዕክት አስተላልፏል።

የተመዘገበው ከፍተኛ የዝናብ መጠን እንደ ዱባይ ባይሆንም በአካባቢው የሚገኙትን ባህሬን፣ ኦማን፣ ኳታር እና ሳዑዲ ዐረቢያንም አዳርሷል። የፈረንሳዩ የዜና ወኪል አዣንስ ፍራንስ ፕሬስ በኦማን የ18 ሰዎች ሕይወት መቀጠፉን ዘግቧል። ጎርፉ ሕይወታቸውን ከተጠቃቸው ውስጥ 10 ሕፃናት ይገኙበታል።

በተባበሩት ዐረብ ኤምሬቶችና በዐረብ ባህር ገብ ሀገራት ለተመዘገው ከፍተኛ የዝናብ መጠን የአየር ንብረት ለውጥ በምክንያትነት ተጠቅሷል። ለዚህ የአየር ንብረት ለውጥ መነሻ ነው የሚባሉት ሰው ሰራሽ ችግሮች መሆናቸውን ባለሞያዎች ያነሳሉ።

በጎርፍ ከተጠቁት መካከል በበረሃማዋ ዱባይ ከፍተኛ መጠን ያለው ዝናብ የተለመደ ባለመሆኑ ለጎርፍ መውረጃ የሚያገለግል ቦይ በሥፋት ቀድሞ ስላልተገነባ አደጋውን አስከፊ እንዳደረገው ተነግሯል።

@ https://t.me/Xuqal